Siáⁿ-sū kı̀m-chí Tâi-oân lâng sú-iōng Tâi-oân oē ê Sèng-keng

Thiaⁿ kóng Tâi-oân-séng Kàu-io̍k-thiaⁿ í-keng hā-lēng, kı̀m-chí choân-séng kok tē sú-iōng Lô-má-jı̄ Sèng-keng. Ì-sù sı̄ beh kı̀m-chí lán ê Pe̍h-oē-jı̄ Sèng-keng. Hiān-sı̂ Tâi-oân ê kok-gú chı̀n-pō͘ chêng-hêng, sı̄ le̍k-sú-siōng hán-iú--ê. Pe̍h-oē-jı̄ ê Sèng-keng tı̄ sím-mı̍h sı̂, sím-mı̍h só͘-chāi, ū chó͘-gāi tio̍h Kàu-io̍k-thiaⁿ ê kang-chok? Kin-á-jı̍t sè-kài bûn-bêng ê kok-ka, tó chı̍t kok ū teh kı̀m-chí tē-hng ê giân-gú, á-sı̄ tē-hng ê bûn-jı̄? Chêng ê Jı̍t-pún tè-kok bat kı̀m-chí lán sú-iōng pe̍h-oē-jı̄, In kóng, che sı̄ Bí, Eng (Bí-kok, Eng-kok) ê bûn-jı̄. In bat kiò lán m̄-thang ēng Tâi-oân oē soat-kàu. In kiò lán tio̍h kái sèⁿ, miâ. In siūⁿ tio̍h chiong lóng-chóng ê jı̂n-bı̂n, thiat-té hông-bı̂n-hoà, chiah ē thang hō͘ in ê kok-ka kiông-tāi. Chóng-sı̄ le̍k-sú chèng-bêng, chit khoán ê siūⁿ-hoat sı̄ ke̍k toā ê chhò-gō͘. Lí khoàⁿ, kin-á-jı̍t ê kiông kok lóng sı̄ ē thang pau-iông ta̍k chéng ê bı̂n-cho̍k, ta̍k hō ê khiuⁿ-kháu, ta̍k khoán ê bûn-jı̄ ê kok-ka. Chhiáⁿ thiaⁿ, hiān-sı̂ ê chheng siàu-liân só͘ teh kóng ê Tâi-oân oē, ū sı̂ lí ē thiaⁿ bô. In-ūi in m̄-sı̄ teh kóng sı̍t-chāi ê Tâi-oân oē, sı̄ teh kóng piàn-chit ê Tâi-oân oē. In sı̄ ēng Tâi-oân im teh kóng Kok-gú (Pak-kiaⁿ-gú) nā-tiāⁿ. M̄-nā chheng siàu-liân án-ni, siā-hoē it-poaⁿ ê jı̂n-sū iā sı̄ án-ni. Phiau-chún ê Tâi-oân oē tı̍t-tı̍t hō͘ lâng bē kı̀-tit khı̀. Piàn-chit ê Tâi-oân oē tı̍t-tı̍t teh liû-Hêng. M̄-nā it-poaⁿ ê siā-hoē án-ni, Liân kóng-pò͘ tiān-tâi ê Bân-lâm-gú pò-im-oân só͘ kóng ê Tâi-oân oē iā sı̄ án-ni; chhin-chhiūⁿ 盟國 kóng “Béng-kok”, 蔣總裁 kóng “Chiúⁿ Chóng-chhái,” nn̄g, saⁿ nı̂ chêng án-ni; nn̄g, saⁿ nı̂ āu iā án-ni. Bô lâng teh koan-sim, iā bô lâng teh kā i chù-ı̀ ê khoán. In sı̄ khoàⁿ Hàn-jı̄ teh kóng, Hàn-jı̄ bē thang chù-bêng pat-im, nā ēng pe̍h-oē-jı̄ chiū bô chit khoán ê chhò-gō͘. Só͘-í Tâi-oân