Sı̍p-jı̄-kè Ê Kau-chiàn 03

Sı̍p-jı̄-kè Piⁿ 1. Tit-kiù Sio̍k-gú kóng “3 hoè gín-ná ê sim kàu 100 hoè boē piàn” goá tùi sè-hàn ê sı̂ chiū siū tio̍h un-khûn ê hùn-liān, 7, 8 ge̍h iām-jia̍t ê thiⁿ-khı̀, tè pē-bú khı̀ chhân-nı̍h so-chháu, ū sı̂ io kut sng koh beh chı̍h-khı̀, iā kiaⁿ lāu-pē mē m̄-káⁿ khiā khí lâi chhun-ûn, chí-hó siang-chhiú chhı̍h tàm chhân-thô͘ àm-àm lâu ba̍k-sái thun-lún, tùi án-ni thong chng ê lâng lóng chheng-chàn choè un-khûn ê iú-hàu-chú. Siū kè chit hō ê hùn-liān, kàu tı̄ goā-ūi tha̍k-chheh, iā sı̄ un-khûn tha̍k-chheh, jı̄n-chin sı̍t-sı̍p, sı̄m-chı̀ siū tông-ha̍k ê oàn-tō͘ chè-chhâi, chóng-sı̄ lāu-su tùi goá sı̄ choa̍t-tùi ê sı̀n-jı̄m, chóng-sı̄ chit khoán hò͘ⁿ-ha̍k kap jı̄n-chin iā put-kò sı̄ chı̍t sı̂ ê le̍k-kim-á iû-chhat nā-tiāⁿ, put-ti put-kak Siōng-tè ê sèng-chhiú chhun kàu tı̄ goá kiû-ha̍k ê sin-chiūⁿ. 19 hè ê chhiu-thiⁿ, ūi-tio̍h gián-kiù se-iûⁿ siông-jiông khı̀ hóng-būn chı̍t ê lâng, tú hó tı̄ hit lâng ê tiâⁿ-bé ū jia̍t-sim ê Ki-tok-tô͘ kap chı̍t ê tāi pún kàu-tô͘ tián-khui chong-kàu lūn chiàn, goá tı̄ piⁿ-á thiaⁿ liáu sim-lāi chin m̄ goān soà hoán-po̍k hit ê Ki-tok-tô͘, goá tı̄ kok-bı̂n ha̍k-hāu ê sı̂ chiū thiaⁿ lāu-su kóng “Ki-tok-kàu sı̄ Au, Bí lâng sı̍t-bı̂n chèng-chhek ê mô͘-chhiú” sim lāi siūⁿ kóng ah lí chit ê bē kok-lô͘, pı̀ⁿ-bı̄n kap i piān gı̄-lūn kàu mńg-pō͘, choè hō͘ chit ê lâng kóng “lí só͘ kóng goá chai, chóng-sı̄ iáu bē bêng-pe̍k Ki-tok-kàu ê sū, nā chai chiū koh khah iú-hān thang pâi-thek Ki-tok-kàu, chit pún sı̄ Sin-iok Sèng-keng, chhiáⁿ tha̍k!” chiū sàng goá 1 pún Sèng-keng, goá tńg-lâi ha̍k-liâu, ta̍k jı̍t ê ha̍k-khò choè oân, lóng tha̍k chı̍t chiuⁿ Sèng-keng chiah khı̀ khùn, tı̄ sim-toé oàn-hūn Ki-tok, iā bāng Ki-tok kàu-hoē ê bia̍t-bông múi tha̍k 1 chiuⁿ to mō͘-to̍k Ki-tok, só͘-í goá sı̄ hō͘ mô͘-kúi lia̍h tio̍h, mô͘-kúi ê chhe-ēng, tha̍k kàu Má-thài 27 chiuⁿ, Iâ-so͘ Ki-tok hō͘ lâng tèng sı̍p-jı̄-kè ê sı̂ bû-ı̀ tiong tah-toh hoah kóng “siâ-chong ê pún-thé Iâ-so͘ Ki-tok bông lah, bān-soè bān-soè!” Hô-téng ê toā choē ah, gōng-kàu-ke̍k. Hit sı̂ kàu-hoē ê bo̍k-su siông-siông lâi thàm goá; chóng-sı̄ goá lóng kóng pe̍h-chha̍t bô khı̀ lé-pài tn̂g. 2. Ū Chı̍t E-hng Ū chı̍t jı̍t tùi ha̍k-hāu tńg-lâi khoàⁿ-kı̀ⁿ kàu-hoē ū kià 1 pún thoân-tō sió-chheh lâi, chı̍t jı̍t ê kong-khò liáu, chiū chēng-chēng the̍h khí lâi tha̍k, chiū sı̄ chı̍t ê hū-jı̂n-lâng sêng-sı̍t ê jı̄n-choē. Hit lâng ún-tàng lâu ba̍k-sái ê hoé-kái, goá ba̍k-chiu kheh-kheh chim-chiok siūⁿ, sui-jiân sı̄ chı̍t ê hū-jı̂n-lâng, iáu-kú hó-táⁿ tı̄ lâng ê bı̄n-chêng kan-chèng i kè-khı̀ kiàn-siàu ê só͘ choè, che chiàⁿ tı̄ chin-sı̍t tı̄ Siōng-tè bı̄n-chêng liông-sim ê kò-pe̍k, án-ni tiām-tiām siūⁿ chı̍t tiám-cheng. Àm-sı̂ 10 tiám ê sı̂, hut-jiân Siōng-tè ê kng chiò goá, hō͘ goá khoàⁿ chhut pún-sin ê tāng choē, Sèng Sı̂n chhiong-moá goá ê pâng-keng, tùi chhut-sı̀ kàu-taⁿ, it-chhè ê choē lóng ta̍k tiâu siá bêng tı̄ goá ê ba̍k-chêng, chit ê choē ê tāng-tàⁿ tùi í-téng kā goá ap-tó lo̍h chóng-pho͘ téng. Goá khàu chhut-lâi, ba̍k-sái ná chúi-chhiâng chhē-chhē tò, ūi-tio̍h thang kiaⁿ ê choē kap liông-sim ê chū-chek, kha chhiú lóng bâ, choân-sin lóng chhoah, kám-kak tùi thâu-khak téng kàu kha-toé choân-sin to sı̄ choē, chin sı̄ pháiⁿ khoàⁿ ê si-thé. “Tùi kha-toé kàu thâu-khak téng bô chı̍t toè hó-bah; lóng sı̄ siong-chhùi.” (Í-sài-a 1:6) Siū lâng o-ló hó kiáⁿ ê sı̂, chiū kám-kak ná chhin-chhiūⁿ siū thoa kàu Siōng-tè bı̄n-chêng, ūi choē ê hêng-hoa̍t, siū soan-kò