Siū niú-khiok ê Tâi-oân bı̂n-cho̍k-sèng

 e̍k 
 Niú-khiok ê ı̀-sù sı̄: “Choān kah oai-ko chhı̄-chhoa̍h.” 
 Tāi-thé-siōng lâi kóng, Tâi-oân-lâng sı̄ ı̂-bı̂n, só͘-í, Tâi-oân-lâng ê bı̂n-cho̍k-sèng ū chı̍t-koá kap goân-lâi ê Hàn-jı̂n bô-kāng-khoán ê só͘-chāi. 
 Î-bı̂n cheng-sı̂n ê te̍k-tiám sı̄---iú-ài, hō͘-siong pang-chō͘, jia̍t-chêng, lōng-bān, mō͘-hiám, ióng-kám, í-kı̍p siōng kài lân-tit--ê chiū-sı̄, lí-sióng-chú-gı̄ ê kheng-hiòng téng. 
 Lēng-goā chı̍t hong-bı̄n, Jı̍t-pún-lâng thóng-tı̄ Tâi-oân 50 nı̂, tû liáu ū lâu lo̍h keng-chè kiàn-siat ê kui-bô͘ í-goā, iā ūi Tâi-oân-lâng phah hó hoat-tı̄ ê ki-chhó͘. 
 Āu-lâi 228 sū-kiāⁿ, í-kı̍p kok-bı̂n chèng-hú chhú-lí chit-ê sū-kiāⁿ ê hong-sek: iû-kı̂ sı̄ chân-sat, sit-chong, sió-khoá ū khan-liân á-sı̄ bû-ko͘ ê lâng iā chóng thâi, téng téng, tı̀-sú-kàu Tâi-oân-lâng piàn-sêng: 
 (1) Put-kek-put ēng chhai-gı̂ ê thāi-tō͘ tùi-thāi goā-séng-lâng, sı̄m-chı̀ Tâi-oân-lâng pún-sin iā m̄-káⁿ hō͘-siong sı̀n-jı̄m. 
 (2) “Bô chò pháiⁿ, chiū m̄-kiaⁿ koaⁿ-hú” ê koan-liām pı̀ⁿ-chò sı̄ bô-iáⁿ bô-chiah pe̍h-chha̍t pe̍h-koat, hoat-tı̄ ê koan-liām chiū lóng pàng--khı̀. 
 (3) Sí-thé thia̍p kah ná soaⁿ, hoeh lâu kah ná khe-chúi, sı̍t-chāi chin khióng-pò͘, chū-pó chi tō chiū-sı̄ léng-tām, bô koan-sim, chū-su chū-lı̄, bô-ài chhap chèng-tı̄, bô kong-tek-sim. Tùi án-ni, kò-sèng loán-jio̍k bô-táⁿ chiū chiâⁿ-chò sı̄ chı̍t-khoán bí-tek: “Bô hoán khòng”. Chò sūn-bı̂n chiah ē hù-kùi tn̂g hoè-siū. 
 Koh án-ni lo̍h-khı̀, Tâi-oân-lâng chiū pı̀ⁿ-sêng bâ-pı̀, bô chū-kak, bô chū-chun ê cho̍k-lūi, kûn-cho̍k ê kiōng-tông lí-sióng, kap lí-sióng ê tı̀-ı̀ tui-kiû, tong-jiân sı̄ koh khah bián kóng ah! 
 “228” ê to̍k-bū àm-iáⁿ it-tı̍t lóng tà tı̄ Tâi-oân-lâng ê sim-lêng-siōng, chó͘-tòng tio̍h khah ko-chân-chhù ê sim-lêng oa̍h-tāng, só͘ teh kóng ê sèⁿ-miā chêng-tiāu ê thê-seng, sim-lêng sè-kài ê chhòng-chō, chiū pı̀ⁿ-choè chin khùn-lân. 
 Só͘-í lán su-iàu sàu-tû chiah-ê sim-lêng-siōng ê àm-iáⁿ, chū-chú lâi chhòng-chō bí-hó ê chiong-lâi. 

(Hong-hiòng Tē 7 kı̂, 1990 nı̂ 11 goe̍h)