Pêng-bîn ê Ki-tok-toān/Tē VI Koàn/Tē-8 chiuⁿ

Tē-8 chiuⁿ: KOK-KOK-THAⁿ

I chiū lóng bô tí-khòng hō͘ in ián-tó Tī hit ê o͘-sek, chho͘-chho͘ ê Si̍p-jī-kè ê téng-bīn. Iā in chiū ēng tōa ki ê thih-teng chin chân-jím lâi tèng thàng -kè I ê chhiú kap kha. Āu-lâi in chiū saⁿ-kap chhut-la̍t chiong Si̍p-jī-kè ián khiā--khí-lâi, sòa kā i lok lo̍h-khì thô͘-khang, hit-sî I ê sîn-keng, I ê kun-beh ū siū-tio̍h chân-jím ê chhì-kek, thàng-thiàⁿ kàu beh piak-li̍h. Siōng-tè ê Sèng-kiáⁿ ū tiàm tī chit ê thang chhiⁿ-chhìn ê thàng-thiàⁿ ê chōng-hóng, bīn n̂g thâu-chêng lâi khòaⁿ hit ê bí-lĒ ê siâⁿ, chiū-sī pek I chhut siâⁿ-gōa lâi tú-tio̍h hāi-sí ê, iā tī i ê kha-Ē ū peng-teng teh iô tâu(**tāu)-á lâi pun I ê saⁿ, koh ū chè-si khn̂g chân-jím ê sim lâi hoaⁿ-hí in ū tek-sèng, iū-koh tī hit ê choeh-kî sī chū-chi̍p ê lâng ū kui tōa-tīn chhut-lâi siâⁿ-gōa chhin-chhiūⁿ beh khòaⁿ hì chi̍t-poaⁿ. Choân sè-kài ta̍k hong-bīn ê lâng ū chū-chi̍p tī i ê bīn-chêng, chit ê sè-kài chiū-sī I sī beh thòe i sí ê sè-kài.

"Iā sè-kan m̄-bat I." Ū chi̍t ji̍t chit ê sè-kan tek khak beh bat I, koh Sī beh bat hit ê choân ì-gī. Keng-kè sò͘ sè-kí ê tiong-kan, hit ê thang kiaⁿ-hiâⁿ ê o͘-sek ê Si̍p-jī-kè, chiū-sī bōe thang kóng-khí ê kiàn-siàu kap bú-jio̍k ê kì-hō ê, ū piàn-chiâⁿ jîn-lūi su-sióng tiong chi̍t ê tē-it ko-siōng ê kì-hō, lâi piáu-bêng Siōng-tè ê hi-seng.

"Chèng-lâng ū khiā tī-hia teh khòaⁿ." Ah, lán tio̍h kong-tō lâi sím-phòaⁿ hiah ê chèng-lâng! Si̍t-chāi to m̄-sī it-poaⁿ ê bîn-chiòng teh òan-hūn Iâ-so͘. Lán to m̄-sī choân-jiân pháiⁿ. Iâ-so͘ ū sìn-iōng lán. I chai lán sī ōe kham-tit hō͘ I lâi ūi-tio̍h lán pàng-sak I pún-sin. siat-sú nā-sī chiàu chōe-chōe lâng sī teh kóng ê khoán, lán sī kàu-ke̍k ê hú-pāi, lán chiū bōe kham-tit thang sêng-siū I ê kiù-un. Lán ū thiaⁿ-kìⁿ lâng kóng, lán Sī bōe thang sìn-iōng lán lâng ū sím-mi̍h hó ê pún-lêng. Chhin-chhiūⁿ tī Khái-sôan ê An-hioh-ji̍t hit ê hêng-lia̍t ê sî, ū kui tōa-tīn ê lâng lóng teh hoaⁿ-hí, âu-kiò hoah Hô-sàn-ná, chóng-sī siāng hiah ê lâng tī āu-lâi sòa âu-kiò kóng, Tio̍h tèng I tī Si̍p-jī-kè! Bo̍k-tit sìn I! TĪ Iâ-lō͘-sat-léng siū chè-si sī ap-pek hiah ê jia̍t-kông ê gû-bîn Sī bōe thang tāi-piáu it-poaⁿ ê bîn-chiòng khóng-khài ê sim-chêng. It-poaⁿ ê bîn-chiòng sui-Sī bô lóng tè I, mā lóng ū khim-gióng I, iòng(**ióng)-hō͘ I, koh mā bô iông-ún Hoat-lī-sài lâng kan-ok ê chhiú lâi kha̍p-tio̍h I. Siōng-tè sī chám-jiân iáu ū tōa ê kám-tōng-la̍t tī lán jîn-lūi ê sim-lāi. Tī kûn-chiòng ê tiong-kan, ū kui tōa-tīn tùi Ka-lī-lī lâi ê lâng tī-teh, in ê sim-lāi ū kan-khó͘, in-ūi iáu-kú ōe kì-tit chá-chêng tī Ka-pek-lông hit ê khòai-lo̍k ê ji̍t-chí. Iā ū tùi thong thiⁿ-ē chū-chi̍p lâi ê chhim-tîm ê chhut-gōa lâng tī-teh, tī tiap-á-kú ê tiong-kan, I ū thê-ko in ê su-sióng; koh ū Lô-má ê chhian-chóng tī-teh, in ū lia̍h I sī Siōng-tè ê chi̍t ê Kiáⁿ. Koh ū Iâ-lō͘-sat-léng ê hū-jîn-lâng ūi-tio̍h I lâu ba̍k-sái, ai-siong. Iā ū kui-tīn lâng tûi-heng tńg-khì; iā I sī chhim-bat ê ha̍k-seng khòaⁿ-liáu chū-jiân sī koh khah siong-sim. Iâ-so͘ tiàm-tī hit ê kan-khó͘ ê sî, to m̄-sī choân-jiân siū sè-kan lâng pàng-sak.

