Pah-chiu-nı̂ Kiàn-chèǹg Koa
Chú-āu 1965 nı̂ 8 ge̍h Tē saⁿ pán
Kám-siā Siōng-tè toā in-tián
Chı̍t pah chiu-nı̂ pe̍h-oē phian
Kı̂-tó Siōng-tè bô ià-siān
Kiû Chú sù hok káng chū-jiân.
Siông-siông kı̂-tó bô hoe-sim
Kiù Chú Iâ-so͘ beh chài-lı̂m
Lán sı̀n Siōng-tè ū chek-jı̄m
Lêng-hûn bô kiù m̄-kam sim.
Siông-siông kı̂-tó chò chiàn-kah
Lán hō͘ Mô͘-kúi thài kiáu-chhá
Beh kiù tông-pau tio̍h thàn chá
Kiaⁿ i lêng-hûn siū ko͘-khoah.
Lán ê kı̂-tó tio̍h sı̍t-chāi
Goá ū keng-giām chiah ē chai
Sèng Sı̂n kap lán ū tông-chāi
Chio-ho͘ ín-chhoā lâng chiū lâi.
Lán tio̍h siông-siông lâi kı̂-tó
Gín-ná toā-soè lóng lâi o̍h
Chú ê kang-tiâⁿ lán tio̍h chò
Chiah bē ko͘-hū Chú kong-lô.
Kı̂-tó ê lâng bô hèng-chhù
Sı̀n Chú chiū-sı̄ má-hu-hu
Lêng-hûn lán tō kín cheng-chhú
Chiah bián im-kan hō͘ hoé pû.
Im-kan só͘-chāi chin kan-khó͘
Bān-hēng lán ū Chú Iâ-so͘
Thoân-tō bo̍k-su pò lán lō͘
Chiah bián tē-ge̍k lo̍h hoé-ô͘.
Khı̀ hù pau-chhia ū peh-chiah
Sı̀-pah goā lâng ê siàu-gia̍h
Tāi-ke to sı̄ lú-koán khiā
Siōng-tè sù lán chin kàu-gia̍h.
Tâi-lâm sı̍t-chāi chin chiàⁿ hn̄g
Àm-thâu chē chhia kàu thiⁿ-kng
Hoē-iú chin chē bô tè sǹg
Siū i khoán-thāi chin cha̍p-chn̂g
Cha̍p-la̍k chá-khí toā lé-pài
Bí-kok bo̍k-su khiā káng-tâi
Tâi-oân thoân-kàu toā pek-hāi
Lán ê hok-khı̀ tùi i lâi.
Lé-pài chò liáu tio̍h hioh-khùn
Thoân-tō piān-tong the̍h lâi pun
Keng chio sūn-soà pun hō͘ goán
Sió chia̍h ê lâng to ū chhun.
Chia̍h pá tio̍h khı̀ ūn-tōng tiâⁿ
Kóng hō͘ bô khı̀ ê lâng thiaⁿ
Tiān-hoé chin chē iā ū iáⁿ
Tek-á pho͘ kàu kui moá-tiâⁿ.
Siat-pı̄ ê lâng chin chiàⁿ khiáu
Choan-iōng tek-á chò í-liâu
Thâu-bé iân-soàⁿ the̍h lâi liāu
Hō͘ goá bē-hiáu tio̍h sǹg-tiâu
Hoē-iú tāi-ke chē lo̍h í
Chheng-liân lâm-lú gı̂m sèng-si
Bo̍k-su chin ē kóng tō-lí
Kóng khí tio̍h sı̄ pah chiu-nı̂.
Goā-kok ko͘-niû liân-ha̍p kóng
Hù hoē ū saⁿ-bān goā-lâng
Kám-siā Siōng-tè toā thiàⁿ-thàng
Ko-san hiaⁿ-ché chin chē lâng.
Bo̍k-su kóng liáu chiū ngiâ teng
Hoē-iú tāi-ke lóng chı̀n-hêng
Kám-siā Siōng-tè toā tek-sèng
Kong-lō͘ khı̀-chhia lóng choân thêng.