oē (Bân-lâm oē) it-tēng tio̍h ēng pe̍h-oē-jı̄ chiah ē thang piáu-hiān. Lán kàu-hoē tùi chá chiū ū pe̍h-oē-jı̄, Siōng-tè iā ū siúⁿ-sù lán pe̍h-oē-jı̄ ê Sèng-keng, che sı̄ ēng choè phiau-chún ê Tâi-oân oē lâi siá ê. Khó-sioh hiān-sı̂ ê kàu-hoē, chē-chē lâng ka-kı̄ khoàⁿ-khin pe̍h-oē-jı̄, iā khoàⁿ-khin pe̍h-oē-jı̄ ê Sèng-keng. Thiaⁿ kóng, kı̄n-lâi ê Sı̂n-ha̍k-seng, chē-chē lâng pe̍h-oē-jı̄ ê Sèng-keng tha̍k bē sūn-liū, kám-kak put-chí ûi-hām. Ǹg-bāng Sı̂n-ha̍k-seng bô khoàⁿ-khin pe̍h-oē-jı̄ kap pe̍h-oē-jı̄ ê Sèng-keng. Lí nā beh ēng Tâi-oân oē soat-kàu, khah hó tio̍h tha̍k pe̍h-oē-jı̄ ê Sèng-keng, tio̍h tha̍k hō͘ i se̍k. Lí nā beh ēng Tâi-oân oē tha̍k Kok-bûn ê Sèng-keng, khiok iā sı̄ lí ê chū-iû, put-kò nā beh án-ni, pe̍h-oē-jı̄ ê Sèng-keng iáu tio̍h koh-khah ka-poē se̍k lâi tha̍k, lâng chiah thiaⁿ ū. Chı̀-chió tiōng-iàu ê chiuⁿ-chat tio̍h tha̍k kàu ē oa̍t-liām. Chhin-chhiūⁿ Lô-má 8:28, lí nā tha̍k “Ngó͘-bûn hiáu-tit bān-sū to͘ hō͘-siong hāu-le̍k, kiò thiàⁿ Siōng-tè ê lâng tit ek-chhù.” Án-ni lâng kiám thiaⁿ ū? Chhiáⁿ lí hian pe̍h-oē-jı̄ ê Sèng-keng lâi khoàⁿ, chiū chai pe̍h-oē-jı̄ ê Sèng-keng sı̄ joā hó. Chı̀-chió lí tio̍h ē-hiáu chiong『叫』tha̍k chò “hō͘,” chiong『都』tha̍k chò “lóng,” chiong『要』tha̍k chò “tio̍h”... téng. “Siōng-tè ēng toā koân-lêng hō͘ Ki-tok koh-oa̍h,” m̄-sı̄ “kiò Ki-tok koh-oa̍h.” Kok-gú ê『都』kap Tâi-oân oē ê “to͘” ı̀-sù oân-choân bô siāng. Nā beh chiàu jı̄ tı̍t tha̍k, chı̀-chió iā tio̍h tha̍k chò “to.” 『你們都要來』m̄-thang tha̍k chò “Lín to ài lâi,” tio̍h tha̍k chò “Lín lóng tio̍h lâi.” Án-ni lâng chiah thiaⁿ ū. Goá ǹg-bāng choân Tâi-oân (m̄-sı̄ chéng-kò Tâi-oân) ê sı̀n-tô͘, bô toè sı̂-sè, lâi khoàⁿ-khin lán ê pe̍h-oē-jı̄ kap pe̍h-oē-jı̄ ê Sèng-keng. Chit pún pe̍h-oē-jı̄ ê Sèng-keng, sı̄ Siōng-tè siúⁿ-sù hō͘ Tâi-oân lâng choè toā ê pó-poè. Lán tek-khak tio̍h pó-siú. (Tâi-oân Kàu-hoē-kong-pò tē 857 kı̂, 1960 nı̂ 5 ge̍h)