Chóng-sī hit ji̍t Kok-kok-thaⁿ ê kûn-chiòng ū tāi-piáu choân sè-kài ta̍k kai-kip ê lâng sī teh khoán-thāi Ki-tok ê thài-tō͘, iā tī hit tiong-kan iā ū khn̂g phian-kiàn, thòng-hūn ê tùi-te̍k tī-teh, iā Hok-im-su tù-chiá chin siong-sim lâi te̍k-pia̍t piáu-hiān in. Chèng-lâng lóng ū thòng-mĒ I, ki-chhì I, iā phah-chhiú léng-chhiò I, iā kóng I lâi tam-tng chit ê ūn-miā sī eng-kai; koh chè-si, Hoat-lī-sài í-ki̍p Ιû-thài lâng ê pō-tô͘ saⁿ-kap teh âu-kiò. "Lí nā-sī Siōng-tè ê Kiáⁿ, taⁿ tio̍h tùi Si̍p-jī-kè lo̍h-lâi. Lí chòe Ki-tok, chòe Í-sek-lia̍t ê Ông, taⁿ tio̍h lo̍h-lâi, hō͘ goán thang sìn! I bat kiù pa̍t-lâng, iā bōe-ōe kiù ka-kī!"

I ū thiaⁿ-kìⁿ, iā ū bêng-pe̍k hit ê ōe. I sī bōe-ōe, iā-sī m̄ eng-kai kiù I pún-sin. Chóng-sī I ê sim ū ūi-tio̍h hiah ê teh hí-lāng ki-chhì ê lâng lâi siong-sim. I teh-beh lîm-chiong kan-khó͘ ê sî, mā lóng bô teh su-sióng ka-kī ê sū, chí-ū teh siūⁿ in ū khiā-khí tī iá-phí, pāi-hōai kap chōe-ok ê seng-oa̍h. Chòe-āu I chiū bōe-thang koh tiām-tiām, I chiū bô koh khòaⁿ in só͘ tiàm tī chōe-ok ê seng-oa̍h ê lâng, ēng sìn-khò ê sim lâi o̍at n̂g chì-tōa ê PĒ, chiū-sī chhòng-chō in ê, lâi kî-tó.

"PĒ ah, sià-bián in, in-ūi in sī chòe ê, in m̄-chai!"

Chhì-siūⁿ chit kù ū cháiⁿ-iūⁿ khé-sī Siōng-tè ê sim-pak! I sī kàu-gia̍h úi-tāi, tiāⁿ-tio̍h Sī bô khn̂g òan-tò͘ ê sim. I bô siū-khì in, hoán-tńg sī thòe in khòa-lū, hôan-ló, chiū-sī khòa-lū in kiaⁿ-liáu ōe pìⁿ-chòe pí in si̍t-chāi ê khoán koh khah pháiⁿ. Chhì-siūⁿ beh lîm-chiong chit ê Iâ-so͘, I ê sim ū khóng-khài kàu cháiⁿ-iūⁿ! I si̍t-chāi ū chhut-la̍t teh chhē khòaⁿ ū sím-mi̍h hoat-tō͘ thang thòe in piān-kái. I m̄-sī kan-ta sià-bián in, á-sī kan-ta thòe in kî-tó nā-tiāⁿ, hoán-tńg si̍t-chāi ū chhut-la̍t teh chhē khòaⁿ ū sím-mi̍h ōe, thang thòe in piān-bêng. Lán khiok-Sī bô lōa-chōe hāng hó thang hō͘ I lâi kóng-khí, chóng-sī I ū chhē, koh ū kóng-khí i. I chai in ū phian-kiàn, ū siū hit hō kàu-io̍k, iā tùi I ê sū gû-gōng tī-teh. Iáu-kú in sī m̄-chai in sī teh chòe ê, siat-sú in nā chai, in ún-tàng bô beh án-ni chòe. PĒ ah! Sià-bián in!