Choân-tó hun choè cha̍p-la̍k tūi
Ū chng thiⁿ-sài chin kó͘-chui
Chı̍t tâi khı̀-chhia chng chin súi
Lō͘-piⁿ ê lâng khoàⁿ kui-tui
Ngiâ-teng bē soah goá hioh-khùn
Kiâⁿ khı̀ ha̍k-hāu sı̀-koè ûn
Nn̄g-chàn bı̂n-chhn̂g pun hō͘ goán
Chin chē hoē-iú tiàm ū chhun.
Tâi-lâm goá to m̄ bat kàu
Thoân-tō chhoā goán i chò thâu
Pài-tn̂g chhı̄-lāi kiâⁿ thàu-thàu
Kap i chham-koan pah-hoè lâu.
Sin-siat kàu-hoē ū ngiâ-kı̂
Goá ū kap i giâ chı̍t-ki
Siū tio̍h tāi-hoē ê hó-ı̀
Tāi-piáu ê lâng ū niá chı̂ⁿ.
Tē-jı̄ sè-kí goá la̍k-cha̍p-it
Goá teh kóng-oē ū chiàu-sı̍t
Siūⁿ beh ı̀n pán ū siau-sit
Thâu-bé lóng sǹg ū saⁿ jı̍t.
Cha̍p-peh chá-khí lâi Ka-gı̄
Chiū lâi Soan-tō-siā thong-ti
Kóng-khí ı̀n pán ê tāi-chı̀
Sūn-piān mn̄g i loā chē chı̂ⁿ.
I kóng sǹg lán chı̍t-chheng kho͘
Kè-chı̂ⁿ m̄-káⁿ loān-loān ho͘
Kiû Chú lâi khui lán ê lō͘
Hō͘ lán m̄-káⁿ chò hô͘-tô͘.
Bô-lūn ı̀n chhut loā chē pún
The̍h hō͘ tông-pau tāi-ke pun
Lán chò sèng-kang chı̄n pún-hūn
Lán tio̍h kiù lâng ê lêng-hûn.
Kı̂-tó lán tio̍h chin phah-piàⁿ
Lâi khí kàu-tn̂g chiah ē chiâⁿ
Hui-liông bo̍k-su lóng ū iáⁿ
Goá lâi kiàn-chèng kóng lín thiaⁿ.
Bo̍k-su ài siat pò͘-tō-só͘
Siat-lı̍p tiúⁿ-ló lâi chio-ho͘
Goá sim chai-iáⁿ khı̀ chhoā lō͘
Thoân-tō sian-siⁿ ē chio-ho͘.
Cha̍p-hun só͘-chāi sı̄ soaⁿ-téng
Khı̀ siat pài-tn̂g thâu chı̍t keng
Tāi-ke hoaⁿ-hí khı̀ iā-chéng
Gióng-bōng Siōng-tè hó siu-sêng.
Jı̍t-chí teh koè ba̍k chı̍t-nih
Goá chhù lé-pài cho͘ chhit nı̂
Lé-pài ha̍k-seng chē tı̄ⁿ-tı̄ⁿ
Múi nı̂ lâng-sò͘ ū ke-thiⁿ.
Goá chhù lé-pài chin sè-keng
Sin khí pài-tn̂g lâi chı̀n-hêng
Kı̂-tó Siōng-tè ū tek-sèng
Hoē-iú tāi-ke lâi chàn-sêng.
Pài-tn̂g sı̍t-chāi khí chin súi
Sı̀-piⁿ ū khiàm chhiûⁿ-á ûi
Gín-ná chio̍h-thâu the̍h lâi lūi
Po-lê lòng-phoà chiū khek-khui.
Toh ê bo̍k-su lâi pò goán
Ài thoân tāi-tāi ê kiáⁿ-sun
Goán iōng sim-sı̂n chò chit pún
Iā ài kiù lâng ê lêng-hûn.
Pài-tn̂g tián-lé sı̄ sı̍t-chāi
Bo̍k-su hoē-iú tāi-ke lâi
Goán ū pài-tn̂g chin kai-chài
Goá nā bô kóng lín iā chai.
