Puigcerda Noevo 09

Káu Ngô͘ Kok-sêng ê hêng-hóng bô kóng kài-hó, sin-thé chin hi-lám, chiūⁿ hoé-chhia chı̀n-chêng, A-tek tı̄ chhia-thâu ê chhan-thiaⁿ bé chı̍t-oáⁿ sio-thng hō͘ lim--loeh, i chiah ū tām-po̍h-á khùi-la̍t. “Siàu-liân--ê, sı̄ Joan kiò lí lâi--ê tio̍h--bô.” Ngô͘ Kok-sêng kóng-oē chin sè-siaⁿ, A-tek ài kā hı̄-á oá tı̄ i ê chhùi chiah thiaⁿ ē tio̍h, “Goá kióng-kiaⁿ bô hoat-tō͘ kap lí chē hoé-chhia khı̀-kàu hit-ê Shangri-la--ah, kin-á-jı̍t tú-hó sı̄ goá káu-cha̍p hoè ê seⁿ-jı̍t, nā chit-jı̍t lâi soah-kó͘ kám m̄-sı̄ chin ha̍h-gı̂--leh.” A-tek tı̄ Espana chiah kú--ah, tē-it-kái thiaⁿ lâng teh kóng Tâi-oân-oē. “Ngô͘ phok-sū, lí ē hó--khí-lâi lah, lí tùi jı̂n-lūi ê pang-chān chiah-nı̍h toā, thiⁿ-kong peh ē pó-pı̀--lí.” “Pang-chān?” Ngô͘ Kok-sêng chin chia̍h-la̍t teh chhiò, “Siàu-laı̂n--ê, lí lia̍h-chò tō-tek chiâⁿ-sı̄ thài-chó͘-pâi?” A-tek m̄-chai beh án-choáⁿ kā ı̀n. “Siōng-kài sûn-súi ê tō-tek sı̄ bô jı̄n-hô pe̍h-chha̍t--ê, siàu-liân--ê, lí kám ē in-ūi bô-ài kóng pe̍h-chha̍t lâi hoán-poē ka-tı̄ ê kok-ka.” “Ū ê tāi-chı̀ pún-té tō-sı̄ ài chai khin-tāng, ài chai sio chéng-hoē--ah...” A-tek ı̀n kah hi-sim hi-sim. “Nā án-ne, lí chún-pı̄ beh thè kah sím-mı̍h khám-chām? Koh lâi, siáⁿ-lâng ū chu-keh lâi koat-tēng chı̍t-ê phiau-chún, tı̄ bó͘-mı̍h-khoán tāi-chı̀ bó͘-mı̍h-khoán sı̂-kan, lán tō ē-tàng kā tō-tek ê goân-chek kā hiat-kak, m̄-koh tı̄ bó͘-mı̍h-khoán tāi-chı̀ bó͘-mı̍h-khoán sı̂-kan tō bē-ēng-tit--leh? Tō-tek ū sı̂-chūn tō chhin-chhiūⁿ sı̄ lı̄-ek ê hun-pheⁿ, khoàⁿ lí sı̄ beh tùi-tiōng tı̄ kò͘ bó͘ chı̍t-ê lâng, bó͘ chı̍t-tı̄n lâng, ia̍h-sı̄ chit sè-kan só͘-ū ê lâng, koh lâi, sı̂-kan--leh, lí beh khoàⁿ joā kú-tn̂g? Kok-ka ê khí-lo̍h tı̄ jı̂n-lūi le̍k-sú lâi khoàⁿ, ū-iáⁿ sı̄ chin té, lán hòng-kiam jı̄n-ūi in-ūi ài-kok lâi hi-seng tō-tek ê goân-chek kám m̄-sı̄?” A-tek choaⁿ-á píⁿ-chhùi, i sêng-jı̄n i bô siūⁿ chiah chē. “Gún ū-iáⁿ s7 kiān-tiu koh hoat chhùi-chhiu,” Ngô͘ Kok-sêng tùn-teⁿ--chı̍t-ê, “chit kúi-tang goá ū teh siūⁿ nn̄g-hāng tāi-chı̀, chı̍t-hāng sı̄ in hit-khaon2 chò-hoat ē khı̀ tit-sit tio̍h joā-chē lâng, koh ē khı̀ pāi-hāi joā-chē lâng hiān-sı̍t ê lı̄-ek, chı̍t-ê oân-choân bô chū-lı̄ ê siā-hoē kám m̄-sı̄ chū-ngó͘ hoé-bia̍t--ê? Chū-lı̄-sim nā bô--khı̀, keng-chè, siong-gia̍p kap chu-pún chhı̄-tiûⁿ tō ē bia̍t-bô, boé--ā, lán kan-taⁿ sı̄ tńg-khı̀ kàu táu-oāⁿ ê sı̂-tāi niā-tiāⁿ, sui-jiân ū-lâng ē kóng siong-gia̍p kap ki-su̍t ê chı̀n-pō͘ tùi jı̂n-lūi bô it-tēng sı̄ hó tāi-chı̀, m̄-koh beh châu-bia̍t siong-gia̍p kap chu-pún lı̄-ek, choa̍t-tùi ū-lâng ē peh khí-lâi kap lí piàⁿ-miā.” Ngô͘ Kok-sêng kóng kah chia, po̍k-phêng sàu kah chin lı̄-hāi, A-tek ná kā tah kha-chiah-phiaⁿ, ná kiò i mài koh kóng--ah. “Che sı̄ goá koè-khùi chı̀n-chêng siōng-boé ê kúi-kù-oē--ah.” Ngô͘ Kok-sêng án-ne kā ı̀n. “Tē-jı̄-hāng sı̄, goá ū tiang-chūn ē siūⁿ-kóng, bô tek-khak ‘bô tō-tek’ khêng-sı̍t sı̄ jı̂n-lūi kiû seng-chûn kap pó-hō͘ ka-tı̄ ê kun-té, lán the̍h pe̍h-chha̍t-oē lâi kóng, tio̍h sí-chèng ê lâng tùi ka-tı̄ kóng ‘goá it-tēng ē hó--khí-lâi’, lí kóng che sı̄ ‘pe̍h-chha̍t’ ia̍h sı̄ ‘sı̀n-sim’--leh? Ū sı̂-chūn pe̍h-chha̍t soah chhin-chhiūⁿ sı̄ teh pó-hō͘ lâng ka-tı̄ ê chı̍t-khaon2 chhiú-lō͘. Kóng--khí-lâi, lán ê sin-thé tùi lán siōng láu-sı̍t, phoà-pēⁿ tio̍h-siong tō hō͘ lí thiàⁿ kah beh sí, lí kám beh kù-chāi i thiàⁿ? Kám lóng bô-ài chia̍h chí-thiàⁿ io̍h-á? Láu-sı̍t thàu-té ê kiat-kó, kám ē liân kā pēⁿ i hō͘ hó ê ki-hoē tō bô, soah bo̍k-bêng kı̂-biāu in-ūi láu-sı̍t lâi sí.” Ngô͘ Kok-sêng kóng kah siōng-boé nn̄g-saⁿ kù-oē ê sı̂, ba̍k-chiu í-keng khoeh--lo̍h, A-tek tán chı̍t-khùn, m̄-koh i lóng bô koh chhut-siaⁿ, chim-chiok kā khoàⁿ, lâng í-keng koè-óng--ah. A-tek tńg-lâi kàu Puigcerda Noevo í-keng sı̄ saⁿ-keⁿ mê-poàⁿ, liân-soà kúi-ā-kang o͘-im, keh-tńg-kang chái-khí chhut-jı̍t, thiⁿ-khı̀ siat-thái hoán-joa̍h, A-tek kúi-ā-kang án-ne chhia-poa̍h-péng, thiám kah it-tı̍t khùn kah ē-po͘ iáu peh bē khí--lâi, bô gı̄-gō͘ chı̍t-tı̄n lâng soah tı̄ chit-ê ē-po͘ lâi beh kā Puigcerda Noevo húi chiâⁿ pêⁿ-po͘, A-tek bē-hù kiù Milagros, i cháu tò chhut--lâi ê sı̂ koh khai-sí teh piàn-thiⁿ, boé--á poa̍h loeh soaⁿ-kheⁿ. Hit-àm chóng-lí tı̄ tiān-sı̄ téng hoat-piáu kóng-oē, kóng: “Tō-tek ê tui-jip sı̄ chı̍t-kiāⁿ chin hó ê tāi-chı̀, m̄-koh tō-tek ê bo̍k-tek sı̄ beh hō͘ kok-ka kap jı̂n-lūi koh-khah hēng-hok ê seng-oa̍h, tō-tek ê pún-sin bô èng-kai chhiâⁿ-chò ko͘-hāng ê bo̍k-tek.” “Choè-kı̄n lán-kok tang-pak-pō͘ soaⁿ-khu hoat-hiān chı̍t-ê in-bô͘ cho͘-chit, chit-ê cho͘-chit ê lâng chı̀n-jı̍p kàu lán chē-chē tiōng-iàu ki-kò lāi-té, pí-lūn kóng Hugo Ferro hām Gabino Lara ê àn-kiāⁿ lóng kap in ū koan-hē, tùi kok-ka siā-hoē ū chin toā ê pāi-hāi, chèng-hú í-keng kín-chia̍p chhú-lí, te̍k-chióng pō͘-tūi tı̄ soaⁿ-khu phah-sí 435 ê pháiⁿ-tô͘, lēng-goā ū chı̍t-koá cháu-thoat--ê, chèng-hú ū sı̀n-sim ē chin-kín kā in chóng sa--khí-lâi, chhiáⁿ ta̍k-ê hòng-sim.” “In bē kóng pe̍h-chha̍t, chin hó-chang.” Chóng-lí kóng-soah beh cháu ê sı̂, kéng-chhat chóng-tiúⁿ tı̄ i ê hı̄-khang piⁿ án-ne kóng. Taⁿ A-tek tı̄ hui-lêng ki-tiûⁿ beh chiūⁿ hui-lêng-ki--ah, i kui-ê thâu-khak lāi jû-chháng-chháng, àm-sı̂ in-ūi chiah-ê tāi-chı̀ teh bı̂n-bāng, jı̍t--sı̂ mā bô hoat-tō͘ cháu-siám chiah-ê jû-sù-bāng. Chiūⁿ-ki ê sı̂-kan kàu--ah, A-tek pâi-tūi tán beh jı̍p-khı̀ chiūⁿ-ki-mn̂g ê sı̂, bô-ı̀-tiong soah khoàⁿ-tio̍h pâi tı̄ thâu-chêng tē-saⁿ-ê lâng, chı̍t-ê hô͘-chhiu--ê, i ê am-á-kún āu-piah ū pô-ché chò kı̀-hō, bē-su chı̍t-chiah boé-ia̍h-á hioh tı̄ hia. (Tâi-bûn Bóng-pò tē 100~102 kı̂, 2005 nı̂ 1~3 goe̍h)