Chok-chiá Ê Oē
Chit phiⁿ “Bê-lō͘ ê lâng” sı̄ chok-chiá tı̄ Thô͘-khò͘ kàu-hoē bo̍k -hoē ê sı̂ chò ê. Pún-lâi beh tı̄ Thô͘-khò͘ ián, khiok in-ūi kui-bô͘ toā, tio̍h su-iàu chin-choē jı̂n-bu̍t, chin-choē siat-pı̄ ê koan-hē, kám-kak bô hoat-tō͘ thang ián chit tè ke̍k. Chit phiⁿ nā m̄-sı̄ tı̄ to͘-chhı̄ ê kàu-hoē, khah ū jı̂n-bu̍t, khah ū ho̍k-chong ê chún-pı̄, goá siūⁿ tı̄ jio̍k-siáu ê kàu-hoē ū khùn-lân.
Put-kò loē-iông chin ū chhù-bı̄, chin ū te̍k-sek ê sim-lí-ke̍k, kı̂-thaⁿ ū “Bē koân” chit phiⁿ sı̄ cha̍p-goā nı̂-chêng, Jı̍t-tı̄ sı̂-tāi ê chok-phín, sı̄ tùi Jı̍t-bûn koh hoan koè-lâi ê. Tı̄ hí-ke̍k ê hêng-thé tiong ū pau chin toā ê ka-têng chhám-kéng kap mâu-tún tı̄-teh. Chit tè ke̍k tı̄ Sin-káng, Pak-káng, Thô͘-khò͘ bat ián liáu. “Sio-hûi sai-hū” chit phiⁿ, m̄-sı̄ goá tı̍t-chiap ê chok-phín, sı̄ bat khoàⁿ lâng teh ián, goá chiū chiàu hit ê ı̀-sù, koh siá hō͘ Chú-jı̍t-o̍h ha̍k-seng ián ê. Tō-ián ê lâng chı̄n-liōng khó-lū jı̂n-bu̍t, thé-keh, châi-tiāu, í-kı̍p ho̍k-chong, poè-kéng lâi ián.
Koan-hē kàu-hoē kap ián-ke̍k ê sū, goá tı̄ tē-it chı̍p ū kóng liáu, só͘-í bô ài koh tiōng-ho̍k, chóng-sı̄ ǹg-bāng oē-thang chham-khó hit ê, soà ū hit ê cheng-sı̂n lâi ián.
Í-siōng chiah ê ke̍k-pún, m̄-tiāⁿ kan-taⁿ chò ián ê lō͘-ēng, iā oē-thang chò tha̍k ê lō͘-ēng. Chhiáⁿ lı̄-ēng chò Sèng-si-kho, Sèng-keng-kho ê pe̍h-oē-jı̄ khò-pún iā sı̄ put-chí ū lı̄-ek, hō͘ ha̍k-seng tı̄ tha̍k ê chı̀n-hêng tiong ū chhù-bı̄ lâi khah khoài bat jı̄.
Chhiáⁿ lia̍t-ūi kàu-oân chhái-ēng tı̄ lí ê ha̍k-kip hō͘ lí ê ha̍k-seng tha̍k á -sı̄ ián.
Chhiáⁿ kàu-hoē ê chheng-liân ǹg-bāng ū ki-hoē thang tı̄ boē-sı̀n ê lâng ê bı̄n-chêng lâi ián, soà ín-chhoā in bat chin-lí. Kı̂-tiong “Pù-lâng kap Lia̍p-sat-lō͘” “Bê-lō͘ ê lâng” sı̄ beh tı̄ pò͘-tō iōng ê.
Goān Chú ê chiok-hok tı̄ tē-jı̄ chı̍p ê téng-bı̄n.
