Puigcerda Noevo 06

La̍k Nn̄g-ê chhēng o͘-sek kín-sin-á, chhiu sa chhèng ê lâng tı̄ poàⁿ-mê nn̄g-tiám liam-kha-neh-chhiú lâi-kàu tı̄ chı̍t-ê kong-ú ê sı̀-lâu, in hó-lé-á kā mn̂g kiāu--khui, āu-piah hit-ê lâng soah bô-tiuⁿ-tı̂ khı̀ khê tio̍h koà tı̄ mn̂g-piⁿ ê hit-tè “Ka-nn̂g i-tı̄ ūn-tōng ki-kim-hoē” ê khang-pan, khang-pan “khiang” chı̍t-siaⁿ kui-ê lak loeh thô͘-kha. Alonso chū-chiông lâi kā Joan ê ki-kim-hoē tàu-saⁿ-kāng, tō lóng chioh khiā tı̄ hia. Ｉ poàⁿ-mê thiaⁿ-tio̍h koài-siaⁿ, tùi bı̂n-chhn̂g peh khí-lâi sûn, tú kiâⁿ chhut-lâi kàu pān-kong-sek, sûi hō lâng tùi bı̄n hiông-hiông bok--loeh, kui-ê lâng siak tı̄ thô͘-kha, kan-taⁿ khoàⁿ-tio̍h chı̍t-ê lâng the̍h chhiú-tiān kā chhiō, mn̄g kóng: “Lí sı̄ m̄-sı̄ Joan Lorca?” Alonso chhiⁿ-tiāⁿ pe̍h-tiāⁿ hō͘ chhiú-tiān chhiō kah ba̍k-chiu peh lóng bē kim, chhiú kā bı̄n bong--chı̍t-ē, tâm-kô͘-kô͘, lóng sı̄ hoeh. “M̄-sı̄, goá sı̄ Alonso, lín sı̄ siáⁿ-lâng--ah?” Lēng-goā chı̍t-ê chhēng o͘-saⁿ ê lâng mā the̍h chı̍t-ki chhiú-tiān sı̀-koè chhiau-tang chhiau-sai, péng kah loān-chhi-pa-chau. “Lí m̄-thang siūⁿ-khang siūⁿ-phāng,” The̍h chhiú-tiān kā chhiō ê hit-ê lâng kā chhiú--nı̍h ê chhèng tùi Alonso koh siòng-chún, kā kéng-kò, “Joan chit-má lâng tı̄ tó-ūi?” “Lín chhoē lí-sū-tiúⁿ beh chhòng--siáⁿ? I lâng bô tı̄ chia--lah.” Alonso hō͘ lâng án-ne háⁿ-heh, kāng-khoán chin pa-kiat. “Sí-ah-á ngē chhùi-poe!” Hit-ê chhēng o͘-saⁿ ê lâng ēng chhèng tùi Alonso ê chiàⁿ-pêng bı̄n khà--loeh, “sím-mı̍h leh ka-nn̂g i-tı̄, kin-pún sı̄ kap kı̂-thaⁿ thoân-thé liân-ha̍p--khí-lâi, beh tı̄ siā-hoē sam-pan kiáu-ke.” Alonso thâu-gia̍h-koân kā chı̂n, “Gún tàu-té sı̄ chò sím-mı̍h tāi-chı̀ hō͘ lín chiah chhiah-ia̍h, gún chí put-kò hi-bāng i-seng kap pēⁿ-lâng chi-kan ē-tàng láu-sı̍t sio-tùi-thāi, hō͘ pēⁿ-ı̄ⁿ tùi pēⁿ-lâng ê i-liâu pau-khoah sin-thé kap sim-lí...” “Hó--ah!” Chit-ê chhēng o͘-saⁿ--ê toā-siaⁿ kā tòng, “Taⁿ lâng ê sim-sèng sı̄ sím-mı̍h sı̂-chūn piàn kah chiah kiông--ah? Cha-po͘ khı̂ⁿ-kô͘, cha-bó͘ giám-ngē, ē-tàng bı̄n-tùi hiān-sı̍t, goá thiaⁿ lí teh kóng hàm-kó͘! Lâng nā ū hiah gâu, chit sè-kan bē-chiú--ê lóng bô seng-lí--ah lah, i-seng siōng tiōng-iàu--ê tō-sı̄ hō͘ pēⁿ-lâng hó--khí-lâi, ēng io̍h-á mā