éng-oán bia̍t-bô ê. Pe̍h-chha̍t, thau-the̍h, lāi-sim ê chêng-io̍k, hu-êng, kiau-ngō͘, ké-hó, oàn-tò͘, saⁿ-chiⁿ téng kóng bē chı̄n, poàⁿ-mı̂ khí-lâi tùi thang-á khoàⁿ thiⁿ-téng ê ge̍h, ı̂ⁿ-ı̂ⁿ ê ge̍h-kng, tı̄ kim-mı̂ sı̄ kô͘ ba̍k-sái choē ê piáu-hiān. Goá chē teh siūⁿ, chit ê chiah-nı̍h tāng choē ê lâng iáu oa̍h kàu kin-á-jı̍t, bô sí iáu oa̍h teh sı̄ kà-sı̄; goá ê choē teh chiù-chó͘ goá. Nā siūⁿ tio̍h goá kàu-taⁿ 2-3 ge̍h jı̍t ta̍k àm tha̍k Sèng-keng chiù-chó͘ Iâ-so͘ Ki-tok, iā khı̀ kàu-hoē sı̄ siūⁿ beh piān-po̍k, chiū sim-koaⁿ giōng beh piak-lı̍h khiā bē tiâu toē. Tùi án-ni goá tē-it; tùi bô khoàⁿ-kı̀ⁿ ê Siōng-tè kı̂-tó. “Thiⁿ-toē nā ū Siōng-tè, kiû Lí kiù goá chit ê tāng choē ê lâng” Te 2: koat-sim tùi kàu-hoē piáu ûi-hām, Chiū lâu ba̍k-sái kia̍h pit the̍h kńg-choá lâi siá chhàm-hoé lio̍k, thiⁿ-kng chiū the̍h khı̀ kàu-hoē, soè keng kàu-hoē án-chún sim-giâm thih-mn̂g ê kaⁿ-ga̍k, kóng bêng lâi-ı̀, chiong chhàm-hoé-lio̍k the̍h hō͘ bo̍k-su, Kiat-tiân bo̍k-su chiap-tio̍h chiū thè goá kı̂-tó, hit ê kı̂-tó oán-jiân lûi tùi goá ê thâu-khak kòng lo̍h-lâi ê kiaⁿ-hiâⁿ. Tùi chia khí bô-lūn khı̀ ha̍k-hāu á-sı̄ tńg-lâi, goá lóng àⁿ-thâu kı̂-tó! Siōng-khò ê sı̂ iā ha̍p-chhiú tı̄ toh-téng, kheh-ba̍k, lâi sǹg só͘ hoān ê choē, chiū thó͘-khùi. Bô kap pêng-iú kóng oē, bô chhiò, bô ǹg-bāng, bô lūn kàu toh-lo̍h to ná-chún ū tē-ge̍k ê mn̂g teh ûi goá. Chhin-chhiūⁿ tı̄ o͘-àm tiong teh thó͘-khùi, siông-siông ha̍p-chhiú kı̂-tó “Ah! Nā ū Siōng-tè, kiû Lí chín-kiù goá”. Te̍k-pia̍t hián-bêng goá sı̄ ké hó ê lâng, tùi goá ka-kı̄ kóng “Lí chit ê lâng-bı̄n khı̂m-siù ê sim, chit khoán ké-hó ê lâng chá sí m̄ khah hó, chı̍t ê hô͘-tô͘ lâng ké choè hó lâng oa̍h tiàm sè-kan siáⁿ lō͘-ēng?” Tông-sı̂ jı̄n-chin khı̀ kàu-hoē sêng-siū kà-sı̄. “Jia-iám ka-kı̄ ê choē-ok ê, boē heng-thong, to̍k-to̍k jı̄n-choē lâi koé-pı̀ⁿ ê, beh tit-tio̍h lı̂n-bín.” (Chim-giân 28:13) 3. Siōng-tè Ê Siaⁿ Kè lâi ta̍k jı̍t to sı̄ tı̂m-tiōng ê hoé-kái, in-ūi choē ê chek-hoa̍t thâu kia̍h boē khı̀, sim-lāi put-sı̂ saⁿ kau-chiàn. Tı̄ chiah ê jı̍t-chí goá chēng-chēng khai-sí hoé-kái, hn̄g ê lâng ēng phoe-sı̀n, kı̄n ê lâng chhin-sin khı̀ kiû sià-bián, iā pi-siong ka-kı̄ ê bô ióng-khı̀. Tùi chia khí ēng khiam-sùn, iu-siong thòng-hoé ê sim tha̍k Sèng-keng, kı̂-kiû chín-kiù ê kng, jia̍t-sim thiaⁿ bo̍k-su ê oē, chı̄n-la̍t lâi lí-kái. Chóng-sı̄ chín-kiù ná chún chin hn̄g, kàu-hoē ê lâng khoàⁿ goá ê kian-sim thàu-chá khı̀ soaⁿ-téng, khui te̍k-pia̍t ê kı̂-tó-hoē. Jı̍t-pún Ki-tok kàu-hoē ê Kiat-tiân bo̍k-su thiaⁿ Tāi-chháu tiúⁿ-ló kóng khí sı̂-siông ū chó-thian kı̂-tó-hoē ê sū. Chin sı̄ pó-kùi sèng-tô͘ ê kı̂-tó, ēng kiong-kèng ê thāi-tō͘ chiah ē lí-kái kı̂-tó ê le̍k-liōng. Ū chı̍t ē-po͘ tùi ha̍k-hāu tńg-lâi, sūn Tāi-tiān chhoan ê sam-nâ, ná kiâⁿ ná siūⁿ, ná kı̂-tó, ná thó͘-khùi. “Thiⁿ-toē nā ū chin-oa̍h ê Siōng-tè, kiû Lí chín-kiù goá” chit sı̂ put-ti put-kak kia̍h-thâu khoàⁿ thiⁿ, chiū tùi thiⁿ-téng thiaⁿ-kı̀ⁿ put-su-gı̂ ê siaⁿ “Ki-tok sı̄ kiù lí ê siōng-tè, tio̍h sı̀n Ki-tok” chin-chiàⁿ sı̄ chong-giâm Siōng-tè ê siaⁿ, chı̍t-sı̀-lâng tú-chiah thiaⁿ-kı̀ⁿ thiⁿ-toē ê chhòng-chō Chú chin Sı̂n Siōng-tè ê siaⁿ, sui-jiân bô khoàⁿ-kı̀ⁿ chû-pi Thiⁿ Pē ê bı̄n, chóng-sı̄ chit ê siaⁿ thiaⁿ tit chin bêng, chiàⁿ sı̄ chin oa̍h Siōng-tè ê siaⁿ, tùi kè-thâu ê chong-giâm choân-sin ná teng tèng tiâu pek-chhiat kı̂-tó “A-bēng! Chú ah! Goá sı̀n Lí! Kiû Lí sià-bián goá chit ê choē-jı̂n” choân-sin chhiong-moá hoaⁿ-hí, khı̀ kàu-hoē sı̀n-gióng