Chit-má hoat-châi ê ki-hoē, chin-chiàⁿ bē-chió, ia̍h chin hó gū--tio̍h, chhiūⁿ chu-sek kı̂-bí, kúi tiám-cheng lāi, ē-tàng chiâⁿ bān gı̂n, m̄-koh che sı̄ ài ū châi-tiāu kap pún-chı̂ⁿ, m̄-sı̄ phó͘-thong-lâng ē-tàng bı̂n-bāng ē-tio̍h. Hia ê khò mô͘-kńg chhut-koāⁿ thàn-chı̂ⁿ ê lâng, jı̄m i joā ū-châi-tiāu lia̍p-chek, ia̍h kan-taⁿ ū-hoat-tō͘ kò͘ saⁿ-tǹg niā-niā, beh chhin-chhiūⁿ he pù kah kúi bān kah ê chhân-hn̂g, chek-kah kúi pah-bān chı̂ⁿ-gı̂n ê lâng, tı̄ hiān-chhú-sı̂ ê siā-hoē, kóng--lâi sı̄ bô hi-hán, m̄-koh nā tı̄ í-chá, tû-liáu khı̀ poa̍h-kiáu í-goā, sı̍t-chāi m̄-chai ū siáⁿ pān-hoat, ē-tàng thàn hiah-nı̍h toā ê ke-hoé .
Sio̍k-gí ū kóng-khí:“Bé bô iā-chháu bē pûi, lâng bô hoâiⁿ-châi bē pù,” koh kóng : “Toā pù iû thiⁿ, sió pù iû khı̂n-khiām,” it-poaⁿ toā pù-hō͘ nā m̄-sı̄ hoâiⁿ--lâi ê tō-sı̄ thiⁿ sù--ê, só͘-í tē-hng siōng chhut-miâ ê pù-hō͘, ke-kiám lóng ū i chı̍t-toāⁿ hoat-châi ê thoân-soat, ū ê sı̄ oàn-tò͘ ê tiòng-siong, ū ê sı̄ lōng-bān sim-sek ê kò͘-sū .
Che sı̄ tiàm soaⁿ-lō͘--nih, kap kiō-hu khai-káng ê oē-gí, kóng-oē tiong ū chı̍t-koá ē-sái chò ka-kı̄ kóng-kò, ia̍h ū chı̍t-koá ē-sái chioh lâi khí-chhiò--lâng, m̄ chiah beh chiong i hoat-piáu. Kóng-oē ê lâng, ū chêng, āu, cháu saⁿ ê, chêng, āu chiá tō-sı̄ chêng, āu-thâu nn̄g ê kiō-hu, cháu tō-sı̄ Cháu-ke-á Sian ka-kı̄, tiong-ng ū kúi kù kng-kiō-lâng ê kang-ô͘-pe̍h, goá siūⁿ sı̄ tāi-ke tiāⁿ-tiāⁿ thiaⁿ--tio̍h ê, só͘-í bô beh lēng-goā chù-bêng.
Āu: Chò-lâng ē-tit chhiūⁿ lín thài-ló(lāu-pē), tō sǹg ta̍t lah, ē ū lí chit khoán āu-chı̀n.
Cháu: Sı̄ lín gâu-o-ló, goá ia̍h bē-hiáu thàn toā-chı̂ⁿ, tı̀-ı̀m i lāu-toā-lâng hiáng-hok, tian-tò hāi i put-sı̂ teh chhau-lô .
Āu: Bô-iáⁿ ko̍h, siáⁿ-lâng m̄-chai, sı̄ i lāu-toā-lâng kāu chhau-hoân, kı̂-sı̍t toā-sè-hāng tāi-chı̀ i lóng ē-sái bián chhap-chhiú ah .
Cháu: Goán siàu-liân-lâng bô tāi-châi, bo̍k-koài i ē bē-hòng-sim.
Āu: Oē m̄ sı̄ án-ne kóng, in-ūi lín tō͘-liōng toā, sim-koaⁿ hó, bô siáⁿ ài chham lâng kè-kàu, só͘-í ke-kiám ia̍h ū koá thoa-lūi, ia̍h ū tām-po̍h-á phah-sńg.
Chêng: Thiaⁿ-khóng lí bô siáⁿ chhun chı̂ⁿ? Ū chit khoán seng-lí, kóng lâi siáⁿ-lâng ē siong-sı̀n.
Cháu: Só͘-í hāi-tio̍h sı̄-toā-lâng, put-sı̂ teh chhau-hoân.
Āu: Chhiūⁿ Kó͘ toā-i-seng, pí lí bān kúi nı̂ chiah chhut-lâi khai-gia̍p, chit-chūn thiaⁿ-kóng chhân ū chheng goā cho͘; Lô i-seng mā pí lí khah bān, chit-má mā khí chı̍t-keng toā-chhù, in teh chhun chı̂ⁿ ná ē chiah-nı̍h kín .
Chêng: I-seng sı̄ kiaⁿ bô sı̂-kiâⁿ, nā ē sı̂-kiâⁿ, kiaⁿ i bô chı̂ⁿ thàn, hiān-chhú-sı̂ chia ê i-seng, siáⁿ-lâng chhiūⁿ lí seng-lí hiah-nı̍h hó, tō-sı̄ kong-i tāi-jı̂n múi-nı̂ ū bān goā kho͘ hó-thàn, ia̍h bô lí ê sı̀n-iōng hó.
