Bí-kok lâng, Jı̍t-pún lâng, kàu-hoē lāi, kàu-hoē goā teh hia̍p-le̍k ê Tâi-lâm Phê-hu chín-só͘.
Tâi-lâm goân-pún ê thoân-jiám pı̄ⁿ-ı̄ⁿ kiò-choè Thô͘-siâⁿ-á, ūi-tı̀ sı̄ tı̄ sai-pêng chhı̄-goā, chiu-ûi ê khoân-kéng chin bái ê só͘-chāi. Chóng-sı̄ chū tı̄ 8 nı̂ chêng, ū Bí-kok ê hō͘-sū Tēng Ko͘-niû lâi khai-pān Nāi-pı̄ⁿ ê chín-só͘ liáu-āu, soà chiâⁿ-choè chı̍t ê chhut-miâ ê só͘-chāi, Thâu chı̍t hāng, chiū-sı̄ Tēng Ko͘-niû pún-sin koat-jiân kap tı̄ chín-só͘ teh ho̍k-bū ê pún-séng lâng Lı̂m Têng-hui Sian-siⁿ kiat-hun, tı̀-kàu m̄-nā choân séng, choân kok chin hong-tōng, koh iā chhut-miâ kàu Bí-kok. In-ūi Tēng Ko͘-niû ūi-tio̍h pún-sin só͘ chı̀-hiòng ê hi-seng sū-gia̍p, ū piáu-hiān hiàn-sin tàu-té ê cheng-sı̂n.
Taⁿ chit ê Phê-hu chín-só͘ liáu-āu ū tit-tio̍h Jı̍t-pún ê i-seng Se-chhoan Phok-sū lâi chú-chhı̂ i-tı̄ ê kang, koh chêng ū tit-tio̍h Jı̍t-pún choân-kok Chú-jı̍t-o̍h ê Sèng-tàn hiàn-kim lâi tàu èng-oān, chit pang iā ū Jı̍t-pún kap Tâi-oân hoē-lāi hoē-goā kap chı̍t pō͘-hūn hōng-hiàn, thang tàu chhiong-sı̍t chín-só͘ ê kiàn-tio̍k kap siat-pı̄.
Kàu kin-nı̂ chín-só͘ ū sin-tio̍k chı̍t chō oân-kang siok-sià, kàu 8 ge̍h 2 jı̍t lo̍k-sêng ê sı̂, Tâi-lâm chhı̄ Oē-seng-kio̍k-tiúⁿ Lâu Liân-ek Phok-sū só͘ tı̀-sû ê kúi hāng, kèng koh-khah ū ı̀-gı̄, hō͘ lâng tit-tio̍h chhim-khek ê ı̀n-siōng. I kóng, Chit ê Nāi-pı̄ⁿ ê phê-hu chín-só͘, ū bêng-bêng piáu-hiān Iâ-so͘ thiàⁿ ê cheng-sı̂n, chit khoán ê piáu-hiān, pí chèng-hú só͘ choè ê bô khah su. Taⁿ chiông-chêng ū Bí-kok ê Tēng Lú-sū, ū Jı̍t-pún ê Se-chhoan Phok-sū lâi pang-chān. Tān-sı̄ chit chhù siok-sià ê kiàn-tio̍k ū piáu-hiān tio̍h pún-séng lâng hia̍p-le̍k kap hōng-hiàn ê cheng-sı̂n, in-ūi pún-séng lâng só͘ kı̀-hù ê chı̂ⁿ chiàm toā pō͘-hūn, jı̂-chhiáⁿ m̄-sı̄ kàu-hoē ê sı̀n-tô͘ nā-tiāⁿ, chiū-sı̄ kàu-hoē í-goā ê pún-séng tông-pau iā chhut chin-choē chı̂ⁿ tı̄ lāi-bı̄n, ū piáu-hiān tio̍h lán ê Nāi-pı̄ⁿ kiù-tı̄ sū-gia̍p ū tit-tio̍h lán ka-kı̄ ê tông-pau ê hia̍p-le̍k kap chi-chhı̂. Koh chı̍t hāng tı̄ chia só͘ choè chin ū ı̀-gı̄ ê, chiū-sı̄ siū i-tı̄ ê lâng, ū lâng kha-chhiú oē khah bô tàu-tah, chiah ê lâng m̄-nā kā in chéng-hêng chhiú-su̍t hō͘ in pı̄ⁿ-chèng tit-tio̍h hó, chiū-sı̄ koh hō͘ in o̍h ki-gē, chiong-lâi tı̄ siā-hoē thang kap lâng seng-chûn kēng-cheng.
Sí liáu 10 nı̂ iáu chin chió lâng chai ê hó sū.