kò-pe̍k, koat-tēng āu lé-pài beh niá sé-lé. 4. Sé-lé Tāi-chèng 15 nı̂ 7 ge̍h 4 jı̍t sı̄ goá siū sé ê jı̍t, it-seng bô boē kı̀-tit ê jı̍t. Tāng-choē poē-ge̍k-chiá, tùi Thiⁿ-pē ê chû-ài tit-tio̍h kiù, tit-tio̍h sià-bián chiâⁿ choè Siōng-tè ê iûⁿ-ko. Sı̄ chí-ū chı̍t pái ê keng-giām, ı̀-gı̄ toā koh chhim lêng-hûn têng-thâu-siⁿ ê jı̍t. Tiúⁿ-ló phâng toé chúi ê khı̀-kū khiā tı̄ piⁿ-á, bo̍k-su ùn 3 pái chúi soan-giân kóng goá ēng chúi kiâⁿ sé-lé hō͘ lí, kui tı̄ Pē, Kiáⁿ, Sèng Sı̂n ê miâ hit sı̂ goá kám-kak Iok-tàn-hô ê chheng-chúi thàu jı̍p goá ê sim-tn̂g. Kiám ū sé tı̄ iûⁿ-huih? Tı̄ sé lêng-hûn chheng-chheng ê pó-huih? Lí ê saⁿ kiám ū chheng-khı̀ pe̍h-pe̍h ná seh? Kiám ū sé tı̄ iûⁿ-ko ê pó-huih? Hoē-chiòng ê ha̍p-chhiùⁿ oán-jiân thiⁿ-téng ê chàn-bí. Hit mı̂ goá bāng chı̍t ê chin ū ı̀-gı̄ ê bāng, kia̍h-bo̍k khoàⁿ thiⁿ, chiū khoàⁿ-kı̀ⁿ âng-sek chhàn-lān ê thiⁿ tiong ū siá “Lí sı̄ Goá só͘ thiàⁿ ê kiáⁿ” ê toā jı̄, sı̍t-chāi boē hiáu hêng-iông ê hoaⁿ-hí kap kám-siā. “Sı̀n lâi siū sé-lé ê, beh tit-tio̍h kiù, m̄ sı̀n ê beh siū tēng choē.” (Má-khó 16:16) 5. Lâu Ba̍k-sái Ê Soaⁿ-kok Chhiong-moá têng-thâu-siⁿ ê hoaⁿ-hí, sim tûi-thiàu, sin-khu khin-sang, khai-sí tı̄ khòng-iá kı̂-tó, tı̄ hô-piⁿ chàn-bí Chú khoài-lo̍k ê seng-oa̍h, lé-pài m̄ bat khiàm-se̍k, liû-sim ēng phō͘-á kı̀ bo̍k-su ê káng-tō, koh chài tha̍k chiâⁿ choè pún-sin ê seng-oa̍h, tı̄ sı̀n-gióng ê lō͘ tit-tio̍h chiok-hok. Khai-sí tùi toā-lâng, ha̍k-seng, chhù-piⁿ ê gín-ná thoân hok-im, chò Chú-jı̍t-o̍h ê lāu-su, chhoā tio̍h kúi-nā cha̍p ê gín-ná, kàu-hoē chin lāu-jia̍t. Bô-lūn toā sió khó-chhı̀ iā giâm-siú sèng jı̍t, tı̀-ı̀ Siōng-tè kap kàu-hoē tiong-sim ê sı̀n-gióng seng-oa̍h, lâi chò kiàn-chèng, chin kı̂-biāu goá ê ha̍k-gia̍p it-hoat tit-tio̍h Siōng-tè ê sù-hok, chiū chiong chit hō hoaⁿ-hí ê sı̀n-sek pò-kò kò͘-hiong ê pē-bó. Liong-pit pē-bó káⁿ ē hoaⁿ-hí, bô phah-sǹg liâm-piⁿ chiap-tio̍h choa̍t-iân-chn̄g (pē-kiáⁿ choa̍t-iân, siū koáⁿ-chhut ê phoe) “chit-khoán m̄ ài chó͘-thoân ê hu̍t-kàu khı̀ sı̀n goā-kok sı̂n-bêng ê lâng, bô pē bô kiáⁿ lah, kā goá chhut-khı̀, m̄ kià ha̍k-hùi hō͘ lí lah”. It-seng chit chı̍t-pái chiap tio̍h lāu-pē ê choa̍t-iân chn̄g, chhiú the̍h phoe toà pâng-keng háu khah bô lâng chai, chài-saⁿ siūⁿ lâi siūⁿ khı̀, choè-āu tı̄ Siōng-tè lâi koan-sim, “kàu taⁿ goá hoān-choē kiâⁿ bia̍t-bô ê lō͘, kàu tē-ge̍k mn̂g-kháu, taⁿ tit-kiù; Chú Iâ-so͘ hiàn I ê sı̀ⁿ-miā kiù-sio̍k goá, goá goān pàng-sak it-chhè ku-tè Chú Iâ-so͘”. Chiū koat-sim thè-o̍h chē hoé-chhia tńg khı̀ kò͘-hiong. Tı̄ chhia-lāi it-bı̄ kiû Siōng-tè ê pang-chān, kı̂-tó ná chı̍h-chām, chiū léng-chēng ap-tó goá. Hit àm kiaⁿ-kiaⁿ hiâⁿ-hiâⁿ jı̍p chhù mn̂g kūi tı̄ chóng-pho͘ téng, tùi lāu-pē kóng khí thâu kàu bé tit-kiù ê kiàn-chèng. 2 tiám cheng āu, liāu-sióng lāu-pē beh kia̍h thûi-á khí-lâi kòng soà koáⁿ goá chhut-khı̀, thau kia̍h-thâu khoàⁿ lāu-pē ê bı̄n, lāu-bú chē tı̄ piⁿ-á bı̄n chin ut-būn, lāu-pē bı̄n âng kòng-kòng teh lâu ba̍k-sái. Ge̍k-choán! Tùi Sèng Sı̂n kóng boē chhut thó͘-khùi ê tāi-tó. “Sià-bián lí! Koh khı̀ ha̍k-hāu tha̍k-chheh” bı̂n-bāng iā bô siūⁿ ē-thang thiaⁿ tio̍h chit kù oē. Ah! Siōng-tè sı̄ thiàⁿ. “Thiàⁿ pē-bú khah kè-thâu tı̄ thiàⁿ Goá ê, boē kham-tit tı̄ Goá.” (Má-thài 10:37) 6. Sı̀n Ê Cheng-chiàn Ha̍k-seng kan ū lâng thê-khí siat-lı̍p Ki-tok-kàu chheng-liân-hoē ê sū, goá ū jia̍t-sim tùi choē-choē ha̍k-seng thoân-tō, chiū chū-chı̍p tâng sı̀n ê pêng-iú lâi sêng-lı̍p, chheng choè “Ga̍k lâm hoē” hoat-hoē sek