Puigcerda Noevo 02

Jı̄ Joan chē tı̄ chhan-thiaⁿ lāi-té, toh-á-téng ū chı̍t-tè sandwich kap chı̍t-poe ka-pi, m̄-koh i lóng bô chhùi-táu, kan-taⁿ ba̍k-chiu kim-kim, chù-sı̂n teh khoàⁿ tiān-sı̄ sin-bûn. I chha-put-to saⁿ-cha̍p goā hoè, sin-châi kiat-sı̍t, in-ūi i ài peh-soaⁿ, siû-chúi, só͘-í phoê-hu sı̄ chhin-chhiūⁿ be̍h-á hit-khoán ê sek-chúi, bı̄n--nı̍h koà chı̍t-ki ka-pi-sek sok-ka-kheng ê ba̍k-kiàⁿ, nn̄g-pêng ê chhùi-phé khoàⁿ ē tio̍h khau bô chheng-khı̀ thàu pı̀n-chhiu ê hûn-jiah; phı̄ⁿ-á tok-tok, lâng seⁿ-tio̍h chin iân-tâu. “Lán jı̂n-lūi mài koh hō͘-siong giâu-gı̂, hō͘-siong siong-hāi--ah, sè-kài chiah chı̍t-sut-á toā, ūi-sím-mı̍h liân chhùi-lāi-bah mā teh iah-lâi pō͘, put-sı̂ teh thún-ta̍h lán ê hiaⁿ-tı̄, put-sı̂ teh khêng-hun?” Chı̍t-ê thâu-mo͘ o͘-sı̀m-sı̀m ê tiong-liân-lâng teh chiap-siū kı̀-chiá hóng-būn. Kin-á-jı̍t ê tiān-sı̄ sin-bûn chin lāu-jia̍t, in-ūi ū nn̄g-ê siū-tio̍h kui-ê Catalona chù-ı̀ ê àn-kiāⁿ tı̄ kāng chı̍t-kang beh sím-phoàⁿ, chı̍t-ê sı̄ kun-jı̂n Hugo Ferro, chı̍t-ê sı̄ chêng-pò jı̂n-oân Gabino Lara. Hugo in-ūi kū-choa̍t chiap-siū chiàn-tàu hùn-liān, koh phò-hoāi bú-khı̀ siat-pı̄, teh beh chiap-siū kun-sū hoat-têng ê sím-phoàⁿ; Gabino sı̄ in-ūi hiòng goā-kok lāu-sià chêng-pò, mā hō͘ kiám-chhat-koaⁿ àn phàn-kok-choē khí-sò͘. “Joan! Chia̍h-pá--boē?” Alonso kiâⁿ-koè i ê sin-khu piⁿ, teh kā sio-chioh-mn̄g, Alonso sı̄ Joan tı̄ lāi-kho ê tông-sū, lâng seⁿ chò khún-thâu khún-thâu, bı̄n ı̂ⁿ-ı̂ⁿ, bı̄n-sek âng-ko chhiah-chhih, put-sı̂ mā bı̂-bı̂-á teh chhiò, seⁿ-sêng sı̄ chı̍t-ê thiòng-siā-á, i pí Joan chá poàⁿ-nı̂ jı̍p-lâi chit-keng pēⁿ-ı̄ⁿ, kap Joan kám-chêng iáu sǹg bē-bái. “Chia̍h bô siáⁿ ē loeh.” Joan àⁿ-thâu khoàⁿ toh-á-téng ê sandwish kap ka-pi kóng. “Án-choáⁿ, teh kiám-pûi--oh?” Alonso poàⁿ-kún-chhiò, kóng soah, oāⁿ chı̍t-ê giâm-siok ê piáu-chêng, “Joan, téng-kái hit-ê àn-kiāⁿ, ū sím-mı̍h kiat-kó chhut--lâi ah bô?” “In-ūi ka-sio̍k kian-chhı̂ beh kò, koh ui-hia̍p kóng beh kā pēⁿ-ı̄ⁿ kap ı̄ⁿ-tiúⁿ lóng kò chham--loeh. Pún-té ı̄ⁿ-tiúⁿ siūⁿ beh thè goá oân--ê, chit-má khoàⁿ--khí-lâi” Joan thó͘ chı̍t-kháu-khùi, “goá iah-sı̄ tio̍h sı̂ thâu-lō͘--ah.” Alonso kā chhiú hē tı̄ Joan ê keng-kah-thâu kā so-so-leh, kóng: “Joan, sui-bóng kóng goá chò bē kàu, m̄-koh goá khak-sı̍t chin phoè-ho̍k lí ê ióng-khı̀, lūn-chin kóng, lí ū-iáⁿ hō͘ goá siūⁿ chin