N̂g Hoâi-in 1957.5.21
Bê-lō͘ ê lâng
1幕3場:
1 場 人生街頭
2 場 巴比倫
3 場 勝利ê 凱歌
A.人物:盲人、靈子、占卜、和尚、私慾婆、惡魔、財神、市民 (老夫人)、市民 (紳士)、市民 (乞食)、女神 (名聲)、女神 (地位)、酒漢a、酒漢b、賭徒a、賭徒b、虛榮太太、虛榮小姐、死神、牧師、天軍 (聖歌隊)
B.主題歌: 聖詩169頁
第一場 人生街頭
Khoah-toā ê ke-thâu, ū lō͘-teng á-sı̄ chio̍h-siōng, chhiū-ba̍k chò poè-kéng.
Bō͘-āu Sèng-koa-tūi gı̂m-si Sèng-si 169 siú
出場人物:盲人,靈子,占卜,和尚,私慾婆,惡魔。
1. 盲人：Goá sı̄ chı̍t-ê khó-lı̂n ê chhiⁿ-mı̂ lâng, tı̄ chit ê jı̂n-seng ke-thâu teh chhoē-kiû oa̍h-miā chiàⁿ-lō͘. Kiâⁿ-lâi, kiâⁿ-khı̀ lóng chhoē bô chin-sı̍t pêng-an an-hioh ê só͘-chāi. Ah, jı̂n-seng sı̍t-chāi sı̄ chin khang-hi, lóng sı̄ iu-chhiû, lô-khó͘, tāng-tàⁿ. Gia̍h-ba̍k sı̀-ûi chheⁿ-chhı̀n, bô ū chín-kiù, chí-ū sı̄ o͘-thiⁿ toē-àm, kiâⁿ bê-lō͘ nā-tiāⁿ.
Lêng-chú ah, lán taⁿ tio̍h kín-kín koh chı̀n-hêng lán ê lō͘, khoàⁿ oē-thang chhoē-tio̍h chı̍t-ê só͘-chāi hō͘ lán thang an-ún khiā-khí á-bô. Jı̂n-seng sı̍t-chāi sı̄ chı̍t-ê o͘-àm ê toā-hái, hong-éng ná háu-sai, tû sí í-goā lóng bô lō͘.
2. 靈子：A-pa, ná kiâⁿ ná bô-lō͘, ná-chhoē ná khoàⁿ boē-tio̍h, lóng sı̄ chin hong-hoè pha-hng.
3. 盲人：Sı̍t-chāi ū-iáⁿ lán í-keng chhoē kàu kha-nńg chhiú-sng lah. Iáu-kú lán boē ēng-tit choa̍t-bāng, lán tio̍h kè-sio̍k ló͘-le̍k lâi kiâⁿ, lâi chhoē hit ê pêng-an ê só͘-chāi, nā bô lán chiū éng-oán tı̂m-lûn tı̄ chit ê khó͘-thàng choa̍t-bāng ê sè-kan. Taⁿ lán tio̍h koh kiâⁿ, lí tio̍h chhoā goá ê lō͘, in-ūi goá lóng sı̄ oá-khò lí ê ín-chhoā.
4. 靈子：A-pa, chóng-sı̄ chiân-tô͘ chin o͘-àm, bông-bông bū-bū, goá mā boē hiáu-tit beh kiâⁿ tó-ūi chı̍t-tiâu lō͘.
5. 盲人：Chhı̀n-chhái kiâⁿ lah, nā ū khah hó-kiâⁿ ê lō͘ chiū kā kiâⁿ lah. Koh nā ū tú-tio̍h lâng tio̍h kā chhéng-kàu lah. Chhı̀n-chhái toè lâng ê āu-bı̄n kiâⁿ soah boē hiáu-tit!
6. 靈子：A-pa, goá chin ià-siān, lóng bô khùi-la̍t thang kiâⁿ khı̀ lah. Lán lâi tiàm chia tām-po̍h hioh-khùn hó bô?
7. 盲人：Khó-lı̂n ê kiáⁿ, lí toè goá án-ni ta̍k-ūi teh kiâⁿ-se̍h, sı̍t-chāi hō͘ lí chin lô-khó͘, chóng-sı̄ lóng sı̄ ūi-tio̍h lán ê hēng-hok. Taⁿ lán tiàm chia hioh-khùn, lí tio̍h m̄-thang lı̄-khui goá, tio̍h ài khı̂ⁿ-tiâu tı̄ goá ê sin-piⁿ.