hó, ēng pe̍h-chha̍t mā hó, hō͘ pēⁿ-lâng ū ı̀-hiòng thang khah pa-kiat--leh.” I oa̍t-thâu mn̄g lēng-goā hit-ê lâng kóng, “Ū chhoē tio̍h miâ-chheh bô?” Alonso thàn i bô chù-ı̀, hoan-chhiú peh--khí-lâi, siūⁿ beh tùi āu-piah-mn̂g cháu--chhut-khı̀, hit-ê chhēng o͘-saⁿ--ê hoat-hiān chin siū-khı̀, “Lí kā goá tòng--leh, goá beh khui-chhèng--ah oh!” Pān-kong-sek ê chit-ê hāng-lō͘ tı̍t-chiap thàng túi āu-piah-mn̂g, Alonso phiân-phiân-tó-tó chông lâi-kàu mn̂g-kha-kháu, chhun-chhiú beh chūn mn̂g-piáⁿ, “Bē-sái hō͘ i cháu--khı̀!” Teh chhiau mı̍h-kiāⁿ hit-ê lâng toā-siaⁿ hoah, lēng-goā hit-ê lâng gia̍h chhèng siòng-chún, “phiù, phiù, phiù” ū chng bia̍t-siaⁿ-khı̀ ê chhèng tı̄ àm-so-so ê khong-khı̀ tiong phùn-chhut hoé-chhiⁿ. “Ū-lâng tı̄ teh bô?” Thâu-chêng-mn̂g ū-lâng teh hoah-hiu, nn̄g-ê chhēng o͘-saⁿ ê lâng hō͘-siong sái chı̍t-ê ba̍k-boé sûi lòng tùi āu-piah-mn̂g chhut--khı̀. A-tek tùi soaⁿ-téng chı̍t-lō͘ koáⁿ lo̍h-soaⁿ, lâi-kàu ki-kim-hoē, soah khoàⁿ-tio̍h mn̂g khui-khui, i jı̍p-lâi chı̍t-ê khoàⁿ, kan-taⁿ khoàⁿ-tio̍h nn̄g-ê o͘-iáⁿ cháu tùi āu-piah-mn̂g chhut--khı̀, kui-chhù-kneg í-keng lóng hō͘ lâng péng kah loān-chhau-chhau, i o͘-àm-bong, kā tiān-hoé chhı̍h to̍h, koè chı̍t-khùn chiah khoàⁿ-tio̍h tó tı̄ āu-piah-mn̂g piⁿ ê Alonso. “Lí bián kiaⁿ, goá sı̄ Joan ê pêng-iú, lí ū án-choáⁿ--bô?” A-tek kín cháu-koè kā khoàⁿ, Alonso sin-khu téng ū nn̄g-ê khang-chhùi, hoeh-chúi chham-chham-lâu. “Mâ-hoân lí...it-tēng...ài khı̀ ‘Saint Fulgentius pēⁿ-ı̄ⁿ’ kiù Ngô͘ phok-sū... Silvio Ngô phok-sū...” Alonso ná kóng ná tùi lak-tē-á jı̂m chı̍t-ki só-sı̂ hō͘ A-tek, bē-hù koh kái-soeh tō tn̄g-khùi--ah. A-tek ē tı̄ saⁿ-keⁿ mê-poàⁿ lo̍h-soaⁿ lâi-kàu chia, sı̄ in-ūi siū-tio̍h Milagros ê pài-thok lâi chhoē Joan--ê, chū-chiông cho̍h--jı̍t ū-lâng tńg-lâi Puigcerda Noevo, kóng chèng-hú beh tùi in chiah-ê lâng put-lı̄, hong-siaⁿ tō khai-sí thoân kah chhiâng-chhiâng-kún, m̄-koh Milagros khah hoân-ló tı̄ soaⁿ-kha Joan ê an-choân, só͘-í chhiáⁿ A-tek it-tēng ài koáⁿ lo̍h-soaⁿ khı̀ chhoē Joan. A-tek sı̀-koè mn̄g bô Joan ê hā-lo̍h, kui-khı̀ ná mn̄g “Saint Fulgentius pēⁿ-ı̄ⁿ”, bô-lūn án-choáⁿ i tùi Ngô͘ Kok-sêng chit-ê toā-lia̍p-lu sı̍t-chāi chin hò͘-hiân tı̄ teh, jı̂-chhiáⁿ kóng--khí-lâi, sǹg-sı̄ hiong-chhin, bô kiàn-sí put-kiù ê tō-lí, chóng--sı̄ i sı̄ goā-ūi-á lâng, kan-taⁿ khò i thiaⁿ-tio̍h--ê chit-ê miâ beh chhoē chı̍t-keng pēⁿ-ı̄ⁿ, khak-sı̍t bē-su hái-té bong-chiam--leh. Nā chiàu tı̄ lō͘--nı̍h mn̄g lâng ê hoán-èng khoàⁿ--khí-lâi, chit-keng pēⁿ-ı̄ⁿ phah-sǹg m̄-sı̄ tı̄ chit-ê siâⁿ-chhı̄, in-ūi tāi-ke chı̍t-ê thiaⁿ--tio̍h, lóng kám-kak bô siáⁿ ı̀n-siòng. Keh-tńg-kang chái-khí, i àn-sǹg beh khı̀ chhoē khoàⁿ ū só͘-chāi thang hó chiūⁿ-bāng go͘gle--chı̍t-ê bô. Ná teh kiâⁿ ê sı̂, khı̀ siam tio̍h lō͘-piⁿ tiàm-thâu-á hē tı̄ hia chò kiàn-pún ê tiān-sı̄ tng-teh pò sin-bûn, chèng-hú soan-pò͘ kóng pau-khoah “Ka-nn̂g i-tı̄ ūn-tōng”, “Láu-sı̍t seng-lí-lâng hia̍p-hoē”, “Chèng-koàn hoat-hêng kap káu-e̍k sêng-sı̍t ūn-tōng”, “Láu-sı̍t kong-bū-oân ki-kim-hoē”, “Láu-sı̍t kun-jı̂n ūn-tōng” kap “Láu-sı̍t chêng-pò ūn-tōng” téng-téng cha̍p-goā ê cho͘-chit lóng sı̄ ûi-hoat ê thoân-thé, chū kin-á-jı̍t khai-sí kı̀m-chí só͘-ū ê oa̍h-tāng, chı̍t-koá thâu-lâng tn̂g-tn̂g té-té lóng hō͘ kéng-chhat chang--khı̀, I m̄-chai ūi-sím-mı̍h sim-lāi khai-sí thè Milagros koà-hoâi, tam-sim chit-ê hêng-tōng kín-choa̍h-bān ē khı̀ khan-liân tio̍h Puigcerda Noevo. Tiān-sı̄ sin-bûn lāi-té ū kóng-tio̍h Joan Lorca chit-ê miâ, kóng kéng-hong chit-má teh chhoē--i, koh ū kóng-tio̍h Joan pún-té sı̄ “Saint Fulgentius pēⁿ-ı̄ⁿ” ê i-seng, in-ūi kau-liâu hông sı̂ thâu-lō͘, “goân-lâi Ngô͘ Kok-sêng tō toà tı̄ Joan goân-té tiàm ê hit-keng pēⁿ-ı̄ⁿ!” A-tek in-ūi án-ne chiah khai-sí khah sa ū thâu-cháng. A-tek chū lo̍h-soaⁿ, it-tı̍t ū teh khà Joan ê chhiú-ki-á, m̄-koh khà lóng bē thong, tiong-tàu i tı̄ lō͘-piⁿ ê chı̍t-keng pháng-tiàm chia̍h-tàu, soah chiap-tio̍h Joan ê tiān-oē. “A-tek, goá sı̄ Joan.” “Joan, gún lóng tio̍h-kip teh chhoē--lí neh, lí chit-má lâng tı̄ toh-ūi?” “A-tek, lí m̄-bián hoân-ló, goá chit-má hó-hó, chá-khí goá í-keng ū khà tiān-oē tńg-khı̀ Puigcerda Noevo hō͘ Milagros, chiah chai-iáⁿ lí lo̍h-soaⁿ lâi chhoē--goá.” “Joan, lí ê pān-kong-sek khı̀ hông poe-chhí, ū chı̍t-ê tông-sū khı̀ hō͘ pháiⁿ-tô͘ thâi--sí ah, lí kám chai?” “A-tek, he m̄-sı̄ sím-mı̍h poe-chhí, he sı̄ chèng-hú phài-lâng chò--ê.” “Lí kóng che sím-mı̍h ı̀-sù, chèng-hú ē