Poàⁿ-au Ka-pi ê Chu-bı̄

Goá chē tı̄ chhan-thiaⁿ lāi-té, toh-téng sı̄ chı̍t-au ka-pi kap chı̍t-tui chheh. Goā-kháu teh lo̍h-hō͘, thiaⁿ kóng sı̄ hong-thai beh lâi, ta̍k-ê lóng gia̍h hō͘-soàⁿ. Ùi toā-mn̂g jı̍p--lâi, tò-chhiú-pêng sı̄ pa-tâi, chiàⁿ-chhiú-pêng pa-tâi tùi-bı̄n ê piah, tiàu chı̍t-tè chiok toā-tè ê kiàⁿ. Goá chē tı̄ chit-ê ūi, tú-á-hó ē-tàng thàu-koè kiàⁿ ê hoán-siā, khoàⁿ-tio̍h pa-tâi, mā khoàⁿ-tio̍h i tı̄ pa-tâi āu-piah. Ū tang-sı̂-á, i teh bô-êng, thâu lê-lê, khoàⁿ bē tio̍h i ê bı̄n; êng ê sı̂-chūn, i khiā tı̄ hia m̄-chai teh siūⁿ siáⁿ. Nā chún-kóng, i teh khoàⁿ tùi-bı̄n piah-téng ê kiàⁿ, goá thâu tō khah kín oa̍t tùi piⁿ--á khı̀, kiaⁿ hō͘ i chai-iáⁿ goá teh thau-khoàⁿ. Chit-má i teh chú ka-pi, toh-téng chit-au èng-kai mā sı̄ i chú--ê. Chē tı̄ kiàⁿ ē-kha hit-toh ê sió-chiá kā goá gı̂n, ún-tàng tòng-chò goá sı̄ teh khoàⁿ--i. I ū khoàⁿ--goá? I bô khoàⁿ--goá? Toh-téng ê ka-pi koh chhun poàⁿ-au iáu-boē lim. Tùi i lâi kóng, chit-au kap pa̍t-au sio-siâng, kan-taⁿ sı̄ i ê khang-khoè, hō͘ siáng lim lóng bô chha, hoâiⁿ-tı̍t chú ê lâng poàⁿ-mı̂ a̍h bē sit-bı̂n--a. Chú-hó ê ka-pi khǹg tı̄ pa-tâi téng, Waiter ē phâng khı̀ hō͘ siáng--leh? Phâng hō͘ siáng lóng kāng-khoán, sı̂-kan kàu i tō hā-pan--a. I tha̍h chı̍t-niá hiû-á, hō͘-soàⁿ the̍h--leh, lı̄-khui pa-tâi, lı̄-khui chhan-thiaⁿ. Goā-kháu ê hō͘ khai-sí kiò, léng--khı̀ ê ka-pi tang-sı̂ ē cháu-bı̄--leh? Goá chı̍t-chhùi lim hō͘ ta, gia̍h chı̍t-ki pit, khai-sí o͘-pe̍h chu̍t. (TGB Thong-sı̀n tē 27 kı̂, 2001 nı̂ 12 goe̍h)