Pı̂n-toāⁿ Niau kā sí Niáu-chhú

Tı̄ goán ê chhù-lāi niáu-chhú chin-choē. Siông-siông lâi koe-tiâu kā koe-á, tı̀-kàu koe-á chhı̄ lóng boē khí. Goán chiū kā lâng thó niau-á lâi chhı̄. Lóng-chóng ū chhı̄ saⁿ chiah, chı̍t chiah khah siàu-liân, nn̄g chiah khah lāu. Hit chiah khah siàu-liân ê, siông-siông khoàⁿ i kā-tio̍h niáu-chhú teh lāng, lāng-liáu nā siān chiū chia̍h, ia̍h ū-sı̂ khoàⁿ i kan-ta kā sí, lóng bô chia̍h. Iáu hit nn̄g chiah khah lāu ê niau lóng m̄ bat khoàⁿ-kı̀ⁿ in kā-tio̍h niáu-chhú, kan-ta khoàⁿ-kı̀ⁿ i kā sí niáu-chhú teh chia̍h nā-tiāⁿ. Sio̍k-gú kóng, Pı̂n-toāⁿ niau, kā sí niáu-chhú, kó-jiân ū iáⁿ. Kūn-lâi Kàu-phài ná choē lâi Tâi-oân,ū-ê tùi Chi-ná lâi, ū-ê tùi Loē-tē lâi. Goá kiò sı̄ beh lâi saⁿ-kap choè kang tı̄ Tâi-oân, lâi kiù Tâi-oân sı̀-pah-bān ê peh-sı̀ⁿ, kı̂-sı̍t to m̄ sı̄ án-ni. Siông-sè kā i gián-kiù khoàⁿ-bāi, to sı̄ beh lâi khan piān-iûⁿ, kap kā sí niáu-chhú. Só͘ ēng ê chhiú-toāⁿ chin chho͘, lóng sı̄ hiâm pa̍t kàu-phài ê pháiⁿ, o-ló ka-kı̄ ê kàu-phài ê hó, tùi pa̍t kàu-phài chin bô lé-sò͘ chin bô jı̂n-ài, kı̀-jiân khiàm jı̂n-ài beh chhut-lâi thoân jı̂n-ài ê Chú ê tō-lí kiám ū kong-hāu ? Sèng-keng kóng, jı̂n ài sı̄ tē-it toā, nā ū jı̂n-ài chiah ū khoan-iông thun-lún chû-pi thiàⁿ-thàng, bô oàn-tò͘, bô khoa-kháu,bô phín-phóng. Khiā tı̄ tâi-téng, beh khoa-kháu ka-kı̄ ê chin kap chheng-khı̀-siùⁿ, phín-phóng sè-kan seh saⁿ lı̀n,khoa-kháu bô hoān-choē, phín-phóng siat-kàu ê kín, i jı̂n-ài tı̄ tó-ūi ? Tio̍h chū-séng, nā bô, oē hō͘ Pó-lô Sian-siⁿ ioh-tio̍h. “Goá nā oē kóng ta̍k-kok ê khiuⁿ-kháu, kap thiⁿ-sài ê oē, nā bô jı̂n-ài sı̄ chhin-chhiūⁿ phah-lô phah giâu-kó͘.” Koh lo̍h-khı̀ nn̄g-chiat, chhiáⁿ tāi-ke ka-kı̄ tha̍k. (Tâi-oân-kàu-hoē-pò tē 523 koàn, 1928 nı̂ 10 goe̍h)