Cháu: Goán khoàⁿ lâng hit khoán thàn-chı̂ⁿ, ia̍h ē ba̍k-khang chhiah, m̄-koh thàn-chı̂ⁿ lēng-goā ū thàn-chı̂ⁿ ê pún-téng, goá ē tit tāi-ke khéng lâi sio-chhoē tāi-khài sı̄ in-ūi bē-hiáu thàn-chı̂ⁿ, ká-sú goá mā beh lâi thàn toā-chı̂ⁿ, tō khióng-kiaⁿ bē sı̂-kiâⁿ ah.
Āu: Bô-iáⁿ ko̍h, Tâi-oân-lâng m̄-sı̄ kóng kan-taⁿ chai-iáⁿ ài chı̂ⁿ, bē-hiáu ài pó-sioh sèⁿ-miā, nā m̄-sı̄ io̍h chia̍h-liáu ū-hāu, sàng--lâng lâng ia̍h bô-ài.
Chêng: Chóng--sı̄ chò-lâng khah chhı̀n-chhái, pún lân-tit chhun chı̂ⁿ .
Cháu: Bô-chı̂ⁿ the̍h bô io̍h, chit kù oē goá chin kóng bē chhut-chhùi.
Chêng: Goân-lâi sı̄ bô chı̂ⁿ ê in-kò͘. Thiau-ı̀-kò͘ beh cháu io̍h-chı̂ⁿ ê lâng, ū ia̍h chin chió. ──Sió ! Tı̀n-lō͘, toà liù !
Āu: Hó! Sió, liù !
Cháu: Iân-lō͘ kóng-oē, í-keng kàu toā-kiā-kha ah.
Chêng: Í-chêng goán kng lín thài-ló, i lāu-toā-lâng kiaⁿ goán siuⁿ chia̍h-la̍t, kàu chia kiā-kha lóng ē lo̍h-lâi kiâⁿ .
Cháu: Aih! Peh chit khoán kiā, sı̍t-chāi chin kan-khó͘, goá cha-mê àm-khùn, io-chiah-kut ū tām-po̍h-á sng, nā bô, goá mā lo̍h-lâi kiâⁿ, thang-hó hō͘ lín sió khin-sang chı̍t-ē.
Chêng: Put-kám-tong! M̄-koh goá sı̄ kóng lín thài-ló chin ē thé-thiap--lâng.
Āu: Lín a-kong chò-lâng koh jú hó, lí hit sı̂ iáu sè-hàn, kiaⁿ bē-kı̀-tit ah, i lāu ê sı̂-chūn, ta̍k-ke jú hoaⁿ-gêng--i, múi-chı̍t-piàn beh khı̀ khah hn̄g ê só͘-chāi thàn-chı̂ⁿ, hit sı̂-chūn iáu bô hoé-chhia, lóng sı̄ chē goán tiàm--nih ê kiō, i chóng--sı̄ chhut ke goā chiah káⁿ chē chiūⁿ kiō, tńg--lâi ê sı̂, kàu ke goā tō lo̍h-kiō, m̄-bat chē kàu mn̂g-kha-kháu. I kóng:“Lán m̄-sı̄ chò-koaⁿ-lâng, tı̄ chū sè toā-hàn ê só͘-chāi kiō-lâi kiō-khı̀, nā tú-tio̍h tióng-poè, sı̍t-chāi sit-lé.” I sı̄ hiah-nı̍h kó͘-ı̀, chit-má ê lâng, tō m̄-sı̄ chit khoán....
Chêng: Toā bô tē, sió koà kak 3 !
Āu: Hó 4 .
Chêng: Sió! Liù, toā-pō͘ khui 5 !
Āu: Hó, toā-pō͘ khui 1 .
Khoàⁿ-khoàⁿ leh í-keng peh khí-lâi toā-kiā-téng ah, goá thiaⁿ in o-ló goán chó͘-kong ê oē, chhin-chhiūⁿ sı̄ teh mē goá, pún-lâi bô-ài hō͘ in hioh-khùn, m̄-koh chē tı̄ kiō--nih hō͘-lâng iô chiūⁿ che chı̍t-lí goā tn̂g ê kiā, io-chiah-kut soah tām-po̍h-á sng-thiàⁿ, tō kā in kóng:
Cháu: Lín siuⁿ sin-khó͘ ah, hioh--chı̍t-khùn chiah koh kiâⁿ !
Āu: Hioh-khùn sı̄ m̄ ?
Chêng: Hó, soê-chhiú 2 !
Kiō chı̍t soê--lo̍h-lâi, goá tō nǹg--chhut-lâi, in chiong kiō soá-khı̀ chhiū-ńg, kó͘-lâng kā phi tı̄ keng-thâu ê kha-kin the̍h-lâi chhit-koāⁿ, sûi koh khı̀ kiō-chı̂ⁿ tháu hun-chhoe lâi chia̍h-hun, koè chı̍t-ē-á, chêng-chhiam ê Khó͘--á chiong khà-khı̀ hun-sái ê hun-chhoe, kí tùi thâu-chêng soaⁿ-kha hiòng goá kóng:
Chêng: Toā-tō͘ Khe tō tı̄ hit-pêng, lí khoàⁿ ! He oan tùi pak-pêng ê só͘-chāi, tō-sı̄ chûn-á-thâu, Jı̍t-pún hoán ê sı̂-chūn, tō-sı̄ tùi hit pêng tō͘ khe koè--lâi, bêng-bêng sı̄ thiⁿ-ı̀, hit tong-sı̂ Pat-koà Soaⁿ téng pàng--chhut-khı̀ ê toā-phàu, tūi-lo̍h tē lóng bē khui-hoe.
Āu: Thiaⁿ-kóng chı̀n-chêng nn̄g-saⁿ-jı̍t, tō ū lâng khoàⁿ-tio̍h Jı̍t-pún-peng, tı̄ chit pêng ê soaⁿ-téng thau-khoàⁿ, thàm-cha kun-chêng.
Cháu: Éng-koè ê lâng ná-ē hit khoán-sek? Sûi-chāi te̍k-kun lâi cheng-chhat tē-sè.
Chêng: Cháu-hoán ê sı̂, ta̍k-ke sûi lâng kò͘ sèⁿ-miā, koán-chhap i án-choáⁿ.
Āu: Éng-koè ê lâng, tiāⁿ-tiāⁿ tú-tio̍h hoán-loān, hō͘ chai-hō chau-that-kàu ū-kàu thiám, tian-tò tùi i bô siáⁿ koan-sim. Hoán nā lâi ah, chí kò͘ ka-kı̄ tô-seng, sûi-chāi chō-hoán ê lâng chham chò-koaⁿ--ê khı̀ chò tùi-thâu. M̄-koán tāi-chı̀ siáⁿ ián-piàn, só͘-í Jı̍t-pún Hoán ê sı̂, phah-sǹg lia̍h-chún sı̄ kāng-khoán.
Chêng: Lán tong-chho͘ àn-sǹg Jı̍t-pún-á bô joā kú ia̍h ē cháu--tńg-khı̀, siáⁿ-lâng siūⁿ ē kàu in ē it-tı̍t toà kàu taⁿ.
Āu: Gū-tio̍h āu-chek chiah siūⁿ-khí tia hó, Tâi-oân-lâng ê sèng chin bái, í-chêng ta̍k-hāng hiah khin-séng, chóng bē-tàng boán-chiok, sı̂-siông hoán-loān . Chit-chūn káⁿ koh loān chı̍t-ē khoàⁿ-māi?
Chêng: Hó lâi-khı̀ ko̍h! Hioh kú ah, oē kóng siuⁿ chē, chhùi ia̍h ē ta. Tı̄ chia kan-taⁿ ē-sái lim gû-jiō.
Āu: Mài siū-khı̀ lah!
Cháu: Lí khoàⁿ, Tek-hāng Tiuⁿ--sèⁿ khı̀ lâm-á chhoā sin-niû tńg--lâi lah.
Āu: In niâ leh, tông-tông ê toā pù-hō͘, choáⁿ-iūⁿ choan kau-kiat che cháu-gê-mn̂g--ê .
Chêng: Thiaⁿ-kóng kè-chng ū saⁿ-bān goā kho͘, kiat chit mn̂g chhin-chiâⁿ, tō khah hó thàn-chia̍h-lâng lô-khó͘ chı̍t-sı̀-lâng ah, chhiūⁿ lán tō-sı̄ saⁿ-sı̀-lâng, ia̍h m̄-káⁿ siūⁿ-beh thàn saⁿ bān kho͘ .
In kóng-oē ê sı̂, kiō mā soá-lâi lō͘--nih, goá tō nǹg--jı̍p-khı̀, in sûi-sı̂ khí-keng, iáu sı̄ chı̍t-lō͘ kiâⁿ chı̍t-lō͘ kóng, bē-su kóng-oē ē hō͘ in ê keng-thâu khah khin-sang, só͘-í it-tı̍t kóng soà--lo̍h-khı̀ .
Āu: Pù-hō͘-lâng ê sió-chiá, hia ê chı̂ⁿ goá khoàⁿ kan-taⁿ ū-kàu i ê só͘-hùi, chı̍t ê cha-bó͘-kán hōng-thāi bô-kàu, iū beh chhiàⁿ chı̍t ê lāu a-pô, tê hun chia̍h-sı̍t tó-chı̍t-hāng bô káng-kiù, saⁿ khò͘ chhēng chhah tó-chı̍t chân bô liōng-siōng. Goá siūⁿ sèⁿ Tiuⁿ--ê só͘ tiông mā tit bô siáⁿ hó-khang, tian-tó thó chı̍t ê pháiⁿ miâ-siaⁿ, kóng tit chhe-ka-châi, thó-soe.
Cháu: Sı̄ ah! Lâm-chú-hàn iáu sı̄ ka-kı̄ thàn-lâi ê chı̂ⁿ khah sı̍t-chāi, siūⁿ-beh chhoā bó͘ lâi tı̀-ı̀m lâi hiáng-hok, kui-khı̀ khı̀ chò iân-tâu.
