Siàu-liām Thô͘ Bo̍k-su

(Tı̄ ē-té só͘ kı̀ hit kúi-kù sı̄ tùi Thoân-tō Sian-siⁿ nn̄g lâng ê phoe ín-khí.)

Kin-á-jı̍t goá chiap-lâi chit-tiuⁿ kong-phoe, lāi-tiong sı̄ kóng-khí Thô͘ Bo̍k-su koè-óng ê chêng-hêng. Lâng thiaⁿ-kı̀ⁿ chit-hō ê siau-sit chin thang iu-būn, in-ūi Kàu-hoē ū sit-lo̍h chı̍t-ki chhiú-kut. Taⁿ koh khah thang iu-būn--ê, sı̄ tı̄ chit sè-kan bô koh thang khoàⁿ-kı̀ⁿ Sian-siⁿ ê bı̄n. Siūⁿ kàu i tı̄ chit jı̄-goe̍h-kan kap goá tı̄ chia saⁿ-kap kóng-oē, kà-sı̄ goá ê giân-gí, kap saⁿ-kap khı̀ thàm-chhoē hiaⁿ-tı̄, chiah ê sū-chêng, sı̄m-chı̀ kàu lâu ba̍k-sái, bô thang koh siū Sian-siⁿ chit-hō ê thiàⁿ-thàng.

Chóng-sı̄ goá chai Sian-siⁿ pêng-seng ū chhut-la̍t tio̍h-boâ ho̍k-sāi Chú, bô hiâm-ià, chiah kin-á-jı̍t lán ê Chú thiàⁿ I, seng chiap-la̍p I khı̀ tit-tio̍h hit-hō éng-oán bô kiông-chı̄n ê hok-khı̀. Chit-sı̂ tı̄ Chú ê sin-piⁿ, tı̄-hia hióng-siū pêng-an khoài-lo̍k; m̄-sái koh ū chhùi-ta, iau, siān ê kan-khó͘. In-ūi I í-keng lı̄ sè-kan, in-ūi Chú ê tō-lí chı̄n-la̍t pháu-cháu, lâi chı̄n i só͘ eng-kai kiâⁿ ê lō͘-chām. Gâu sím-phoàⁿ ê Chú tı̄ chit-sı̂ chū-jiân ū siúⁿ-sù I gı̄ ê pò-siúⁿ, chhin-chhiūⁿ tı̀ bián-liû; che m̄-nā beh siúⁿ-sù I, iā beh siúⁿ-sù hoān-nā him-bō͘ Chú hián-bêng tù-hiān ê lâng.

Taⁿ goá nā ē chı̄n pún-hūn, o̍h Sian-siⁿ chò chı̄n-tiong ê hó bô͘-iūⁿ, Chú tı̄ hit-sı̂ iā beh siúⁿ-sù goá tı̄ I sin-piⁿ saⁿ-kap tit-tio̍h chè chiâu-pı̄ ê hok-khı̀, sı̄ goá só͘ teh ǹg-bāng--ê.

Lūn kàu Thô͘ Bo̍k-su ê koè-óng, goá ū-sı̂ ka-kı̄ teh chē,siūⁿ tio̍h I ê hó kau-poê, bē-kı̀m-tit kúi-nā-pái tio̍h lâu ba̍k-sái, sı̄ I ê thiàⁿ goá siông siông kám tōng goá ê sim koaⁿ. Ū-sı̂ koh the̍h I kià hō͘ goá ê phoe lâi khoàⁿ chiū koh khah siong sim.

(Tâi-oân-hú-siâⁿ Kàu-hoē-pò tē 115 koàn,1894 nı̂ 10 ge̍h)