Pó͘ Ióng-sim-sı̂n-si
Pó͘ Ióng-sim-sı̂n-si.
siu-kái“Ióng-sim-sı̂n-si” chı̍t-pún sı̄ chò Lán kàu-hoē ê toā lō͘-ēng , chiông-tiong ê si chē-chē chin-hó thang kà-sı̄ lâng , hō͘ lâng khah-khoài bat tō-lí . Chóng-sı̄ ū chı̍t-hāng thang hiâm , chiū-sı̄ siuⁿ chió , si chí-ū 59 siú nā-tiāⁿ , bē-tit thang chiâu-pı̄ chò kàu-hoē ta̍k-hāng ê lō͘-ēng. Phah-sǹg thiⁿ ē bô chı̍t-ê kàu-hoē chhin- chhiūⁿ lán-ê hiah-toā si-chheh kàu-hiah Khiàm-khoeh . Iā chiah-kú lóng bô ke- thiⁿ sin-ê , chha-put-to jı̄-cha̍p nı̂ kú iû- goân sı̄ hit-pún . Hit-sı̂ ê tiong-kan Cha̍p- lio̍k chham Hoē-pò khiok ū sin-chhut kúi-nā siú ; chóng-sı̄ kéng-soán--khí-lâi chí-ū cha̍p-goā siú ē-kham-tit ēng . Chiah-ê si iā lóng sı̄ goán goā-kok lâng chò--ê . Hiaⁿ-tı̄ bô chò , káⁿ bô tek-khak sı̄ in-ūi in bē-ē , kiám-chhái sı̄ tùi in bô phah-sǹg , á-sı̄ bē hiau-tit thang ēng hit- ê tú-hó ê tō-lí .Goán chó͘-ke ê si chin- chē , iā chin-hó , hō͘ lâng gı̂m-liáu lóng siū kám-kek . Nā chiong hiah-ê si hoan- e̍k chit-pêng ê oē , kàu-hoē ún-tàng tit- tio̍h lı̄-ek ; Só͘-í taⁿ kéng-chhut hit-pêng toā chhut-miâ ê si , chiong hit--nı̍h ê ı̀-gı̄ kı̀ tı̄ ē-té ; chhiáⁿ ta̍k só͘-chāi ê hiaⁿ-tı̄ chhı̀-khoàⁿ ē-tit thang chiàu chit-ê ı̀-sù lâi chò-si . Lóng-chóng ū 4 chat, múi chat 6 choā , múi choā 7 jı̄ . Tê -ba̍k hō-chò Bān-sè-poâⁿ , sı̄ chí Kiù-chú Iâ-so͘ . Iā in-ūi si chò-liáu thang chò kong ê lō͘- ēng, chhiáⁿ Tn̂g-soaⁿ lia̍t-ūi ê sian-siⁿ lâi soà chàn-sêng chit-ê tāi-chı̀.
1. Bān-sè-poâⁿ thè goá phah-khui ,
Kiû lí ín goá bih tı̄ hit tiong-kan .
Lí ê hia̍p-ē hō lâng chha̍k-phoà ,
Chúi chham hoeh lóng lâu-chhut-lâi;
Hō͘ goá tit-tio̍h nn̄g hāng ê kong-hāu ,
Sià-bián goá-ê choē , sé goá-ê sim .
2.Goá sui-jiân chı̄n-la̍t tio̍h-boâ ,
Iáu-kú bē-tit chiâu-thàn lí-ê lu̍t-hoat,
Sui-jiân jia̍t-sim lóng bô thè,
Ba̍k-sái éng-éng lâu bô thêng,
Tàu-tí lóng bē sio̍k-choē,
To̍k-to̍k lí ē-tit kiù-goá .
3.Goá chhiú khang-khang lâi chiū lí,
Kan-ta khı̂ⁿ-tio̍h lí-ê sı̍p-jı̄-kè;
Goá thǹg-theh chiū lí kiû i-chiûⁿ,
Goá nńg-chiáⁿ chiū lí kiû in-tián,
Goá lâ-sâm chiū-kı̄n chúi-choâⁿ,
Kiù-chú sé goá , nā-bô goá chiū sí .
4.Goá iáu-oa̍h tı̄ sè-kan ê sı̂,
Á-sı̄ lı̂m-chiong khùi-tn̄g ê sı̂,
Á-sı̄ sí-āu chiūⁿ koân ê kéng-kài,
Khoàⁿ-kı̀ⁿ lí chē-ūi sím-phoàⁿ,
Bān-sè-poâⁿ thè goá phah-khui,
Kiû lí ín goá bih tı̄ hit tiong-kan .
Hiān chia lâng í-keng chiong chit-ê tō- lí chò-chiâⁿ si . Taⁿ lâi ín tı̄ ē-té hō͘ lín khoàⁿ ; chhiáⁿ tāi-ke chim-chiok kàu- chiàⁿ , khoàⁿ tó-ūi eng-kai tio̍h ké-oāⁿ.
1.Thè goá phah-phoà Chio̍h-poâⁿ sin,
Hō͘ goá bih tı̄ lí lāi-bı̄n;
Lí siū chhiuⁿ-chha̍k hia̍p-ē khui,
Khang-chhùi lâu-chhut hoeh kap chúi;
Nn̄g-hāng kong-hāu goá lóng ài ,
Sià-choē sé-sim tû pháiⁿ-tāi.
2.Goá sin chı̍t-sı̀ chò hó lâng,
Thài-ē lóng kap lu̍t-hoat tâng?
Sui-sı̄ in-khı̂n bô ià-lán,
Ba̍k-sái siông-lâu sim bē an,
Choē-tāng ka-tı̄ bē-ē oân,
Kiù goá to̍k-to̍k lí ū koân.
3.Goá taⁿ khang-chhiú lâi chiū-kı̄n ,
Sı̍p-jı̄-kè-ē kiû khó-lı̂n;
Chhiah-thé bāng lí sù i-chiûⁿ,
Nn̄g-chiáⁿ bāng lí khéng poê-iúⁿ,
Lâ-sâm chı̀n-kàu oa̍h-choâⁿ piⁿ,
Kiû lí sé goá têng-thâu-siⁿ.
4.Kiám-chhái sè-chiūⁿ teh tō͘-oa̍h,
Kiám-chhái lı̂m-chiong ba̍k ha̍p-oá ,
Kiám-chhái boa̍t-jı̍t lı̄ tē-bı̄n ,
Khoàⁿ lí chē-ūi phoàⁿ bān-bı̂n ,
Thè goá phah-phoà Chio̍h-poâⁿ-sin ,
Hō͘ goá bih tı̄ lí lāi-bı̄n.
(Tâi-lâm Hú-siâⁿ kàu-hoē-pò tē 106 koàn, 1894 nı̂ 2 ge̍h)