(Nn̄g-lâng chē-lo̍h hioh-khùn, Chiam-pok chhut-tiûⁿ)
8. 占卜：Khoàⁿ-miā, khoàⁿ-miā! Thiu-chhiam, pok-koà! Nā ū lâng ài beh tit-tio̍h sêng-kong, pù-kùi, chiong-lâi ê hēng-hok tio̍h lâi chiū-kı̄n goá. Goá sı̄ Pat-koà soaⁿ-téng ê 理智 chiam-pok, choan-choan tı̄ chit ê 人生街頭 teh chhoē chiah ê kiâⁿ bê-lō͘ ê lâng. Lâi ah, á-sı̄ ū lâng sim-lāi iu-būn bô pêng-an, tio̍h lâi chiū-kı̄n goá, á-sı̄ chiân-tô͘ ū sím-mı̍h bô bêng ê sū, lóng thang lâi kàu goá chia lâi siòng-miā.
9. 盲人：Sian-siⁿ ah, lí kiám oē-thang pò goá ê lō͘?
10. 占卜：Lí sı̄ sím-mı̍h lâng?
11. 盲人：Goá sı̄ chı̍t-ê chhiⁿ-mı̂ lâng, kap goá ê kiáⁿ tı̄ chit ê 人生街頭 teh kiâⁿ bê-lō͘. Goá sı̄ ài beh kàu chı̍t-ê oa̍h-miā, pêng-an, khoài-lo̍k ê só͘-chāi, thang siám-pı̄ chit sè-kan ê hong-pho, khó͘-thàng, m̄-chai lí oē chai hit ê só͘-chāi tio̍h tùi tó-ūi chı̍t-tiâu lō͘ khı̀ chiah chhoē oē tio̍h?
12. 占卜：Hó, lí sı̄ ài beh kàu hit ê oa̍h-miā, pêng-an, khoài-lo̍k ê só͘-chāi o?! Chhiáⁿ lí chhun lí ê chhiú hō͘ goá kā lí kóng lí tio̍h tùi chit ê ke-thâu kiâⁿ kàu hit ê ke-boé, tı̄ hit ê ke-boé ū 2 tiâu lō͘, chhiáⁿ lí chiàu lí ê ı̀-chı̀ lâi kiâⁿ hit tiong-kan ê chı̍t-tiâu, in-ūi tı̄ hit 2 tiâu lō͘ ê lō͘-boé lóng ū lí só͘ teh chhoē-kiû ê só͘-chāi.
13. 盲人：To-siā lí ê chí-tō, nā bô lí ê pang-chān goán pē-kiáⁿ tio̍h tiàm chia gōng-gōng-á teh se̍h bô lō͘.
14. 占卜：Goān lí chiân-tô͘ kng-bêng, tit-tio̍h lí ê hēng-hok, lí nā ū koh tú-tio̍h sím-mı̍h, thang lâi chia mn̄g goá, taⁿ chhiáⁿ lí sūn-lō͘ pêng-an. Khoàⁿ-miā, khoàⁿ- miā! Thiu-chhiam pok-koà!
(Thoè-tiûⁿ)
15. 盲人：Lêng-chú ah, lán taⁿ tio̍h kín-kín lâi khı̀, m̄-thang koh iân-chhiân, lí tio̍h ài chiàu hit ê lāu-lâng só͘ kóng chhoā goá lâi khı̀, lán teh beh tit-tio̍h an-hioh, khoài-lo̍k ê só͘-chāi lah. (Gı̂m-si 169 siú)
16. 靈子：A-pa, lán í-keng lâi kàu hit ê 2 tiâu lō͘-thâu lah.