Āu:Oē sı̄ án-ne kóng bô m̄-tio̍h, m̄-koh goá khoàⁿ hiān-chhú-sı̂ ê siàu-liân-ke, iáu sı̄ phō-tio̍h chit khoán siūⁿ-hoat khah chē, chit-má chı̍t-sı̀-kè hō͘ lâng gı̄-lūn ê Thô͘-chhù Chhù Tân--ka só͘ chio ê káⁿ m̄-sı̄“tha̍k-chheh-á”, jiá-tio̍h chı̍t-tiûⁿ koaⁿ-si, iáu bú kah bū-sà-sà .
Chêng: Thiaⁿ-kóng in tiūⁿ-ḿ sí liáu-āu, só͘-ū hiān-gı̂n, chin-chu, kim-á ta̍t saⁿ, sı̀ bān kho͘. Lóng-chóng hō͘ i khoán--khı̀, chham kè-chng sı̀ pah chio̍h, ia̍h ū la̍k, chhit bān kho͘, i iáu bô boán-chiok? Lâng ê sim-koaⁿ ko̍h!
Āu: Goá thiaⁿ lâng kóng, hit-ê siàu-liân-lâng bat tùi lâng kóng: “Sè-kan chí-ū chı̂ⁿ siōng hó.” i chit-má kan-taⁿ khoàⁿ-tio̍h chı̂ⁿ, chhun ê lóng pàng-bē-kı̀, sím-mih gı̄-lí i mā bē-kı̀-tit liáu-liáu, sím-mih miâ-siaⁿ i mā bô beh kò͘ . Ah! I m̄-sı̄ bat chham Bûn-hoà--ê chhut-lâi káng-ián? Ah! Lâng chin ....
Chêng: Thiaⁿ-kóng i khı̀ Jı̍t-pún liû-ha̍k, choân-sı̄ ūi-tio̍h chit chân tāi-chı̀ khı̀ gián-kiù hoat-lu̍t ê .
Goá thiaⁿ-tio̍h in án-ne gı̄-lūn, sı̍t-chāi thè hiān-tāi chheng-liân hoah oan-óng, sim-lāi ia̍h kám-kak kiàn-siàu--khí-lâi, siūⁿ-beh kā oē-tê thoa-khı̀ pa̍t-ūi, tō siūⁿ-chhut chı̍t ê būn-tê.
Cháu: Ńg--ka ê ka-sán sı̍t-chāi toā, m̄-chai in chó͘-kong-á sı̄ án-choáⁿ keng-êng ?
Chêng: Lâng kóng “Bé bô iā-chháu bē pûi, lâng bô hoâiⁿ-châi bē pù ”, toā pù-hō͘ ū siáⁿ-lâng sı̄ mô͘-kńg chhut-koāⁿ ê .
Cháu: Ô͘ !
Āu: Chit-má í-keng sı̄ khah liáu-boé lah, cha̍p kúi nı̂ chêng tō chin hó-koè, a-Chong hit chı̍t thiāu í-keng tó--khı̀, Gia̍t--sià ia̍h hō͘ Ku-niú liáu khı̀ kúi pah bān, hàu-lâm, chóng hō͘ lâng kng-khı̀ chò toā ti bē .
Cháu: Thiaⁿ-kóng in hit kháu-chàu tùi chú-tē sı̄ án-ne chú-tiuⁿ, m̄ hō͘ chú-tē khı̀ tha̍k-chheh, kan-taⁿ kà in chia̍h a-phiàn, kóng a-phiàn nā chia̍h ē-tiâu, ke-hoé tō kò͘ ē-tio̍h? Hah-hah! Lí khoàⁿ! In-ūi in bô tı̀-sek, ta̍k-nı̂ m̄-chai hō͘ lâng phiàn-khı̀ joā-chē chı̂ⁿ? Chhiūⁿ bó͘-bó͘ in kúi-lâng bô lóng sı̄ phiàn Ńg--ka ê chı̂ⁿ lâi chò ke-hoé ê ?
Āu: “Lān-chiáu-á”chı̂ⁿ, liáu-liáu--khı̀ mā-sı̄ èng-tong ê .
Cháu: “Lān-chiáu-á”chı̂ⁿ ! ? Sı̄ án-choáⁿ kóng ?
Chêng: Lí m̄-chai ô͘ ? I chai-iáⁿ kah chin siông-sè.
Cháu: Kóng ! Kóng lâi thiaⁿ !
Āu: Goá ia̍h sı̄ thiaⁿ lâng kóng--ê, che ū koan-hē-tio̍h lâng ê miâ-siaⁿ, kiaⁿ ū choē-kò.
Cháu: M̄ sı̄ án-ne kóng, bô-iáⁿ bô-chiah, lán chō-iâu o͘-pe̍h loān-kóng, chiah sı̄ choē-kò. Sı̍t-chāi ê tāi-chı̀ kóng--lâi ē-sái sǹg sı̄ kóng-kó͘, bô iàu-kín, kóng!
Āu: Kóng--lâi oē-thâu tn̂g, lín siàu-liân-poè, bô thiaⁿ lâng kóng--koè, khah ū-hoè ê lâng, sı̄ siáⁿ-lâng lóng chai-iáⁿ, che sui-jiân sı̄ hiau-hēng, m̄-koh ia̍h ū chı̍t-koá-á thiⁿ-ı̀ .
Cháu: Sı̄ án-choáⁿ?