chē, i-seng ê choan-gia̍p, chò-lâng ê thāi-tō͘, jin-seng-koan téng-téng; tı̄ chit-kiāⁿ tāi-chı̀, goá bô hoat-法tō͘ kā lí tàu chih-la̍t, kan-taⁿ ē-sái kā lí kó͘-lē, m̄-thang sit-chı̀, goá éng-oán sı̄ lí ê hó pêng-iú.” Joan kā chhiú hē tı̄ i ê chhiú bı̄n-téng, chhùi ngiauh--chı̍t-ê, tı̀m-thâu piáu-sı̄ kám-siā, Alonso bô koh kóng siáⁿ tō lı̄-khui. Joan chē tı̄ hia, koh khai-sí siūⁿ-tio̍h saⁿ-kang chêng siōng-boé chı̍t-kái ê loē-pō͘ sím-cha hoē-gı̄. “Goá chín soan-pò͘ hoē-gı̄ khai-sí, chhiáⁿ hù-ı̄ⁿ-tiúⁿ seng soeh-bêng chit-kái hoē-gı̄ ê bo̍k-tek kap chı̀n-hêng ê hong-sek.” Īⁿ-tiúⁿ khin-khin-á sàu--chı̍t-ê liáu-āu khai-sí kóng-oē. Hoē-gı̄-sek sı̄ tı̄ pēⁿ-ı̄ⁿ ê cha̍p-saⁿ-lâu, kap ı̄ⁿ-tiúⁿ ê pān-kong-sek tı̄ kāng chı̍t-lâu, chit-ê hoē-gı̄-sek ū chı̍t-pêng bı̄n-tùi goā-kháu, nā khoàⁿ tùi liân-chò kui-phı̀ⁿ ê po-lê-thang chhut--khı̀, ē-tàng khoàⁿ-tio̍h kui-toā-phı̀ⁿ ê chhı̄-khu. Hit-kang hó-thiⁿ, m̄-koh in-ūi thiⁿ-khı̀ liâng-liâng, só͘-í kha-tián bô pàng--lo̍h-lâi, jı̍t-chhiu chhiō tı̄ hoē-gı̄-sek lāi-té, hō͘ lâng kám-kak sim-koaⁿ chheng-iu, chóng--sı̄ chit-kái hoē-gı̄ ê chú-tê, sı̍t-chāi hō͘ lâng sim-koaⁿ-thâu bē khin-sang--tit. “Īⁿ-tiúⁿ, Oe-seng-pō͘ ê Villa sian-siⁿ, Patricia ê ka-sio̍k, koh ū chāi-tiûⁿ ê úi-oân, lán kin-á-jı̍t tı̄ chia sı̄ beh thó-lūn koan-ı̂ lāi-kho i-seng Joan Lorca tùi hoān-chiá Patricia ê i-liâu hêng-ûi choè-āu chı̍t-kái ê sím-cha.” Hù-ı̄ⁿ-tiúⁿ iáu bē-chêng kóng-soah, hit-ê ū-hoè ê cha-bó͘-lâng, Patricia ê lāu-bú, sûi toā-la̍t “póng” chı̍t-siaⁿ kā toh-á tǹg--lo̍h-khı̀, tùi í-á peh--khí-lâi hoah kóng: “Lín chia lóng bô tam-niá--ê lah! I hāi-sí goá ê cha-bó͘-kiáⁿ, tio̍h-ài lia̍h-khı̀ koaiⁿ, thoa-khı̀ chhèng-sat!” Chit-ê cha-bó͘-lâng ok-khia̍k-khia̍k kā chē tı̄ chhoa̍h-tùi-kak ê Joan tı̍t-tı̍t gı̂n, Joan thâu-lê-lê lóng bô-taⁿ, bô joā kú, cha-bó͘-lâng sûi toā-siaⁿ háu--chhut-lâi, “Patricia...Patricia...ma-ma ê sim-koaⁿ pó-poè--ah...” Chē tı̄ i piⁿ--á ê lâng it-tı̍t kā an-tah, kā i chhah--khí-lâi, hû i khı̀ goā-kháu hioh-khùn. “Joan, che sı̄ lí siōng-boé chı̍t-kái ūi ka-tı̄ piān-kái ê ki-hoē, kin-á-jı̍t koaⁿ-oân mā lâi tı̄ chia, lí koh ū sím-mı̍h oē beh kóng--bô?” Īⁿ-tiúⁿ mn̄g Joan. Joan hioh chı̍t-khùn-á chiah kóng: “Īⁿ-tiúⁿ, Villa sian-siⁿ, hù-ı̄ⁿ-tiúⁿ, chāi-tiûⁿ ê úi-oân, kı̂-sı̍t goá goân-té bô chún-pı̄ beh kóng siáⁿ-hoè--ah, m̄-koh kı̀-jiân Villa