San-pan-hı̂

Sè-hàn ê sı̂, goán tau thâu-chêng hit-tiâu khe--nih, lóng sı̄ san-pan-hı̂ teh siû. San-pan-hı̂ sèⁿ-miā-la̍t chiâⁿ kiông, iū-koh kiò-chò “sio-phah hı̂-á”. M̄-koh, chit-má tı̄ goán tau thâu-chêng ê khe-á-té, sı̄ án-choáⁿ lóng khoàⁿ bē tio̍h san-pan-hı̂--a-leh? Goá siūⁿ, khoân-kéng phò-hoāi sı̄ siōng toā ê goân-in. Lán nā beh kiám-thó Tâi-oân ê khoân-kéng būn-tê, ū-iáⁿ sı̄ kiám-thó bē liáu. soaⁿ-pho-tē loān khai-hoat, hō͘ hō͘-chúi kā soaⁿ-téng ê lok-kô͘-á-moê lóng lâu lo̍h-lâi khe-té, hāi hı̂-á bô hoat-tō͘ kè-sio̍k seng-chûn--lo̍h-khı̀; koh ū chı̍t-hāng, tō-sı̄ choh-sit-lâng loān iōng lông-io̍h, chō-chiâⁿ khe--nih ê san-pan-hı̂ giōng beh tn̄g-chéng. San-pan-hı̂ sui-jiân chiâⁿ sè-boé, m̄-koh kong-kek-la̍t chiâⁿ toā, koh khah toā-boé ê hı̂-á mā chih-chat bē tiâu. Chhiūⁿ kóng chháu-hı̂-á, toā-thâu-liân ah-sı̄ tai-á, lóng sı̄ san-pan-hı̂ kong-kek ê bo̍k-phiau. Ba̍k-chiu sı̄ hı̂-á siōng jio̍k ê só͘-chāi, san-pan-hı̂ lóng iōng siōng kín ê sok-tō͘ kong-kek toā-boé hı̂-á ê ba̍k-chiu, soah hāi toā-boé hı̂-á khoàⁿ-tio̍h san-pan-hı̂ tō seng chhoah leh tán, kín siám--khui niū hō͘ i koè. Khó-sioh, lán ê khoân-kéng pāi-hāi kah siuⁿ giâm-tiōng, chit-má siūⁿ beh tı̄ khe-té khoàⁿ-tio̍h san-pan-hı̂, í-keng chin oh--a! (TGB Thong-sı̀n tē 19 kı̂, 2001 nı̂ 4 goe̍h)