Siú-chı̂-lô͘

e̍k Bat khoàⁿ sin-bûn teh kóng tı̄ goā-kok ū chı̍t ê Siú-chı̂ⁿ-lô͘ , i ū chek-chū put-chí choē chı̂ⁿ khǹg tı̄ chhù-lāi ,iā i sim-koaⁿ siông-siông teh chù-ı̀ hiah-ê chı̂ⁿ in-ūi kiaⁿ liáu oē sit-lo̍h , Só͘-í siông siông chiong mn̂g koaiⁿ--teh , chiū the̍h chhut i só͘ chek-chū ê chı̂ⁿ lâi sǹg chı̍t piàn khoàⁿ--leh , sǹg liáu chiū koh pau--khí-lâi khǹg . Chit ê Siú-chı̂ⁿ-lô͘ í-keng chin lāu lah , bô bó͘ iā bô kiáⁿ , in-ūi i kiaⁿ-liáu chhoā bó͘ siⁿ kiáⁿ oē khai liáu i ê chı̂ⁿ , i chí-ū chhı̄ chı̍t chiah eng-ko chiáu tı̄ chhù-lāi kap i choè phoāⁿ nā-tiāⁿ . Siú-chı̂ⁿ-lô͘ nā teh chia̍h pn̄g ê sı̂ , hit chiah eng-ko iā kap i tiàm toh-téng chia̍h , i nā teh sǹg chı̂ⁿ ê sı̂ , hit chiah eng-ko iā tı̄ i ê sin-piⁿ thiàu-lâi thiàu-khı̀ teh khoàⁿ ; só͘-í tû-khı̀ hit chiah eng-ko í-goā bô pa̍t lâng chai i ê chı̂ⁿ-gûn khǹg tı̄ tó-ūi . Ū chı̍t pái i teh sǹg chı̂ⁿ , sǹg liáu hut-jiân kiám put-chí choē , i ê sim chin kı̂-koài chin hoân-ló . Keh kúi-nā jı̍t koh sǹg khoàⁿ iū sı̄ koh-khah kiám , só͘-í hit-tia̍p i ê sim chin hoân-ló kàu boē chia̍h boē khùn-tit , to̍k-to̍k m̄ chai i ê chı̂ⁿ tùi tó-ūi sit-lo̍h . Ū chı̍t chá-khí i chá-chá khí-lâi khui mn̂g hut-jiân khoàⁿ-kı̀ⁿ mn̂g-kháu sng-seh ê téng-bı̄n ū gín-ná ê kha-jiah , i chiū siūⁿ che sı̄ cha-mı̂ ū chı̍t ê gín-ná lâi thau-the̍h i ê chı̂ⁿ . Só͘-í kín mé tùi hit ê kha-jiah tı̍t-tı̍t thêng tı̍t-tı̍t chhē , Khı̀ chhē kàu chı̍t tui kū chhâ-liāu thia̍p chin toā-tui ê só͘-chāi . Tı̄-hia ū chı̍t ê khang i chiū àⁿ--lo̍h-khı̀ khoàⁿ lāi-toé kó-jiân ū chı̍t ê chiâⁿ cha̍p-hè ê cha-bó͘ gín-ná tı̄-hia koâⁿ kàu gı̂m-gı̂m chun ,i chiū kín kā khiú chhut-lâi iā pún-sin nǹg--jı̍p-khı̀ chhē khoàⁿ i só͘ sit-lo̍h ê chı̂ⁿ ū tı̄-hia á-bô?Chóng-sı̄ chhē lóng bô , āu-lâi chhut-lâi khoàⁿ-kı̀ⁿ hit ê cha-bó͘ gín-á chin koâⁿ chin iau chin khó-lı̂n ê khoán , i chiū siⁿ-chhut lı̂n-bín ê sim kā i