Sió pêng-iú ê kò͘-sū

 Toê-ba̍k: Chı̍t chiah lû kı̀ⁿ-tio̍h Thiⁿ-sài
 Sèng-keng chat: Bı̂n-sò͘-kı̀ 22-24 chiuⁿ
 Kò͘-sū 
 Kó͘-chá ū chı̍t chiah lû kap i ê chú-lâng Pa-lân saⁿ-kap khiā-khí tı̄ chı̍t tiâu hô-piⁿ. Tı̄ hia ū chhiⁿ-chhùi ê chháu-po͘, chóng-sı̄ chit chiah lû nā tio̍h chài Pa-lân khı̀ pa̍t-ūi ê sı̂, chiū tio̍h lı̄-khui súi ê hô-piⁿ, lâi keng-kè chin choē tiâu ta-sò kham-khia̍t ê lō͘. 
 Chit chiah lû sı̄ chin koai, só͘-í i ê chú-lâng chin thiàⁿ i, bô phah i, hō͘ i chia̍h kàu pá, koh tı̄ àm-sı̂ pı̄-pān hó ê só͘-chāi hō͘ lû thang pêng-an hioh-khùn. 
 Pa-lân m̄-sı̄ ū chı̂ⁿ ê lâng. I chí-ū ū Chit chiah lû nā-tiāⁿ, só͘-í nā beh khı̀ pa̍t-ūi, ta̍k pái tio̍h khiâ lû khı̀. Pa-lân chin thiàⁿ Siōng-tè, koh ka-kı̄ oē hiáu thiaⁿ Siōng-tè ê siaⁿ. Tùi án-ni, sı̀-bı̄n ta̍k ê lâng lóng chai i sı̄ chin ū tı̀-sek ê lâng. 
 Ū chı̍t jı̍t, ū kúi-nā ê chhēng súi saⁿ, ông ê sù-chiá toà lé-mı̍h lâi chhoē Pa-lân. In ài chhoā Pa-lân tńg-khı̀, lâi tiau-kı̀ⁿ kok-ông. Hit ê kok-ông chin kiaⁿ, in-ūi ū chin choē goā-kok lâng tùi Ai-kı̍p lâi kàu tı̄ i ê kok. I phah-sǹg in chiah ê lâng oē tùi-te̍k koh khah-iâⁿ i ê kok, só͘-í ài Pa-lân lâi kā in chiù-chó͘ . (Chiù-chó͘ chiū-sı̄ kı̂-kiû Siōng-tè hō͘ chiah ê lâng tú-tio̍h chai-ē) 
 Pa-lân chiū kā chiah ê sù-chiá kóng, tio̍h thèng-hāu keh-jı̍t khoàⁿ māi, in-ūi i beh tāi-seng thiaⁿ Siōng-tè ê siaⁿ, kā i kóng tio̍h choè sím-mı̍h. Keh-jı̍t chiū kā hiah ê lâng kóng, “Siōng-tè ū í-keng chiok-hok chiah ê lâng.” ( Ì-sù chiū-sı̄ Siōng-tè í-keng ū pang-chān hiah ê lâng ài hō͘ in tit-tio̍h pêng an). Pa-lân chiū kóng, “In-ūi Siōng-tè ū chiok-hok in, goá koat-toàn m̄ chiù-chó͘ in.” Só͘-í hiah ê lâng lı̄ khui khı̀, chóng-sı̄ bô loā-kú chiū ū koh khah toā ê jı̂n-sı̂n toà lé-mı̍h lâi beh sàng hō͘ Pa-lân, koh ài chhoā i khı̀ tiâu-kı̀ⁿ ông, iā chiù-chó͘ hiah ê chin choē chhut Ai-kı̍p ê goā-kok lâng. Pa-lân kóng, “Ông nā ēng moá-chhù ê kim-gûn hō͘ goá, goá iā m̄-káⁿ poâⁿ-kè goá ê Siōng-tè ê bēng-lēng.” Chóng-sı̄ Pa-lân koh chhiáⁿ hiah ê jı̂n-sı̂n hit mı̂ hioh tı̄ i hia, hō͘ i ū sı̂-kan thang koh thiaⁿ kı̀ⁿ Siōng-tè ê siaⁿ. 
 Kiám-chhái Pa-lân hoaⁿ-hí ông ū koh chı̍t pái chhe jı̂n-sı̂n lâi, koh kiám-chhái i ài tit-tio̍h hiah ê ta̍t-chı̂ⁿ ê lé-mı̍h. Bô lūn jû-hô, keh-jı̍t i tah-èng beh kap in chò-hoé khı̀, m̄-kú i kóng m̄ ûi-ke̍h Siōng-tè ê bēng-lēng. 
