" Chhı̀-siūⁿ Pek-ha̍p-hoe cháiⁿ-iūⁿ ná toā-châng."
Chhiáⁿ khoàⁿ tē-chiūⁿ só͘ ū chiah-ê gio̍k-lâu, tâi-koh, in kiám oē ka-kı̄ chū-jiân tı̄-teh ? To̍k-to̍k sı̄ tùi huih, koāⁿ só͘ kiat-chiâⁿ--ê. Ūi-tio̍h sè-chiūⁿ bu̍t-chit ê koan-hē, soà tı̀-kàu hoè-chhím,bông-chhan; mı̂-jı̍t tio̍h-boâ lô-khó͘,kan-ta ūi-tio̍h toē-chiūⁿ ê kong-bêng,châi-pó, chiū lí kı̀-jiân ū gio̍k-lâu, tâi-koh; chek-chū choē-choē châi-bu̍t. Nā-sı̄ Siōng-tè tùi lí kóng, "Gōng-lâng ah !kim-mı̂ beh tùi lí thó lí ê lêng-hûn; chiū lí só͘ chek-thiok--ê beh kui tı̄ sím-mı̍h lâng ah ?"
“Lâng nā tit-tio̍h choân sè-kài, lâi sōng-sit i ê sı̀ⁿ-miā, ū sím-mı̍h lı̄-ek?” Sòng-hiong lâng ah! Lín bo̍k-tit ūi-tio̍h sin-khu só͘ phāiⁿ ê ka-chí lâi lâu ba̍k-sái, thı̂-khàu, iu-chhiû, khoà-lū, kia̍h-thâu khoàⁿ khong-tiong ê pe-chiáu, in bô chèng-choh, bô siu-sêng, iā bô khò͘-pâng, bô chhek-chhng, lán ê Siōng-tè siōng-chhiáⁿ teh chhı̄ in, hô-hóng lán sı̄ i ê kiáⁿ-lūi mah?
Hó-gia̍h lâng ah ! lín bo̍h-tit ūi-tio̍h oē pāi-hoāi ê gio̍k-lâu, châi-pó lâi hoaⁿ-hí khoài-lo̍k, tı̀-kàu koè-thâu khoà-lū tı̄ toē-chiūⁿ lâi sòng-sit sı̀ⁿ-miā.
Chhı̀-siūⁿ Pek-ha̍p-hoe cháiⁿ-iūⁿ ná toā-châng. I bô tio̍h-boâ bô pháng-cheh, to chhēng kàu án-ni. Tng Só͘-lô-bûn ke̍k hâng-ngó͘ ê sı̂,i só͘ chhēng--ê to m̄-ta̍t-tio̍h chit-hō hoe ê chı̍t-lúi.
Chāi-chá Chı̂n-sí-hông tng-sı̂ bat thiaⁿ-kı̀ⁿ ū chı̍t-ê tiông-seng put-ló ê sian-kéng; lāi-bı̄n ū pat-chia̍t tióng-chhun-chháu; kı̂-tiong ū put-sí-chháu, chia̍h chit-ê chiū bē sí, thang éng-oa̍h. I moá-sim him-bō͘, chek-sı̂ chhe lâng khı̀ Tong-hái chhái-chhú. Ō--ah ! Ke̍k bû-tō ê Jı̂n-kun siōng-chhiáⁿ pâu chit hō liām-thâu, beh chhoē-chhut éng-oa̍h, hô-hóng lán sió-sı̀n ê lâng mah ? Chú kóng," Bo̍h-tit ūi-tio̍h bı̂n-á-jı̍t lâi khoà-lū;in-ūi hit ê bı̂n-á-jı̍t i beh ka-kı̄ khoà-lū.Chı̍t jı̍t ê kan-khó͘ tı̄ chı̍t jı̍t kàu-gia̍h. "" To̍k-to̍k lín tio̍h kiû I ê kok, chiū chiah-ê mı̍h beh soà hō͘ lín.”
1. Khoàⁿ-kı̀ⁿ Pek-ha̍p ê sek-tı̀, Hián-chhut chò Chú toā lêng-tı̀, Sè-chiūⁿ hoe-ba̍k sui-jiân choē, Lóng-chóng m̄-ta̍t Pek-ha̍p-hoe.
2. Bo̍h-tit khoà-lū chia̍h, chhēng, ēng, Chiah-ê Chú chai lán khiàm-ēng, Chhı̀-khoàⁿ khong-tiong ê poe-chiáu, Siōng-tè hō͘ in bē gō-liáu.
3. In bô chèng-choh, bô siu-sêng, Ta̍k-jı̍t khoài-lo̍k ke̍k chū-jiân, Chhı̀-siūⁿ khòng-iá Pek-ha̍p-hoe, Toā-toā kà-sı̄ lán tāi-ke.
4. In bô tio̍h-boâ bô pháng-cheh, Sek-tı̀ iáu-kú chhin-chhiūⁿ seh, Chāi-chá hiân-ông Só͘-lô-bûn, Kim, gı̂n, kok-pó sò͘-bān kun.
5. Miâ-siaⁿ liû-chûn sù-hái lāi, Hoē-lāi toā-sè lóng bêng chai, Só͘ chhēng tiû-toān, hiah-nı̍h súi, m̄-ta̍t che hoe ê chı̍t lúi.
6. Lán lâng chiām toà tē-bı̄n chiūⁿ, Sı̀ⁿ-miā chhin-chhiūⁿ bāng chı̍t-iūⁿ, Mı̍h-sái tô͘-bô͘ tham châi-lı̄ ? Chiàⁿ-sı̄ bô ha̍p Chú kà-sı̄.
7. Sèng-chheh bêng-chài che tō-lí, Khǹg lán tāi-ke ē hiáu-lí. Bo̍h-tit koè-thâu tı̄ tē-nı̍h, To̍k-to̍k chek-chū tı̄ thiⁿ-nı̍h.
(Tâi-oân-kàu-hoē-pò tē 497 koàn, 1926 nı̂ 8 goe̍h)
