Chheng-liân thoân-khè ê tāi-piáu tùi Tâi-lâm ê Hā-lēng-hoē tò-lâi, ū teh pò-kò kóng, koan-hē pe̍h-oē-jı̄ ê būn-tê, ū chı̍t-pō͘-hūn ê lâng teh chú-tiuⁿ kóng, “Pe̍h-oē-jı̄ sı̄ bô pit-iàu.” Goá thiaⁿ-liáu put-chí kan-khó͘. Kóng “Pe̍h-oē-jı̄ bô pit-iàu”, chiū-sı̄ kóng “Tâi-oân oē bô pit-iàu.” In-ūi pe̍h-oē-jı̄ kap Tâi-oân sı̄ boē thang pun-lı̄-tit--ê.
Í-chêng goá iā bat thiaⁿ-kı̀ⁿ ū Tâi-oân ê chheng-liân teh kóng, “Pe̍h-oē-jı̄ ê Sèng-keng bô ha̍h-ēng; in-ūi tha̍k-liáu khah bē thang bêng-pe̍k hit ê ı̀-sù.” Goá thiaⁿ iā put-chí gông-ngia̍h, in-ūi i m̄-chai, boē thang bêng-pe̍k ı̀-sù ê goân-in, sı̄ in-ūi m̄-bat Tâi-oân oē ê iân-kò͘. I iā m̄-chai, pe̍h-oē-jı̄ ê Sèng-keng sı̄ Tâi-oân oē choè hó ê bûn-ha̍k.
Sı̍t-chāi kin-á-jı̍t ê Tâi-oân, phó͘-phiàn ê hiān-siōng; chiū-sı̄ Tâi-oân lâng boē-hiáu kóng Tâi-oân oē, iā boē-hiáu thiaⁿ Tâi-oân oē, che sı̄ chı̍t ê pi-chhám ê hiān-siōng, che chiū-sı̄ Tâi-oân 50 nı̂ kú siū Jı̍t-pún thóng-tı̄ ê kiat-kó. Jı̍t-pún lâng kı̀m-chí lán kóng Tâi-oân oē, kı̀m lán sú-iōng Tâi-oân miâ-sı̀ⁿ. In iā kı̀m-chí lán ê Chú-jı̍t-o̍h kà pe̍h-oē-jı̄. In ê ı̀-sù chiū-sı̄ kóng, lán tio̍h oân-choân kái-piàn chiâⁿ-chò Jı̍t-pún lâng, chiah ē thang tit-tio̍h seng-chûn. In siūⁿ tı̄ Jı̍t-pún tè-kok ê lāi-bı̄n, Tâi-oân lâng sı̄ bô pit-iàu. Chóng-sı̄ hiān-sı̂ í-keng bô lâng teh kı̀m-chí lán kóng Tâi-oân oē, iā bô lâng teh kı̀m lán sú-iōng pe̍h-oē-jı̄ lah, lán kiám m̄-ài tû-khı̀ chit hō pi-chhám ê hiān-siōng mah?
Ta̍k pái goá hian-khui pe̍h-oē-jı̄ Sèng-keng ê sı̂, chiū oē tit-tio̍h chı̍t khoán chhin-chhiūⁿ tı̄ lāu-bú ê heng-chêng, hit hō un-loán ê kám-kak. Chit hō kám-kak sı̄ tùi pa̍t hō bûn-jı̄ ê chheh só͘ boē thang tit-tio̍h--ê. Goá siūⁿ Tâi-oân lâng eng-kai tio̍h ēng Tâi-oân oē kı̂-tó, iā eng-kai tio̍h tha̍k pe̍h-oē-jı̄ ê Sèng-keng.
(Tâi-oân kàu-hoē-kong-pò 730 koàn, 1949 nı̂ 10 goe̍h)