 Só͘-í Pa-lân khiâ lû lâi kap hiah ê ông ê jı̂n-sı̂n saⁿ kap khı̀. Hit chiah lû lóng m̄-chai sím-mı̍h tāi-chı̀, to̍k-to̍k chai i tio̍h koai-koai chài Pa-lân kiâⁿ-lō͘. M̄ kú lû kám-kak bô an-sim. Phah-sǹg Pa-lân pún-sin iā bô cha̍p-hun an-sim. Lû ná kiâⁿ ná bô pêng-an, chiū hut-jiân-kan oa̍t-tńg-sin lı̄-khui lō͘ siám-jı̍p piⁿ-thâu chı̍t khu hn̂g. Pa-lân m̄-bat phah lû, chóng-sı̄ chit pái chin siū-khı̀, ēng koáiⁿ-á kā i phah, bián-kióng lû koh chiūⁿ-lō͘ kiâⁿ. In kiâⁿ kàu phû-tô-hn̂g lāi ê chı̍t tiâu oe̍h ê lō͘, lû koh-chài thêng. Tı̄ lō͘-piⁿ ū chio̍h-chhiûⁿ. Lû kiâⁿ oá chhiûⁿ, hō͘ i ê seng-khu kheh Pa-lân ê kha tı̄ chhiûⁿ nih. Pa-lân koh khah siū-khı̀, kā i phah. Lû koh chı̀n-chêng kàu tı̄ koh-khah oe̍h ê lō͘, chiū tó tı̄ lō͘-tiong, m̄ koh kiâⁿ. Chit pái Pa-lân hui-siông siū-khı̀, ēng koáiⁿ-á kā lû phah kàu chin thiám. Hut-jiân-kan Pa-lân thiaⁿ lû kóng-oē. (Lí bat thiaⁿ káu-á á sı̄ niau kóng oē á m̄ bat? Ū-sı̂ sı̄ ná chhin-chhiūⁿ in teh kóng, “Chhiáⁿ lí hō͘ goá thang chia̍h,” á-sı̄ “Lâi kap goá thit-thô.” Ū sı̂ tōng-bu̍t oē hiáu kóng-oē kàu chin chheng-chhó. Lán nā thiàⁿ tōng-bu̍t, lán sı̍t-chāi oē chai in só͘ kóng ê oē). Pa-lân chin thiàⁿ i ê lû, taⁿ chai-iáⁿ lû tó tı̄ hia teh kóng, “Goá tùi lí choè sím-mı̍h, lí kéng-jiân phah goá chí saⁿ-pái ah?” Pa-lân kóng, “Sı̄ in-ūi lí m̄ thiaⁿ chhùi.” Lû koh kóng,“Goá kiám m̄-sı̄ lí ê lû mah? Goá pêng-sò͘ bat tùi lí án-ni kiâⁿ mah?” Pa-lân kóng, “Bô.” 
 Tú-tú tı̄ hit-sı̂, Siōng-tè khui Pa-lân ê ba̍k-chiu, hō͘ i khoàⁿ-kı̀ⁿ tı̄ lō͘-tiong ū thiⁿ-sài teh khiā, i ê chhiú pu̍ih to. Pa-lân chiū chai lû ū tāi-seng khoàⁿ thiⁿ-sài, só͘-í m̄ kâⁿ, nā kâⁿ chiū ū gûi-hiám. Pa-lân chiū kan-khó͘-sim, chai i choè m̄-tio̍h, iā chai lû sı̄ chin koai. Pa-lân kóng, “Goá choè m̄ tio̍h. Lán lâi tò-tńg-khı̀ lah. Siōng-tè m̄ hō͘ lán chı̀n-chêng khı̀.” Tı̄ hit-sı̂ thiⁿ-sài kóng,“Taⁿ tio̍h chı̀n-chêng khı̀ kı̀ⁿ kok-ông, chóng-sı̄ sêng-sı̍t tio̍h chiàu Siōng-tè ê oē lâi kóng.” Pa-lân chiū koat-tēng beh chin soè-jı̄ thiaⁿ Siōng-tè ê siaⁿ,koh chiàu Siōng-tè ê bēng-lēng lâi kiâⁿ kap kóng. In chiū chı̀n-chêng khı̀, lû pêng-an kiâⁿ lō͘ kàu tı̄ kok-ông ê só͘-chāi. Ông chhoā Pa-lân kàu tı̄ chı̍t ê soaⁿ-téng. Tı̄ soaⁿ-kha ū kúi-nā chheng ê goā-kok lâng, ū tah pò͘-pı̂ⁿ chat-iâⁿ teh hioh tı̄ hit ê soaⁿ-kok. Ông kóng,“Taⁿ lí chiù-chó͘ hiah ê lâng.” Pa-lân kóng, “Siōng-tè thiàⁿ in. Siōng-tè ū kā in chiok-hok, goá thài-thó oē chiù-chó͘ in, goá beh kiû Siōng-tè chiok-hok.”Kok-ông chin siū-khı̀, só͘-í Pa-lân tio̍h koáⁿ-kín lı̄-khui khı̀. I lóng bô tit-tio̍h hiah ê súi ê lé-mı̍h, chóng-sı̄ i sim-lāi chin pêng-an khiâ lû tńg-khı̀ tı̄ hit ê chhiⁿ-chhùi ê hô-piⁿ. 
 Lí chai hiah ê goā-kok lâng sı̄ sím-mih lâng? In sı̄ Mô͘-se só͘ ín-chhoā chhut Ai-kı̍p ê Í-sek-lia̍t peh-sı̀ⁿ. Āu-lâi Chú Iâ-so͘ choè eⁿ á chhut sı̀ tı̄ in tiong-kan, só͘-í chiah ê Í-sek-lia̍t peh-sı̀ⁿ chin-chiàⁿ ū tit-tio̍h Siōng-tè ê chiok-hok. 
(Tâi-oân Kàu-hoē Kong-pò tē 771 hō, 1953 nı̂ 3 goe̍h)