Lán lóng tio̍h khiā tī Siōng-tè sím-phòaⁿ ê kong-chō chêng. Chóng-sī lán tio̍h tām-po̍h ōe kì-tit lâi siàu-liām I, in-ūi liân in, I to goân-chêng in lâi kóng chit ê ōe: "GOán sìn lí beh lâi chòe goán ê sím-phòaⁿ si."

In ún-tàng Sī bô thiaⁿ-kìⁿ I ê ōe. Hiah ê ki-chhì ê lâng nā ū thiaⁿ-kìⁿ, ún-tàng tòng-bōe-tiâu. Tī hit ê soan-jióng, thí-chhiò kap hì-lāng ê jia̍t-nāu ê tiong-kan, chí-ū hiah ê tē-it chiap-kūn Si̍p-jī-kè kha ê lâng chiah ōe thiaⁿ-kìⁿ I ê ōe.

Chì-chió ū chi̍t lâng ū thiaⁿ-tio̍h. Hit ê lâng sī ēng gông-ngia̍h, chhiⁿ-kiaⁿ ê liām-thâu lâi thiaⁿ i. Chiàu khòaⁿ hit kù ōe ū kám-tōng-tio̍h i kú-kú (**thiām)-chēng ê sim-chêng, iā chit ê kám-tōng sī chū-sè Sī bē-bat tùi lāu-bú lâi siū-tio̍h ê. "Hit-sî ū nn̄g ê hōan-lâng kap I tâng tèng tī Si̍p-jī-kè. Chi̍t ê Tī chiàⁿ-pêng, chi̍t ê tī tò-pêng." Khí-chho͘ hit nn̄g ê hōan-lâng lóng ū léng-chhiò chit ê "Bí-sài-a." In mā-sī siūⁿ kóng, Bí-sài-a nā m̄-Sī beh gia̍h to lâi cheng-chiàn, Sī bô sím-mi̍h lō͘-ēng. "lí nā-sī bí-sài-a, sī tio̍h kiù ka-kī kap goán." Hit-sî tâng tèng ê chi̍t ê ū ná tiām--khì. Lán thang sióng-siōng, i ū hián-chhut hiong-ok, goân-kò͘, siū-khì ê bīn, lâi chù-ba̍k khòaⁿ chèng-lâng, iā ū ūi-tio̍h pún-sin ê kan-khó͘ lâi chhau-sim, tì-kàu bōe kò͘-tit siūⁿ iáu hit ê Iâ-so͘ ê kan-khó͘. Āu-lâi hit ê ióng-kám, (**thiām)-chēng ê koân-ui ū kám-tōng i ê sim. Iâ-so͘ ê khip-ín-la̍t ū chhui-pek i, chiū siⁿ-chhut put-an ê liām-thâu, sòa ka-kī kiàn-siàu, iā ū kiàn-siàu hiah ê bô tám-liōng ê kûn-chiòng, ū cháiⁿ-iūⁿ teh thí-chhiò chit ê bô lâng thang hû-chō͘ ê lâng.

Jiân-āu Iâ-so͘ chiū khui-chhùi kóng-ōe, iā hit ê chha̍t ū chù-ì thiaⁿ I, in-ūi Iâ-so͘ lóng bô kiò kan-khó͘, á-só͘ kóng chiù-chó͘ ê ōe, chiū-sī i pún-sin sī khòai-khòai kóng ê, hoán-tńg só͘ kóng, "In m̄-chai in sī chòe ê. PĒ ah, sià-bián in!" Chhiáⁿ khòaⁿ! Tī chit sî ū hoat-seng chit ê sîn-jiah. Tī tiap-á-kú ê tiong-kan, hit ê lâng ū piàn-ōaⁿ i ê sim-koaⁿ, hut-jiân hoán-hóe i ê chōe! Ki-tok súi ê jîn-keh tī tiap-á-kú ê tiong-kan, ūi-tio̍h i sī chòe ê, chiū-sī Lô-má tè-kok ê kiù-Tī hoat-lu̍t tī kú-kú sī chòe liáu sit-pāi ê, chiū-sī ū kiò-chhíⁿ i ê sim, hō͘ i siⁿ-khí, á-sī him-bō͘ hó ê liām-thâu, iā iu-būn i kè-khì ê sī-chòe, sòa tām-po̍h hián-chhut him-bō͘ súi, lí-sióng ê seng-oa̍h ê iáⁿ-jiah. Chit ê chha̍t koh ēng kiaⁿ-hiâⁿ kap kám-thàn ê sim lâi khòaⁿ chit ê sîn-biāu ê Bí-sài-a, chiū-sī ūi-tio̍h chū-chheng sī Siōng-tè ê Kiáⁿ lâi siū tèng ê. Chit ê Iâ-lō͘-sat-léng ê hōan-lâng, ún-tàng bat thiaⁿ-kìⁿ lâng teh kóng-khí I ê chú-tiuⁿ kap I ê Sèng-kok ê sū. Ūi-tio̍h chit ê in-toaⁿ, in chiah ài beh thâi I. I sī chī-chūi? Tàu-tí chit ê Sîn-biāu ê Lâng sī chī-chūi? I sī sím-mi̍h?

