Sim-sek Koa
Sim-sek Koa
siu-káiĒ-mn̂g Lú-o̍h ê Ha̍k-seng
1. Khí-thâu khang-khang bô thiⁿ-toē,
Chhin-chhiūⁿ o͘-àm moá sı̀-koè,
Sam-ūi it-thé chin Chú-cháiⁿ,
Sèng-sı̂n ūn-tōng tı̄ hí-lāi.
2 .Chú-cháiⁿ ê miâ Iâ-hô-hoa,
Chı̀-sèng chı̀-chun chı̀ koâiⁿ-toā,
Pèng bô khí-thâu bô lō͘-bé,
Pı̂ⁿ-pı̂ⁿ éng-éng chò Siōng-tè.
3. Thiⁿ-toē bān-mı̍h I chhòng-chō,
Kóng ū hit-hō chiū hit-hō,
Thâu-jı̍t Siōng-tè kóng tio̍h kng,
Chiū hun chá-khí kap ê hng.
4.Jı̄-jı̍t chō thiⁿ hō kiong-chhong,
Hō͘ téng-ē chúi bô saⁿ-thong,
Saⁿ-jı̍t hun chúi kap ta-toē,
Hoat-siⁿ chhiū-ba̍k kap chhài-soe.
5. Sı̀-jı̍t chhòng-chō jı̍t ge̍h chhiⁿ,
Lâi hun jı̍t-mı̂ tiāⁿ sı̂ nı̂,
Gō͘-jı̍t chō chiáu kap hı̂-pih,
Soaⁿ-chiūⁿ ū chiáu hái ū hı̂.
6. La̍k-jı̍t chō siù lio̍k-thiok thâng,
Kiam chō lâm-lú kok chit-lâng,
Chhit-jı̍t bān-mı̍h lóng chiâu-pı̄,
Siōng-tè an-hioh sù hok-khı̀.
7. Lâm sı̄ thô͘ chhòng miâ A-tong,
Siōng-tè pûn khı̀ chiū chiâⁿ lâng,
Koh hō͘ A-tong hó-khùn khı̀,
Thiu i hia̍p-ē kut chı̍t-ki.
8. Chō chiâⁿ hū-jı̂n miâ Hā-oa,
Saⁿ-chān liāu-lí tâng tio̍h-boâ,
Sèng-chêng lóng tâng Siōng-tè khoán,
Toē-chiūⁿ bān-mı̍h hō͘ in koán.
9.Hō͘ in kiat chiâⁿ choè ang-bó͘,
Lâi choè bān-lâng ê sí-chó͘,
Tiàm tı̄ Ai-tiân lo̍k-hn̂g lāi,
Saⁿ-kāng kò͘-siú kap chèng-chai.
10. Hn̂g-lāi ké-chí kù in chia̍h,
Chí kı̀m chı̍t-châng chiū kàu-gia̍h,
Hit-châng ké-chí sı̄ siáⁿ-hō?
Chiū-sı̄ hun-piat siān-ok kó.
11. Hū-jı̂n tāi-seng siù kúi bê,
Chio ang tâng chia̍h ge̍k Siōng-tè,
Hoān-choē piàn-pháiⁿ chiah tio̍h sí,
Koáⁿ-chhut lo̍k-hn̂g sit hok-khı̀.
12. A-tong siū hoa̍t tio̍h kan-khó͘,
Thoa-boâ chiah thang pá pak-tó͘,
Hā-oa siū hoa̍t kan-khó͘ siⁿ,
Liân-lūi āu-tāi lóng án-ni.
13. Sí-chó͘ ge̍k-bēng lı̄ Siōng-tè,
Āu-tāi toà choē lâi chhut sı̀,
Kiâⁿ pháiⁿ pài pu̍t pài bo̍k-chú,
Lóng tio̍h tı̂m-lûn lo̍h im-hú.
14. Sèng Pē Siōng mt3e si toā-un,
Ài kiù chèng-lâng bián tı̂m-lûn,
Chhe khián Sèng-kiáⁿ lâi kiù-sè,
Kā lâng koé hoé kui Thiⁿ-pē.
15. Sèng-kiáⁿ Iâ-so͘ kiù-sè Chú,
Tâu-thai Iû-thài chāi-sek-lú,
Thè lâng kiâⁿ gı̄ siú hoat-tō͘,
Thè lâng siū sí khui oa̍h-lō͘.
