Sió-toān
Sió-toān Kin-ḿ
Kin-ḿ sèⁿ Tiuⁿ miâ Iân, sı̄ A-lí-káng ê Nâ-á chng lâng. Chhut-sı̀ tı̄ Chú kàng-seng 1880 nı̂ 5 goe̍h 30 jı̍t, 19 hoè chio tiōng-hu sı̄ choh-sit lâng; kàu 28 hoè poaⁿ lâi A-lí-káng ke chò seng-lí.
Kin-ḿ tùi ē ti jı̂n-sū chiū chin khiân-sêng ho̍k-sāi pu̍t; múi-goe̍h ê chhe-it cha̍p-gō͘ chiū bé chin-chē kim-hiuⁿ-choá-chek, lâi sio hō͘ hiah-ê pu̍t. Ūi-tio̍h án-ne thàn chı̂ⁿ bô kàu liáu; tı̀-kàu sàn-phí-phí. Iū-koh m̄-nā án-ne, só͘-seⁿ ê kiáⁿ cha-bó͘-kiáⁿ kúi-nā ê , tn̂g-té tn̂g-chhiam sí kàu bô poàⁿ-ê. Sui-jiân tú-tio̍h hit hō tāng chai-ē, chóng-sı̄ ho̍k-sāi pu̍t ê sim lóng bô piàn-oāⁿ; iû-goân sı̄ khiām-chia̍h teh sio-kim teh hàu-kèng. Ū chı̍t jı̍t i teh hàu-kèng hiah-ê pu̍t-á ê sı̂, tú-hó ū chı̍t ê chí-moē hō-chò Goân-só lâi chhoē i thit-thô, pún-té sı̄ chin chai i ê chêng-hêng, taⁿ koh khoàⁿ-kı̀ⁿ i chit-hō chêng-kéng, chiū kā i kóng ū chı̍t ê chhòng-chō thiⁿ-tē bān-mı̍h ê Siōng-tè; I sı̄ Chin-sı̂n, chiah-ê pu̍t-á sı̄ chhâ khek--ê, bē pó-pı̀ lâng. Chit nn̄g kù oē khı̀ kô͘ tı̄ Kin-ḿ ê thâu-náu, tùi án-ne tiāⁿ-tiāⁿ siūⁿ, siūⁿ-liáu bêng-pe̍k, chiū koat-sim kui-sêng Siōng-tè; liâm-piⁿ chiū chiong hit 17 sian pu̍t-á kap hiah-ê bo̍k-chú-á chò chı̍t-ē hiat-lo̍h chàu-khang khı̀ sa̍h ti-liāu. Soà ín-chhoā tiōng-hu lâi sı̀n Chú, tiōng-hu āu-lâi iā tng kàu-hoē ê chit. Hit-sı̂ sı̄ Lí Bo̍k-su teh sûn kàu-hoē, Bo̍k-su-niû kà i bat Sèng-keng.
Kàu 32 hoè tiōng-hu sí, bô poàⁿ ê kiáⁿ, lâu Kin-ḿ ko͘-sin, 35 hoè chiah koh kái-kè Phêⁿ Kin thoân-tō sian-seⁿ; ū toà kúi nā ê kàu-hoē, iā ū tit-tio̍h Siōng-tè siúⁿ-sù chı̍t-lâm chı̍t-lú. Kàu 43 hoè ê sı̂ sian-seⁿ chiū tńg-khı̀ Thian-tông. Kin-ḿ chiū tı̄ Tang-káng khui hûi-á-tiàm, saⁿ nı̂ kú hō͘ hoé sio saⁿ pái; tùi án-ne chiū siūⁿ-tio̍h in éng-koè toà Iâm-po͘ ê kàu-hoē, hiān-sı̂ ná chhin-chhiūⁿ iûⁿ bó bo̍k-chiá; chiū chiong nn̄g ê kiáⁿ chı̍t-ê sàng kàu Tiong-o̍h, chı̍t-ê kàu Lú-o̍h, toaⁿ-sin chiū khı̀ Iâm-po͘, chio-ho͘ kó͘-bú lâng siu-lí lé-pài-tn̂g, ín-chhoā lâng ho̍k-sāi Siōng-tè. Koh i ê pêng-seng gâu kap tú-tio̍h sí-sit iu-būn ê lâng tông-chêng, iā chin gâu khek-kí thé-sut kan-khó͘ pháiⁿ-miā lâng. Koh put-chí ài kóng tō-lí hō͘ lâng thiaⁿ, bô-lūn chhin-chiâⁿ pêng-iú, saⁿ-bat m̄ saⁿ-bat, kı̀ⁿ lâng chiū pò-iông Siōng-tè ê in-tián. Che sı̄ goá bat kap i toà siāng lé-pài-tn̂g chı̍t nı̂ kú, chhin-ba̍k khoàⁿ-kı̀ⁿ, chhin-hı̄ⁿ thiaⁿ-kı̀ⁿ chiah chai. Kin-ḿ toà chit ê kàu-hoē kè-kiōng 25 nı̂ kú. Tı̄ kin-nı̂ sin-le̍k 3 goe̍h 21 jı̍t chiū koè-óng, hióng-siū 75 hoè. Taⁿ i ê kang bêng-pe̍k, hok-khı̀ iā toè i.
Po̍k Kán-lio̍k siá chiah-ê sı̄ beh hō͘ lia̍t-ūi hiaⁿ-ché chai, lán ta̍k lâng lóng ū chhin-chhiūⁿ Kin-ḿ siū siâ-mô͘ khó͘-to̍k. Siōng-tè ēng in-tián thê-poa̍t lán chhut Mô͘-kúi ê koân-sè, só͘-í tio̍h o̍h Kin-ḿ ê jia̍t-sim lâi pò-tap Siōng-chú chín-kiù ê toā-in, eng-kai kı̀ⁿ lâng tio̍h pò-iông Chú ê miâ.
(Tâi-oân Kàu-hoē-pò tē 367 koàn,1915 nı̂ 10 ge̍h)