I ê tâng-phōaⁿ chiū koh kap chèng-lâng saⁿ-kap mĒ Iâ-so͘. Bo̍k-kòai, tī i ê bīn-chêng to lóng sī hit khoán ê lâng teh chòe i ê bô͘-iūⁿ. Chiū-sī thâu-mn̂g lóng pe̍h ê chè-si, ū phok-ha̍k ê keng-ha̍k-sū, koh mā ū khó kèng ê lu̍t-hoat phok-sū tī-teh. Bo̍k-kòai i iā sī ài mĒ I. Chóng-sī hit ê hiong-ok, (**thiām)-chēng ê pêng-iú thiaⁿ-liáu chiū tòng-bōe-tiâu. "lí kì-jiân tâng siū chōe, liân Siōng-tè iā m̄-kiaⁿ mah? Lán siū chōe sī kong-tō. In-ūi lán sī siū ê pò-èng, sī ha̍p tī lán ê sī kiâⁿ. Chóng-sī chit ê Lâng sī kiâⁿ ê, bô chi̍t hāng m̄-tio̍h!"

Lán khó-lîn ê jîn-sèng, tùi tī kap Ki-tok saⁿ-kap kau-thong, chiū ōe chiap-chhiok-tio̍h súi ê sè-kài, chhì-siūⁿ hit ê khó-lêng-sèng ū tōa kàu cháiⁿ-iūⁿ! I tùi chiap-tio̍h Ki-tok ê kám-hòa, chiū siⁿ-chhut khîm-gióng, hoán-hóe, khiam-pi ê sim, āu-lâi chiū siū-khì, bô kò͘-tio̍h ka-kī, lâi iòng(**ióng)-hō͘ Tī i ê sin-piⁿ teh siū-khó͘ hit ê Lâng, iā jiân-āu ū it-hoat chìn-pō͘ lâi siⁿ-chhut sìn-gióng ê kî-īⁿ ê pún-lêng, khak-sìn Iâ-so͘ m̄-sī chi̍t ê phó͘-thong lâng nā-tiāⁿ. Chit ê chha̍t ū kan-khó͘ kàu beh hūn--khì. I sí ê sî-kan ū ti̍t-ti̍t pek-óa, iā sí ê ì-sù sī sím-mi̍h, kiám-chhái sī bô ì-sek--khì, á-sī kui tī o͘-iú--khì, i m̄-chai. Só͘-í ū tùi hit ê chin chhiⁿ-kiaⁿ ê sim-lāi hoat-chhut sit-bāng ê siaⁿ âu-kiò kóng, "Iâ-so͘ ah, lí tī lí ê kok lâi ê sî tio̍h ōe kì-tit góa!"

Hit-sî Iâ-so͘ chiū tông-chêng chit ê khó-lîn ê lâng, i chiū-sī Iâ-so͘ ūi-tio̍h sè-kan lâng sí, sī kiat ê thâu chi̍t-lia̍p ké-chí. Iâ-so͘ sī oh-tit o̍at-thâu kè-khì khòaⁿ i. Iā I ê chi̍h kàu-gia̍h chhùi-ta, kàu bōe thang kóng-khí sím-mi̍h. Chóng-sī tī chit ê teh-beh lîm-chiong ê Ki-tok, sī ìn ê ōe, sī ū hián-chhut Kun-ông ê ui-giâm tī-teh. "Góa si̍t-chāi kā lí kóng, Kin-á-ji̍t lí beh kap góa Tī lo̍k-hn̂g."