hit jı̍t goá tùi tāi-ke kóng “choè chiâⁿ tūi iā oē liâm-piⁿ tó, beh hō͘ i bē tó, tek-khak tio̍h kı̂-tó, ūi-tio̍h beh chi-chhı̂ chit ê hoē goá beh chiâⁿ choè kı̂-tó ê lâng” goá chiū tı̄ chiàu-siòng ê sı̂ kūi teh kı̂-tó; chham-ka hit ê chiàu-siòng. Tı̄ ha̍k-hāu lâng lóng kóng goá sı̄ Ki-tok ê siáu lâng, thàu-chá khí-lâi poàⁿ-tiám chı̍t tiám-cheng kú ūi-tio̍h 200 goā lâng lâi kı̂-tó, koh tı̀-ı̀ tha̍k Sèng-keng, àm-sı̂ ka-kı̄ chı̍t lâng khı̀ soaⁿ-nı̍h, tı̄ toā chhiū-kha kı̂-tó. Koâⁿ-thiⁿ sı̂ ū sı̂ thǹg-theh toā-siaⁿ kı̂-tó “oh! chí ū chı̍t pái ê jı̂n-seng, Chú ah hō͘ goá chai Lí ê tiàu-bēng, iā chān goá ē-tit oân-chiâⁿ hit ê tiàu-bēng” Tha̍k sı̀n-gióng ê chheh choè khoài-lo̍k, chē tı̄ chhiⁿ-chháu téng tha̍k 1 ia̍h chiū kı̂-tó, koh tha̍k 1 ia̍h chiū be̍k-sióng. Chhim-sı̀n kám-hoà goá choè chhim ê chheh sı̄ Chú só͘ sù sı̀n-gióng ê sian-siⁿ. Sèng-keng koh lâi chiū-sı̄ ài tha̍k chiah ê chheh, sı̄ tha̍k 3 piàn 5 piàn 10 piàn. Hut-lân-se-su, Oē-su-lé, Sat-hu-sun-tāi, Kéng-poē só͘ tù ê chheh siāng hó, chhian-bāng goá iā oē tit chiàu án-ni pàng-sak it-chhè lâi ho̍k-sāi Siōng-tè kap lâng. “Chheng-khı̀ sim-koaⁿ ê lâng ū hok-khı̀, in-ūi in beh khoàⁿ-kı̀ⁿ Siōng-tè.” (Má-thài 5:8) 7. Kap Chit Sè-kan Ê Kau-chiàn Hit nı̂ nı̂-bé tông-kip seng koat-gı̄ beh khui bông-liân-hoē tiûⁿ-só͘ tı̄ chiú-ka, hoē-hùi 1 lâng 5 kho͘, chāi lâi ta̍k hāng goá lóng kap in tông-ı̀, taⁿ goá í-keng kò-pe̍k sı̄ Ki-tok-tô͘ só͘-í bē thang kap in tâng pō͘-tiau, goá chiū khí-lâi tùi in soan-giân “goá sı̄ Ki-tok-tô͘, só͘-í choa̍t-tùi kı̀m chiú” koh “lán sı̄ pē-bú kià chı̂ⁿ hō͘ lán tha̍k-chheh ê, kiò gē-toàⁿ lâi lim chiú m̄ ha̍p-kai” kā in hoán-tùi, in koh-khah oàn-hı̄n Chú mē goá, ū lâng toā siū-khı̀ “kā siu-lí!” tùi àn-ni siū tông-ha̍k pâi-thek, bô lâng kap goá kóng oē, thàu oa̍h-miā ê mn̂g sı̍t-chāi oe̍h. Goá khı̀ kàu-hoē kóng hō͘ bo̍k-su thiaⁿ kap i chham-siông, choân kàu-hoē lóng chi-chhı̂ goá khai-sí thè goá kı̂-tó. Chı̍t jı̍t goá tùi ha̍k-hāu beh tńg-lâi, tı̄ lō͘-nı̍h kan-ta chı̍t lâng tiām-tiām teh kiâⁿ-lō͘, thiaⁿ-kı̀ⁿ āu-bı̄n ū pêng-iú teh kiò “Chó-tı̂n!” I oá lâi kā goá kóng “goá chai lí sı̀n Ki-tok sı̍t-hêng kı̀m-chiú bô jı̍p ı̂m-loān ê siā-hoē, chóng-sı̄ goá sı̄ lí ê chhin-iú, ūi-tio̍h lí kap tông-ha̍k chò bō-á-sim, só͘-í pài-thok lí ba̍k-chiu pàng kheh-kheh lâi chhut-se̍k leh, bô lim-chiú, bô chhiùⁿ-koa bô iàu-kín, mài kā khoàⁿ gē-toàⁿ ê bı̄n, choè lí tiām-tiām kı̂-tó, hit ê tiûⁿ-bı̄n kiám-chhái oē tit-tio̍h chheng-khı̀!” goá thiaⁿ chit khoán un-loán tông-chêng ê oē tòng boē tiâu, chiū toàn-jiân kóng “Lí ê oē goá boē thang chàn-sêng, sı̀n-gióng sı̄ sūn-thàn Siōng-tè ê lō͘” pêng-iú siū-khı̀ 2 lâng chiū lı̄-pia̍t, chiū-sı̄ kiâⁿ pi-siong jı̂n-seng ê pun-chhe tiám, án-ni goá m̄ bat suh 1 ki hun, choan-sim chı̍t-ı̀ gióng-bōng Chú, kun-tè I. “Lín tio̍h tùi hit ê oe̍h-mn̂g jı̍p; in-ūi thàu kàu bia̍t-bô ê, hit ê mn̂g khoah, hit ê lō͘ toā tiâu, tùi hia jı̍p ê lâng choē. Thàu-kàu oa̍h ê, hit ê mn̂g oe̍h, hit ê lō͘ soè-tiâu, chhē tio̍h ê lâng chió.” (Má-thài 7:13:14) 8. Thè O̍h Ê Koat-ı̀ Ná chhin-chhiūⁿ goá pàng-sak chit sè-kan it-chhè ê ǹg-bāng, kı̂-sı̍t sı̄ Ki-tok ê thiàⁿ-thàng chhui-pek goá. Bô poàⁿ lâng beh kap goá kóng oē chit khoán ha̍k-hāu seng-oa̍h tı̍t-tı̍t bô ài, taⁿ beh cháiⁿ-iūⁿ? Chiū siūⁿ tio̍h kı̀m-chia̍h kı̂-tó, khai-sí kı̀m-chia̍h ê-hng tǹg kı̂-tó Siōng-tè, lim-chúi chia̍h chheng peh hio̍h. Khai-sí thoàn-liān nāi-khó͘, nāi-pı̂n, nāi-iau ê nāi-hoa̍t seng-oa̍h. Ū chı̍t