17. 盲人：Ah, kàu-ūi lah tio̍h m̄! Taⁿ tó-ūi chı̍t-tiâu khah hó-kiâⁿ, koh chiân-tô͘ kng-bêng lí tio̍h ài chim-chiok khoàⁿ.
18. 靈子：Chiàⁿ-pêng chit-tiâu sı̄ oe̍h-oe̍h koh kham-khia̍t ê soaⁿ-lō͘, tı̄ hit ê lō͘-boé ū toā soa-bô͘. Tò-pêng chit-tiâu sı̄ pêⁿ-tháⁿ koh hó kong-kéng ê toā-lō͘, chóng-sı̄ chêng-bı̄n sı̄ bū-bū o͘-àm.
19. 盲人：Taⁿ beh án-choáⁿ phah-sǹg, iā bô lâng thang mn̄g thang koh ín-chhoā lán!
(和尚出場)
20. 和尚：南無阿彌陀佛,南無阿彌陀佛! Hiaⁿ-tı̄ ah, lí beh khı̀ tó-ūi?
21. 盲人：Goá sı̄ chı̍t-ê khó-lı̂n ê chhiⁿ-mı̂ lâng, tı̄ chit ê lō͘-thâu teh kiâⁿ bê-lō͘, m̄ chai-iáⁿ tio̍h kiâⁿ tó-ūi chı̍t-tiâu lō͘ chiah oē-thang kàu hit ê an-hioh, khoài-lo̍k, pêng-an ê só͘-chāi, lí m̄-chai oē-thang chí-tō goán á-boē?
22. 和尚：Nā-sı̄ án-ni, chhiáⁿ lí tùi chit tiâu oe̍h-oe̍h koh kham-khia̍t ê lâi, goá sı̄ chit-tiâu liông-sim lō͘ ê hoê-siūⁿ, kı̀ⁿ-nā ū lâng ài beh tui-jı̍p kàu hit ê pêng-an, khoài-lo̍k ê só͘-chāi tio̍h tùi chit-tiâu lō͘ lâi. Tı̄ chit-tiâu lō͘ ū siu-hēng ê chhiū-nâ, iā ū kı̀m-io̍k ê chúi-tı̂, ū sêng-pu̍t ê sió-soaⁿ, lō͘-boé chiū-sı̄ Se-chōng ê soa-bô͘ lah. Tı̄ hit ê Se-chōng ū lí só͘ teh chhoē ê pêng-an, an-hioh, khoài-lo̍k tı̄-hia.
23. 盲人：Án-ni chin-hó, chhiáⁿ lí kín-kín chhoā goá jı̍p lâi khı̀.
24. 和尚：Bān-sı̄ leh, lí nā beh jı̍p chit-tiâu lō͘ tio̍h ài thǹg lí ê sio̍k-saⁿ, sio̍k-khò͘, iā tio̍h thı̀ lí ê thâu-mng, koh tio̍h ēng kha-thâu-u lâi pê jı̍p-khı̀, lí ê chhiú iā m̄-thang bak-tio̍h chit sè-kan ê sio̍k-bu̍t.
25. 盲人：Án-choáⁿ, tio̍h án-ni chiah oē-thang jı̍p-khı̀ tio̍h bô?
26. 和尚：Sı̄ lah, tùi kó͘-chá kı̀ⁿ-nā ū lâng beh jı̍p chit-tiâu lō͘, lóng tio̍h chiàu chit ê hoat-tō͘ chiah oē-thang jı̍p-khı̀.
27. 盲人：Goá oân-choân bô hit ê khùi-la̍t, goá sı̄ chı̍t-ê loán-jio̍k ê chhiⁿ-mı̂ lâng, thài oē-thang lâi chiàu chit ê hoat-tō͘. Chhiáⁿ lí lı̂n-bín goá hō͘ goá m̄-bián án-ni chò thang jı̍p chit-tiâu lō͘ hó bô?
28. 和尚：Boē ēng-tit, lí nā ū sim beh kiû lí chiong-lâi ê hok-khı̀, lí tio̍h m̄-thang kiaⁿ kan-khó͘.
