Siōng-tè Só͘ Beh Ēng Ê Lâng 13

Tē 13 Chiuⁿ Beh Cháiⁿ-iūⁿ Ūi Chú Lâi Oah Lí ū chiap-la̍p Iâ-so͘ Ki-tok choè lí ê Kiù-chú á-bô? Lí ê choē ū tit-tio̍h sià-bián á-bô? Sèng Sı̂n kiám ū kap lí ê sı̂n saⁿ-kap kan-chèng lí í-keng chhut-sí jı̍p-oa̍h? Lí ū têng-thâu-siⁿ koh ài beh ūi Chú lâi oa̍h á-bô? Nā ū, lí tio̍h choè chit 5 hāng sū? 1. Chai-iáⁿ Ka-kı̄ Í-keng Tit-kiù Lí beh cháiⁿ-iūⁿ oē chai-iáⁿ í-keng ū tit-kiù? Chú Iâ-so͘ ê pó-huih chín-kiù lí, Siōng-tè ê Oē hō͘ lí ū khak-sı̀n. “Goá siá chiah-ê hō͘ lín sı̀n Siōng-tè ê Kiáⁿ ê miâ ê, beh hō͘ lín chai lín ū éng-oa̍h” (I Iok-hān 5:13). Tı̄ chia m̄-sı̄ kóng, Beh hō͘ lín ǹg-bāng, chhai á-sı̄ siūⁿ ka-kı̄ ū éng-oa̍h. Sı̄ kóng beh hō͘ lín chai. Iā m̄-sı̄ kóng Goá chiong chiah-ê khoài-lo̍k ê kám-kak hō͘ lín,” sı̄ Goá siá chiah-ê hō͘ lín. Só͘ siá ê chiū-sı̄ “Chiū-kūn Goá ê lâng , Goá koat-toàn bô khı̀-sak i” (Iok-hān 6:37). Lí kiám ū chiū-kūn Chú Iâ-so͘? Lí ū siū chiap-la̍p á-bô? I kóng, I koat-toàn bô khı̀-sak lí, só͘-í I tek-khak chiap-la̍p lí. In-ūi Sèng-keng koh kóng, “Kı̀ⁿ-nā chiap-la̍p I ê, chiū-sı̄ sı̀n I ê miâ ê lâng , I chiū siúⁿ-sù in ū koân, chiâⁿ choè Siōng-tè ê kiáⁿ-jı̂” (Iok-hān 1:12). Chhiáⁿ mn̄g, lí kiám ū chiap-la̍p I? Lí ū choè Siōng-tè ê kiáⁿ-jı̂ á-bô? Che it-chhè lóng sı̄ tùi Siōng-tè ê Oē lâi. Lí ê kám-kak ta̍k-jı̍t oē kái-piàn, kin-á-jı̍t lí kám-kak ū tit-kiù, bı̂n-á-chài chiū kám-kak bô tit-kiù. Só͘-í tio̍h kun-kù Siōng-tè ê Oē, sı̀n I só͘ kóng ê, tio̍h sı̀n Sèng-keng só͘ kı̀-chài ê. Siōng-tè ê Oē éng-oán boē kái-piàn. “Án-ni sı̀n sı̄ chhut tı̄ thiaⁿ, thiaⁿ sı̄ tùi Ki-tok ê giân-gú” (Lô-má 10: 17). Lí nā káⁿ án-ni sı̀n, Sèng Sı̂n chiū tiàm-tı̀ lí ê sim, kap lí ê sı̂n saⁿ-kap kan-chèng, lí choè Siōng-tè ê kiáⁿ-jı̂, lí chiū ū kiù-un ê khak-sı̀n. 2. Tı̄ Chèng-lâng Ê Bı̄n-chêng Sêng-jı̄n Ki-tok Tio̍h tı̄ chèng-lâng ê bı̄n-chêng sêng-jı̄n Ki-tok, m̄-thang choè àm-chı̄ⁿ ê Ki-tok-tô͘, tio̍h gia̍h-koân lí kiù-un ê kı̂, hō͘ chèng-lâng lóng khoàⁿ oē tio̍h. Ū ki-hoē tio̍h sêng-jı̄n Chú Iâ-so͘, chiong I ê kiù-un thoân hō͘ pa̍t-lâng chai, m̄-thang ún-ba̍t lí ê kng. “Hoān-nā tı̄ chit ê kan-im ū choē ê sè-tāi lia̍h Goá kap Goá ê Oē choè kiàn-siàu ê, Jı̂n-chú ēng Pē ê êng-kng kap chiah ê sèng ê thiⁿ-sài lâi ê sı̂, iā beh lia̍h i choè kiàn-siàu” (Má-khó 8:38). Lí nā ài chú Iâ-so͘ tı̄ hit-sı̂ sêng-jı̄n lí, lí chit-sı̂ tio̍h sêng-jı̄n I. Lí nā beh hō͘ lí ê lêng-sèng kín-kín chı̀n-pō͘, tio̍h tı̄ chèng-lâng ê bı̄n-chêng sêng-jı̄n I. Chek-sı̂ khı̀ choè, m̄-thang thèng-hāu. 3. Lı̄-khui Só͘-ū Ka-kı̄ Chai-iáⁿ Ê Kè-sit Sèng Sı̂n tiàm-tı̄ lí ê sim-lāi, chiū tùi choē-ok tháu-pàng lí. “In-ūi tiàm-tı̄ lín ê, khah toā tiàm-tı̄ sè-kan ê” (I Iok-hān 4:4). “Só͘-í lâng nā tiàm-tı̄ Ki-tok, chiū-sı̄ choè sin chhòng-chō ê, kū ê tāi-chı̀ í-keng kè-khı̀, taⁿ lóng pı̀ⁿ-chiâⁿ sin ê” (II Ko-lı̂m-to 5:17). I beh siúⁿ-sù lí chı̍t-ê sin ê