sian-siⁿ lâi tı̄ chia, goá tō koh kā goá ê lı̍p-tiûⁿ koh kóng chı̍t-kiàn.” “Goá hoán-tùi tùi pēⁿ-lâng ún-moâ pēⁿ-chêng, goá jı̄n-ūi láu-sı̍t kā pēⁿ-lâng kóng, hō͘ in chai-iáⁿ ka-tı̄ ê chêng-hóng sı̄ in ki-pún ê koân-lı̄, nā beh ēng pe̍h-chha̍t lâi hō͘ pēⁿ-lâng ū ké-iáⁿ ê sı̀n-sim, goá sı̄ m̄-khéng án-ne choè--ê, goá mā m̄-sı̀n kóng hit-khoán hau-la̍k-oē ē-tàng hō͘ pēⁿ-lâng sím-mı̍h pang-chān.” “Joan, lí kám chai-iáⁿ chū-chiông lí kā Patricia kóng i sı̄ tē-saⁿ-kı̂ ê khan-ha̍t, jı̂-chhiáⁿ í-keng thoàⁿ kah kui sin-khu liáu-āu, i ê pēⁿ-chêng liam-piⁿ kín-chia̍p hoán-chèng, goân-té keng-koè tı̄-liâu, pān-phoe iáu ū poàⁿ-nı̂ ê sı̂-kan, kiat-kó i nn̄g lé-pài tō lâi chū-sat, che lí kám chai?” Īⁿ-tiúⁿ koh mn̄g. “Īⁿ-tiúⁿ, goá jı̄n-ūi he sı̄ in-ūi lán bô hō͘ i kiàn-lı̍p chèng-khak ê sı̀n-sim, i chiah ē loé-chı̀, hoán kah chiah-nı̍h kín, goá jı̄n-ūi i-liâu choan-gia̍p tio̍h-ài pau-khoah hō͘ pēⁿ-lâng tùi ka-tı̄ ê pēⁿ, tùi jı̂n-seng kap seⁿ-sí ê ı̀-gı̄, lóng ài ū ka-nn̂g ê liáu-kái, m̄-sı̄ kan-taⁿ ēng ki-su̍t kā sè-khún kap pēⁿ-to̍k thâi--sí, kā bah liô--khí-lâi án-ne niā-tiāⁿ, koh keng-ka m̄-sı̄ oá-khò kā pēⁿ-lâng am-khàm pēⁿ-chêng, kóng pe̍h-chha̍t-oē...” “Hó--ah!” Īⁿ-tiúⁿ bô tán Joan kóng-soah, tō kā chó͘-tòng, “Goá siūⁿ gún tāi-ke lóng í-keng chin liáu-kái lí ê khoàⁿ-hoat--ah. Chhiáⁿ chāi-tiûⁿ ê úi-oân lóng oá--lâi, chò chı̍t-ê choè-āu ê koat-tēng.” Joan chē tı̄ āu-piah, khoàⁿ-tio̍h in ûi tı̄ thâu-chêng chhi-bú-chhı̄-chhū kóng sè-siaⁿ-oē, kám-kak ka-tı̄ bē-su sı̄ lâi tı̄ ti-chhı̄ ê ti-á, teh tán lâng chhut-kè koat-tēng i ê miā-ūn. Gō͘ hun-cheng āu, tāi-ke lóng chē tńg-lâi goân-té ê ūi. “Hù-ı̄ⁿ-tiúⁿ, kiat-kó tō hō͘ lí soan-pò͘.” Īⁿ-tiúⁿ bô-ài chò pháiⁿ-lâng. Hù-ı̄ⁿ-tiúⁿ kā ı̄ⁿ-tiúⁿ khoàⁿ--chı̍t-ê, bô tâ-oâ kóng: “Koan-ı̂ lāi-kho i-seng Joan Lorca tùi pēⁿ-lâng Partricia ê i-liâu hêng-ûi kiám-thó-àn, úi-oân-hoē it-tı̀ koat-gı̄, Joan Lorca in-ūi giâm-tiōng ê sit-chhò, tùi āu lé-pài khí thêng-chí gia̍p-bū chı̍p-hêng, tán-thāi Oe-seng-pō͘ chı̀n-chı̍t-pō͘ ê koat-tēng.” Joan chai-chai--leh, só͘-í i thiaⁿ-tio̍h chit-ê koat-tēng ê sı̂, sim-lāi pēng bô kám-kak chin ı̀-goā, tāi-ke kiâⁿ-chhut mn̂g-chhùi ê sı̂, ı̄ⁿ-tiúⁿ koh thiau-kang oá-lâi ēng chhiú kā tah kha-chiah-phiaⁿ, kóng chı̍t-koá liông-khiang-á oē, hō͘ i ke chiâⁿ chhiah-ia̍h. (Tâi-bûn Bóng-pò tē 100~102 kı̂, 2005 nı̂ 1~3 goe̍h)