Siōng-tè Só͘ Beh Ēng Ê Lâng 04

Tē 4 Chiuⁿ Siōng-tè Cháiⁿ-iūⁿ Khoàⁿ-goá? Si-phian ê chok-chiá án-ni kóng, “Siōng-tè ah, kiû Lí kàm-chhat goá, chai goá ê sim-su; Chhı̀-giām goá, chai goá ê ı̀-sù. Khoàⁿ goá ū sím-mı̍h pháiⁿ só͘-kiâⁿ bô, Chhoā goá kiâⁿ éng-oa̍h ê lō͘.” (Si-phian 139:23~24). Che iā sı̄ lán ê kı̂-tó. Goān Sèng Sı̂n ê kng chiò lán, hō͘ lán oē bêng-pe̍k ka-kı̄, chhin-chhiūⁿ I só͘ khoàⁿ tio̍h lán chı̍t-poaⁿ-iūⁿ. Lán m̄-bián khoà-lū sè-kan tùi lán ê khoàⁿ-hoat. Pò-choá, cha̍p-chı̀ kap êng-á-oē tùi lán ê phêng-lūn, kiám-chhái kap Siōng-tè só͘ khoàⁿ ê tú-tú tùi-hoán; Siōng-tè beh chek-pı̄--ê, in beh o-ló, Siōng-tè khoàⁿ choè tio̍h o-ló--ê, in kiám-chhái beh húi-pòng. Lán iā m̄-bián khoàⁿ tāng chhin-chiâⁿ, pêng-iú ê ı̀-kiàn, in-ūi in iā oē hō͘ lán phiàn-khı̀. “lâng khoàⁿ goā-māu, Siōng-tè sı̄ khoàⁿ sim-lāi.” Lán chí-ū ài chai-iáⁿ Siōng-tè cháiⁿ-iūⁿ teh khoàⁿ lán. Ū chı̍t jı̍t lán beh khiā tı̄ Siōng-tè ê bı̄n-chêng siū I sím-phoàⁿ, kàu sı̂ I beh hian-khui lán ê phè, chiū-sı̄ tı̄ sim-lāi ún-ba̍t ê, ia̍h tio̍h lō͘-hiān. lâng ê goā-māu sui-jiân oē jia-khàm pa̍t-lâng ê ba̍k-chiu, chóng-sı̄ choa̍t-tùi boē jia-khàm Siōng-tè ê ba̍k-chiu. Siat-sú lán chá chiū chai-iáⁿ I cháiⁿ-iūⁿ khoàⁿ lán, chiū-sı̄ lán siū chhı̀n tı̄ thian-phêng, hián-bêng lán ê bô kàu-gia̍h, lán kiám bô beh kín-kín pó͘-chhiong lán só͘ khiàm-kheh--ê, kap I ū chèng-siông ê koan-hē mah? Siōng-tè cháiⁿ-iūⁿ teh khoàⁿ lán? Kàm-chhat lâng lāi-sim ê Siōng-tè , tı̄ goá sim-lāi só͘ khoàⁿ tio̍h ê sı̄ sím-mı̍h? Goá ê it-chhè oē hō͘ I hoaⁿ-hí mah? 1. Siōng-tè Khoàⁿ Goá Ê Kang-chok Cháiⁿ-iūⁿ? Siōng-tè tı̄ goá ê lāi-bı̄n ū khoàⁿ-chhut sêng-sim sı̍t-ı̀, bô khúi-chà, bô choè ké-hó ê tāi-chı̀ á-bô? Bô-lūn goá ū joā-choē kè-sit, che lóng m̄-sı̄ iàu-kín, chú-iàu ê būn-toê sı̄ chāi tı̄ goá ê tōng-ki ū chı̄n-tiong, sêng-sı̍t á-bô? Nā ū, I beh sià-bián goá ê kè-sit. Goá ê kang-chok ū tham-tio̍h kò-jı̂n ê lı̄-ek, á-sı̄ ūi-tio̍h chit-gia̍p chiah teh choè á-bô? Goá ê kang-chok ū tùi Siōng-tè hū-chek á-bô? Goá ê seng-oa̍h ū teh kan-chèng Iâ-so͘ á-bô? Goá kiám oē ín-chhoā pa̍t-lâng lâi kè tek-sèng koh ū khùi-la̍t ê seng-oa̍h á-boē? Goá kiám ū ín-chhoā lâng lâi sı̀n Chú? Tı̄ kè-khı̀ ê jı̍t-chí goá kiám bat tùi pa̍t-lâng kóng-khí in lêng-hûn tit-kiù ê tāi-chı̀? Goá ū tō-lí thang thoân á-bô? Á-sı̄ goá ka-kı̄ ê thé-giām chin chhián, tùi pa̍t-lâng bô sím-mı̍h chok-iōng? 2. Siōng-tè Khoàⁿ Goá Ê Siā-kau Seng-oa̍h Cháiⁿ-iūⁿ? Siōng-tè bat bēng-lēng kóng, “Lín tio̍h tùi in tiong-kan chhut-lâi, ka-kı̄ hun-pia̍t,” “Bo̍h-tit kap m̄ sı̀n ê lâng choè phoāⁿ.” Goá kiám ū sūn-thàn I ê bēng-lēng? Goá só͘ choè ê kiám ū hō͘ I hoaⁿ-hí? Ū sím-mı̍h khoài-lo̍k tı̀-kàu chiong Chú Iâ-so͘ koáⁿ-chhut goá ê sim-lāi, hō͘ I bô kap goá saⁿ-kap tı̄-teh? Goá teh choè tāi-chı̀, kóng-oē, kiâⁿ-ta̍h ê sı̂, goá ê liông-sim kiám ū pêng-an? Tı̄ choân sè-kan ê bı̄n-chêng goá ū kam-goān pàng-sak só͘ ū ê, kan-ta kéng beh tı̍h Chú Iâ-so͘ mah? Goá teh siūⁿ beh hō͘ I hoaⁿ-hí, á-sı̄ sı̂-siông siūⁿ beh kap I piān-lūn? Goá ū chiong sio̍k tı̄ Chú ê sı̂-kan the̍h-khı̀ choè hiah-ê bô chèng-tong ê siā-kau oa̍h-tāng á-bô? 3. Siōng-tè Khoàⁿ Goá Ê Lêng-siu Seng-oa̍h Cháiⁿ-iūⁿ? Goá kiám ū ēng kàu-gia̍h ê sı̂-kan tı̄ ba̍k-pâng kap I kau-poê? Kap Chú Iâ-so͘ kau-poê ê sı̂ goá ū kám-kak--tio̍h tiⁿ-bı̍t á-bô? Iâ-so͘ ū oân-choân boán-chiok goá ê sim á-bô? Goá ū teh gián-kiù Siōng-tè ê Oē á-bô? Tı̄ ba̍k-pâng nih, á-sı̄ chí-ū tı̄ kàu-hoē ê chá-keng-hoē? Chú ū chiong I ê ò-biāu khé-sı̄ goá á-bô? Goá m̄-chai ū khak-sı̍t khı̂ⁿ-tiâu I ê èng-ún choè goá ê hok-khı̀ á-bô? Tı̄ goá seng-oa̍h ū put-sı̂ teh kı̂-tó á-bô? Goá ê kı̂-tó ū tit-tio̍h I ê èng-ún mah? Goá kiám ū teh ha̍k-sı̍p tio̍h cháiⁿ-iūⁿ kı̂-tó? Goá ū ēng chin-sı̍t ê sim kı̂-tó á-bô? Goá ê kı̂-tó ū kong-hāu mah? Tùi goá lâi kóng, kı̂-tó sı̄ chı̍t-hāng chin-sı̍t koh tiōng-iàu ê tāi-chı̀ mah? 4. Siōng-tè Khoàⁿ Goá Ê Lêng-sèng Chı̀n-pō͘ Cháiⁿ-iūⁿ? Tùi sio̍k-lêng ê sū, goá kiám ū pí kū-nı̂ khah chı̀n-pō͘ mah? Goá sı̄ chı̍t ê tióng-toā ê Ki-tok-tô͘ mah? Goá kin-nı̂ ê chêng-hêng kiám ū pí kū-nı̂ koh-khah hó? Tùi goá lâi kóng, Iâ-so͘ ū koh-khah chin-sı̍t? Pêng-iú kiám oē khoàⁿ-chhut goá kap í-chêng bô kāng ê só͘-chāi? Goá loán-jio̍k sio̍k hiat-khı̀ ê sit-pāi, kiám ū teh siau-bô͘, hō͘ Sèng Sı̂n só͘ kiat ê ké-chí tı̄ goá ê sin-chiūⁿ teh ke-thiⁿ á-bô? Teh tí-tng choē-ok, te̍k-pia̍t sı̄ khah-oē tı̂ⁿ-poàⁿ goá ê choē, tı̄ chit hāng sū goá ū teh chı̀n-pō͘ á-bô? Í-chêng bat khah-iâⁿ goá ê choē, taⁿ tı̄ hiān-kim goá ū khah-iâⁿ á-bô? Goá kiám ū teh siūⁿ beh tùi hit ê choē-ok tit-tio̍h tháu-pàng? Iáu ū sím-mı̍h sim só͘ ı̀-ài ê ngó͘-siōng tı̀-kàu chiong Chú ê koân-lêng, pêng-an, thiàⁿ-thàng, kap tông-chāi lóng kū-choa̍t tı̄ sim-goā á-bô? Lán siông-siông choè kan-chèng kóng, Chú Iâ-so͘ sı̍t-chāi hō͘ goá boán-chiok. Chóng-sı̄ lán kiám oē thang hoán-tńg lâi mn̄g kóng: Chú ū khoàⁿ goá choè boán-chiok á-bô? Tē-it iàu-kín ê, chiū-sı̄ Chú tùi lán ê khoàⁿ-hoat. Lán ū hō͘ I kám-kak tio̍h sit-bāng? Á-sı̄ lán sı̂-siông hō͘ I hoaⁿ-hí? Tàu-tí Siōng-tè Khoàⁿ Goá Cháiⁿ-iūⁿ?