sèng-chêng, oàn-hūn choē-ok, ài kong-gı̄. Sèng Sı̂n ū toā koân-lêng, I beh tháu-pàng lí tit-tio̍h chū-iû, khah-iâⁿ it-chhè ê choē-ok. “In-ūi choē-ok bô koh koán-hat lín” (Lô-má 6:14). “Lán bô koh choè choē-ok ê lô͘-châi” (Lô-má 6:6). Chóng-sı̄ lí tio̍h pàng-sak it-chhè ê choē-ok, kiâⁿ tı̄ gı̄ ê lō͘, ēng Chú só͘ siúⁿ-sù lí têng-thâu-siⁿ ê ı̀-chı̀ lâi tùi-hù pháiⁿ-tāi. “Oàn-hūn pháiⁿ, chhin-kūn hó” (Lô-má 12:9). Tio̍h siám-pı̄ hiah-ê khoài-khoài tı̂ⁿ-poàⁿ lí ê choē, chun-thàn Chú ê Oē, thâi-sí múi chı̍t-ê Ka-lâm-lâng , tû-khı̀ sim-lāi ê A-kan kap choē-ok bô kan-sia̍p. “Goá nā sim-lāi chù-tiōng choē-ok, Chú tek-khak bô beh thiaⁿ” (Si-phian 66:18). Lí nā sı̍t-chāi ū koat-sim beh án-ni choè, Siōng-tè beh tháu-pàng lí, chí-ū khò chú pó-huih ê kong-lô kap I sèng-miâ ê toā koân-lêng chiū hó, I chiū beh chín-kiù lí. “Só͘-í bo̍h-tit iông-ún choē-ok choè ông tı̄ lín oē sí ê seng-khu” (Lô-má 6:12). “Soah lín ê choè-pháiⁿ ha̍k-sı̍p kiâⁿ-hó” (Í-sài-a 1:16, 17). 4. Ēng Kang-hu Gián-kiù Sèng-keng Kap Kı̂-tó Lí nā jú tha̍k Sèng-keng, chiū oē jú ài tha̍k. Lí nā beh tı̄ Chú ê un-tián lâi chı̀n-pō͘, tio̍h ta̍k-jı̍t kap Chú saⁿ kau-poê. Tio̍h ū it-tēng sı̂-kan kap só͘-chāi thang tha̍k Sèng-keng, kı̂-tó. Tio̍h choè chı̍t-ê tiong-sı̍t tı̄ Sèng-keng ê Ki-tok-tô͘. “Siàu-liân-lâng tio̍h ēng sím-mı̍h lâi chheng-khı̀ i ê só͘ kiâⁿ? Sı̄ tio̍h chiàu Lí ê Oē lâi soè-jı̄ kiâⁿ” (Si-phian 119:9). Lí nā hut-lio̍k Siōng-tè ê Oē, chiū oē tūi-lo̍h, lí nā ha̍k-sı̍p beh cháiⁿ-iūⁿ kı̂-tó, lí ê lêng-sèng chiū oē toā chı̀n-pō͘. 5. Un-khûn Ūi Chú Choè-kang Bô Sı̂ Thêng Tio̍h un-khûn choè-kang bô sı̂ thêng, in-ūi Sat-tàn sı̂-siông ín-iú êng-êng bô tāi-chı̀ thang choè ê lâng khı̀ choè pháiⁿ. Pun Hok-im thoân-toaⁿ, chham-ka kàu-hoē pò͘-tō ê kang, che chiū-sı̄ lí ê pún-hūn, m̄-thang êng-êng teh tán, tio̍h chhē tāi-chı̀ thang choè, un-khûn ūi Chú choè-kang bô thêng. Chham-ka Sèng-koa-tūi, hù Kı̂-tó-hoē, pang-chān Chheng-liân thoân-khè ê kang-chok, choè kò-jı̂n pò͘-tō ê kang, kà Chú-jı̍t-o̍h, koe-lō͘ pò͘-tō, khı̀ thàm sòng-hiong-lâng , pı̄ⁿ-lâng á-sı̄ hoān-lâng , choè lí tit-kiù ê kan-chèng......che lóng sı̄ tiōng-iàu ê kang-chok, tio̍h tı̀-ı̀ khı̀ choè. Tio̍h lı̄-khui hiah-ê léng-tām koh hêng-sek-hoà kap sè-sio̍k bô hun-pia̍t ê kàu-hoē. Tio̍h chham-ka chù-tiōng thoân Hok-im ū teh kóng têng-thâu-siⁿ tō-lí ê kàu-hoē, kap ū hó phín-hēng ài kı̂-tó ài-pò͘-tō sio̍k-lêng ê sı̀n-tô͘ choè pêng-iú. Taⁿ goá m̄-bián koh kóng lah, lí nā khak-sı̍t chai-iáⁿ lí ū tit-kiù; koh tı̄ chèng-lâng ê bı̄n-chêng jı̄n Ki-tok; lı̄-khui lí só͘ chai ê kè-sit; ēng kang-hu gián-kiù Sèng-keng kı̂-tó; sı̂-siông bô-êng teh ho̍k-sāi Siōng-tè , án-ni chiū hó. Lí án-ni choè, chiū chiâⁿ-choè chı̍t-ê sim-lāi ū hoaⁿ-hí khoài-lo̍k ê Ki-tok-tô͘. Siōng-tè beh ēng lí lâi choè I ê kang, bô-lūn lí kàu sím-mı̍h só͘-chāi khı̀, lóng beh tit-tio̍h I ê chiok-hok.