1 Īⁿ-pang siáⁿ-sū lonān-loān soan-hoa,
Peh-sı̀ⁿ siū-khı̀ khang-khang tio̍h-boâ,
Sè-chiūⁿ kun-ông lia̍t-kok chu-hô͘,
Tâng-sim chū-chı̍p saⁿ-kap kè-bô͘.
2 Chı̀-chun Siōng-tè in káⁿ poē-ge̍k,
Kap Chú Ki-tok lâi choè tùi-te̍k,
Sèng-keng chin tō lı̄-khui ke̍k hn̄g,
Lu̍t-hoat só͘ pa̍k lām-sám chhoah-tn̄g.
3 Thiⁿ-téng Chú-cháiⁿ éng chē koâiⁿ-ūi,
Thí-chhiò khoàⁿ-khin hoán-poān tóng-lūi,
Chhim-chhim oàn-hūn siū-khı̀ khiàn-chek,
Kong-gı̄ hêng-hoa̍t chı̄n tāng kàu ke̍k.
4 Siat-lı̍p Ki-tok lóng bô koé-oāⁿ,
Choè ông chē ūi tı̄ Sûn sèng-soaⁿ,
Thiⁿ-pē chí-ı̀ chāi-chá chù-tiāⁿ,
Éng choè Siōng-tè to̍k-siⁿ ê Kiáⁿ.
5 Pek-chhiat kı̂-tó, Siōng-tè ún-chún,
Thiⁿ-ē bān-kok chèng-lâng kui-sūn,
Chú kia̍h thih-koáiⁿ giâm-giâm tı̄-lí,
Phah-phoà tùi-te̍k chhin-chhiūⁿ hûi-khı̀.
6 Lia̍t-ông tio̍h lâi sêng-siū kà-sı̄,
Bûn-bú, koaⁿ-oân, sı̀n-thàn tō-lí,
Chı̍t piⁿ hoaⁿ-hí, chı̍t piⁿ kiaⁿ-hiâⁿ,
Ho̍k-sāi kèng-ùi Siōng-tè toā miâ.
7 Sèng-kiáⁿ siū-khı̀ pí hé khah jia̍t,
Lō͘-tiong tùi-te̍k hut-jiân châu-bia̍t,
Kín-kín tio̍h lâi hoán-hoé hâng-ho̍k,
Khò i chun miâ éng-oán hióng-hok.
