Sim-hiân 2

Àn chhut-sı̀ kàu jı̍p Tâi-lâm Sı̂n-ha̍k-ı̄ⁿ tha̍k-chheh, goá lóng toà tı̄ Ko-hiông ê Ha-má-seng, iā chiū sı̄ Siū-san soaⁿ kha oá káng-chhùi, tē-it hō bé-thâu ê só͘-chāi tē. Sè-hàn ê sı̂ chhù-piⁿ-keh-piah, chhin-chiâⁿ-gō͘-cha̍p ū chı̍t-poàⁿ khah ke lóng sı̄ thó-hái lâng, sui-jiân tı̄ hit ê kan-khó͘ thó-thàn ê nı̂-tāi, seng-oa̍h bô chin hó koè, chóng-sı̄ goán iû-goân ū chin choē ta̍t-tit siàu-liām ê gín-á-nı̂. Chhin-chhiūⁿ ū sin chûn lo̍h chúi ê sı̂, sio chio khı̀ khioh moâ-chı̂, á-sı̄ toè sı̄-toā-lâng khı̀ Se-á-oân ê hái-kı̂ⁿ khà chhiⁿ-ô-á, hiān khà hiān chia̍h, á-sı̄ ē-àm khut tı̄ biō-kháu thiaⁿ hûn-iû-sù-hái ê Ông-lo̍k-á-sian kóng kò͘-sū, phah-kûn bē ko-io̍h, á-sı̄ ngiâ lāu-jia̍t ê sı̂ giâ í-á chiàm ūi, chiú tiàm hı̀-pêⁿ kha chiú kui mı̂, m̄ bián khai hùi poàⁿ-sián-chı̂ⁿ, goán ê gín-á-nı̂ chiàu siông koè kah ū sek, ū chu-bı̄. Choè-kı̄n jı̄-cha̍p kúi nı̂ lâi, goá bat khı̀ koè chin choē só͘-chāi, Hiong-káng, Thài-kok, Má-lâi-se-a, Sin-ka-pho, Bí-kok, Ka-ná-tāi, Nô͘-ui, Tan-be̍h, Sūi-tián, Hun-lân, Tek-kok, Eng-kok, Hoat-kok, Ò-tē-lı̄, to-chhái-to-chu ê ı̄-pang bûn-hoà, m̄ sı̄ bô phah tāng koè goá ê sim-lêng, chóng-sı̄ bô-lūn in joā khip-ín goá, tō boē chhin-chhiūⁿ goá ta̍k-pái tò-tńg-khı̀ Ha-má-seng ê sı̂ hit-chióng kám-kak, sui-jiân hái-kı̂ⁿ ê chúi í-keng piàn chhàu, ke lō͘ ê phoà-siùⁿ ū ke bô kiám, sim tiong ê hit-tiâu hiân khiok án-choáⁿ tō tòng-boē-tiâu, tı̍t-tı̍t tiô-khí-lâi, han-chı̂ miā tō sı̄ han-chı̂ miā, lı̄-khui thô͘, goá siūⁿ goá oē pı̀ⁿ chò “M̄-chiâⁿ-kiáⁿ”! (Gân Sı̀n-seng Tâi-gí Bûn-ha̍k soán, 2002 nı̂ Chin-pêng Khı̀-gia̍p Chhut-pán)