Āu: Í-chêng ê chúi-chùn, bô chhiūⁿ chit chūn ū âng-mô͘-thô͘ ē-tàng lâi hō͘-hoāⁿ, sió-khoá lo̍h kúi lia̍p hō͘, m̄-sı̄ hoāⁿ pang tō-sı̄ chùn-thâu pháiⁿ, só͘-í chhiūⁿ lâm-á it-tài chúi-boé chhân, sı̄ tiāⁿ-tiāⁿ bô siu-sêng.
Chêng: Éng-koè lâng khah chió, chhân koh khoah choh, choh-chhân-lâng tō bô chhiūⁿ hiān-chhú-sı̂ ài khı̀ pa-kiat thâu-ke, tian-tò sı̄ thâu-ke ài khı̀ pa-kiat tiān-hō͘, só͘-í siu bô cho͘ ia̍h-sı̄ chhiâng-chāi ê tāi-chı̀ .
Āu: Éng-koè ū hoâiⁿ pà-pà ê thâu-ke, ia̍h ū áu-bân ê tiān-hō͘, chhiūⁿ lâm-á it-tài choân-sı̄ sèⁿ Ńg--ê, só͘-í chit hū-kı̄n ê chhân-hn̂g, cha̍p-sèⁿ ê lâng sı̄ m̄-káⁿ khı̀ chò . Sui-jiân-kóng sı̄ tiān-hō͘, chhân tō chhin-chhiūⁿ sı̄ ka-kı̄ ê, thâu-ke beh ài chhân-cho͘, lóng ài khoàⁿ Ńg--ka ê liông-sim.
Cháu: Éng-koè kám chiâⁿ-sı̍t chit khoán-sek, ē-tàng chhiúⁿ--lâng ?
Āu: Lí thiaⁿ goá kóng ! Oē-thâu tn̂g loh.
Ē-bı̄n tō lóng sı̄ āu-chhiam Chhoà--ê só͘ kóng--ê .
He khí-ke ê sı̄ bân-á, miâ-kiò Kiat, tāi-ke lóng kiò i Hó-boé Kiat. Hiān-chhú-sı̂ Ńg--ka sin-chhù tang-pêng he gō͘ kah goā tē, tō-sı̄ i khí-ke--ê, pún-lâi hia ê chhân sı̄ sèⁿ N̂g ê gia̍p, cho͘ Boé Kiat choh. Che sèⁿ N̂g ê chú-lâng í-keng koè-sin, chí chhun chı̍t ê koá-hū tong ke, Boé Kiat tı̄ in thâu-ke bē sí chı̀n-chêng, la̍p-cho͘ tō bô chiàu khí-kang, lú bián kóng chhun chı̍t ê koá-hū, i ná iáu ū siáⁿ thian-liông? Koá-hū bêng-chai sı̄ chhân-tiān káu-koài, nā bô kè-kàu--chı̍t-ē, ē hō͘ i khi-hū kàu té, kiat-kio̍k kiaⁿ liân chhân ia̍h piàn-chò i ê, só͘-í tō chiong Boé Kiat hiàm--lâi . Mn̄g i :
“Chit tang sı̀-kè siu-sêng lóng chin hó, choáⁿ-iūⁿ lí ê chhek lóng sı̄ jı̄-chô-phàⁿ--ê. Jı̂-chhiáⁿ mā la̍p bô-kàu gia̍h, í-chêng khiàm ê seng bián kóng, kin-nı̂ lí choáⁿ phah-sǹg ? ”
“Thâu-ke-niû! Lí ia̍h chai, goán káⁿ sı̄ thiau ı̀-kò͘? Hit tah chúi-boé chhân tiāⁿ-tiāⁿ chia̍h bô chúi, goán ia̍h-sı̄ liáu-pún, kiò goán khı̀ tia̍h-lâi hō͘ lí, lí ia̍h-sı̄ put-jím-sim, goá ia̍h bô pún-chı̂ⁿ, chóng--sı̄ thâu-ke-niû....”
“Chúi chia̍h bô-kàu? Chúi-chı̂ⁿ nı̂-nı̂ siu-khı̀, ná ū chit khoán tō-lí, kám kan-taⁿ lán ê chhân chia̍h bô chúi, keh-piah-khut lâng lóng siu chiok gia̍h, jı̂-chhiáⁿ ū lêng gō͘ tāng . ”
“Oan-óng ! Thâu-ke-niû ! Lâng ê oē lí m̄-thang sı̀n, ná ū chit lō tāi-chı̀ ?”
“Kin-nı̂ hō͘-chúi chiah chhiong-chiok, sı̄ m̄? ”
“Hō͘-chúi koè chē siū chı̀m, tiū-á ia̍h m̄-hó, chit chı̍t tang tō-sı̄ tio̍h chúi im hāi khı̀ ê . ”
“M̄-koh chhân beh choh, ài khah ū thian-liông koá .”