Chhin-chhiūⁿ án-ni, chit ê khó-lîn ê chha̍t, ū tit-tio̍h chōe ê sià-bián ê keng-giām, sim-lāi pêng-an, iā ū tit-tio̍h iok-sok thang hióng-siū sí-āu hit pêng ê oa̍h-miā. Lūn hit pêng ê sū, chí-ū Iâ-so͘ chai-iáⁿ. Iā siat-sú lán beh lâi kóng I ê ì-sù, tāi-khài tām-po̍h thang kóng sī án-ni. "Kin-àm lán ê sin-si tiàu tī Si̍p-jī-kè téng ê sî, lí kap góa beh saⁿ-kap kàu tī sí-lâng sī-khì ê sè-kài, iā tī-hia lán iû-goân ōe saⁿ-kap sio-jīn, oán-jiân chhin-chhiūⁿ kin-chá-khí saⁿ-kap tiàu tī Si̍p-jī-kè, lán chit nn̄g lâng chi̍t-poaⁿ-iūⁿ." Kè saⁿ-tiám cheng āu, chit ê Iâ-so͘ chiū-sī hit-pêng ê sè-kài ê Chú, ū kè-khì tī hit-pêng, lâi thèng-hāu chit ê teh-beh sí ê chha̍t.

I í-keng ū khui-chhùi kóng-ōe nn̄g pái. Thâu-chi̍t pái sī chhin-chhiūⁿ Chè-si, iā bē-bat ū khòaⁿ-kìⁿ chè-si chhin-chhiūⁿ I hiah-ni̍h khóng-khài, lâi ūi-tio̍h hiah ê chèng-lâng, chiū-sī chhui-pek I kàu tī sí ê tōe-pō͘ ê, lâi chòe in ê tiong-pó thòe in kî-tó. Āu-lâi koh chi̍t-pái sī chòe chhin-chhiūⁿ Kun-ông kóng-chhut chin-chiàⁿ ū koân-pèng ê ōe lâi iok-sok, beh hō͘ hit ê khó-lîn ê chha̍t thang ū hūn tī i ê Ông-kok. Iā chit-pái lán ū koh thiaⁿ-tio̍h I ê siaⁿ, khiok m̄-sī chhin-chhiūⁿ Chè-si, mā m̄-sī chhin-chhiūⁿ Kun-ông, to̍k-to̍k sī chhin-chhiūⁿ Jîn-chú tī teh-beh lîm-chiong ê sî, lâi siàu-liām I ê lāu-bú, í-ki̍p I ê pêng-iú, iā ū tùi in chīn chòe lâng ê pún-hūn.

Hit-sî tú-tú thàu-tiong-tàu, ji̍t-thâu chin iām. Hit ê saⁿ-tiám cheng-kú ê thòng-khó͘, sī í-keng kè-liáu. Koh chèng-lâng ê hán-hōa, iā-sī soah-liáu. Chèng-lâng taⁿ lóng ià-siān, bô ài khòaⁿ hit ê hì-chhut-khoán ê chêng-kéng, tāi-ke sì-sòaⁿ khì tī-chia, tī-hia ê soaⁿ-bé-liu. Tī Si̍p-jī-kè piⁿ pō͘-peng khiā-teh, in mā hō͘ ji̍t-thâu pha̍k kàu chin kan-khó͘, koh ū in ê chhian-chóng sī chhin-chhiūⁿ tâng-siōng, khiâ tī i ê bé-téng. In mā-sī bô iàu-kín hiah ê sòe-sòe ê thôan-thé, chiū-sī "hn̄g-hn̄g teh khiā ê," kiâⁿ óa lâi chòe-āu khòaⁿ kàu in ê pêng-iú ê lîm-chiong.

Chhin-chhiūⁿ án-ni, "khiā tī iâ-so͘ ê Si̍p-jī-kè piⁿ, ū I ê lāu-bú," kap I kúi-nā ê pêng-iú. I ê lāu-bú lóng bô koan-sim tī lâng ê lóe-mĒ, thí-chhiò, mā bô beh khòaⁿ hiah ê teh kè-khì ê chong-giâm ê lia̍p-pí. I sī Iâ-so͘ ê lāu-bú, chit-tia̍p Sī bô lâng thang chó͘-tòng m̄ hō͘ i óa lâi I ê sin-piⁿ. Sui-jiân Má-lī-a sī bōe-thang chhit I ê thâu-hia̍h, á-sī lâi liâng I jia̍t hōng-hōng ê chhùi-chi̍h, iáu-kú chāi Má-lī-a tī tōe-bīn-chiūⁿ tû-khí kūn-óa I ê sin-piⁿ í-gōa, Sī bô ū ùi-an ê só͘-chāi. Má-lī-a ū tiàm tī hit ê bōe lâu ba̍k-sái ê khó͘-kéng, I sī siong-sim ê lāu-bú, ū "lāi ê kiàm chha̍k thàng i ê sim-koaⁿ," i ê choan cheng-sîn sī kàu-gia̍h chhám-chhoeh lâi khòaⁿ Iâ-so͘ ê bīn-māu, chiū-sī tiàu tī i ê téng-bīn ê. I sī bí-sài-a. I sī i ê Chú. Sui-jiân hit ê ò-biāu, i bōe lí-kái, iáu-kú i bô bōe kì-tit. chóng-sī m̄-sī kan-ta án-ni nā-tiāⁿ, chit-tia̍p I sī i ê Kiáⁿ; sī i ê Âng-eⁿ-á, chiū-sī í-chêng bat hō͘ i phō Tī heng-chêng ê; sī Ná-sat-le̍k kang-tiûⁿ ê ū chhong-bêng, ióng-kám ê Gín-ná; sī chi̍t ê Chheng-liân, chiū-sī tùi i ê tiōng-hu kè-sin liáu-āu, ū ūi-tio̍h i lâi chòe ba̍k hōng-ióng i ê.