ê-hng ê kı̂-tó-hoē, bô-ı̀-tiong án-ni kiàn-chèng, bo̍k-su tio̍h chı̍t kiaⁿ kóng “He m̄ sı̄ Siōng-tè ê lō͘”, sı̄ kóng “Siōng-tè sı̄ chhòng-chō thiⁿ toē ê Chú, ū pı̄-pān só͘ su-iàu ê mı̍h” chóng-sı̄ cheng-sı̂n tek ê khó͘-chiàn m̄-sı̄ án-ni soah, kàu-bé chiū khoán hêng-lí, koat-sim thè-o̍h, kap Ga̍k-lâm-hoē lâng-sı̀n ê pêng-iú saⁿ sı̂, in lóng chê-siaⁿ bán-liû goá, chóng-sı̄ boē oē chó͘-tòng goá choè-āu khı̀ kàu-hoē sı̂-pia̍t bo̍k-su, bo̍k-su tio̍h toā-kiaⁿ. “Sian-siⁿ, siū tio̍h lí thiàⁿ chin toā, taⁿ goá thè o̍h lah!” “Án-ni lí beh chhòng sím-mı̍h?” “Goá beh choè thoân-tō-chiá, thoân hok-im kàu sí.” “Beh khı̀ tó-ūi thoân?” “Kiâⁿ kàu hia thoân kàu hia.” Bo̍k-su it-hoat kiaⁿ. “Chó-tı̂n hiaⁿ, chhiáⁿ bān, lí só͘ choè bô tú-hó, ta̍k-hāng sū tio̍h chiàu tō-lí, lí koh kúi ge̍h-jı̍t chiū pit-gia̍p.” “Sı̄!” “Lí tio̍h tha̍k hō͘ pit-gia̍p, thèng-hāu 1 nı̂, hit tiong-kan goá thè lí siat-hoat jı̍p Sı̂n-ha̍k-hāu, tı̄ hia tha̍k liáu lí thang choè chin hó ê thoân-kàu-su.” Goá thâu-khak chhih-chhih ı̀n kóng “Án-ni hó!” 9. Keng-kè Lâu Ba̍k-sái Ê Soaⁿ-kok Kai-chài koh lâu tı̄ ha̍k-hāu, chóng-sı̄ iáu chit kúi ge̍h-jı̍t sı̄ hoân-būn kap kı̂-tó ê seng-oa̍h, ná kı̂-tó sim ná kám-kak Chú Iâ-so͘ teh chio goá choè thoân-tō-chái. Ha̍k-hāu sūn-sū pit-gia̍p, ū thâu-lō͘, ū ka-têng, che sı̄ goá kò-jı̂n ê sū, sı̄ sió-sū, khoàⁿ bô ka-kı̄ lâi kun-tè Chú, choè thoân-tō-chiá, ín-chhoā choē-choē choē-jı̂n jı̍p thian-kok, chiàⁿ sı̄ goá choè toā, choè sı̂n-sèng ê tiàu-bēng, chóng-sı̄ goá kéng chit tiâu lō͘, it-tēng éng-oán siū koáⁿ chhut, siūⁿ kàu chia chiū it-hoat pek-chhiat kı̂-tó “ah! Siōng-tè ah, kà-sı̄ goá só͘ tio̍h kiâⁿ ê lō͘, ín-chhoā goá, lı̂n-bín goá chı̍t ê loán-jio̍k ê lâng, goá chiong chit ê seng-khu lêng-hûn lóng hiàn hō͘ Chú!” Ta̍k mı̂ tı̄ bô lâng chheng-chēng ê só͘-chāi, pek-chhiat án-ni kı̂-tó. Ha̍k-hāu pit-gia̍p, tńg-lâi kò͘-hiong, í-goā hō͘ goá khoàⁿ-kı̀ⁿ Chú ê sèng-chhiú, sı̄ lāu-bú khí-siáu. Goân-in tāi-khài in-ūi lāu-pē ê hò͘ⁿ-chiú, bô chèng-keng, chū-jiân goá ū khàn-hō͘ ê chek-jı̄m. Ū sı̂ kui lé-pài lóng bô chia̍h, bih tiàm phoē-lāi khàu, ū sı̂ chiū toā-loān, kia̍h chhài-to tui beh thâi tàu kha-chhiú ê cha-bó͘ gín-ná, khoàⁿ tio̍h sim-koaⁿ pho̍k-pho̍k chhéng, sı̂-khek to boē thang pàng-sang. Ū-sı̂ mı̂-sı̂ chiah chhē bô lāu-bú ê chong-chek, chiū sı̀-koè chhē, chiah tı̄ soaⁿ-nı̍h chhē tio̍h i tı̄ hia khàu, chiah chhoā i tńg-lâi. Koh ū sı̂ chhē lóng bô, siūⁿ kóng káⁿ sı̄ tńg-khı̀ āu-thâu chhù, chiū the̍h io̍h-kan cháu 8 kong-lí. Lō͘-tiong tú-hó tiòng toā-chúi, kiô lâu-khı̀, goá chiū thǹg saⁿ pa̍k toà thâu-khak koat sí ê kak-ngō͘ siû kè hô, kàu ūi lāu-bú kó-jiân tı̄ hia, tiām-tiām chē, goá kā i kiò iā lóng bô ı̀n! M̄ chia̍h, io̍h-kan siak hō͘ phoà. Ū sı̂ the̍h hé-chhâ ná chhin-chhiūⁿ beh pàng-hé, hō͘ lâng sim chin put-an, sı̍t-chāi kàu-gia̍h thang pi-siong. I-io̍h bô kong-hāu, goá chiū kı̂-kiû Siōng-tè. Lāu-pē ū chhiáⁿ toē-lí-su lâi khoàⁿ, kóng sı̄ hit keng sin khí ê chàu-kha soah-tio̍h, só͘-í tı̄ hit ê chiu-ûi sio-hiuⁿ liām-keng. Goá chiū khai-sí jia̍t-sim kı̂-tó, tı̀-ı̀ gián-kiù Sèng-keng ài chai Chú cháiⁿ-iūⁿ i-tı̄ pı̄ⁿ-lâng, cháiⁿ-iūⁿ koáⁿ-kúi i cheng-sı̂n pı̄ⁿ, koh hit tia̍p khí, ê-hng sı̂ chū-chı̍p chheng-liân lâng khai-sí chū-hoē, tông-sı̂ chū-chı̍p chng lāi ê gín-á khai-sí Chú-jı̍t-o̍h, tit-tio̍h Chú ê sù-hok, chng-lāi ê gín-ná bô chı̍t ê bô lâi, liân biō-nı̍h ê gín-ná iā lâi, tian-tò mâ-hoân. Hoē-tiûⁿ tı̄ chhng-khò͘, ēng chheh-pau choè í-á, chheng-liân sı̄ àm-sı̂ tı̄ soaⁿ-téng tiám-teng lâi chū-hoē, ū chı̍t ê hiaⁿ-tı̄ tı̄ hoē-tiong ba̍k-chiu piàn-sek, chhut kı̂ⁿ-ı̄ⁿ ê siaⁿ hoat-choh, chiū sı̄ iûⁿ-hı̂n-chèng, goán chiū ūi chit ê hiaⁿ-tı̄ kı̂-tó. Ūi-tio̍h lāu-bú kap chit ê hiaⁿ-tı̄ chı̄n-la̍t ê kı̂-tó, iā lóng bô khoàⁿ-kı̀ⁿ sı̂n-jiah. Che lóng sı̄ ūi-tio̍h goá ê lêng-hûn bô chheng-khı̀. Chó-thian kı̂-tó liām choē-choē lâng ê miâ thè in kı̂-tó. Tē-it; sı̄ chit ê iûⁿ-hı̂n ê hiaⁿ-tı̄, tē-jı̄: sı̄ ūi-tio̍h lāu-bú. I ū koh khai-sí jia̍t-sim tùi toā-lâng thoân-tō, chng-nı̍h toā ho̍k-heng, gín-ná khoàⁿ tio̍h goá chiū kia̍h-chhiú hoah “Eng-è bān-soè” chóng-sı̄ ū ê in-ūi sı̀n goā-kok sı̂n ê lí-iû hō͘ ha̍k-hāu ê lāu-su phah, koh ū ê in-ūi sı̀n Ki-tok siū pē-bú chek-pı̄, m̄ chún khı̀ ha̍k-hāu. Goá iā kám-kak m̄ thang kú-tn̂g toà chia, chiū khai-sí chún-pı̄ jı̍p Sı̂n-ha̍k-hāu. “Lâi tè goá, goá beh hō͘ lín tit-tio̍h lâng chhin-chhiūⁿ thó-hı̂ ê.” (Má-thài 4:19) 10. Jı̍p Sı̂n Ha̍k-hāu Tùi Kiat-tiân bo̍k-su ê hó-ı̀ ē thang jı̍p Sı̂n ha̍k-hāu, chóng-sı̄ ū chı̍t ê lân-koan chiū-sı̄ chhin-chhek ê hoán-tùi. Lāu-pē àm-àm pài-thok chhin-chhek iú-le̍k ê i-seng beh khó͘-khǹg goá. Ū chı̍t jı̍t chhe lâng kiò goá khı̀, chek-sı̂ khai-sí chham-siông chiong-sin ê sū. “Lí sı̄ toā kiáⁿ, lāu-bú ū hit khoán cheng-sı̂n-pı̄ⁿ, lāu-pē kı̄n-lâi sim-chōng iā m̄ hó, koh lín sió-tı̄ bô kú tio̍h khı̀ choè peng, lí tek-khak tio̍h ho̍k-sāi pē-bú, lâi sêng-chiap ke-gia̍p, só͘-í tio̍h kiat-hun.” Goá ı̀n kóng “Boē ēng-tit, chit ê sin-khu, lêng-hûn lóng hiàn hō͘ Ki-tok, goá tio̍h choè thoân-tō-chiá.” I-seng kóng “Phoà-pı̄ⁿ ê sı̂ sím-mı̍h lâng beh khoàⁿ-kò͘?” “Siōng-tè teh khoàⁿ-kò͘.” “Khùn-lân ê sı̂, sím-mı̍h lâng chı̂ⁿ hō͘ lí?” “Khùn-lân ê sı̂ Siōng-tè ē pang-chān goá.” “Bô châi-sán, lí ê Siōng-tè kiám oē kā lí pó-chèng?” “Oē! I oē kā goá pı̄-pān só͘ khiàm-ēng ê.” I-seng khoàⁿ-phoà lah! Kóng chit khoán oē it-seng thâu chı̍t pái thiaⁿ-kı̀ⁿ, Bo̍k-hō͘ in hāu-siⁿ ê sı̀n-gióng tâm thong chng lóng chai, chiâⁿ choè chng-nı̍h chhut-miâ oē-tê. Chóng-sı̄ m̄ sı̄ án-ni soah, koh lâi chiū-sı̄ khui ka-cho̍k hoē-gı̄. Ū piān-hō͘-sū, ū ha̍k-hāu ê lāu-su, ū choh-sit lâng, iā ū seng-lí lâng, chı̍t ê-hng tāi-ke lóng chiâu kàu, goá chē tı̄ siāng bé ūi, chı̍t ê chı̍t ê to sı̄ jia̍t kún-kún ê kàu-hùn, thâu kàu bé goá lóng thâu-khak chhih-chhih teh thiaⁿ. Ta̍k ê to sı̄ kóng: “Ki-tok-kàu kiám sı̄ kà lâng put-hàu ê chong-kàu nā hit hō chong-kàu m̄ thang sı̀n, nā-sı̄ kà-sı̄ iú-hàu, chiū lí tio̍h toà chhù-nih heng-hàu pē-bú, sêng-chiap ka-gia̍p chiah tio̍h.” Goá ı̀n kóng “Ki-tok-kàu sı̄ kà-sı̄ lâng iú-hàu, chóng-sı̄ goá siū tiàu tio̍h khı̀ choè thoân-tō-chiá, goá nā sūn-thàn Siōng-tè, chiū I oē khoàⁿ-kò͘ goá ê ka-têng, Siōng-tè ū choè hó ê an-pâi, lāu-bú ê pı̄ⁿ iā oē hó, bián chı̂ⁿ, bián châi-sán, chí-ū chı̍t seng-khu chiū hó, chhiáⁿ iông-ún goá khı̀.” Án-ni kúi nā pái, kàu-bé tāi-ke lóng khoàⁿ-phoà, phāu tio̍h sit-bāng kap siū-khı̀, chin àm chiah tńg-khı̀, goá chiū koāⁿ chı̍t ê hêng-lí khı̀ Sı̂n-ha̍k-hāu. “In-ūi pē-bú lı̄-khui goá. Iâ-hô-hoa beh siu-liû goá.” (Si-phian 27:10) 11. Siōng-tè Ê Sim-su Jı̍p Sı̂n-ha̍k-hāu thang ha̍k-sı̍p choē-choē hāng, chí ū chı̍t hāng goá bô bē kı̀-tit, chiū-sı̄ lāu-bú ê phoà-pı̄ⁿ, chá, àm jia̍t-sim teh kı̂-tó, chóng-sı̄ lóng bô thiaⁿ tio̍h hó ê siau-sit, che sı̄ tùi goá ê bô kàu-gia̍h jia̍t-sim, só͘-í kı̂-tó bô tit-tio̍h chiap-la̍p, ta̍k ê-hng kı̀m-chia̍h, thǹg chhiah-kha chhut-khı̀ Sı̂n-hō͘ ê ke-lō͘, lō͘-piⁿ pò͘-tō, sui-jiân lo̍h-seh, iáu-kú