Sim-hiân 3

Chûn tùi Ko-hiông jı̍p káng, chiàⁿ-pêng sı̄ Kı̂-āu, tò-pêng sı̄ Ha-má-seng, hái té tē-hā-tō iáu-boē khui-thong chı̀n-chêng, nā beh khı̀ tùi bı̄n hoāⁿ chí-ū chı̍t-tiâu lō͘, chiū sı̄ tah hoé-chûn-á. Tan-choā ê hêng-thêng iok-lio̍k sı̄ cha̍p-hun-cheng, goá tùi chûn-phiò chı̍t-tiuⁿ nn̄g-kak chē kah chı̍t-tiuⁿ saⁿ-kho͘ ê sı̂, chiah lı̄-khui Ha-má-seng chhut goā khı̀ tha̍k-chheh. Toà Ha-má-seng ê lâng khı̀ Kı̂-āu chhin-chhiūⁿ leh kiâⁿ chàu-kha siāng-khoán, in-ūi seng-oa̍h kap chhin-chêng chiong goán ê khò͘-toà kat-sio-liân, goá ê a-hiaⁿ kap a-ché lóng tı̄ Kı̂-āu chhut-sı̀, a-pa iáu tı̄-teh ê sı̂, chûn nā jı̍p káng mā siông-siông pha tı̄ Kı̂-āu, oá goā-hái ê soa-thoaⁿ koh khah sı̄ goán kòng-kiû, tiò-hı̂, khoàⁿ lâng khan-ko͘ ê hó só͘-chāi, tı̄ hit toāⁿ tui-hong-tio̍k-lōng, m̄ chai thiⁿ m̄ chāi tē koh gâu chò bı̂n-bāng ê soè-goa̍t, Kı̂-āu phoāⁿ goá tō͘ koè bû sò͘ hoâi-liām ê gín-á-nı̂. Chit kúi nı̂ sûi tio̍h bûn-bêng ê kha-pō͘, iû-kı̂ sı̄ hái té tē-hā-tō khui thong liáu-āu, Kı̂-āu chiām-chiām hoân-êng khí-lâi, ke chin lāu-jia̍t. Seng-oa̍h khah hó koè, goá tong-jiân mā thè kò͘-hiong ê lâng hoaⁿ-hí, chóng-sı̄ ta̍k-pái goá tò-tńg-khı̀ Kı̂-āu ê sı̂, siōng phah-tāng goá ê sim-hiân ê, khiok sı̄ hiah ê siū bûn-bêng hòng-tio̍k, ēng i tı̂-hoán ê kha-pō͘, kiâⁿ tı̄ Kı̂-āu ke-lō͘ téng-koân ê jı̂n-le̍k saⁿ-lián-chhia, in-ūi tı̄ jı̍p khı̀ Sı̂n-ha̍k-ı̄ⁿ tha̍k chheh chı̀n chêng, ūi tio̍h seng-oa̍h goá bat thoa koè chı̍t-tang ê saⁿ-lián-chhia, tùi goá lâi kóng, hit-tang sı̄ goá ê sin-khu kha̍p tio̍h Tâi-oân ê thô͘ siōng kı̄n ê jı̍t-chí. (Tâi-oân Kàu-hoē-kong-pò Tē 2127 kı̂, 1992 nı̂ 12 goe̍h) (Gân Sı̀n-seng Tâi-gí Bûn-ha̍k soán, 2002 nı̂ Chin-pêng Khı̀-gia̍p Chhut-pán)