Seⁿ-kiáⁿ sı̄ sai-á chhı̄-kiáⁿ chiah sı̄ sai-hū

Chit kúi nı̂ sè-kài ê keng-chè in-ūi Chi-na khò lâng chē, thó͘-tē toā ê sêng-pún iu-sè, chiām-chiām chiâⁿ-chò sè-kài ê kang-tiûⁿ, keng-chè khò ka-kang iah-sı̄ tāi-kang chhut-kháu ê kok-ka, lóng siū-tio̍h chin toā ê éng-hióng. Sè-kài ê keng-chè mā in-ūi mı̍h-kiāⁿ ê seng-sán-liōng chhiau-koè su-iàu-liōng siuⁿ koè-thâu chē, chiah tı̍t-tı̍t soe-bı̂. Tâi-oân mā in-ūi án-ni-siⁿ, keng-chè tı̍t-tı̍t chhu--lo̍h-khı̀, iû-kı̂ sı̄ khò thé-la̍t teh thó-thàn ê chò-kang-á-lâng koh-khah chhám, kang-tiûⁿ tı̍t-tı̍t koaiⁿ, bô thâu-lō͘ ê lâng tı̍t-tı̍t chē; choh-sit-lâng mā in-ūi lông-sán-phín ùi Chi-na hia toā-liōng chı̀n-kháu kap cháu-soè, kè-siàu it-tı̍t lo̍h, tiāⁿ-tiāⁿ liân pún-chı̂ⁿ to siu bē tńg--lâi, koh-khah bián kóng in ê kang-chı̂ⁿ. Tı̄ sı̂-ki chiah-nı̄ bái ê sı̂-chūn, “BONG-pò” ê siā-bū úi-oân kap koan-chı̂ⁿ ê lâng soah tian-tò jú lâi jú chē, goân-in tı̄ toh? Sı̄ in ê kian-chhı̂ chiah ū khó-lêng oa̍h kàu kin-á-jı̍t. Ū bo̍k-phiau kap jia̍t-chêng sı̄ bô-kàu--ê, siōng tiōng-iàu--ê sı̄ kian-chhı̂ ê thài-tō͘ chiah ū khó-lêng sêng-kong.Tâi-oân ê seng-lí-lâng kóng, nā bô khı̀ Chi-na chò seng-lí, bô kap in “sam-thong”, Tâi-oân ê keng-chè ē pang--khı̀. M̄-koh lán lâi khoàⁿ Hân-kok in ê seng-lí-lâng, in m̄ siong-sı̀n kóng “bô khı̀ Chi-na tō ē hip--sí”, kam-goān hip-sí tı̄ Hân-kok mā bô-ài khı̀ Chi-na. Chit-má lâng Hân-kok ê keng-chè chhia-iāⁿ kah, in ê pâng-tē-sán tı̍t-tı̍t khí, lán soah kap lâng tian-tò-péng. Che mā sı̄ kian-chhı̂ só͘ tián-hiān ê le̍k-liōng. Lán beh án-choáⁿ o̍h “BONG-pò” kap Hân-kok ê cheng-sı̂n--leh? M̄ sı̄ chhùi kóng-kóng--leh niâ, ài tı̄ seng-oa̍h--nih lo̍h-sı̍t, chhiūⁿ kóng: kam-goān ko͘-khut mā bô-ài chhoā Chi-na bó͘, kè Chi-na ang, seⁿ Chi-na kiáⁿ, bô-ài kau Chi-na ê pêng-iú, bô-ài bé Chi-na ê mı̍h-kiāⁿ, bô-ài khoàⁿ Chi-na ê tiān-sı̄, tiān-iáⁿ kap chheh, bô-ài thiaⁿ Chi-na ê koa kap Radio, bô-ài kóng Chi-na oē, jı̄m-hô tùi Chi-na iú-lı̄ ê tāi-chı̀ lóng m̄-thang chò. Thâu-khí-seng chhòng-pān “BONG-pò” ê sı̂, goá mā sı̄ tàu seⁿ ū tio̍h--ê, m̄-koh kàu chín. tû-liáu chò siā-úi kian-chhı̂ bô-piàn í-goā, tâu-kó ê liōng bē chhiau-koè 2000 jı̄, kóng--khí-lâi sı̍t-chāi chiâⁿ kiàn-siàu, m̄-chiah kóng: “Seⁿ-kiáⁿ sı̄ sai-á, chhı̄-kiáⁿ chiah sı̄ sai-hū.” (Tâi-bûn Bóng-pò tē 75 kı̂, 2002 nı̂ 12 ge̍h)