Poàⁿ-mê sı̂-chūn
Goá ùi chháu-tē tńg--lâi
Toā-lō͘-téng choē-choē KTV
Kah-ná leh hoé-sio
Poàⁿ-mê sı̂-chūn
Goá àn chng-kha tńg--lâi
Keng-koè ah-thâu ke-kiān ló͘-bı̄ tiàm
Ou-tó͘-bái
Thêng tı̄ toā-lō͘ piⁿ
Moá-moá-moá
Láu-pán--á
Be̍h-á-chiú chı̍t koàn
Sūn-soà chhiat chı̍t-poâⁿ ti-sim ti-koaⁿ
Saⁿ-kiⁿ-poàⁿ-mê ê toā-lō͘-téng
Ū kè-thêng-chhia leh paⁿ-paⁿ-paⁿ
A̍h ū lâng khiâ ki-chhia
Ná leh chhoē lāu-pē
Kui-lō͘ it-tı̍t kiò
A-pa a-pa
Ha̍k-hāu piⁿ ê KTV
Mn̂g-kháu ê hoe-kho͘
Pâi kúi-cha̍p kong-chhioh lō͘
Chhı̄-tióⁿ gı̄-tióⁿ lı̍p-úi kok-tāi gı̄-oân
Ta̍k-ê lóng lâi kā i chiok-hok
Poàⁿ-mê ê sı̂
Koà kim koà gı̂n
Koà soān-chio̍h ê KTV
Oá tı̄ “Tâi-oân bûn-hoà kó͘-to͘”
Tang-khu Tong-kong kok-sió ê sin-khu-piⁿ
Gia̍h-tio̍h hoe-hoe-hoe
Lāi-lāi-lāi ê to-kiàm
Hiòng bô-oē-bô-kù ê Thiⁿ-kong-peh--á
It-tı̍t leh iāu-bú-iông-ui
Poàⁿ-mê sı̂-chūn
Goá àn chng-kha tńg--lâi
Toā-keng toā-keng ê KTV
Khiā tı̄ tiām-tiām ê ha̍k-hāu piⁿ
Siàu-iâ kong-chú
Hiòng lō͘-teng
Hiòng goe̍h-niû
Hiòng só͘-ū iâu-oán ê thiⁿ-chhiⁿ
Kóng: Hoan-êng koang-lı̂n
