e̍k
Tı̄ chit ê sè-kan, siōng hó ê tāi-chı̀ sı̄ sím-mı̍h?
Ēng hoaⁿ-hí ê sim lâi ke-thiⁿ nı̂-hoè,
Chin ài choè-kang, chóng-sı̄ chí-ū hioh-khùn nā-tiāⁿ,
Chin ài kóng-oē, chóng-sı̄ chí-ū tiām-tiām,
Tı̄ sit-bāng ê sı̂, koh siⁿ-chhut ǹg-bāng,
Sūn-thàn, an-chēng, poē ka-kı̄ ê sı̍p-jı̄-kè,
Khoàⁿ-kı̀ⁿ siàu-liân-lâng ū cheng-sı̂n teh kiâⁿ Siōng-tè ê lō͘, bô oàn-tò͘,
Siūⁿ beh thoè lâng choè-kang, put-jû khiam-pi hō͘ lâng ho̍k-sāi,
Sui-bóng Ńg-chiáⁿ boē-thang ho̍k-sāi lâng, iah tio̍h chhin-chhiat, un-jiû ...
Nı̂-lāu ê tāng-tàⁿ sı̄ Siōng-tè só͘ siúⁿ-sù ê.
Chit-ê chiah-nih kū ê sim, koh chı̍t-piàn kā i soé chheng-khı̀,
Che sı̄ ūi-tio̍h beh khı̀ hit-ê chin-sı̍t ê chó͘-ke.
Chiong chit-ê kap sè-kan kiat-liân ê só-liān,
Chı̍t-chat, chı̍t-chat kā i tháu-khui,
Che sı̄ hô-téng úi-tāi ê kang ah,
Nā-sı̄ lí ê sim-sı̂n boē-thang koh choè sím-mı̍h,
Chiū chí-ū khiam-pi chiap-siū lah.
Siōng-tè siông-siông chiong hit-ê siōng-hó ê lâu tı̄ lō͘-boé, chiū-sı̄ kı̂-tó.
Lí ê siang-chhiú boē-thang koh choè sím-mı̍h,
Chóng-sı̄ lí oē-thang ha̍p-chióng, tı̍t-kàu choè-āu ê sı̂,
Ūi-tio̍h só͘-ū só͘-thiàⁿ ê lâng tùi Siōng-tè kiû-thó un-hūi.
Tng í-keng pháu-cháu èng-kai pháu-cháu ê lō͘-chām,
Tı̄ lı̂m-chiong ê bı̂n-chhn̂g téng, lí oē thiaⁿ-kı̀ⁿ ū siaⁿ án-ni kóng:
“ Lâi ah! goá chı̀-hó ê pêng-iú ah, goá bô pàng-sak lí. “
(Tâi-oân Kàu-hoē Kong-pò tē 2124 kı̂, 1992 nı̂, 11 goe̍h)
