Sat-thâng-che sı̄ phang-chúi pau-chong ê lông-io̍h

e̍k Kóng tio̍h lông-io̍h, lán lóng chin kiaⁿ, tān-sı̄, chin chió lâng chai-iáⁿ, sat-thâng-che put-kò sı̄ ū koà phang-chúi pau-chong ê lông-io̍h, kèng-jiân ta̍k-ê ka-têng lóng tāi-liōng teh sú-iōng. Nā-sı̄ chhù-lāi-bı̄n kap hù-kı̄n ê khoân-kéng chin chheng-khı̀, iā bô khǹg chin-kú ê pùn-sò-tui (Múi chı̍t ê ka-têng lóng ài chin ha̍p-chok, tı̄ chí-tēng ê sı̂-kan chiah the̍h pau chin-ân ê pùn-sò chhut--lâi). Chiū ē kiám-chió báng-á hô͘-sı̂n ka-choa̍h kap niáu-chhí. Chhù-lāi keng-siông pó-chhı̂ chheng-khı̀, bô sí-chúi bih báng-á hô͘-sı̂n, bô sí-kak bih niáu-chhí, bô kū-pò-choá kū-ê mı̍h-kiāⁿ tún kui-tui bih ka-choa̍h, chiū ē kiám-chió chiah-ê thâng-hāi. Ka-tı̄ ê chhù-lāi chheng-khı̀, chhù-piⁿ ê khoân-kéng nā bô chheng-khı̀, in ê hāi-thâng iā ē cháu-koè--lâi, lán ē-sái ēng ē-bı̄n chit kúi-chióng pí-kàu khah an-choân koh chū-jiân ê hong-hoat lâi èng-hù: 1.Sat-bûn-chúi ē-tàng thâi-sí ka-choa̍h. Chiong chı̍t poe ê sat-bûn-si phàu 4 kong-seng ê sio-chúi, hē toà chúi-kau-á, piah-kak, chin ū-hāu. 2.Tùi-hù káu-hiā, ē-sái tı̄ chhù-lāi ê chı̍t-koá kak-lo̍h, iā chı̍t-koá hô͘-chio-hún, á-sı̄ chèng kúi-phûn po̍h-hô-hio̍h lâi koáⁿ-tio̍k. 3. Hông-chí bí-tháng, mı̄-hún-koàn kap piáⁿ-koàn seⁿ-thâng, ē-sái khǹg chı̍t-koá ta ê jio̍k-kùi-hio̍h toà lāi-bı̄n. 4.Hông-chí hô͘-sı̂n, ē-sái ēng bāng-á-mn̂g bāng-á-thang, pùn-sò-tháng ài khàm-koà, lēng-goā ē-sái ka-tı̄ ēng thn̂g-chiuⁿ kap chúi hūn-ha̍p chò hô͘-sı̂n-liâm. Kāng-khoán, niáu-chhí-tauh iā pí niáu-chhí-io̍h koh khah an-choân ū-hāu. 5.Tû-pâng pó-chhı̂ chheng-khı̀, iû-kı̂ sı̄ tû-pâng thô͘-kha pó-chhı̂ chheng-khı̀, sı̄ koh khah tiōng-iàu. Chiong pêng-sng-hún iā toà tû-pâng ê phāng--nih kap chhù-kak, ē-tàng chiong ka-choa̍h kap chı̍t-koá thâng koáⁿ-cháu. Jû-kó lí sat-thâng-che ēng liáu koàn-sı̀, iā bô-ài thiaⁿ goá ê kiàn-gı̄, iā m̄-kiaⁿ sat-thâng-che ín-khí koaⁿ-chōng, phoê-hu kap ho͘-khip hē-thóng ê pı̄ⁿ-chèng, chı̀-chió chhiáⁿ lí phùn sat-thâng-che í-āu, lâng kap cheng-seⁿ lóng èng-kai lı̄-khui chı̍t-toāⁿ sı̂-kan. Sat ka-choa̍h ê io̍h-á kan-na ē-sái phùn thô͘-kha, choa̍t-tùi bē-sái chhin-chhiūⁿ phang-chúi án-ni loān-phùn, put-tān bô-hāu, koh giâm-tiōng gûi-hāi kiān-khong. (Hong-hiòng Tē 2 kı̂, 1990 nı̂ 1 goe̍h)