16. Thoân-tō i-pı̄ⁿ koáⁿ-tio̍k kúi,
Piàn piáⁿ hoa̍h hong kiâⁿ hái-chúi,
Koh oa̍h sí-lâng kiâⁿ kı̂-sū,
Hián-bêng I sı̄ kiù-sè Chú.
17.Iû-thài sin-sū bô in-toaⁿ,
Ká-bû Chú hoán lia̍h sàng koaⁿ,
Kiau-so chèng-lâng lóng sáⁿ-tè,
Kiông-kiû tèng Chú sı̍p-jı̄-kè.
18. Pháiⁿ-lâng siat-kè hāi Kiù-chú,
Tú chiâⁿ Siōng-tè kiù lâng sū,
Lán lâng tùi Chú kan-khó͘ sí,
Hō͘ siâ khún-pa̍k thang thoat-lı̄.
19.Iâ-so͘ sí-liáu tâi lo̍h bōng,
Saⁿ-jı̍t koh-oa̍h chhut chio̍h-tōng,
Koh-oa̍h siap-jı̍t tiàm toē-bı̄n,
Kà-sı̄ ha̍k msèng kian-kò͘ sı̀n.
20.Āu-lâi chē hûn koh chiūⁿ-thiⁿ,
Gō͘-pah goā lâng tâng khoàⁿ-kı̀ⁿ,
Thiⁿ-téng chhut-siaⁿ pò in chai,
Boa̍t-jı̍t Kiù-chú beh koh-lâi.
21.Hit-sı̂ thiⁿ, toē, lâng, piàn-oāⁿ,
Sí ê koh-oa̍h siū sím-phoàⁿ,
Hó chiūⁿ thian-tông hióng hok-khı̀,
Pháiⁿ lo̍h tē-ge̍k éng-oán sí.
22.Taⁿ khǹg chèng-lâng hoán-hoé choē,
Pài pu̍t pháiⁿ-tāi lóng tio̍h koé,
Bô lia̍h koé-pháiⁿ choè kan-lân,
Khún-kiû Sèng-sı̂n I oē chān.
23.Sı̀n-khò Iâ-so͘ chiū tit kiù,
Kèng-pài Siōng-tè ū pı̀-iū,
Sui-jiân tiàm tı̄ chit sè-kan,
Sin-khu kan-khó͘ sim pêng-an.
24.Chá àm poah-kang tha̍k Sèng-keng,
M̄-thang the-sı̂ kóng bô êng,
Sèng-keng lı̄-ek put-chí toā,
Ká lâng o̍h hó tit éng-oa̍h .
25.La̍k-jı̍t khûn-kín sè-kan sū,
Chhit-jı̍t an-hioh chiàu kui-kú,
Gı̂m-si lé-pài thiaⁿ tō-lí,
Boē bêng tio̍h kiû Chú chí-sı̄ .
26.Ta̍k-hāng tāi-chı̀ lóng thang kiû,
Ha̍p Chú chí-ı̀ oē sêng-chiū,
Siōng-tè un-tián sı̄ piān-piān,
Chhim-sı̀n chiū oē khoàⁿ hiān-hiān .
27.Siōng-tè nā thiaⁿ lán kı̂-tó,
Hō͘ lán ē tit ta̍k-hāng hó,
Tio̍h pò lâng chai lâi chhin-kūn,
Hián-bêng lán sim ū kám-un.
28.Hoān ū thiaⁿ-kı̀ⁿ ê tō-lí,
Tú-tio̍h pêng-iú tio̍h kóng-khí,
Pún-sin kiâⁿ hó chò bô͘-iūⁿ,
Chhin-chhiūⁿ kng-teng chiò lō͘-chiūⁿ.
29.Ín-chhoā chhin-pêng kàu pài-tn̂g,
Hō͘ in chai Chú kong-lô chn̂g,
Saⁿ-kap ho̍k-sāi chin Siōng-tè,
Kiam thiàⁿ sè-kan chèng tāi-ke .
30.Nā án-ni kiâⁿ Chú hoaⁿ-hí,
Bián kiaⁿ chhiò mē ū hok-khı̀,
Kè-óng liáu-āu oē chiūⁿ thiⁿ,
Êng-kng chun-kùi bān-bān nı̂.
(Tâi-oân Hú-siâⁿ Kàu-hoē-pò tē 154 koàn, 1898 nı̂ 1 ge̍h)