“Aih! Thâu-ke-niû, lí m̄-siong-sı̀n, ū-êng chhiáⁿ poah chı̍t-sı̂-á kang lâi-khı̀ khoàⁿ, chhân sı̄ án-choáⁿ? Tiū-á sı̄ án-choáⁿ? Tō bē koh kóng goá phiàn--lí. ”
N̂g--ka chit-ê koá-hū, chai-iáⁿ khang iōng chhùi chhia-poâⁿ sı̄ bô-lō͘-iōng, tō hō͘ Boé Kiat tńg--khı̀. M̄-koh i í-keng hā-tēng koat-sim: i siūⁿ nā-sı̄ bô kek khah ngē leh, it-tēng siū lâng khi-hū, só͘-í ū chı̍t ê chá-tang, i thàm-thiaⁿ-tio̍h Boé Kiat ê tiū-á í-keng koah hó, tāi-iok sı̄ pha̍k ta ê sı̂-chūn, tō khı̀ chhiáⁿ lâi chı̍t tı̄n ē sio-phah ê kang-lâng, ka-kı̄ chē-kiō kàu chhân-tiān Boé Kiat chhù--nih khı̀.
Che chiàⁿ sı̄ Boé Kiat ūn-khı̀ beh tháu .
Boé Kiat khoàⁿ-tio̍h thâu-ke-niû chhin-sin lâi, koh chhoā lâi chı̍t tı̄n hàn-chháu hó ê kang-lâng, chá chai tāi-chı̀ bô thò-tòng, chhek í-keng choân-pō͘ pha̍k tı̄ tiâⁿ--nih, bô-hoat-tō͘ koh am-khàm, i chí-hó ké hó-lé, beh chhiáⁿ i jı̍p chhù--nih chē, siūⁿ-bē-kàu thâu-ke-niû chit piàn chin kò͘-chip, kan-kan m̄-khéng jı̍p chhù-lāi chē, beh chē leh tán chhek pha̍k ta thang koè hong-kó͘, Boé Kiat mā kù-chāi i khı̀ keⁿ-liâu chē-liâng.
Koè-tàu, thiⁿ-téng o͘-hûn bı̍t pò͘, kiam ū hong, sai-pak-hō͘ pò thâu, chhek khoàⁿ-khoàⁿ mā ta ah. Chit-ê koá-hū tō bēng-lēng in koè hong-kó͘, kó͘ chēng tō kiò kang-lâng chng-jı̍p pò͘-tē, Boé Kiat khoàⁿ chit khoán-sè, chhin-chhiūⁿ m̄-kéng lâu chı̍t-koá lo̍h--lâi, i tòng-bē-tiâu ah, tō khı̀ ai-kiû i ê thâu-ke-niû, kóng :
“Thâu-ke-niû ! Lâu koá hō͘ goán chò bí-bó lah! ”
“M̄-sı̄ kā lí lâu chı̍t-toā-tui? ”Koá-hū kí hit jı̄-chô-phàⁿ--ê, kā i ı̀n.
“Ah! Thâu-ke-niû, chia ê phàⁿ--ê khı̀ chhı̄ cheng-seⁿ hó lah. ”
“Án-choáⁿ ? Chhı̄ cheng-seⁿ? Lí ta̍k-nı̂ la̍p hō͘ goán ê m̄-sı̄ choân lóng chit khoán ? Chiong chia ê lâu hō͘ lí sı̄ chiok kong-tō ê . ”
“Thâu-ke-niû! Chit tang chiah siu-sêng hó--chı̍t-tiám-á, goán kúi kò goe̍h ê kang-hu, thâu-ke-niû! Lí tāi-jı̂n ū tāi-liōng, hoat chı̍t-tiám-á chû-pi, lâu ...”
Boé Kiat it-tı̍t teh ai-kiû, koá-hū soah it-tı̍t m̄-tah-èng, kang-lâng kan-taⁿ kò͘ kā kó͘--koè ê chng-jı̍p-khı̀ pò͘-tē, Boé Kiat tō khı̀ chhiúⁿ pùn-ki, siang-hong khiú-khiú-la̍k-la̍k ê sı̂-chūn, phéⁿ~~, sai-pak-hō͘ lo̍h--lo̍h-lâi, tāi-ke chiah bô êng-kang koh oan-ke, taⁿ-kang soá chhek-pau, tiān-lâng khàm chhek-tui, koá-hū ia̍h cháu-jı̍p-khı̀ keⁿ-liâu bih hō͘. Chit chūn hō͘ lú lo̍h lú chho͘, bô sûi hioh ê khoán-sè . Boé Kiat chhek-tui khàm hó, chai-iáⁿ thâu-ke-niû iáu tı̄ keⁿ-liâu . Hoān-sè sı̄ kiaⁿ thâu-ke-niû chı̍t ê lâng bô-liâu, siūⁿ-beh khı̀ hōng-thāi i, Boé Kiat mā jı̍p-khı̀ keⁿ-liâu. Jı̍p-khı̀ liáu-āu, hō͘ lo̍h lú toā, chı̍t lia̍p hō͘ ē phah-sí kúi ê lâng, it-tı̍t lo̍h kàu àm. Kàu poàⁿ-mê in thâu-ke-niû siūⁿ-kóng sı̄ hō͘ siuⁿ toā, pháiⁿ-sè kiò Boé Kiat chhut--khı̀, tō tâng-chê tı̄ keⁿ-liâu tán kàu hō͘ thêng, chit sı̂ tāi-khài-sı̄ poàⁿ-mê āu ah.