Tùi án-ni, Má-lī-a chin kan-khó͘ khòaⁿ I. SĪ lah. Tû-khí Iâ-so͘ í-gōa bô pa̍t-lâng thang koh khah liáu-kái hit ê chêng-hêng. Iâ-so͘ siū-khó͘ ê chòe-ko-tiám sī teh pek-óa, só͘-í chit-tia̍p Sī bōe-thang iông-ún Má-lī-a lâi tī-hia khòaⁿ-kìⁿ hit ê sū. Sui-jiân chit-tia̍p I só͘ tiàm tī kan-khó͘ ê tiong-kan, iā sui-jiân put-chí teh su-sióng sè-kài ê chín-kiù kap sī teh-beh kàu ê êng-kng ê tiong-kan, I mā bô ūi-tio̍h án-ni sòa bô sim-chiâⁿ thang siàu-liām I ê chiú-kóaⁿ lāu-bú. Tng I beh lîm-chiong ê sî, I ū chù-sîn lâi khòaⁿ Tī hit ê sió thôan-thé tiong nn̄g ê lâng, chiū-sī siⁿ I ê lāu-bú, kap I ê tâng-phōaⁿ, chiū-sī tī i iáu o̍ah-teh, kap teh-beh sí ê sî, chòe tōe-it chhin-kūn tī i ê sin-piⁿ ê.

"Lāu-bú ah, khòaⁿ lí ê kiáⁿ! Kiáⁿ ah, khòaⁿ lí ê lāu-bú!" "Tùi hit-sî hit ê ha̍k-seng chih-chiap i kàu ka-kī ê ke."

Chhin-chhiūⁿ án-ni, I chiū ēng un-jiû, thiàⁿ-thàng, sió-sim ê thài-tō͘ lâi chòe-āu pàng-sak tōe-bīn-chiūⁿ ê koan-hē, iā ka-kī chi̍t lâng lâi tí-tng Sī beh kàu hit ê chhim-khok thang kiaⁿ-hiâⁿ ê keng-giām. Lán ê su-sióng Sī bōe-thang liáu-kái, á-sī siat-sióng koh kè-lâi hit saⁿ-tiám cheng kú thang chhiⁿ-kiaⁿ ê sū. Tī hit-sî put-tān I ê jio̍k-thé ū siū-tio̍h thang chhi-chhìn ê khó͘-thàng, chiū-sī ū ke thiⁿ keng-giām-tio̍h sîn-biāu ê cheng-sîn-chiūⁿ ê tò͘-cheng, bōe-thang kóng-chhut ê chhiⁿ-chhám. Tī hit-sî piàn-tōe siū o͘-àm sī jia-khàm, che sī ha̍p-gî. Hit ji̍t ê o͘-àm kiàm-chhái sī tōe-tāng beh kàu ê í-chêng sī ū ê hiān-siōng. Koh ū chin-chōe pe̍k-sek ê hûn-bū lâi khàm-ba̍t hit ê chêng-kéng, tì-kàu Ka-ná-soaⁿ ê gōa-hêng, Iâ-lō͘-sat-léng ê thah kap îⁿ-chhù-kòa sòa iā chiām-chiām bô bêng--khì, bô khòaⁿ-kìⁿ. "Tùi ji̍t-tàu khí, kàu saⁿ-tiám cheng, piàn-tōe o͘-àm!"