phài-lâng khı̀ chhiau lí ê pān-kong-sek, koh thâi-sí lâng?” “A-tek, chiah-ê tāi-chı̀ lóng sı̄ ū kau-kâⁿ--ê, lí kám bô khoàⁿ-tio̍h sin-bûn, goá ê ki-kim-hoē í-keng hông kóng chò hui-hoat cho͘-chit--ah.” “Joan, lí ē-sái kóng khah chheng-chhó--leh bô, hiah-ê sím-mı̍h ‘láu-sı̍t’ sím-mı̍h oáⁿ-ko, ‘tō-tek’ sím-mı̍h oáⁿ-ko ê cho͘-chit, sı̄ án-choáⁿ ē kap lí ê ki-kim-hoē lóng khı̀ hông kı̀m--khí-lâi? Lín kám ū sím-mı̍h koan-hē, koh lâi, lín kám ū chò sím-mı̍h pháiⁿ tāi-chı̀, bô kéng-hong 方nah ē teh chhoē--lí.” “A-tek, goá chit-má sı̄ ēng kong-kiōng tiān-oē, bô hoat-tō͘ kā lí kóng kah chheng-chheng chhó-chhó, m̄-koh, gún lóng sı̄ Puigcerda Noevo ê lâng, gún í-keng chún-pı̄ kúi-ā tang--ah, tō-sı̄ ǹg-bāng gún ū ki-hoē thang kái-piàn siā-hoē, kái-piàn kok-ka kap jı̂n-lūi ê ūn-miā, taⁿ khoàⁿ chit-ê pān-sè, ài siūⁿ khah tn̂g-mn̂g--chı̍t-ê ah.” “Joan...lí téng-kài kan-taⁿ kóng-tio̍h hit-ê kè-oē, beh kái-liông jı̂n-lūi, kái-koat lâng siōng ki-pún ê būn-tê niā-tiāⁿ...m̄-koh lí chit-má kóng--ê goá iáu sı̄ thiaⁿ lóng bô...” “A-tek, goá ê pêng-iú, nā ū ki-hoē, goá chiah khoaⁿ-khoaⁿ-á hun-thiah hō͘ lí thiaⁿ, goá khà chit-thong tiān-oē siōng chú-iàu ê bo̍k-tek, sı̄ beh chhiáⁿ lí kā goá tàu-saⁿ-kāng.” “.....lí kóng khoàⁿ-māi--leh...” A-tek sui-jiân ū kui pak-tó͘ gı̂-ngái, mā chí-hó seng án-ne kā ı̀n. “A-tek, saⁿ-kang-āu te̍k-chióng pō͘-tūi tō ē khı̀-kàu Puigcerda Noevo, in siūⁿ beh hō͘ chit-ê chng-thâu oân-choân siau-sit, hoâiⁿ-tı̍t chit-ê chng-thâu goân-té tō bô oē tı̄ tē-tô͘ téng-bı̄n.” “Joan...Puigcerda Noevo mā ū teh hong-siaⁿ, m̄-koh goá kám-kak che sı̍t-chāi siuⁿ hàm--ah...” “A-tek, lí thiaⁿ goá kóng, sı̂-kan chhun bô joā chē--ah, ū nn̄g-kiāⁿ tāi-chı̀ pài-thok--lí, kiû lí khı̀ goá chı̀n-chêng chò-sit ê pēⁿ-ı̄ⁿ kiù Ngô͘ phok-sū, lēng-goā, tńg-khı̀ Puigcerda Noevo kiò in tio̍h kín lı̄-khui, pó-hō͘ gún sió-moē Milagros ê tāi-chı̀ tō kau hō͘--lí ah.” Joan kā A-tek kóng Saint Fulgentius pēⁿ-ı̄ⁿ ê tē-chí liáu-āu, tiān-oē tō chhiat tn̄g--khı̀, chit-ê pēⁿ-ı̄ⁿ sı̄ tı̄ nn̄g-pah kong-lí goā ê lēng-goā chı̍t-ê siâⁿ-chhı̄, m̄-koh hó ka-chài ū thàu-choā-chhia, A-tek àn-sǹg ē-po͘ tō chē-chhia koáⁿ--koè. (Tâi-bûn Bóng-pò tē 100~102 kı̂, 2005 nı̂ 1~3 goe̍h)