Lí siūⁿ chit-ê sı̂-chūn, chı̍t ê koá-hū, chı̍t ê ióng-chòng ê cha-po͘-lâng(Boé Kiat iáu bē chhoā-bó͘), tâng-chê tı̄ liâu-á lāi, in m̄ sı̄ iam-koah--koè ê, siáⁿ-lâng káⁿ pó-chèng in bē chhut tāi-chı̀? Ū lâng kóng sı̄ Boé Kiat iōng kiông--ê, tàu-té choáⁿ-iūⁿ, tı̄ hit khoán hong-hō͘ ê iā--nih, siáⁿ-lâng khoàⁿ--kı̀ⁿ? Kiat-kiok sı̄ Boé Kiat sûi in thâu-ke-niû ê ı̀, i tō tiān-hō͘ piàn thâu-ke ah .
Chêng: Kau-tı̂ⁿ 1 !
Āu: Hó ! Kau-tı̂ⁿ 2, āu--lâi tō sı̍t-chāi ū koá thiⁿ-ı̀, khó-kiàn beh hó-gia̍h ia̍h m̄-sı̄ chhı̀n-chhái tō ū hoat-tō͘. Chúi-boé-chhân bān-tang hō͘-chúi sió, pò͘ tiū-á chóng bô hó siu-sêng, só͘-í lóng sı̄ iā thô͘-tāu, chhah han-chı̂ khah chē .
Tng”Sóng-bûn Hoán”ê sı̂-chūn, hoán-loān iáu-bē kàu ê kúi goe̍h chêng, peh-sèⁿ chi-kan ê hong-siaⁿ í-keng chin kín-kip, tāi-ke lóng kám-kak put-an, lóng chún-pı̄ cháu-hoán, to̍k-to̍k Boé Kiat m̄-sı̀n, i goân-pún m̄-sı̄ pı̂n-toāⁿ ê lâng, só͘-í chhân--nih ê sit-thâu, iû-goân chiàu-siông khı̀ choh. I gō͘ kah goā tē ê han-chı̂ chhah soah bô goā kú, hoán-loān lâi ah, chit sı̂-chūn sèⁿ-miā iàu-kín, ná ē kò͘-tit han-chı̂, Boé Kiat bô kò͘ lâng chhiò, chham in chò-hoé cháu-hoán--khı̀ .
Kóng-khí Sóng-bûn Hoán, sı̍t-chāi chin chhi-chhám, hoán-loān saⁿ, sı̀ nı̂, chèng bē-tàng chèng, choh bē-tàng choh, peh-sèⁿ lóng chia̍h chháu-kin thun chhiū-chí, ū chı̂ⁿ bô tè khı̀ bé chia̍h, só͘-í gō--sí ê bē chió lâng. Chhiūⁿ siâⁿ lāi goā, loān pêng, cháu-hoán ê tńg--lâi, khoàⁿ-tio̍h sı̀-kè lóng-sı̄ sí-lâng kut-thâu, ū ê kui sin-khu pâi tı̄ bı̂n-chhn̂g téng, ta̍k kháu-chàu chhù-lāi, chháu lóng seⁿ kàu chhù-téng, chàu-khang piàn chô-khang, iā-pô ia̍h ē tok-lâng ba̍k-chiu, cháu bān ê lâng bô lâu kah poàⁿ ê. Bān-seng Hoán ê sı̂-chūn, goá í-keng ē-hiáu ah lah, thiaⁿ-kóng mā bô chit piàn ê cha̍p hun it .
Loān pêng, peh-sèⁿ ta̍uh-ta̍uh-á tńg--lâi, m̄-koh chhân-hn̂g í-keng choân phaⁿ-hng--khı̀, chèng-chok mā ài koè sı̀, gô͘ goe̍h-jı̍t āu chiah ū siu-sêng, ....
Chêng: Sió 1!
Āu: Hó, sió 2, ──koaⁿ-hú kan-taⁿ chai chia̍h-chı̂ⁿ, siu-soè, koán lí peh-sèⁿ sí-oa̍h, sui-jiân seng-lí-lâng ūn lâi Chı̍t-koá bí-niû, tong-sı̂ lóng sı̄ pō͘ taⁿ, chiap-chè bı̄ chiu-tō, bān hāng lóng khí kah chin kùi. Chit sı̂-chūn Boé Kiat gō͘ kah goā tē ê han-chı̂, i cháu-hoán chêng só͘ chhah--ê, chù-sí! Saⁿ, sı̀ tang kóng bô hō͘ lâng thau ku̍t--khı̀, lí siūⁿ ! Chhah saⁿ, sı̀ tang ê han-chı̂, he sı̄ moá chhân lóng sı̄, têng-têng-lúi-lúi, ku̍t--khí-lâi tō-sı̄, ū ê chı̍t tiâu chı̍t, nn̄g”chhı̀n”tāng. Hit sı̂-chūn chı̍t kho͘ bé joā-chē kin, lí ioh khoàⁿ leh? Bián tio̍h-kiaⁿ, kóng sı̄ chin sio̍k, la̍k-cha̍p kin! Han-chı̂ tiâu ia̍h ta̍t-chı̂ⁿ, lí siūⁿ ! Choai han-chı̂ ē-tàng hō͘ i bē joā-chē chı̂ⁿ ?
Cháu: Mh! Che sı̄ thiⁿ chò-sêng, ....
