Pi-chhám ê Sió-toān

Liāu Oa̍t sı̄ Sai-lê kàu-hoē ê hoē-iú. Káu hoè chiū bô lāu-pē; lāu-bó kam-goān chiú-koáⁿ lâi khan-kiáⁿ. Kàu toā-hàn ê sı̂, ū khı̀ Tâi-lâm kap Kam Bo̍k-su, Pa Bo̍k-su, Liâm Bo̍k-su toà. Phín-hēng toan-chong, jia̍t-sim sı̀n Chú. Tı̄ An-hioh-jı̍t siông-siông àm-chı̄ⁿ khı̀ Tâi-lâm hū-kı̄n ê chi-hoē chò chú-lí, chhoā hiaⁿ-tı̄ lé-pài. Tı̄ Tāi-chèng 8 nı̂ sı̂ thâu-lō͘, tńg-lâi Sai-lê chò seng-lí. Sèng-chêng oa̍h-tāng, tı̄ siā-hoē tiong ū sı̀n-iōng; tı̄ kàu-hoē tiong tam-tng Chú-jı̍t-o̍h ê kàu-oân, ta̍uh-ta̍uh chhut-mn̂g pò͘-tō, tō-lí láu-liān, só͘ kóng hō͘ lâng ài thiaⁿ. Sui-jiân kı̄n-lâi seng-lí sit-pāi, ka-sū khùn-lân, iáu-kú chò kàu-hoē ê kang bô khah thè-pō͘. Bô phah-sǹg tı̄ 6 goe̍h 26 hō khı̀ pha-hı̂, soà hō͘ chúi kek--sí. Tng tı̄ gûi-hiám ê sı̂, goá siû oá khı̀ kiù; khó-lı̂n tı̄ saⁿ-tiâu-chúi sio-kap ê só͘-chāi, chúi chhim koh kip-lâu, goá soà hō͘ i giú-tio̍h ām-kún, kap i saⁿ-kap tı̂m. Kai-chài Thiⁿ Pē lâu goá ê sı̀ⁿ-miā, goá koh phû chhut chúi-bı̄n, chóng-si i hō͘ chı̍t-niá chhiú-bāng só͘ liân-lūi, chiū bē thang koh phû. Thèng-hāu lâng kàu, kau khí-lâi ê sı̂, í-keng koè-khùi. Saⁿ-cha̍p la̍k nı̂ koè chı̍t-sı̀-lâng. Chhám-ah! pàng i siú-chiat pe̍h thâu-mn̂g ê lāu-bó, 68 hoè; kap bó͘ kap saⁿ-ê sè-sè-hàn ê kiáⁿ, thı̂-thı̂ khàu-khàu. Hit ê-hng sin-si kàu-ūi ê sı̂, tiàm lāi-goā lâng-soaⁿ lâng-hái; ū ê an-ùi i ê lāu-bó, ū-ê phō i ê thâu-khak thı̂-khàu; lâng lâng kóng, Bô chhái! Thêng tia̍p-á-kú kàu-hoē goā ū chin-chē lâng the̍h chı̂ⁿ lâi beh chò i ê song-hùi;in-ūi chai i ê ka-kè khùn-lân, sí-lo̍h lóng khang-khang; koh hoē-lāi iā chin tông-chêng iû-goân saⁿ-kap chhut-chı̂ⁿ, só͘-í tı̄ 27 hō ē-po͘ pı̄-pān hó-sè kā i an-chòng. Chit-tia̍p i ê ke-āu chiām-sı̂ an-tùn, hoē-lāi hoē-goā ê lâng ū teh kā i tàu phah-sǹg tio̍h àn-choáⁿ ı̂-chhı̂. Tha̍k-tio̍h chit chām Sió-toān ê hiaⁿ-ché ah! Ǹg-bāng lín ūi-tio̍h chit-ke lâi tông-chêng, tı̄ kı̂-tó-tiong saⁿ siàu-liām. Goān Thiⁿ Pē khui-lō͘ an-ùi. (Tâi-oân Kàu-hoē-pò tē 473 koàn, 1924 nı̂ 8 ge̍h)