chhoā tò--khı̀ in chhù pı̄-pān mı̍h hō͘ i chia̍h . Chia̍h pá chiū mn̄g I kóng, Lí ū pē-bú á-bô? Cha-bó͘ gín-ná ı̀n kóng , pē-bú hiaⁿ-tı̄ lóng bô chí-ū goá ka-kı̄ chı̍t ê nā-tiāⁿ , goá sı̄ kàu-ke̍k kan-khó͘ bô i-oá ê gín-ná .Siú-chı̂ⁿ-lô͘ chiū kóng ,Nā-sı̄ án-ni lí kap goá tiàm chia hó mah? Cha-bó͘ gín-ná ı̀n kóng hó . Cha-bó͘ gín-ná put-chí koai só͘-í Siú-chı̂ⁿ-lô͘ chin thiàⁿ i ,choè saⁿ hō͘ i chhēng , iā sàng i jı̍p ha̍k-hāu tha̍k-chheh . Chit ê cha-bó͘ gín-ná ê miâ kiò choè Bí-jı̂n . I ū chı̍t jı̍t teh peh chhiū thit-thô ê sı̂ chhē-tio̍h chı̍t ê chiáu-siū lāi-bı̄n ū chin choē kim poa̍t-á tı̄-teh i chiū khı̀ pò Siú-chı̂ⁿ-lô͘ chai . Siú-chı̂ⁿ-lô͘ khı̀ khoàⁿ chiū jı̄n-tit sı̄ i chêng só͘ sit-lo̍h ê chı̂ⁿ ,chiū sı̄ teh sǹg ê sı̂ hō͘ hit chiah eng-ko thau-kā khı̀ , taⁿ koh tit-tio̍h chin hoaⁿ-hí ; Só͘ í koh khah thiàⁿ Bí-jı̂n , khoán-thāi i choè ka-kı̄ ê cha-bó͘-kiáⁿ . Bí-jı̂n chin gâu tha̍k chheh iā ū hō͘ tâng-phoāⁿ chio khı̀ tha̍k Chú-jı̍t-o̍h . Bí-jı̂n thiaⁿ tō-lí put-chí siū kám-kek , i chiū koat-ı̀ sı̀n Iâ-so͘ . Siú-chı̂ⁿ-lô͘ iā bô chó͘-tòng i . Bí-jı̂n 16 hè ê sı̂ Siú-chı̂ⁿ-lô͘ chiū sí--khı̀ . I só͘ chek-chū ê chı̂ⁿ-gûn lóng hō͘ Bí-jı̂n tit-khı̀ . Bí-jı̂n ū siūⁿ i só͘ tit-tioh2 ê chı̂ⁿ-gûn bêng-bêng sı̄ Siōng-tè siúⁿ--ê , só͘-í i chiū lı̍p chı̀ beh chiong i pún-sin kap só͘ tit-tio̍h--ê lâi choè kàu-hoē ê lı̄-ek . Āu-lâi chiū chiong i ê chı̂ⁿ kià-hù chin choē tı̄ lé-pài-tn̂g ,i koán ,ha̍k-hāu , iā i pún-sin koh jı̍p Sı̂n-ha̍k-ı̄ⁿ tha̍k-chheh chut-gia̍p , choè ko͘-niû sı̀-koè pò-iông tō-lí put-chí ū lı̄-ek kàu-hoē . Sio̍k-gú kóng , Lâng teh choè thiⁿ teh chhiâu .Lán khí-thâu khoàⁿ-kı̀ⁿ Siú-chı̂ⁿ-lô͘ teh siú chı̂ⁿ ta̍k lâng ài hiâm i , chóng-sı̄ kiat-bé lâi khoàⁿ iû-goân sı̄ Siōng-tè ê ı̀-sù .Chim-giân ū kóng , Lâng ê só͘ choè kàu-bé lóng kui Siōng-tè tı̄-lí . (Tâi-oân Kàu-hoē-pò tē 423 koàn,1920 nı̂ 6 ge̍h)