Āu: Lâng kóng hok chı̀ sim lêng, chit chūn i tō chai-iáⁿ beh án-choáⁿ sǹg ah. Éng-koè ê chhân sı̄ chin sio̍k, bô chhiūⁿ chit-má sǹg chin sǹg ha̍p, chı̍t kho͘ gı̂n nā-sı̄ khah chúi-boé ē-sái bé-tio̍h chı̍t, nn̄g chio̍h, chhân bı̄n iū khoah, kū tn̄g chı̍t kah, chha-put-to ū tong-kim ê nn̄g, saⁿ kah, Boé Kiat chiong bē han-chı̂ ê chı̂ⁿ, lóng-chóng bé chhân, bô-lâng chai-iáⁿ i bé joā-chē, chóng--sı̄ siu-lâi--ê chia̍h bē liáu, nı̂-nı̂ chhun, I koh kut-la̍t, chı̍t nı̂ chı̍t nı̂, tō chiâⁿ-chò toā pù-hō͘ ah .
Cháu: Ah! Che sı̄ chı̍t phiⁿ chin hó ê pù-hō͘-lâng ê le̍k-sú .
Chêng: Tâi-oân ê pù-hō͘, ta̍k-ke-hoé lóng ū i te̍k-piat ê kò͘-sū, m̄-koh piàⁿ-tio̍h mô͘-kńg chhut-koāⁿ, pe̍h-chhiú khí-ke--ê sı̄ chin chió .
Cháu: Sı̄, tō-sı̄ Lı̂m Láu-ngó͘ thiaⁿ-kóng ia̍h-sı̄ koái-phiàn tǹg-kheh ê chı̂ⁿ lâi khí-ke--ê . A-ta̍h-bú, ....
Āu: Kóng kàu A-ta̍h-bú, kóng nn̄g saⁿ jı̍t ia̍h kóng bē oân, kan-taⁿ chiū piàⁿ toā hoê-siūⁿ ê tāi-chı̀ lâi kóng, ia̍h ài kóng chı̍t po͘ .
Chêng: Chit chân sū, chit-má kóng--khí-lâi ia̍h ē hō͘ lâng khí ke-bó-phoê .
Cháu: Sı̄ siáⁿ-khoán? Hiah-nı̍h kiaⁿ--lâng ?
Chêng: Toā hoê-siūⁿ ê tek-ûi hông kong-phoà, chı̍t ke toā-sè cha̍p kúi lâng, châu kah chı̍t ê bô lâu, kan-kan chı̍t ê gō͘, la̍k hoè ê cha-po͘ gín-á, bô thâi--sí, oa̍h lia̍h tńg--khı̀. M̄-koh chám chháu chóng--sı̄ ài tû kin, lâu chı̍t pé boé chá-bān sı̄ ū āu-hoān, in siūⁿ : chhú-tı̄ gín-á, chí ū oa̍h tâi khah séng hùi-khı̀, só͘-í gín-á hông chhoā kàu bōng-á-po͘ khı̀. Khut ku̍t hó, kiò i tó--lo̍h-khı̀. Chit-ê gín-á ia̍h chok-koài, m̄-sı̄ kóng beh pàng-sái, tō-sı̄ kóng beh pàng-jiō, kúi-ā pái tó--lo̍h-khı̀ iū-koh peh--khí-lâi. Siū chú-lâng bēng-lēng, beh oa̍h-tâi--i ê lâng, tán kah siū-khı̀ lah, khoàⁿ i koh beh peh-khí-lâi, tō iōng kha kā i that--lo̍h-khı̀, sūn-chhiú iōng tı̂-thâu hiòng thâu-khak-sim khà--lo̍h-khı̀, chit sı̂-chūn, chheng-thian pe̍h-jı̍t, bô-iân-bô-kò͘ khí liáu chı̍t siaⁿ lûi, chit-ê lâng iah tō hō͘ lûi-kong kòng--sí ah.
Cháu: Ná ū hiah-nı̍h tú-hó ê tāi-chı̀ ?
Āu: Chin chin ū chit lō sū, m̄-sı̄ loān-kóng--ê .
Cháu: Āu--lâi neh ?
Āu: Āu--lâi chún soah--khı̀.
Cháu: Kúi cha̍p tiâu lâng-miā, chiâⁿ pah kah ê chhân-hn̂g, tō án-ne chún soah--khı̀ ?
Āu: Kúi chheng-bān ê sèⁿ-miā! Chı̍t kok ê thó͘-tē ia̍h tō chún soah--khı̀ ko̍h, bián kóng chit sió-khoá ah....
Chêng: Ta̍h-pō͘-thun 1 !
Āu: Hó ! Ta̍h-pō͘-thun .
Cháu: Beh kàu--ah, kóng bô kúi-kù-oē lín chin ē kiâⁿ.
Chêng: Iân-lō͘ kiâⁿ iân-lō͘ kóng, m̄-chai-iáⁿ kú, hńg! Kiâⁿ beh chı̍t tiám-cheng kú .
Tò-tńg--khı̀ ê lō͘--nih, goá ū chı̍t-koá lán, chı̍t chiūⁿ kiō tō khùn khı̀ ah, m̄-chai in ū koh kóng sím-mı̍h?