Tē-it sè-kí ı̀n chı̍t pài
Ū siat pài-tn̂g chit pún lâi
Lán ū Sèng Sı̂n lâi tông-chāi
Tāi-ke jia̍t-sim chiah eng-kai.
Chng-kha hoē-iú chò bē kàu
Chhı̄-lāi hoē-iú khiā iûⁿ-lâu
Hiaⁿ-ché thiàⁿ Chú chò ē kàu
Tām-po̍h kià-hù goán chng-thâu.
Ìn-pán lâi hiàn chı̍t-chheng-kho͘
Nā siu beh bé âng-mô͘-thô͘
Siâⁿ-chhiûⁿ thih-mn̂g ū kian-kò͘
Tāi-khài àn-sǹg nn̄g-bān kho͘.
Hiong-chhoan pài-tn̂g lı̄ goán hn̄g
Goán iā koan-sim lé-pài-tn̂g
Tông-pau nā beh siông-sè mn̄g
Hoan-gêng lí lâi lé-pài-tn̂g.
Kám-siā Siōng-tè chin-chiàⁿ thiàⁿ
Kı̂-tó bān-hāng hō͘ goá chiâⁿ
Lâng-lâng him-bō͘ goá hó-miā
Kap lâng khiā-khí Tāi-pak siâⁿ.
Sè-kan bān-mı̍h ē kái-piàn
Goá Chú thiàⁿ lán siōng chū-jiân
Beh chò mı̍h-kiāⁿ chin lı̄-piān
Bián chhiáⁿ khoàⁿ jı̍t lâi iân-chhiân.
Siōng-tè un-tián tē-it toā
Lâi thiaⁿ goá liām kiàn-chèng koa
Mı̂-jı̍t I ū chiàu-kò͘ goá
Bián siū tāng-tàⁿ lâi tio̍h-boâ.
Goá ài ūi Chú chò kiàn-chèng
Hām-bān boē-hiáu kóng chin bêng
Nā-sı̄ ū ha̍p lí lō͘-ēng
Kám-siā Siōng-tè bô sı̂-thêng.
Ūi Chú kiàn-chèng goá chin ài
M̄-bat Sèng-keng kóng boē lâi
Goá ū keng-giām chin choē pái
Bô saⁿ khı̀-hiâm tāi-ke lâi.
Koa-á goá sı̄ boē-hiáu liām
Kiû Chú tı̀-sek kā goá thiam
Āu-lâi chı̀n-pō͘ chiū chiām-chiām
Liām nā m̄ tio̍h kā goá hiâm.
Siōng-tè oē àm iā oē kng
Siúⁿ sù ta̍k-hāng lóng cha̍p-chn̂g
I, sı̍t, chū, hêng lán ū ǹg
Kám-siā Siōng-tè sù lán mı̍h.
Chhòng-chō bān-mı̍h kàu la̍k-jı̍t
Chhit jı̍t tio̍h siú an-hioh-jı̍t
Chit jı̍t tio̍h hiu lán ê sit
I ū pı̄-pān lán hoé-sit.
I oē chhut-jı̍t kap lo̍h hō͘
Sán-toē hō͘ I pı̀ⁿ pûi-thó͘
Só͘ chèng ngó͘-kok I chiàu-kò͘
M̄-bián hoân-ló bô siu-cho͘.
Lán chèng tiū-á kap chháu-chhài
Jı̍t pha̍k hō͘ ak toā khí-lâi
Kám-siā Siōng-tè chı̀ jı̂n-ài
Tio̍h lâi kèng-pài chiah eng-kai.
Taⁿ beh tùi thâu lâi kóng-khí
Goá pē sit-bêng hit tong-sı̂
Ô͘ Mûi sı̄ goá sió miâ-jı̄
Pêng-khe hiong sı̄ goá pún-ki.
Kóng-khí soè-hàn ê khó͘-chêng
Goá beh thiat-té liām hō͘ chheng
Goán bú siⁿ goá tı̄ soaⁿ-téng
Keng-koè la̍k-cha̍p-it nı̂ chêng.
