Siōng-tè Só͘ Beh Ēng Ê Lâng 03

Tē 3 Chiuⁿ Choè-ko Ê Chhı̀-giām Chú Iâ-so͘ bat 3 pái mn̄g Pí-tek kóng: “Lí thiàⁿ Goá mah?” Lán tio̍h khoàⁿ chit-ê choè choè-ko ê chhı̀-giām. Che sı̄ beh chhı̀-giām lâng tùi Chú Iâ-so͘ ū khiân-sêng, jia̍t-sim, chı̄n-tiong á-bô? Lí siūⁿ kiám ū pí chit-ê koh-khah tiōng-iàu ê chhı̀-giām mah? Kàu kin-á-jı̍t, lán iáu-kú khoàⁿ che choè lán sio̍k-lêng seng-oa̍h choè-ko ê chhı̀-giām; chit ê chhı̀-giām ū pau-hâm í-hā saⁿ-tiám. 1. Choè Chú Ê Ha̍k-seng Choè-ko Ê Chhı̀-giām Le̍k-tāi í-lâi, Iâ-so͘ Ki-tok ài lâng sūn-ho̍k sio̍k tı̄ I; m̄ sı̄ chhut-tı̄ bián-kióng, kiaⁿ-hiâⁿ; oân-choân sı̄ chhut tı̄ thiàⁿ. Sat-tàn kam-goān chiong thiⁿ-ē bān-kok kap in ê êng-kng hō͘ Iâ-so͘ chai-iáⁿ Thiⁿ-pē ê chí-ı̀ choa̍t-tùi m̄-sı̄ bián-kióng lâng sūn-ho̍k I, I chí-ū ín-chhoā, m̄ bat kiông-pek. lâng tek-khak tio̍h chiàu ka-kı̄ ê ı̀-chı̀ lâi soán-te̍k Iâ-so͘; tio̍h hō͘ I ê thiàⁿ só͘ kám-hoà ín-chhoā lâi sūn-ho̍k I. Chit khoán ê kiat-ha̍p, pí ēng kiông-pek hō͘ lâng hâng-ho̍k khah chhin-bı̍t, ū khùi-la̍t, oē chûn-chāi koh-khah kú. In-ūi thiàⁿ ê iân-kò͘, Iâ-so͘ Ki-tok lâi kàu chit sè-kan. Thiàⁿ------hō͘ I ūi-tio̍h tı̂m-lûn ê jı̂n-lūi lâi sí. Thiàⁿ------chiah oē ín-chhoā jı̂n-lūi lâi kàu I ê bı̄n-chêng. Kiám ū sím-mı̍h kiat-iok ê soan-sè, pí chit-kù kán-tan ê chhı̀-giām “Lí thiàⁿ Goá mah?” koh-khah ū khùi-la̍t? I lóng bô ēng pa̍t ê būn-toê------chhin-chhiūⁿ kàu-gı̄, sı̀n-tiâu, sı̂n-ha̍k lâi mn̄g Pí-tek, iā bô kóng-khí choē, hoán-hoé á-sı̄ ūi Chú choè-kang ê sū; I chí-ū mn̄g chı̍t ê būn-toê “Lí thiàⁿ Goá mah?” Hit-sı̂ chiū-sı̄ Chú Iâ-so͘ beh kà-sı̄ ha̍k-seng choè-āu koh sı̄ choè hó ê ki-hoē, in-ūi I bô kú chiū beh lı̄-khui in. I pún-lâi oē thang kóng-khí choè ha̍k-seng ê chu-keh, sı̀n-tiâu, kàu-hoē cho͘-chit, chóng-sı̄ I lóng bô kóng chiah-ê, chí-ū kóng “Lí thiàⁿ Goá mah?”; in-ūi chit-kù ū pau-hâm it-chhè; kun-pún ê būn-toê nā kái-koat, pa̍t ê būn-toê chū-jiân chiū oē kái-koat. Kin-á-jı̍t kàu-hoē lāi ū chheng-chheng bān-bān ê sı̀n-tô͘ chin oa̍h-tāng, iā ū chin-choē gı̄-kang. Chóng-sı̄ in kò-jı̂n tùi Iâ-so͘ Ki-tok bô thiàⁿ-sim. Kan-ta ū tián-lé kap gı̂-sek iáu bô kàu-gia̍h; tiong-sı̍t tı̄ sı̀n-gióng ê ki-pún būn-toê, iā boē oē chèng-bêng tı̄ lí ê sim-lāi khak-sı̍t ū thiàⁿ Iâ-so͘. Ū chin-choē lâng , in ê lí-lūn sı̄ tio̍h, chóng-sı̄ in ê sim sı̄ chhò-gō͘. In-ūi án-ni, hiān-tāi ê kàu-phài chiah ū hiah choē ê mâu-tún kap put-an. Siōng-tè só͘ siúⁿ-sù hō͘ lán koah