Che kiám-sī chi̍t chéng ê kì-hō, teh piáu-bêng Siōng-tè bô hóaⁿhi mah? Che kiám-sī chū-jiân kài iā teh piáu-sī hoán-khòng hit ji̍t ê chōe-ok mah? In-ūi sè-kan lâng ū án-ni mah? Che kiám-sī chi̍t chéng chun-kùi ê pò͘-lī beh jia-khàm hit ê ò-biāu ê cheng-chiàn mah? Che kiám-sī chi̍t chéng ê liông-sim chòe-āu beh lâi kiò-chhíⁿ hit ê siâⁿ-ni̍h ê peh-sìⁿ mah? Hit-sî piàn-tōe ū o͘-àm!

I tiàm tī hit ê chhi-chhám ê gûi-ki, bô chi̍t lâng ū khòaⁿ-kìⁿ I. Lán ū thiaⁿ-kìⁿ kóng, hit ê o͘-àm ê saⁿ-tiám cheng sī (**thiām)-chēng ê saⁿ-tiám cheng. I iáu-bē lîm-chiong ê í-chêng, ū ēng hit ê âu-kiò ê siaⁿ lâi phah-phòa hit ê (**thiām)-chēng ê sî-kan, iā lán tùi hit ê âu-kiò ê siaⁿ-im, thang chai I ū cháiⁿ-iūⁿ keng-kè hit ê o͘-àm ê sî-kan. Hit ê âu-kiò ê siaⁿ ū tōa-tōa ìn-siōng tī Si̍p-jī-kè kha teh khòaⁿ ê lâng ê sim. Siāng thâu hit nn̄g pún Hok-im-su ū pó-chûn I tī Si̍p-jī-kè téng só͘ kóng ê, chí-ū sī chit kù ōe nā-tiāⁿ. Hok-im-su ū kì-chài tú-tú I só͘ kóng-chhut ê ōe tī-teh, oán-jiân chhin-chhiūⁿ teh piáu-bêng thèng-chiòng koat-toàn ê tò͘-cheng liáu-āu, I chiah tōa-siaⁿ âu-kiò, hián-chhut hit ê bōe-thang hêng-iông-tit ê tháu-pàng ê ōe. "Chha-put-to saⁿ-tiám, Iâ-so͘ ū tōa-siaⁿ âu-kiò kóng, Í-lī, Í-lī, Lia̍p-má-sat-po̍k-tāi-nî, chiū-sī kóng, Góa ê Siōng-tè! góa ê Siōng-tè! Lí siáⁿ-sū pàng-lī góa."

Hok-im-su tù-chiá ū kì-chài chit ê âu-kiò ê ōe, khòaⁿ-chòe sī Ki-tok beh lîm-chiong ê sî, só͘ kóng chòe-āu ê ōe, chhì-siūⁿ Hok-im-su ê hó-táⁿ ū khak-sìn, sêng-si̍t kàu cháiⁿ-iūⁿ! Bo̍k-kòai hiah ê bô sìn-gióng ê lâng sī ài chù-tiōng chit-kù. Chiàu in teh siūⁿ chit ê ko-siōng siàu-liân ê jia̍t-sim-ka chòe-āu ū khòaⁿ-chhut I ê chhò-gō͘. I ū ūi-tio̍h ko-siōng ê lí-sióng lâi hi-seng it-chhè. I sī ǹg-bāng Siōng-tè ōe sêng-jīn I. Chóng-sī chit ê bōe tô-siám-tit ê sí ū tùi I piáu-sī I ê chhò-gō͘, iā chòe-āu I sī âu-kiò hit ê thang chhiⁿ-kiaⁿ ê ōe, thang kóng sī sit-bāng kap kái-bê ê âu-kiò. Siōng-tè ū pàng-sak I lah. I sī chòe hit ê hián-hek ê chū-kí hi-seng sǹg-sī kui tī khang-khang lah. M̄-sī lah, I m̄-sī Ki-tok lah.

Lán sī chī-chūi ōe-thang liáu-kái chit ê Chì-kôaiⁿ ê ê chhim-ò ê pì-koat mah? Lán chai chit ê siū-tèng ê chiū-sī Siōng-tè éng-oán ê Kiáⁿ. Siat-sú lán Ēng kèng-khiân ê liām-thâu ài chhui-chhek hit ê ì-sù, lán sī chí-ū tio̍h ài tit-tio̍h chi̍t tiâu lō͘, chiah thang liáu-kái hit ê ò-biāu, iā hit tiâu lō͘ chiū-sī kóng, I sī Siōng-tè beh lâi tam-tng sè-kan lâng ê chōe. Lán Sī bōe-thang soat-bêng hit ê ì-gī tú-tú siáⁿ-khoán. Lūn Ki-tok ê sio̍k-chōe ê ha̍k-soat, lán kiám-chhái ū koh-iūⁿ ê ì-kiàn tī-teh, chóng-sī lán chì-chió thang sìn, "Siōng-tè ū hō͘ hit ê bô chōe ê, thòe lán chiâⁿ-chòe chōe;" iā sìn, "I tī chhâ-ni̍h chhin-sin tam-tng lán ê chōe Tī i ê sin-khu;" koh sìn, "I in-ūi lán ê chōe lâi siū khó͘-chhó͘, I in-ūi lán ê kè-sit lâi siū thàng-thiàⁿ, I siū hêng-ho̍at, lán tit-tio̍h an-jiân, I siū phah, lán ōe i-hó."

