Piān chhong-bêng tı̀-hūi
Taⁿ-lūn-kàu sū,lông,kong,siong, m̄-nā chı̍t-téng-hō ê lâng, bô-koh-m̄ kok ū tı̀-hūi chhong-bêng . Chóng-sı̄ ēng ka-tı̄ ê tı̀-hūi chhong-bêng,khiok iā chin chē . Nā-m̄-sı̄ thàn in su-phian ê ı̀-kiàn, m̄-chai thang hoán-hoé ké-pı̀ⁿ,chiū-sı̄ hō͘ sè-sio̍k khı̀-sı̍p pé-pa̍k , bē-bián-tit piàn- thong . Hāiⁿ ah ! chhin-chhiūⁿ hiah-ê kóng sı̄ tı̀-hūi chhong-bêng , kiù-chin lóng bô tı̀-hūi chhong-bêng tı̄-teh . Che sı̄ sím-mı̍h iân-kò͘?To̍k-to̍k boē-bat thiaⁿ-kı̀ⁿ Sèng-keng só͘ kóng, “ Kèng-ùi Siōng-tè piān sı̄ tı̀-hūi , lı̄- khui pháiⁿ-tāi chiū-sı̄ chhong-bêng ” hit-hō ê kà-sı̄ .
Chhı̀ chiong in oá-khò ka-tı̄ ê su-sim lâi lūn , chai tha̍k-chheh-lâng lōng lâng saⁿ-kò lâi chò chn̄g-su , ǹg-bāng chia̍h pit-boé ê-chı̂ⁿ.Choh-chhân-lâng bē-hiáu poê-iúⁿ tiū-á,siông-siông pàng-teh pha- hng . Kang-hu-lâng chò-chhut kı̂-koài ı̂m-io̍k ê khı̀-kū . Seng-lí-lâng ēng pháiⁿ mı̍h ké-hoè lâi phiàn-lâng . Sı̄m-chı̀ ū- ê pàng-sak pún-gia̍p, khı̀-chia̍h gê-mn̂g pn̄g . Ū-ê hā-chiān khı̀-chò chhiong-iu lē-chut. Ū-ê ha̍k-sı̍p ı̄ⁿ-toan lâi loān hong-sio̍k . Ū-ê ha̍k-sı̍p siâ-hoat lâi bê- he̍k lâng. Chhin-chhiūⁿ chit-poè bô chiàu hoat-bûn-keng, sı̍t-chāi sǹg bē- liáu . Tāi-khài in ê sim chhin-chhiūⁿ to̍k-choâ , in ê sèng chhin-chhiūⁿ chhâi- lông , bô kèng-hōng Siōng-tè , káⁿ chò pháiⁿ-tāi . Chāi-siⁿ sui-jiân ē thang hiau- hēng thoat-lı̄ kok-hoat ê hêng-hoa̍t , sí- āu tek-khak bē thoat-lı̄-tit im-kan ê sím- phoàⁿ , ka-tı̄ khoa-kháu in ê tı̀-hūi , sû- put-ti in ê tı̀-hūi í-keng tı̂m-lûn , in ê chhong-bêng lóng ēng m̄ tio̍h lō͘ .
Che kiám m̄-tio̍h chhim-chhim khó- sioh mah ? Chiàu pún-hūn lâi kóng , tha̍k-chheh-lâng eng-kai tio̍h cheng- kong si-hù bûn-gē,choh-chhân-lâng eng- kai tio̍h thiⁿ-sı̂ bat tē-thó͘ , kang-hu-lâng eng-kai tio̍h chı̄n-la̍t keng-êng chò kang- khoè , seng-lí-lâng tio̍h bat hâng-chêng gâu sǹg-siàu lâi chò lı̄-lō͘. Chhin-chhiūⁿ che sı̄ in pún-sèng pún-hūn só͘ eng-kai ū ê tı̀-hūi, só͘ tio̍h chı̄n ê chhong-bêng, chı̄-chūi-á káⁿ kóng in m̄-tio̍h? Án-cháiⁿ-iūⁿ hō͘ khı̀-sı̍p pé-pa̍k bē-kı̀-tit in ê kin-pún, khı̀ sı̀n pu̍t-kàu thàn Ló-chú, lâi teh chia̍h chhài siu-hēng , koh ēng chhâ thô͘ lâi chò ngó͘-siōng . Siat-sú tha̍k-chheh-lâng ē chiūⁿ-koân, choh-chhân- lâng ū chhun chhek, kang-hu-lâng chin kı̂-khá, seng-lí-lâng gâu thàn chı̂ⁿ, iā put-kò sı̄ siⁿ-chêng chiām-sı̂ hióng-siū êng-hián ê hok-lo̍k, bô tek-khak sí-āu ē pó-niá in ê lêng-hûn, beh-thài ta̍t-tio̍h kèng-ùi Siōng-tè, lı̄-khui pháiⁿ-tāi , chiong-sin chheng-khı̀,hoaⁿ-hí chò sèng- kàu ê tô͘ , sí-āu seng-thian , éng-oán hióng thian-tông ê hok-khı̀ ? Che sǹg sı̄ chı̄n tı̀-hūi toā chhong-bêng lah. Goān thàn ka-tı̄ su-io̍k ê lâng iàu-kín tio̍h liōng-chá hoán-hoé ké-pı̀ⁿ , tû-khı̀ pháiⁿ ê kan-kí, koh-chài iā hó ê chéng-chí, sè- sio̍k ê pé-pa̍k tùi án-ni ē piàn-chhian , chiū jı̂n-tō koh chun-chông thian-tō, chò-hoé kiâⁿ hit-tiâu hó lō͘, kiám m̄ chin- chiàⁿ hó mah ?
(Tâi-oân Hú-siâⁿ Kàu-hoē-pò tē 113 koàn, 1894 nı̂ 8 ge̍h)