Sió-toān Siau Tek-bêng Sian-siⁿ-niû

Sian-siⁿ-niû kin-nı̂ 33 hoè. I chhut lâi chò Chú ê kang thâu boé 14 nı̂. I múi jı̄m beh oāⁿ ūi ê sı̂ kàu-hoē ê hiaⁿ-tı̄ chí-moē chin m̄ kam, in-ūi tùi hiaⁿ-tı̄ chí-moē kóng oē khin-siaⁿ, sè-soeh, chhin-chhiat, hó kám-chêng, bô kek phài, bô toā sè sim, láu-sı̍t, chèng-khı̀. Koh chı̍t hāng, i múi lé-pài chò chêng liām Chú-jı̍t-sı̂n-liông lâi chò chèng chí-moē ê bô͘-iūⁿ. I múi lé-pài ū hū-jı̂n lâng ê kı̂-tó-hoē put-chí kám-kek chí-moē ê sim. Sui-jiân bô tha̍k Lú-o̍h, iáu-kú lūn i teh kı̂-tó, kóng tō-lí put-chí kám-kek lâng ê sim. Sian-siⁿ-niû ê thian-chu chin chiok. Chin gâu thun-lún, ū sím-mı̍h chí-moē tùi i kóng bû-tō ê oē, i iā bô siū-khı̀, m̄ bat kap chı̍t ê chí-moē lâi kè-kàu sím-mı̍h. Ia̍h chin gâu khoán-thāi tiōng-hu, iā chin gâu chéng-tùn pài-tn̂g lāi goā chheng-khı̀. Sian-siⁿ-niû só͘ choè-ê kàu gia̍h thang chò kàu-hoē ê bô͘-hoān. Tn̄g-pat-táu kàu-hoē it-tông pài.

(Tâi-oân Kàu-hoē-pò tē 428 koàn, 1920 nı̂ 11 ge̍h)