29. 盲人：Goá ka-kı̄ bô hit ê khùi-la̍t thang tit-tio̍h Se-chōng ê khoài-lo̍k; goá sı̄ chı̍t-ê kha-nńg chhiú-sng ê lâng, án-choáⁿ ū hoat-tō͘ neh?
30. 和尚：Khó-lı̂n ê lâng, lí ê sim-sı̂n loán-jio̍k, lóng bô ū jím-siū ê la̍t, bô ū khek-khó͘ ê sim! Taⁿ lí chhiáⁿ, goá beh lâi khı̀.
(Liām-keng thoè-tiûⁿ)
31. 盲人：Lêng-chú ah, taⁿ lán beh án-choáⁿ, hit ê Se-chōng kó-jiân tio̍h keng-koè hiah-nı̍h toā ê hi-seng kap lô-le̍k chiah oē-thang jı̍p-khı̀, koh lán lóng bô ū sím-mı̍h khùi-la̍t, taⁿ ū sím-mı̍h pān-hoat?
(私慾婆出場)
32. 私慾：Hiaⁿ-tı̄ ah, lín tı̄ chit ê só͘-chāi teh chhoē sím-mı̍h? Lí sı̄ beh khı̀ tó-ūi?
33. 盲人：Oh, chit ūi lāu a-pô, lí sı̄ sím-mı̍h lâng?
34. 私慾：Goá kiò-chò Su-io̍k-pô, lóng sı̄ chit ê toā-lō͘ thâu teh chhoā lâng ê lō͘.
35. 盲人：Nā-sı̄ án-ni chhiáⁿ lí chhoā goán ê lō͘ hó m̄? Goán sı̄ tı̄ chit ê lō͘-thâu teh kiâⁿ bê-lō͘ ê lâng.
36. 私慾：Lín sı̄ beh khı̀ sím-mı̍h só͘-chāi?
37. 盲人：Goán sı̄ chı̍t-ê siū-khó͘ bô an-hioh ê lâng, ài beh chhoē chı̍t ê pêng-an, khoài-lo̍k ê só͘-chāi, m̄-chai chit tiâu toā-lō͘ sı̄ beh kàu sím-mı̍h só͘-chāi?
38. 私慾：Chit tiâu toā-lō͘ sı̄ sè-kan lâng toā-pō͘-hūn só͘ teh kiâⁿ ê só͘-chāi, lóng sı̄ chin thò-tòng, koh chin ū hēng-hok, khoài-lo̍k ê só͘-chāi, lí nā jı̍p-khı̀ khoàⁿ, lí tio̍h chai hit ê khoài-lo̍k kàu án-choáⁿ.
39. 盲人：Nā-sı̄ sè-kan lâng toā-pō͘-hūn só͘ teh kiâⁿ ê lō͘ tek-khak sı̄ chin thò-tòng, chin khak-sı̍t chiah tio̍h.
40. 私慾：Tı̄ chit lāi-bı̄n iā ū êng-hoâ ê Pa-pí-lûn, iā ū hióng-lo̍k ê Lô-má, iā ū pù-kùi ê Ai-kı̍p, sè-kài it-chhè ê hēng-hok, khoài-lo̍k pau-hâm tı̄ lāi-bı̄n.
41. 盲人：Án-ni chhiáⁿ lí kín-kín chhoā goá jı̍p-khı̀, goá ê sim thiaⁿ liáu chin hoé-jia̍t.
42. 私慾：Án-ni chhiáⁿ lí toè goá ê āu-bı̄n lâi, tio̍h chhut-chāi goá chhoā-lō͘.
Taⁿ hit-keng chiū-sı̄ Hu-ké kiong, hit-chàn sı̄ Hi-êng lâu, hit-chō sı̄ Hióng-lo̍k thah, hit ê chiū-sı̄ Miâ-siaⁿ tiān, koh hit ê chiū-sı̄ N̂g-kim siâⁿ.