chin-choē lâng kia̍h hō͘-soàⁿ khiā teh thiaⁿ. Tńg-lâi ha̍k-liâu beh khùn, chóng-sı̄ thong-mı̂ kàu thiⁿ-kng kha lóng bē sio. Án-ni iáu-kú bē thang thiaⁿ-kı̀ⁿ hó ê sı̀n-sek, siūⁿ kóng che sı̄ in-ūi goá ê jio̍k-thé su-io̍k bô chheng-khı̀, chiū tı̄ chheh-tû āu khǹg chı̍t ki chhê-á, nā sim-lāi ū pháiⁿ liām-thâu jı̍p-lâi chiū kia̍h khí-lâi kòng thâu-khak hoán-hoé kı̂-tó. Chit sı̂ siū chí-sı̄ chı̍t hāng choē, chiū-sı̄ siūⁿ khí goá 10 hè ê sı̂ tı̄ chng-nih ê tiám-á thau-the̍h 1 tè sap-bûn, tiàm-chú m̄ ài chhap gín-ná 1, 2 chiam ê boé-bē, chin m̄ kam-goān, tng-tán i bô chù-ı̀ chiū kā thau-the̍h 1 tè 5 chiam chı̂ⁿ ê sap-bûn, chek-sı̂ siá phoe lok 1 kak-gûn ê iû-phiò kià tńg-khı̀ kā tiàm-chú siā choē, tiàm-chú chiap tio̍h phoe, kám-kak oa̍h Ki-tok ê hok-im, chiong phoe the̍h khı̀ hō͘ lāu-pē khoàⁿ, lāu-pē gō͘-kái sı̄ tiàm-chú teh bú-jio̍k i chin siū-khı̀, tē 2 pái chiap tio̍h choa̍t-iân chn̄g, “choè chha̍t ê put-hàu kiáⁿ, pē-bú ê bı̄n hō͘ lí kô͘ noā-thô͘, m̄ chún lí kā goá tńg-lâi, tùi chia pē, kiáⁿ choa̍t-iân!” chit tiuⁿ phoe hō͘ goá sin-khu gı̄-gı̄ chhoah. Lâng só͘ iā ê sı̄ sím-mı̍h, i iā beh siu hit hō.” (Ka-lia̍p-thài 6:7) Chú ê oē sı̄ chin, goá chit ê choē-jı̂n eng-kai siū choē ê hêng-hoa̍t. Kàu hioh-joa̍h ê sı̂, sûi lâng lóng chin hoaⁿ-hí beh chhut-khı̀ hā-kùi thoân-tō, goá siūⁿ beh khı̀ Sù-kok ê nāi-pı̄ⁿ-tó soé pı̄ⁿ-lâng ê kha, khı̀ kàu Ko-chhêng chiah chai m̄-chún jı̍p tó, chiū peh chiūⁿ Pat-tó ê koân soaⁿ-téng, chhu thán-á tı̄ hia kı̀m-chia̍h kı̂-tó 3 jı̍t kú. Lám Sèng-keng siūⁿ khí goá ê pháiⁿ-miā soà khàu khí-lâi, khàu kàu ba̍k-sái tih tâm Sèng-keng, o͘-a pi-siong ê siaⁿ í-goā lóng bô thiaⁿ-kı̀ⁿ sím-mı̍h, siūⁿ beh toà chia kı̀m-chia̍h hō͘ i sí, chóng-sı̄ bē kham-tit iau chiū lo̍h soaⁿ, siūⁿ kàu ka-kı̄ khek-kí sim ê nńg-chiáⁿ kàu-gia̍h kiàn-siàu. Sin-khu bô poàⁿ-sián chiū khı̀ tǹg-tiàm beh tǹg sı̂-pió kap só͘ ū ê mı̍h, in-ūi bô pó-chèng-jı̂n tǹg-tiàm m̄ chhap goá, chiū ha̍p chhiú ai-kiû koè-lō͘ lâng kā goá boé só͘ ū ê mı̍h, tit-tio̍h 5 kho͘-gûn, tùi hia chē chûn khı̀ Tāi-hun koān ê Chò-hō-koān, sūn hái-hoāⁿ ná kiâⁿ ná pò͘-tō khı̀ kiong-kiā tiàm bó͘ kàu-hoē lâi pang-chān thoân-tō, ta̍k-jı̍t ta̍k àm chhiah-kha pò͘-tō, tit-tio̍h choē-choē lâng hoaⁿ-hí thiaⁿ. 2 kò-ge̍h ê hōng-sū kiat-sok, tı̄ sàng-pia̍t-hoē hit àm, tùi tiúⁿ-ló tit-tio̍h chin hó ê bián-lē kap kim chı̍t hong, āu-lâi thiah-khui khoàⁿ ū 200 kho͘. Ha̍k-liâu ê chia̍h-hùi 1 ge̍h jı̍t 16 kho͘, chiah toā tiâu ê chı̂ⁿ, chin-chiàⁿ sı̄ Siōng-tè ê un-sù, tńg lâi Sı̂n ha̍k-hāu chiū chiong toā-poàⁿ ê chı̂ⁿ pun hō͘ sòng-hiong ê tông-ha̍k, kiong-kiā ê iú-le̍k chiá chū-chı̍p beh chó͘-chit “Chó-tı̂n hō͘-oān hoē” goá kā in sı̂ thè, in-ūi “Siōng-tè í-goā goá bô beh oá-khò sím-mı̍h”. Goá tńg-lâi Sı̂n-ha̍k-hāu iā bô tit-tio̍h lāu-bú pı̄ⁿ hó ê siau-sit, nā chiàu án-ni khı̀, chiū goá sı̄ chı̍t ê pe̍h-chha̍t ê, chhin-cho̍k-hoē ê sek-siōng, goá ê kiàn-chèng “goá nā kun-tè Iâ-so͘, Chú Iâ-so͘ tek-khak oē i-hó goá ê lāu-bú” chit kù oē khó͘-chhó͘ goá ê sim, goá chiū tùi hāu-tiúⁿ kóng bêng; goá beh thè-o̍h, koat-sim beh siá-sı̀n thoân-tō kap kı̂-tó. Mái-ia-su sian-siⁿ phō goá ê ām-kún lâu ba̍k-sái kóng “Chó-tı̂n kun, lí tio̍h kè-sio̍k tha̍k-chheh, Hō-chhoan-kun hiah-nı̍h siū tiōng-iōng sı̄ tùi i ū chhut-la̍t tha̍k, lí nā chhut-la̍t tha̍k iā beh án-ni siū tiōng-iōng chit hō ê un-chêng goá éng-oán bô boē kı̀-tit. (Myers phok-sū sı̄ Hō-chhoan sian-siⁿ ê un-su). Chhiau-oa̍t gı̄-lí jı̂n-chêng, goá tùi Sı̂n-ha̍k-hāu