Tī hit ê thang chhiⁿ-kiaⁿ saⁿ-tiám cheng kú ê tò͘-cheng ê pì-koat sī chāi tī chit tiám, chiū-sī I ū hiàn pún-sin lâi lim chit ê khó͘-poe; iā chit ê poe, I tī Khek-se-má-nî hn̂g ū kiû kóng, nā ōe chòe-tit, sī ài lī-khui I.

Í-siōng iáu-ū sím-mi̍h khah chhim ê ì-sù, lán khiok m̄-káⁿ siat-sióng. Lán chì-chió sī chai I ū ūi-tio̍h lán, lâi tam-tng chit pái tú-tio̍h pàng-sak ê kan-khó͘.

Hit ê chòe-ko ê cheng-sîn-chiūⁿ ê tò͘-cheng kèng-jiân kè-liáu, hit-sî I ê jio̍k-thé ū him-bō͘ ài lim chúi. Che sī chi̍t chéng ê kì-hō, piáu-bêng I ê sim-sîn taⁿ sī í-keng ū pêng-an. Chhin-chhiūⁿ I tī Siū-chhì hit ê thang chhiⁿ-chhìn ê sì-cha̍p-ji̍t ê tiong-kan, I sī m̄-bat siūⁿ ài beh chia̍h, chóng-sī kàu tī kín-tiuⁿ ê cheng-sîn kè-khì liáu-āu hit-sî, "I chiū chai iau." Chit-tia̍p iā-sī chhin-chhiūⁿ án-ni. I chin-chiàⁿ sī chiàu lâng ê khoán! I ū sêng-si̍t sìn-iōng hiah ê chho͘-iá ê Lô-má peng, chai-iáⁿ in goân-lâi iā-sī ōe hiáu kiâⁿ chhin-chhiat ê hêng-ûi, chhì-siūⁿ chit hō ê sim-chêng si̍t-chāi sī súi kàu cháiⁿ-iūⁿ! I ū tùi in kóng, "Góa chhùi-ta." In chiū chek-sî chiong ùn-chhò͘ ê hái-jiông lâi thuh hō͘ chit ê beh lîm-chiong ê Iâ-so͘ lim i. Lán sī ài chòe chhin-chhiūⁿ hiah ê pō͘-peng lâi the̍h chúi hō͘ I lim.

I ê lîm-chiong kūn lah. I ū la̍k-tiám cheng kú tiàm tī Si̍p-jī-kè ê téng-bīn, tùi án-ni I ê khùi-la̍t sī í-keng sòng-sit liáu. Iā I ê oa̍h-miā ê me̍h-phok ū chiām-chiām kĒ--khì. chóng-sī I ê sim ū tit-tio̍h an-ùi, tùi án-ni chiū chin pêng-an. Lán thang ēng kèng-khiân ê thài-tō͘ lâi sióng-siōng, chit-tia̍p I ū chin bín-chia̍t lâi teh hôe-kò͘ kè-khì ê īⁿ-siōng; chiū-sī koh siūⁿ-tio̍h Siōng-tè ê kau-tāi, chit sè-kài ê piáu-hō kap iáⁿ-jiah, kó͘-chá ê sian-ti, bô pō͘ ê sè-kài , siū kù-cho̍at ê thiàⁿ-thàng, chhám-chhoeh, kàu lâu-kōaⁿ chhin-chhiūⁿ huih ê chêng-hêng, Si̍p-jī-kè kap siū-lān, lâi ūi-tio̍h lán khó-lîn ê hiaⁿ-tī pàng-sak I ê sìⁿ-miā. Chhin-chhiūⁿ án-ni, siūⁿ-liáu I chiū kóng, "Sū bêng-pe̍k lah." I sī ēng hoaⁿ-hí khak-sìn ê liām-thâu, chai-iáⁿ I ū ôan-sêng I ê kang, chiah lâi âu-kiò án-ni. "Sū bêng-pe̍k lah! Sū ôan-sêng lah! PĒ ah, góa ê Sîn kau-tài lí ê chhiú, chiah ê ōe kóng soah, khùi chiū tn̄g."