43. 盲人：Chóng-sı̄ chin khó-sioh goá ê ba̍k-chiu lóng bô khoàⁿ-kı̀ⁿ sím-mı̍h.
44. 私慾：Sı̄ lah, lí ê ba̍k-chiu tek-khak bô khoàⁿ-kı̀ⁿ, in-ūi ū 無智 ê o͘-hûn teh jia-phè teh, lí tio̍h ài khı̀ pài-kiû Sat-tàn ông lâi kā lí khui lí ê 無智.
45. 盲人：Sat-tàn ông sı̄ sím-mı̍h lâng, i oē khui goá ê ba̍k-chiu tio̍h bô?
46. 私慾：Sat-tàn ông sı̄ chit sè-kan ê ông, lí nā hoaⁿ-hí hâng-ho̍k i, chiū beh chiong i it-chhè ê êng-hoâ kap khoài-lo̍k hō͘ lí ū hūn thang hióng-siū.
47. 盲人：Goá ūi-tio̍h goá ê sı̀ⁿ-miā ê hēng-hok kap khoài-lo̍k hoaⁿ-hí hâng-ho̍k tı̄ i ê bı̄n-chêng, chhiáⁿ lí kín-kín chhoā goá lâi khı̀ chhoē i.
48. 私慾：Nā-sı̄ án-ni lí koh toè goá lâi.
(魔王出場。私慾婆,盲人,靈子跪下)
49. 魔王：Su-io̍k pô, lí koh kā goá chhoā lâng lâi mah!! Kám-siā lí ê lô-khó͘, lí hō͘ goá ê kok-tō͘ khui-khoah, hō͘ goá ê koân-pèng ke-thiⁿ, lí sı̍t-chāi chı̄n-tiong tı̄ goá.
50. 私慾：Ông ah, lí m̄-thang koè-thâu po-chióng goá, in-ūi che put-kò sı̄ goá ê pún-hūn nā-tiāⁿ.
51. 魔王：Chit ūi sè-kiáⁿ sı̄ tùi tó-ūi lâi ê...
52. 私慾：Tı̄ jı̂n-seng lō͘-boé teh kiâⁿ bê-lō͘ ê lâng, goá chiū ín-chhoā i jı̍p lâi chia.
53. 盲人：Ông ah, goá sı̄ chı̍t ê khó-lı̂n ê chhiⁿ-mı̂ lâng, tı̄ sè-kan teh kiâⁿ bê-lō͘, chhoē bô ū chı̍t só͘-chāi thang an-ún, khoài-lo̍k khiā-khí. Ông ah, goá chai lí ê koân-pèng kap êng-iāu, chhiáⁿ lí hō͘ goá ū hūn tı̄ lí ê kok-tō͘ ê lāi-bı̄n, thang tô-siám kim-sè ê choa̍t-bāng, thòng-khó͘ lâi hióng-siū khoài-lo̍k kap pêng-an!
54. 魔王：Hǹg, lí sı̄ chı̍t-ê bê-lō͘ ê lâng, lí m̄-bián koh siong-pi, khoà-lū, goá beh hō͘ lí choan-sim goá ê kok-tō͘ ê lāi-bı̄n lâi an-hioh khoài-io̍k. Chóng-sı̄ lí tio̍h ài bān-sū hâng-ho̍k goá.
55. 盲人：Ông ah, goá hoaⁿ-hí chiàu lí ê chí-ı̀ lâi kiâⁿ.
56. 魔王：Án-ni, lí só͘ chhoā hit ê gín-ná lâi kau-tài tı̄ goá.
57. 盲人：Ông ah, chhiáⁿ lí m̄-thang hun-lı̄ goán, chit ê goá só͘ thiàⁿ ê kiáⁿ, sı̂-siông kiat-liân tı̄ goá, sı̄ goá sı̀ⁿ-miā ê pang-chān, chhiáⁿ lí m̄-thang hun-lı̄ goán.
