Lia̍t-ūi hiaⁿ-chí. Lán chū kàu-taⁿ iáu bô Pe̍h-oē-jı̄ ê koa, kiám bô kám-kak tùi kà Pe̍h-oē-jı̄ ū khùn-lân mah? Goá chin kám-kek kè-khı̀ ê sian-poè kap lāu-su ê úi-tāi, m̄-nā hō͘ goá oē hiáu Pe̍h-oē-jı̄, koh hō͘ múi chı̍t ê chhin-kūn Pe̍h-oē-jı̄ ê lâng lóng hō͘ i kap in saⁿ-bat, tı̄ chia ài piáu kúi-kù tùi in seh-siā.
Goá bat siūⁿ kóng, pa̍t ê bı̂n-cho̍k (chhiūⁿ Jı̍t-pún, Eng-kok) lóng ū in ê jı̄-bú koa, iā chin ài chit ê koa, kám-kak tùi kàu-ha̍k-siōng ke chin lı̄-piān, iā hō͘ soè-kiáⁿ á-sı̄ tú-chiah lâi o̍h tha̍k ê lâng khoài kı̀ tı̄ náu-lāi, koh ǹg-bāng hit ê hāu-kó jú-hó. Tú-tú teh siūⁿ chit ê tāi-chı̀, goán ū chhoā Chú-jı̍t-o̍h ê ha̍k-seng khı̀ Liú-goân kàu-hoē oán-chiok, khoàⁿ-kı̀ⁿ in ū án-ni choè, iā hit ê sêng-chek pí kè-khı̀ ke chin ū khoàⁿ-kı̀ⁿ chı̀n-pō͘, āu-lâi goán iā án-ni sı̍t-hêng, kó-jiân ū iáⁿ. Taⁿ goá ài chiong tùi Liú-goân kàu-hoē só͘ o̍h hit ê koa pun hō͘ tāi-ke, ǹg-bāng tāi-ke chhı̀ khoàⁿ-māi. Koh bô joā kú Chhun-kùi ha̍k-hāu iā beh kàu lah, chhiáⁿ tāi-ke ēng oán-tāi ê kè-e̍k lâi sàu-tû bûn-bông ê lâng, m̄-nā án-ni, kèng ka hō͘ khah choē lâng lâi bat Siōng-tè ê oē, sı̄ goá só͘ ǹg-bāng.
Taⁿ hit ê koa sı̄ án-ni
4/4 Key D
| 1 1 5 5| 6- 5-|
a i u e o o͘
| 4 4 3 3| 2- 1-|
chiah ê kiò choè bú-im
| 5 5 4 -| 3 3 2 -|
b ch chh g h j
| 5 5 4 -| 3 53 2 -|
k kh l m n ng
| 1 1 5 5| 6 - 5 -|
p ph s t th ch
| 4 4 3 3| 2 - 1 -|
chiah ê kiò choè chú-im
(Tâi-oân Kàu-hoē Kong-pò tē 925 hō, 1964 nı̂ 1 ge̍h)
