- Ē-mn̂g tah hé-hun-tsûn beh khì Tāi-Eng kok, tsúi-lō͘ chīu-sī Ē-mn̂g kàu Hiong-káng 930 lí, Hiong-káng kàu Si̍t-la̍t 4790 lí, Si̍t-la̍t kàu Pin-nn̂g-sū 1270 lí, Pin-nn̂g-sū kàu Sek-lân 3037 lí, Sek-lân kàu Âng-hái 7113 lí, kè Âng-hái 4360; kè Ai-ki̍p ê tōa-káng 270 lí, tōa-káng kàu Bí-lī-tāi 3180, Bí-lī kàu Se-pan-ngá ê lâm-hng 3270 lí. Se-pan-ngá ê lâm-hng kàu Tāi-Eng kok 4080 lí. Taⁿ mn̄g: Ē-mn̂g làu Si̍t-la̍t kúi lí?
- Siat-sú Ti̍t-lē ū saⁿ-chheng bān lâng, Soaⁿ-sai chi̍t-chheng gō͘-pah bān, Soaⁿ-tang saⁿ-chheng chi̍t pah bān, Hô-lâm nn̄g-chheng sì-pah bān, Siám-sai chi̍t-chheng gō͘-pah bān, Kam-siok chit-chheng la̍k-pah bān, O͘-pak nn̄g-chheng poeh-pah bān, Hok-kiàn chi̍t-chheng poeh-pah bān, Hûn-lâm gō͘-pah gō͘-tsa̍p bān, Kùi-chiu gō͘-pah gō͘-tsa̍p bān. Chīu tsa̍p-poeh séng lóng-kiōng jōa-tsōe lâng?
KIÁM-HOAT
Lâi pí-phēng nn̄g tiâu-siàu, ēng khah-sòe-tiâu khàu-tû khah tōa-tiâu khòaⁿ ū chhun jōa-tsōe, hō tsòe Kiám-hoat. Kiám-hoat Ka-hoat saⁿ-tùi-hoán.
Khah-tōa-tiâu-siàu tio̍h thán-hoâiⁿ siá tsòe téng-lia̍t, khah-sòe-tiâu tio̍h hoâiⁿ-lia̍t tī ē-bīn; toaⁿ ê ūi tùi toaⁿ ê ūi, tsa̍p ê ūi tùi tsa̍p ê ūi, í-siōng kok tùi i ê ūi pâi. Pâi-lia̍t bêng-pe̍k, tio̍h u̍ih-hûn keh-kài; tāi-seng tùi toaⁿ ê ūi kiám-khí, ēng ē-siàu kiám téng-siàu, khòaⁿ chhun jōa-tsōe, chīu kì tī pún-ūi ê hûn-ē. Kok-ūi tio̍h chiàu chit-ê hoat-tō͘.
Beh tùi 3897 lâi kiám 1326, khòaⁿ kai chhun jōa-tsōe; tio̍h chiong tōa siàu siá téng-bīn lia̍t, sió siàu siá ē-tóe lia̍t, u̍ih-hûn keh-kài khòaⁿ toaⁿ-ūi ê 7 kiám 6 sīn 1, tio̍h kí 1 tī pún-ūi hûn-ē; tsa̍p ūi ê 9 kiám 2 sīn 7, pah-ūi ê 8 kiám 3 sīn 5, chheng-ūi ê 3 kiám 1 sīn 2, kok tùi pún-ūi ê hûn-ē lâi kì, chīu tsai tōa siàu só͘ chhun chīu-sī 2571.
3897 1326 ———— 2571