Kò͘ Si Sek-ke Bo̍k-su kè-sin liáu í-keng 10 nı̂ khah ke. I seng-chiân in-ūi choè lâng tiong-tı̍t ngı̄-khı̀, só͘-í chia̍p-chia̍p siū gō͘-kái á-sı̄ hoat-seng mô͘-chhat. Chóng-sı̄ kàu choè-kūn chiah thiaⁿ-tio̍h i ê kàu-hoē ê tng-chit-chiá kóng i tı̄ kong-ho̍k āu ūi-tio̍h kàu-hoē keng-chè khùn-lân, khı̀ kiam-chit tı̄ kong-lı̍p ha̍k-hāu ê sı̂, hun-bûn to bô tùi kàu-hoē niá sin-súi á-sı̄ tin-thiap. Hit sı̂ kàu-hoē in-ūi i ū choè kang bô niá kang-chı̂ⁿ, m̄ kè-sim, choē-choē pái beh the̍h tin-thiap á-sı̄ sin-hōng hō͘ i, i lóng sı̂-thè, kiò in siu-sı̍p chek-chū khí-lâi, kàu ū khùi-la̍t ê sı̂, thang hó phèng choan-jı̄m ê bo̍k-su, in-ūi i kóng tek-khak bô beh niá siang-thâu ê sin-hōng. Chhin-chhiūⁿ án-ni, pó-chhı̂ liâm-kiat tàu-té, só͘-í siu-jı̍p sı̄ chin bı̂-po̍k, chóng-sı̄ tong-sı̂ tı̄ ha̍k-hāu só͘ kà ê ha̍k-seng ū nn̄g ê chí-bē-á, keng-chè khùn-lân oh-tit kè-sio̍k ha̍k-gia̍p. I thiaⁿ-tio̍h án-ni, bô kò͘ tio̍h pún-sin siu-jı̍p bı̂-po̍k, iáu-kú to-to siáu-siáu siông-siông àm-chı̄ⁿ pang-chān, hō͘ in kè-sio̍k ha̍k-gia̍p. Hiān-sı̂ chit nn̄g ê chí-bē chı̍t ê tı̄ Bí-kok, chı̍t ê choè bo̍k-su-niû. Tān-sı̄ chai-iáⁿ chit ê sū ê lâng iáu-kú hui-siông chió.
Kàu-hoē ê hō͘-tēng chhiûⁿ-ûi kiám thang chō hō͘ koân-koân?
Hiān-sı̂ thoân-kàu ê hong-sek chiàⁿ tı̍t-tı̍t teh kó͘-bú ài hō͘ kàu-hoē ê mn̂g-hō͘ toā khui, hō͘ kàu-hoē chı̀n-chhut siā-hoē, hō͘ siā-hoē iông-ı̄ⁿ chı̀n-jı̍p kàu-hoē. Chóng-sı̄ tı̄ Ko-hiông-koān Bı̂-tô chit keng sin siat bē moá 10 nı̂ ê kàu-hoē, só͘ chhái-chhú ê hong-sek siông-siông chhin-chhiūⁿ tò-hoán ê khoán-sit. In-ūi in chng-thâu ê lâng nā ū sím-mı̍h hó sū, pháiⁿ sū, beh lâi chioh khı̀-kū, í toh, téng-téng, lóng m̄-khéng tah-èng, chhin-chhiūⁿ mn̂g-hō͘ ná siat ná koân, hō͘ siā-hoē oh-tit lâi chhin-kūn, in-ūi in só͘ chú-tiuⁿ ê, chiū-sı̄ kóng, kiaⁿ-liáu chiah ê ke-si cha̍p-bu̍t chioh chhut hō͘ lâng lı̄-piān khı̀ choè chè-sū pài ngó͘-siōng ê lō͘-ēng, án-ni bô-ha̍h. Chóng-sı̄ kàu-hoē tı̄ koè-khı̀ chiâⁿ cha̍p tang kú hián-jiân ū toā chı̀n-pō͘, in-ūi in ū chı̍t hāng hong-sek, chiū sı̄ tı̄ in ê tē-thâu, nā ū lâng kó-jiân tú tio̍h bah-thé siōng, bu̍t-chit siōng, í-kip lêng-sèng siōng ê khùn-lân ê sı̂, kàu-hoē chiū thoân-kiat it-tı̀ choân-thé chhut-tōng, chı̍p-tiong khı̀ ín-chhoā, khı̀ pang-chān; só͘-í khai-siat kàu-hoē kàu taⁿ iáu-boē 10 nı̂, kàu-sè í-keng chin oa̍h-tāng koh sèng-hóng, múi chú-jı̍t ê chū-hoē 100 goā lâng.
(Tâi-oân Kàu-hoē-kong-pò tē 947 hō, 1964 nı̂ 12 ge̍h)
