Sı̀-cha̍p hoè í-āu
Lí sı̄ m̄ sı̄
Ū sı̂-chūn siūⁿ-khí
Lán sè-hàn hái-piⁿ ê jı̍t-chí
Im-àm-sı̂
Kim-sih-sih ê chhiⁿ
Chhin-chhiōⁿ sı̂n ê ba̍k-chiu
Sı̂n-sı̂n-pı̀-pı̀
Kóng-chhut choē-choē sit-thoân ê kò͘-sū
hù-hù-kiò ê hái-hong
Iù-iù ê sin-khu
Kng-thâu ê cha-po͘-gín-á
Tn̂g-thâu-chang ê cha-bó͘-gín-á
Sı̄ lí
Sı̄ goá
Phāiⁿ chheh-pau ê hêng-iáⁿ
Tek-á-kiô lán ū kiâⁿ--koè
Thàng Sai-po͘-lāi ê lō͘
Mô͘-hông-á, gû-chhia
Han-chû, iôⁿ-chhang, thô͘-tāu
Chhiah-kha ê gín-á
Ta̍h liâng-liâng ê tô͘
Lí sim-koaⁿ-lāi leh siōⁿ siáⁿ hoè
Èng-chhài,pû-á iah-sı̄ chhài-koe
Biō-tiâⁿ thâu-chêng
Siáⁿ-mı̍h sı̂-chūn ū pò͘-tē-hı̀
Siáⁿ-mı̍h sı̂-chūn ū koa-á -hı̀
Kong-khò choē
Khoàⁿ chı̍t-chhut-á hı̀
Kám ū siáⁿ mı̍h
Thàng Chíⁿ-á-kha
Iâm-tiâⁿ kau, hoāⁿ-á-lō͘
Kiâm-kiâm ê hong
Chhiah-iāⁿ-iāⁿ ê jı̍t-thâu
Chháu-tē-gín-á ê piau-chı̀
Lóng sı̄ pha̍k kah o͘-o͘-o͘
Lí kóng sı̄ m̄ sı̄
Tn̂g-tn̂g ê kau-kı̂ⁿ
Hit pêng káng-pak
Hoé-chûn-á í-keng sái jı̍p le̍k-sú
Chı̍t lúi chı̍t lúi tńg--lâi ê pò͘-phâng
Toā-lâng bô êng
Gín-á ia̍h bô êng
Chı̍t tâi chı̍t tâi ê iâm-chhia
Chı̍t téng chı̍t téng ê chháu-le̍h-á
Tı̍t-tı̍t e thih-ki-lō͘
Jı̍t-thâu lo̍h-hái í-chêng
Kui-ke chò-hoé lâi phah-piàⁿ
Sai-pêng ê thiⁿ-piⁿ
Piàn-lâi piàn-khı̀ ê hûn
Ū Sng-ngō͘-khong
Ū Gû-mô͘-ông
Khè lâi khè khı̀ chı̍t-toā-tı̄n
Chhin-chhiōⁿ beh tńg-khı̀ chia̍h àm-tǹg
Chiàn-cheng lâu--lo̍h-lâi ê hông-khong-hô
Toā-lâng kóng in cháu sàu-siā ê kò͘-sū
Gín-á hun nn̄g kok
Lán lâi Chhian-pah-lah
Lí Chin-pêng goá Sù-lông
Po-lê-chu ang-á-phiau
Chhú gû hó͘ thò͘ lêng choâ bé iôⁿ
Ū chı̍t-piàn
Hioh-joa̍h ê thàu-chá-sı̂
Nó͘-su khah bān lâi
Ta̍k-ke hoaⁿ-hoaⁿ-hí-hí
Chū pān chiap-le̍k-pí-sài
Liân Nó͘-su lâi iah lóng m̄ chai
Lí siōⁿ
Hit-piàn siáⁿ-lâng
Hō͘ nó͘-su kòng siōng lı̄-hāi
“Hoàn-kong hoàn-kong
Hoàn-kong tá-lú chhí”
“Tà-tàu ó-khó
Hoàn kóng-chhàn hoàn kóng-chhàn”
Sı̄ ha̍k-hāu kà lán ê koa-siaⁿ
Tı̄ lán m̄-chai thiⁿ m̄-chai tē ê sı̂
Thiⁿ-kong-peh..á lóng-ū thiaⁿ--tio̍h
Lí kóng
Lán ū kó͘-chui bô kó͘-chui
