Phòng-thn̂g

Ū chı̍t-jı̍t ê ē-po͘, cha-bó͘-kiáⁿ hiông-hiông mn̄g goá kóng: “Pa-pa! Lí kiám bat chia̍h koè phòng-thn̂g! “ Goá thiaⁿ chı̍t-ē kiaⁿ chı̍t-tiô, “Phòng-thn̂g” chit nn̄g-jı̄ tùi goá lâi kóng í-keng sı̄ kiōng beh kap “Hoà-chio̍h” siang-khoán ı̀-sù ê mı̍h-kiāⁿ lah! Sı̄ án-choáⁿ goán cha-bó͘-kiáⁿ oē chai-iáⁿ. Goá mn̄g i, i ēng heng-hùn ê siaⁿ ı̀n kóng: “Chai no! Téng lé-pài ma-ma chai-iáⁿ ū chı̍t-ê só͘-chāi teh chò phòng-thn̂g, tiâu-kang chhoā goá khı̀ khoàⁿ, soà bé chı̍t-tè lâi chia̍h, chiok sim-sek koh chiok hó chia̍h ê.” Cha-bó͘-kiáⁿ ê chhiò-iông, chò chı̍t-khùn chiong goá ê nı̂-jı̍t giú tò-tńg-khı̀ saⁿ-cha̍p goā tang chêng, tı̄ hit-ê sı̂-tāi, gín-á bô tiān-sı̄ thang khoàⁿ, bô tiān-náu thang sńg, beh chia̍h chı̍t-tǹg chhe-chhau tio̍h tán-hāu koè-nı̂ koè-chiat, chóng-sı̄ gín-á tàu-tı̄n ê sı̂, chı̍t-ê tang-kóng-á, chı̍t-chhok thô͘-oân-á chiū oē-thang sńg kah hit-pêng thiⁿ khı̀, sin-piⁿ nā ū nn̄g-kak-gı̂n, khut-toà lō͘-piⁿ, ēng thn̂g chham chúi tò jı̍p hāu-hia, hē tiàm hang-lô͘ téng hiâⁿ hō͘ kún, jiân-āu ēng tı̄ ùn hoat-hún lā lo̍h khı̀, chı̍t-tè kim-n̂g koh kah-ba̍k ê phòng-thn̂g chiū chhut-thô͘ lah! Hit-chióng chhùi kā ka-kı̄ chú ê phòng-thn̂g ê chu-bı̄, khah hó teh chia̍h kùi kah oē kiaⁿ sí-lâng ê goā-kok liāu-lí. Goá put-chí siàu-liām hit sı̂-tāi ê gín-á nı̂. (Tâi-oân Kàu-hoē Kong-pò tē 2096 kı̂, 1992 nı̂, 5 goe̍h) (Gân Sı̀n-seng Tâi-gí Bûn-ha̍k soán, 2002 nı̂ Chin-pêng Khı̀-gia̍p Chhut-pán)