thè-o̍h, siūⁿ kóng lāu-bú pı̄ⁿ hó liáu-āu, tùi Siōng-tè ê un-tián káⁿ oē thang koh tha̍k Sı̂n-ha̍k. 12. Kı̂-tó Ê Lâng Soan-kàu-su Thé-lah sian-siⁿ chiap-la̍p goá, khún-chhiat chí-tō goá kı̂-tó, chit ê lâng sı̄ kı̂-tó ê lâng, siông-siông thong mı̂ thè lâng kı̂-tó. Kám-siā Chú hō͘ goá tùi i tit-tio̍h chin chhim ê kà-sı̄, koh chhe Siáu-chhoan bo̍k-su lâi chí-tō goá kı̂-tó kap sı̍t-toē thoân-tō. Chit lâng chin sòng-hiong, 3 jı̍t bô chia̍h iā bô gāi-tio̍h, kı̀m-chia̍h teh thoân-tō, siông-siông hián-chhut i-pı̄ⁿ ê sı̂n-jiah, goá iā chhim-bāng oē chiâⁿ choè chı̀-khı̀ kian-tēng, sèng-kiat, sı̂n-jú kı̂-tó ê lâng, goá tùi jı̍p sı̀n ê tong-sı̂ chiū teh siūⁿ tē it iàu-kín sı̄ kàu-hoē, chhin-chhiūⁿ Sù-tô͘ Hêng-toān sı̀n ê lâng ta̍k lâng lóng siū Sèng Sı̂n chhiong-moá, ū sı̂ bat liân-soà kı̂-tó kúi-nā tiám-cheng, chiah siū Sèng Sı̂n ê lêng-le̍k chhiong-moá, chóng-sı̄ pek-chhiat ǹg-bāng khah thiat-toé sêng-siū Sèng Sı̂n ê un-hūi. Kiat-kó ka-kı̄ hoán-séng it-hoat khiam-pi hoán-hoé, sio̍k-sè it-chhè ê mı̍h khoàⁿ choè pún-sò, oân-choân hiàn choè oa̍h-chè, chhiat-chhiat kı̂-kiû Sèng Sı̂n. Tùi án-ni chı̀n-hêng ta̍k-jı̍t poah kúi-nā tiám-cheng ê kı̂-tó. Án-ni iû-goân bē thang tit-tio̍h sù-tô͘ hit khoán ê un-hūi, tı̀-kàu sit-bāng, chū-pō chū-khı̀, goá ê thiàⁿ Chú bô su pa̍t-lâng, pàng-sak sè-kan oân-choân hiàn-sin ê seng-oa̍h, ūi Chú iā khah choē ê hoân-ló kap cheng-chiàn, cháiⁿ-iūⁿ bô tit-tio̍h Sèng Sı̂n ê un-sù? Káⁿ sı̄ Siōng-tè pàng-sak goá, só͘-í kàu chia m̄ kı̂-tó là, chit sè-kan bô ǹg-bāng lah, koat-sim beh chū-sat. Poàⁿ-mı̂ khí lâi iân tiān chhia-lō͘, ǹg Su-mô͘ hái-hoāⁿ beh khı̀ sí. Ah! Hit mı̂ sı̄ hô-téng ê pi-siong o͘-àm ê Khek-se-má-nı̂ ah. Khè-thâu ê khó͘-thàng choa̍t-bāng, thâu-khak chhih-chhih ná thó͘-khùi pún-sin siū Siōng-tè ê chiù-chó͘, moá-moá ê pi-thòng tian kha teh kiaⁿ. Choa̍t-bāng ê ke̍k-tiám thâu-khak ná chún hō͘ lâng ēng kòng-thûi kòng-tio̍h, siū toā kiaⁿ chiū tó lo̍h khı̀, chiū-sı̄ thâu-hia̍h lòng tio̍h tiān-hé-thiāu. Tó toē ê sùn-kan khó͘-būn ê sim piak-lı̍h, ba̍k-sái ná chúi-chhiâng tı̍t lâu, khàu iā bē chhut-siaⁿ, hit sı̂ chhin-chhiūⁿ toā chio̍h hiah tēng, goá ê sim siau-iûⁿ chhin-chiūⁿ la̍h, chio̍h ê sim chhin-chhiūⁿ chúi-chhiâng chhiâng soàⁿ ê chúi, phoà kàu chhùi kô͘-kô͘. Tı̄ àm-mı̂ bû-jı̂n só͘ chiū khí-lâi, kha lóng bô la̍t ná kiâⁿ ná-tian, só͘-í kàu Su-mô͘ hái-hoāⁿ chiah ū 6 kong-lí iā bô iông-ı̄ⁿ kàu, kiâⁿ 3 pō͘ chiū ǹg-thiⁿ “ah! Goá thài oē chiah put-hēng?” Kiâⁿ 5 pō͘ pûn toā-khùi “pē-bú m̄ tı̍h goá, sè-kan khı̀-sak goá, taⁿ Siōng-tè iā khı̀-sak goá” siū hiat-ka̍k tı̄ tiān-chhia lō͘-piⁿ, chē tı̄ pùn-sò tiong teh thó͘-khùi. Chı̍t-ē chai lâng, thiⁿ chiām-chiām teh kng. “Ai ah! Goá chū-sat bô khı̀!” Taⁿ bô hoat-tō͘ lah, siūⁿ kóng chū-sat tio̍h oān jı̍t, chiū chē tiān-chhia tńg-lâi kàu-hoē. Tùi Siōng-tè goá pí lâng khah jia̍t-sim, khah tiong-sı̍t, hit ê kiau-ngō͘ kian-tēng ê sim, tı̄ hit mı̂ hō͘ Siōng-tè ê Sèng-chhiú phah-chhùi lah. “......ia̍h kap sim-sı̂n thòng-hoé khiam-pi ê lâng saⁿ-kap khiā-khí, beh hō͘ khiam-pi ê lâng ê sim-sı̂n koh-oa̍h, ia̍h hō͘ thòng-hoé ê lâng ê sim koh-oa̍h.” (Í-sài-a 57:15) Kàu āu-jı̍t bêng-pe̍k chit ê sū, chiū bô koh siūⁿ chū-sat, khiam-pi it-bı̄ kám-siā kap chàn-bí. Ia̍h siū Sèng Sı̂n ê un-hūi chhiong-moá, kàu hiān-chāi iā put-sı̂ ū hūn chit ê un-hūi. Goá ê sı̀n-gióng seng-oa̍h thang kóng sı̄ kap Sèng Sı̂n ê kau-thong! “Chhin-chhiūⁿ hé ê chı̍h, hioh tı̄ ta̍k-lâng ê téng-bı̄n.” (Sù-tô͘ Hēng-toān 2:3)