Pháiⁿ-siu-sêng bāng āu-tang

e̍k Téng-nı̂ joa̍h--lâng siu-koah ê kı̂-kan, tú tio̍h ú-kı̂, toā-hō͘ liân-soà lo̍h kúi-nā kang, chin-choē tiū-á lóng gō͘ liáu siu-koah ê jı̍t-chí. Toā-ché ê tiū-á, iā in-ūi hō͘-chúi chı̀m siuⁿ-kú, bián-kióng siu-koah liáu, koh bô jı̍t thang pha̍k, siūⁿ chı̄n pān-hoat pó͘-kiù, toā-pō͘-hūn iû-goân siⁿ-ko͘, hoat-gê. M̄-nā siu-sêng bái, koh ài sı̀-koè pài-thok chiah bē ē-chhut--khı̀, koh kan-nā bē tio̍h kong-tēng-kè ê chı̍t-poàⁿ. Toā-ché múi-pái tńg--lâi, kóng tio̍h chit-ê tāi-chı̀, nâ-âu-kńg chiū tı̄ⁿ. A-bú lóng an-ùi toā-ché kóng: “pháiⁿ-siu-sêng, bāng āu-tang. Lán chò-sit-lâng, pún-lâi chiū-sı̄ ài kap thiⁿ táⁿ-tó͘, tú-tio̍h hong-thai kap ú-kı̂ éng ē. M̄-kú, lán chò-sit-lâng, khah ū té”. Toā-ché-hu bô chàn-sêng a-bú ê kóng-hoat, chiū kóng: “Tio̍h lah! Pháiⁿ-siu-sêng bāng āu-tang lah, tān-sı̄ chı̍t-tang bāng koè chı̍t-tang, goá iā bāng kàu 40 goā beh 50 hoè ah, m̄-sı̄ lóng kāng-khoán. Khiām-chia̍h khiām-ēng, kan-nā thàn tio̍h chhı̄ kúi-ê gín-á toā-hàn. Beh khí chı̍t-keng-á phó͘-thong-chhù, tō ài kā lông-hoē tāi-khoáⁿ, hêng kúi-nı̂ ah, iáu teh thoa.” Liáu-āu toā-ché-hu kái-piàn keng-chok, thiaⁿ kóng chèng-chhài ê siu-ek iáu sǹg boē-bái, chiū iōng-sim gián-kiù án-choáⁿ chèng, án-choáⁿ koán-lí, put-toān kap ū keng-giām ê lâng thó-lūn, 5 hun-tē choân-pō͘ kái chèng-chhài. Chèng-chhài chin kāu-kang, ta̍k-jı̍t bô-sı̂ êng, bô hoat-tō͘ chhut-khı̀ choè-kang, chiū choan-sim it-ı̀ kap toā-ché chéng-lí chhài-hn̂g. Tē it pái beh chèng siáⁿ ? Toā-ché-hu kap toā-ché chham-siông liáu koh chham-siông, sǹg liáu koh sǹg, siūⁿ kóng chèng chhài-thâu ē tú tio̍h hó sı̂-ki, tān-sı̄ jı̂n-soàn put-jû sı̂-ūn, siu-sêng ê sı̂, sàng khı̀ kang-chhiúⁿ, chı̍t kong-kin bē bô chı̍t-kho͘, bián-bián kióng-kióng pún-chı̂ⁿ siu--tńg-lâi, só͘-ū tâu-jı̍p sı̂-kan kap khùi-la̍t lóng o͘-iú--khı̀. Toā-ché siūⁿ kóng, tē-it pái khah bô keng-giām, tòng-chò thàn tio̍h keng-giām tō hó! Chı̍t-chām-á ê sit-bāng liáu āu, koh chhiong-moá ǹg-bāng kái chèng ko-lê-chhài. Kiat-kó lú hāi, liân pún-chı̂ⁿ to siu boē tńg--lâi. Khut-kiông koh kò͘-chip ê toā-ché-hu, chin m̄ kam-goān, koat-sim koh chèng chı̍t-pái ko-lê-chhài. Chit-pái kè-siàu ū liô-á khah-koân, goán lóng thè toā-ché hoaⁿ-hí, kā toā-ché kún-chhiò kóng: “Chit-pái hō͘ lín teh--tio̍h ah.” Toā-ché mā hoaⁿ-hí kah, khó-sioh khı̀-hāu put-tùi, thâng-hāi koh choē, toā-toā kiám siu. Kè-sio̍k chèng-chhài neh ? Á-sı̄ koh tńg-lâi chèng tiū-á ? It-hiòng chò-sū chin-ū chū-sı̀n kap phek-le̍k ê toā-ché-hu, hoe-sim sòng-chı̀ khai-sí tiû-tû, iā sán-seng gı̂-he̍k (gı̂-būn, bê-he̍k, siūⁿ-boē-hiáu): “lán chò-sit-lâng kā lâng bé mı̍h-kiāⁿ, kè-chı̂ⁿ chāi lâng khui, chı̍t-chiam to boē-kiám--tit; lán-ê lông-sán-phín beh bē, kè-chı̂ⁿ iā-sı̄ sûi-chāi lâng hoah, chı̍t-chiam to boē-ke--tit. Chin kı̂-koài.” Tiû-tû to tiû-tû, siūⁿ-boē-hiáu to siūⁿ-boē-hiáu, chhân-hn̂g chóng boē-sái pàng hō͘ pha-hng ah! Toā-ché o̍h a-bú ê kháu-khı̀ kóng: “Pháiⁿ-siu-sêng, ko͘-put-chiong tio̍h bāng āu-tang, bô beh án-choáⁿ ?” Toā-ché-hu kám-khài kóng: “Lâng kóng liáu-chı̂ⁿ seng-lí bô-lâng chò, lán m̄-sı̄ siông-siông teh chò hihN ? pháiⁿ siu-sêng bāng āu-tang, hó lah! Bāng āu-tang lah!” (Hong-hiòng Tē 15 kı̂, 1992 nı̂ 3 goe̍h)