58. 魔王：Lí tio̍h hâng-ho̍k goá ê chí-ı̀, goá só͘ hoaⁿ-hí ê tú-tú sı̄ chit ê. Su-io̍k pô chhiáⁿ lí chiong gín-ná thoa jı̍p-khı̀ kı̀m tı̄ goá ê kaⁿ-lô.
59. 私慾：Gín-ná, goá beh pa̍k lí tı̄ kaⁿ-lô, toè goá lâi.
60. 靈子：A-pa, A-pa, kiù goá, kiù goá.
61. 盲人：M̄-thang hun-lı̄ goán lah, chhiáⁿ lí m̄-thang pa̍k goá sim só͘ thiàⁿ ê kiáⁿ lah!
62. 魔王：Bê-lō͘ ê lâng, lí tio̍h ài ho̍k-chiông goá, chiah oē-thang hióng-siū hok-khı̀ kap khoài-io̍k tı̄ goá ê kok-nı̍h, nā-sı̄ lí ê kiáⁿ sı̄ beh chiâⁿ-chò lí hióng-siū khoài-io̍k ê that-gāi, lí tio̍h kau-tài i tı̄ goá ê chhiú-lāi.
63. 靈子：A-pa, A-pa, kiù leh lah, lí kiám bô thiaⁿ goá ê siaⁿ teh âu-kiò lí tio̍h m̄, goá soà-boé ê siaⁿ lí kiám bô thiaⁿ tio̍h mah!?
64. 盲人：Goá ê kiáⁿ, ū lah, chóng-sı̄ goá lóng bô hoat-tō͘ thang bán-hoê lí lah, goá ê kiáⁿ, goá ê kiáⁿ!
(Háu,私慾婆,靈子退場)
65. 魔王：Bê-lō͘ lâng, lí m̄-bián ūi-tio̍h lí ê kiáⁿ lâi thı̂-khàu, lí tio̍h toè goá lâi, goá beh chhoā lí lâi khı̀ khoàⁿ sè-kan ê êng-hoâ.
66. 盲人：Ah, goá lı̄-khui goá ê kiáⁿ ū sím-mı̍h hēng-hok, ū sím-mı̍h khoài-lo̍k.
67. 魔王：Lí tio̍h ài choan-sim hióng-lo̍k, m̄-thang koh siūⁿ-tio̍h lí ê kiáⁿ, nā bô, kiat-kio̍k lí tio̍h ài siū koáⁿ chhut tı̄ hit ê éng-oán o͘-àm ê bê-lō͘.
68. 盲人：Ông ah, goá beh sūn-thàn lí lah.
69. 魔王：Án-ni tio̍h, lí tio̍h an-sim oá-khò goá, goá beh khui lí tı̀-hūi ê ba̍k-chiu, hō͘ lí ū khoàⁿ-kı̀ⁿ it-chhè ê bí-sek. Chiah ū chı̍t-niá o͘-saⁿ, lí nā moa chit-niá tı̄ lí ê sin-khu, lí tio̍h sûi-sı̂ oē khoàⁿ-kı̀ⁿ.(moa-saⁿ)
70. 盲人：Ū-iáⁿ, lóng ū khoàⁿ-kı̀ⁿ tō-tio̍h! Moá-moá lóng sı̄ sè-kan ê êng-kng! N̂g-kim siâⁿ, chhia-hoâ ê Pa-pí-lûn, Lô-má, Ai-kı̍p, lóng sı̄ chin-súi ê kong-kéng.
71. 魔王：Ū sim-sek bô? Taⁿ goá kā lí kóng chiah ê lóng sı̄ goá ê só͘-ū, lí oē thang chiàu lí ê chí-ı̀ khı̀ hióng-siū, kàu lí ê sim-moá ı̀-chiok, lí ê sim só͘ ài ê m̄-thang kı̀m-chí i. Goá koh chhoā lí lâi khoàⁿ goá ê kok-tō͘ ê peh-sı̀ⁿ ê seng-oa̍h. Lí toè goá lâi.
