Sūn-thàn

Bat chı̍t jı̍t ū saⁿ ê gín-ná tı̄ lō͘-nı̍h chò-hoé teh chhit-thô, hut-jiân-kan thiaⁿ-kı̀ⁿ in lāu-bú ê siaⁿ teh kiò in.“Hōng--á, A-kim, Bān-chhun! Lâi lah! Kín-kín lâi!”In-ūi in m̄ ài khı̀, Hōng--á chiū kóng,“Án-niâ m̄ chai-iáⁿ lán sı̄ tı̄-chia, m̄ bián khı̀. Káⁿ sı̄ beh kah lán khı̀ boé mı̍h, á-sı̄ phō sió-tı̄ chhit-thô. Lán kā tèⁿ m̄-chai, chiū hó.”A-kim ia̍h kóng,“Tú-á teh choè siāng hó chhit-thô ê sı̂, án-niâ put-sı̀ teh kiò lán, m̄ bián khı̀.” Chóng--sı̄ Bān-chhun lóng bô kóng poàⁿ kù, khí-lâi choè i khı̀. Nn̄g ê chí-moē-á chiū siūⁿ kóng,“Taⁿ i tò-khı̀ lah, chiū kàu-gia̍h, lán m̄ bián.”In chiū koh chhit-thô, m̄-kú khiàm Bān-chhun thang choè-phoāⁿ sı̄ khah bô hiah-nı̍h sim-sek, ia̍h in ê liông-sim káⁿ iā lio̍h-á teh chha̍k in. Só͘-í koh koè poàⁿ tiám cheng kú, in chiū tò-khı̀ chhù-nı̍h, ài beh khoàⁿ in hiaⁿ sı̄ teh choè siáⁿ-hoè. Chhoē i bô, chiū mn̄g in lāu-bú, Bān-chhun khı̀ tó-ūi. In lāu-bú chiū kóng: “I ū khı̀ kong-hn̂g chhit-thô, lín a-chek tú-á lâi, beh chhoā lín lóng khı̀, hō͘ lín thang chē chū-choán-chhia, soà boé mı̍h hō͘ lín chia̍h. Goá ēng toā siaⁿ kiò lín, Chóng--sı̄ kan-ta Bān-chhun lâi nā-tiāⁿ. Lín a-chek boē thang thèng hāu, só͘-í chò in khı̀.” Chí-moē-á chiū hoân-ló kóng: “Taⁿ hāi lah! Lí thài bô kā goán kóng sı̄ sím-mı̍h tāi-chı̀? Goán nā chai-iáⁿ án-ni, tek-khak hoaⁿ-hí lâi.” Lāu-bú chiū kóng: “M̄-kú Bān-chhun i ia̍h m̄ chai-iáⁿ, chóng--sı̄ ū thiaⁿ goá teh kiò, chiū liâm-piⁿ lâi.” A-kim kap Hōng--á chiū tiām-tiām, teh saⁿ khoàⁿ, bô koh kóng sím-mı̍h oē. In-ūi in chai-iáⁿ sı̄ ka-kı̄ ê chhò-gō͘, āu pái chiū tio̍h hoaⁿ-hí thàn. (Tâi-oân Kàu-hoē-pò tē 440 koàn, 1921 nı̂ 11 ge̍h)