tiū-á ê khı̀-kū, m̄-sı̄ beh ēng lâi tùi-hù lán ê hiaⁿ-tı̄, sı̄ beh ēng lâi siu-koah ngó͘-kok. Chin ū khó-lêng, ūi-tio̍h sı̀n-gióng lâi sûn-tō--ê, bô it-tēng sı̄ thiàⁿ Iâ-so͘. Tú-tú chhin-chhiūⁿ Pó-lô só͘ kóng: “Goá siat-sú......hiàn goá ê seng-khu hō͘ hé sio nā bô jı̂n-ài, chiū goá bô tit-tio̍h lı̄-ek.” 2. Choè Chú Ê Ha̍k-seng Phín-keh Choè-ko Ê Chhı̀-giām Tùi sè-kan bu̍t-chit ê thài-tō͘, ū chin-choē lâng án-ni kóng: Án-ni choè kiám ū m̄ tio̍h? Án-ni choè sı̄ hoān choē mah? Chit chióng kū ê būn-toê goá bô su-iàu koh thê-khí. Lán kan-ta ēng che choè-ko ê chhı̀-giām lâi kàm-chhat lán it-chhè ê hêng-tōng chiū hó. Che chiâⁿ-choè sio̍k-lêng pı̍t-siâ kui-chèng ê khùi-la̍t. Būn-toê m̄-sı̄ hòng-chhiòng tı̄ ū būn-toê ê gû-lo̍k, sı̄ tio̍h á m̄-tio̍h. Chı̍t ê lâng hō͘ Sèng Sı̂n chhiong-moá koh sim-lāi ū Ki-tok ê thiàⁿ, i it-tēng sı̄ ài beh ho̍k-sāi hit ūi í-keng tit-tio̍h i ê sim ê Chú, koh ài sı̂-siông hō͘ I hoaⁿ-hí, i choa̍t-tùi bô sim-chêng khı̀ hoān-choē, khı̀ thiàⁿ sè-kan, khı̀ tui-kiû choē-ok tiong ê khoài-lo̍k. Bô lâng oē siong-hāi i ka-kı̄ só͘ thiàⁿ ê lâng ; só͘-í būn-toê sı̄ chāi-tı̄ thiàⁿ------choè-ko ê chhı̀-giām. Chı̍t ê thiàⁿ Chú ê lâng it-tēng oē sı̂-siông ài beh hō͘ I hoaⁿ-hí, hō͘ I sim-moá ı̀-chiok, án-ni sè-kan tùi i chiū bô koh ū khip-ín-la̍t, i boē koh-chài him-bō͘ sè-kan ê bu̍t-chit kap khoài-lo̍k; in-ūi Iâ-so͘ chiâⁿ-choè i ê it-chhè. Tùi án-ni, lêng-sèng hong-bı̄n thang tit-tio̍h I ê iúⁿ-chhı̄, kap I saⁿ-kap toà, tı̄ I lāi-bı̄n, thiàⁿ I, chun I choè lí sim-lāi ê Ông; lí nā sı̍t-chāi thiàⁿ I, it-chhè ê būn-toê chiū lóng chin hó kái-koat. 3. Choè Chú Ê Ha̍k-seng Ho̍k-sāi Chú Choè-ko Ê Chhı̀-giām Choè Chú ê ha̍k-seng ho̍k-sāi Chú, sı̄ in-ūi thiàⁿ I, m̄ sı̄ ūi-tio̍h gı̄-bū. Oāⁿ oē lâi kóng, m̄ sı̄ ūi-tio̍h chı̄n chek-jı̄m, sı̄ thiàⁿ ê chhui-pek. Sı̄ sím-mı̍h le̍k-liōng hō͘ Pò͘ Tāi-pı̍t (tı̄ Bí-kok Âng-hoan choè soan-kàu-su, David Brainerd) goān-ı̀ khı̀ kàu bô lâng kiâⁿ kàu ê khòng-iá tùi Ìn-tē-an lâng thoân tō-lí? Sı̄ sím-mı̍h hō͘ i tı̄ 24 hè ê sı̂, chiū lı̄-khui ka-têng, ka-kı̄ chı̍t-ê toà tı̄ bô lâng só͘ kàu ê lāi-toē chhiū-nâ lāi? I sui-jiân hoān tio̍h chin giâm-tiōng ê hı̀-pı̄ⁿ, chóng-sı̄ i kam-goān thun-lún iau-gō, khiâ bé kàu chin hn̄g ê só͘-chāi, àm-sı̂ ià-siān koh bô ūi thang hioh-khùn, ū-sı̂ tı̄ chhiū-nâ lāi tú-tio̍h toā-hō͘ lâm ê kan-khó͘, chóng-sı̄ i chı̍t ge̍h-jı̍t koh chı̍t ge̍h-jı̍t thun-lún lo̍h-khı̀. I ê bo̍k-tek sı̄ ūi-tio̍h beh hō͘ i só͘ thiàⁿ ê Ìn-tē-an lâng bêng-pe̍k Siōng-tè thiàⁿ in koh chiong I to̍k-siⁿ ê Kiáⁿ siúⁿ-sù in ūi-tio̍h in lâi sí. Tàu-té sı̄ tùi tó-ūi lâi ê khùi-la̍t hō͘ i thun-lún kan-lân, thòng-khó͘? Choa̍t-tùi m̄-sı̄ chek-jı̄m ê būn-toê, che sı̄ thiàⁿ kám-tōng só͘ piáu-hiān ê. Pò͘ Tāi-pı̍t thiàⁿ i ê Chú, só͘-í i ū choè-ko ê piáu-hiān. Chhin-chhiūⁿ Iâ Tek-sun, Lí-un-su-teng, Má Lé-sùn, Tè Tek-seng, Khek-lé kap chá-chêng só͘ ū úi-tāi ê soan-kàu-su iā lóng sı̄ án-ni. Siat-sú lí nā chı̄n sim thiàⁿ chú, lí iā it-tēng oē án-ni khı̀ choè. Lí tio̍h ēng hoaⁿ-hí ê sim ho̍k-sāi Chú, ēng án-ni lâi chèng-bêng lí ū thiàⁿ I. In-ūi lí ū thiàⁿ Chú, só͘-í nā ū su-iàu lí beh ūi I pàng-sak sı̀ⁿ-miā, lí ia̍h it-tēng oē hoaⁿ-hí kam-goān khı̀ choè. Oh! Chú ê thiàⁿ-thàng kap lı̂n-bín ê sim, hit ê tn̂g, khoah, koâiⁿ, chhim, sı̄ boē thang chhek-to̍k ê. Thiàⁿ ê tui-kiû sı̄ thiàⁿ ê ı̀n-tap, í-goā bô pa̍t mı̍h oē boán-chiok thiàⁿ ê sim. Chú Iâ-so͘ ēng chiah-nih toā ê thiàⁿ-thàng thiàⁿ lán, lán nā bô án-ni thiàⁿ I, í-goā bô pa̍t mı̍h oē boán-chiok I ê sim. Teh chhiat-chhiat him-bō͘ thiàⁿ ê lâng , khoàⁿ châi-pó, chhù-the̍h, chhân-hn̂g, lóng m̄-sı̄ tiōng-iàu; chí-ū án-ni thiàⁿ Chú, chiah oē tit-tio̍h Ki-tok ê hoaⁿ-hí kap chiap-la̍p. Só͘-í Chú Iâ-so͘ kóng: “Lí thiàⁿ Goá mah?”, chit kù chiū chiâⁿ-choè múi chı̍t ê Ki-tok-tô͘ choè-ko ê chhı̀-giām. Tı̄ Hoat-kok ū chı̍t ê chin hó-gia̍h ê hū-jı̂n-lâng , oàn-thàn i ê tiōng-hu tùi i léng-tām. I ê tiōng-hu kóng: Lí iáu beh tı̍h sím-mı̍h? Goá só͘-ū ê chı̂ⁿ-gûn lóng kau hō͘ lí koán, ke-hé chhù-the̍h lóng-sı̄ lí ê, lí tı̄ chia ū thang chia̍h, ū thang ēng, lí iáu teh oàn-thàn sím-mı̍h ah? Hit ê hū-jı̂n-lâng kóng: Goá ài tit-tio̍h lí ê sim, goá ài lí thiàⁿ goá. Hit ê choè tiōng-hu ê toā-siaⁿ tùi i kóng: Boē ēng tit, in-ūi goá ê sim sı̄ sio̍k tı̄ pa̍t-lâng --ê, lí thang tit-tio̍h goá ê it-chhè, nā-sı̄ goá ê sim, goá ê thiàⁿ, lí bô hūn. Lán thang chiong só͘-ū lóng-chóng hiàn hō͘ Chú, nā-sı̄ I iáu-boē boán-chiok; in-ūi thiàⁿ teh tui-kiû thiàⁿ ê ı̀n-tap, bô ū pa̍t-mı̍h oē thang thoè-oāⁿ. Hiān-kim I iáu teh ǹg-bāng lí ı̀n-tap chit ê choè-ko ê chhı̀-giām-------“Lí thiàⁿ Goá mah?” Siat-sú kin-á-jı̍t Iâ-so͘ hián-hiān tı̄ lán tiong-kan, I beh mn̄g lán ta̍k-lâng kóng: “Lí thiàⁿ Goá mah?” Lán beh cháiⁿ-iūⁿ ı̀n-tap? Lán sı̄ beh siám-pı̄ I ê chit-būn, á-sı̄ beh kap I kóng lán thiàⁿ I? Sù-tô͘ Iok-hān tı̄ i ê phoe kóng: “Goán thiàⁿ I.” Lí ū thiàⁿ I á-bô? Goá ū thiàⁿ I mah?