Phoaⁿ Se̍k-pin ê sió-toān

I bat chò sûn-cha 15 nı̂-kú, āu-lâi tńg-lâi chhù-nih choh-sit. Tı̄ kàu-hoē ū tng-chit chē-chē nı̂, bat chò Chip-sū, iā bat chò Tiúⁿ-ló. I ū nn̄g ê hāu-siⁿ, 5 ê cha-bó͘-kiáⁿ; hiān-sı̂ lāi-goā-sun 30-ê. I ê toā kiáⁿ-sài tı̄ La̍k-kah chò i-seng, miâ Si Chú-keh; í-keng pia̍t-sè. I ê tē-jı̄ cha-bó͘-kiáⁿ tı̄ La̍k-kah chò sán-pô. I ê tē 3 cha-bó͘-kiáⁿ kap tiōng-hu tı̄ Giâm-tiân-cho͘ teh thàn-chia̍h. I ê tē 4 kiáⁿ-sài tı̄ Tâi-oân tiān-le̍k teh hōng-chit. Tē 5 kiáⁿ-sài tı̄ Ko-hiông teh chò i-seng, miâ Gân Chhong-hoâi. (Phok-ài I-ı̄ⁿ) Lūn i ê chò lâng chin tiong-hō͘, tùi tō-lí chin jia̍t-sim, chin khó-chhú. Tı̄ pēⁿ-chhn̂g ê sı̂, phí-jı̂n siông-siông khı̀ thàm--i, khoàⁿ-kı̀ⁿ i sin-piⁿ put-sı̂ chı̍t-pún Sèng-keng. Sui-jiân tó-chhn̂g chin kú, bē khí lâi, iáu-kú o̍h Iok-pek ê khoán, jím-nāi kan-khó͘, siông-siông khoàⁿ Sèng-keng, kı̂-tó. Iā ū chı̀-goān Siōng-tè nā beh koh lâu i ê sèⁿ-miā 3 nı̂-kú, i beh hu-hū saⁿ chhoā chhut-khı̀ kan-chèng Chú ê miâ, kàu hō͘ choân chng ê lâng tāi-ke lóng bat tō-lí. Chóng-sı̄ Siōng-tè ê chí-ı̀ í-keng chiâⁿ, soah i ê tio̍h-boâ, hō͘ i éng-oán an-hioh. Toā ǹg-bāng i ê kiáⁿ-sun o̍h i ê khoán, put-lūn sím-mı̍h kéng-gū bô pàng-sak Chú. (Tâi-oân Kàu-hoē Kong-pò tē 629 hō,1937 nı̂ 8 ge̍h)