Po͘-siā Thó͘-húi

Po͘-siā ū piàn-chhian, chiū-sı̄ Se-le̍k 7 goe̍h 11 jı̍t Po͘-siā ê Jı̍t-pún koaⁿ-oân kap kun-hu thàu-mê lóng ū tô-cháu khı̀ Pak-káng-khe. Sı̄ in-ūi tùi pa̍t só͘-chāi ê tē-hng ū chē-chē ê thó͘-húi lâi ài-beh thâi in. Iā tı̄ Chı̍p-chı̍p-ke ū hiàn-peng 18 miâ chò chı̍t-sı̂ lóng hō͘ thó͘-húi thâi- sí, iā oá Po͘-siā ê Gō͘-siâⁿ-pó ū siú-pı̄-tūi ê sûn-sàu-peng hō͘ thó͘-húi thâi-sí 7 lâng. Koh hiàn-peng chô-tiúⁿ chı̍t miâ siū tāng-siong. Tùi chiah ê tāi-chı̀ Po͘-siā ê koaⁿ-hú chiū lóng pàng-sak in ê mı̍h- kiāⁿ chò in thàu-mê tô-cháu. Án-ni-seⁿ Po͘-siā chin loān, thó͘-húi chin chē lâi chhiúⁿ Jı̍t-pún lâng ê mı̍h, soà thiah gê- mn̂g, iā tiān-soàⁿ-phoe lóng chām-tn̄g phah-hāi, hoān-nā koaⁿ-hú só͘ ū--ê lóng siū hùi-hoāi.

Kàu 7 goe̍h 17 jı̍t, Jı̍t-pún kun-tūi, toā-tūi kàu Po͘-siā-siâⁿ thó͘-húi ū hō͘ Jı̍t- pún peng thâi-sí iok-lio̍k 120 lâng, kı̂- û ê thó͘-húi pāi-tı̄n sı̀-soàⁿ tô-cháu jı̍p-soaⁿ. Kàu tı̄ 19 jı̍t kap 20 jı̍t, thó͘-hoa̍t-tūi ê peng ū chhut siâⁿ sio kè-kiōng 17 chng. Ū kúi-nā chheng lâng tô-cháu jı̍p-soaⁿ, bô bí-niû thang chia̍h, teh chia̍h chhiū-chí kap chhiū-hio̍h, gō-sí--ê chin chē, iā ū-ê tı̄ soaⁿ-nı̍h soà hō͘ chheⁿ-hoan thâi-khı̀. Tùi kúi-nā nı̂ hoán-loān ê sū Po͘-siā sǹg sı̄ pêng-an, chóng-sı̄ chit pang thó͘-húi heng-khí jiáu-loān, Po͘-siā lâng tú-tio̍h kan-khó͘ chhi-chhám kóng bē- liáu, kóng bē chı̄n lah!

Chóng-sı̄ lán kàu-hoē hiaⁿ-tı̄ thang toā-toā kám-siā Siōng-tè, in-ūi tı̄ choa̍t- bāng ê tiong-kan Siōng-tè ū chhun I ê chhiú lâi kiù I ê peh-sèⁿ, chiū-sı̄ chiong Jı̍t-pún tāi-jı̂n chhim-sı̀n jı̍p Iâ-so͘-kàu ê lâng bē-ē kap in chò tùi-te̍k lâi kè-bô͘ kok-tō͘ ê sū. Tùi án-ni oá-kı̄n lé-pài-tn̂g kı̄n-hū chng iā bô sit-lo̍h chı̍t lâng. Chia ê kàu-hoē goá khoàⁿ ū lio̍h-lio̍h-á khah oa̍h-tāng chı̀n-pō͘ ê khoán. Hiān-sı̂ Po͘-siā ê chêng-iû chiū-sı̄ án-ni.

(Tâi-lâm Hú-siâⁿ kàu-hoē-pò tē 135 koàn, 1896 nı̂ 6 ge̍h)