Sim-sim Liām-liām

(Chit phiⁿ bô-lūn toā-lâng, gín-ná lâi khoàⁿ lóng ē bêng). Bat ū chı̍t pái tı̄ bó͘ só͘-chāi, ū chı̍t ê Lú-o̍h ha̍k-seng kap i chı̍t ê sió-tı̄, nn̄g ê sio-chhoā chhut-mn̂g; chē hoé-chhia khı̀ kàu Pı̂n-tong ê só͘-chāi chhoē i ê chhong-iú thit-thô. Hit-jı̍t in kàu Pı̂n-tong tú-tú 3 tiám poàⁿ, iā hit ê ha̍k-seng ê chhong-iú ū lâi kàu chhia-thâu tán-chih in; tāi-ke kı̀ⁿ bı̄n chin hoaⁿ-hí, saⁿ-kap kóng-oē; chiū chhoā in kàu i ê chhù. Hit-àm chiū pān chheⁿ-chhau chhiáⁿ in. Chia̍h-pá liáu thêng tiap-á-kú, in chiū chhut-khı̀ mn̂g-kháu-tiâⁿ hioh-khùn; ū-sı̂ chē--teh, ū-sı̂ khí-lâi; kiâⁿ-lâi kiâⁿ-khı̀, kóng-tang kóng-sai kóng chin kú, sı̄ in-ūi thài-kú hán-tit sio-tú; iū-koh hioh-joa̍h ê sı̂-kan í-keng beh koè, tāi-ke saⁿ-chhoē chē; hiám-hiám chiū bô thang saⁿ-thàm ê ki-hoē, só͘-í tāi-ke tâm-oē chin-chē; kàu chin àm chiah bô koh hoē; tāi-ke hoaⁿ-hí kàu-ke̍k, lóng-chóng chin sim-sek. Í-keng 9 tiàm poàⁿ lah, i ê chhong-iú chiū-sı̄ tiàm tı̄ Pı̂n-tong hit ê, miâ-kiò Gio̍k-ki; chiū kā lâi chhoē i hit ê tâng-phoāⁿ, miâ-kiò Siù-jiông kóng,“Siù-jiông sàng, taⁿ lán lâi lé-pài thang khùn lah hòⁿ, lí to káⁿ chin siān leh?”Siù-jiông chiū kóng,“Bē ko̍h, goá ta̍k-jı̍t sim-sim liām-liām, ài lâi chhoē lí thit-thô, taⁿ kin-á-jı̍t ū hó ki-hoē, goá khah kóng mā bē siān; sı̄ í-keng chin àm lah, bô lán kiám m̄-sı̄ ài koh kóng khah kú leh?”Āu--lâi Siù-jiông kap in sió-tı̄ miâ-kiò Bûn-hiông, chiū kap Gio̍k-ki í-kı̍p in ke-lāi ê lâng saⁿ-kap chò lé-pài. In teh lé-pài, tha̍k Sèng-chheh lûn-liû tha̍k, chı̍t lâng tha̍k chı̍t chat; Siù-jiông ê sió-tı̄ Bûn-hiông iā kap lâng lûn-lâi lûn-khı̀. Gio̍k-ki ê lāu-bú khoàⁿ-kı̀ⁿ Siù-jiông ê sió-tı̄ iáu hiah-nı̍h sè-hàn liâm-piⁿ hiah gâu tha̍k Sèng-keng, siūⁿ-liáu chin kı̂-koài; kàu lé-pài soah chiū kiò i lâi, mn̄g khoàⁿ i kúi hoè, chiah chai-iáⁿ sı̄ 12 hoè. Bûn-hiông sı̄ bó͘ kàu-hoē ê Chú-jı̍t-o̍h ha̍k-seng, 5 hoè ê sı̂ chiū o̍h jı̄-bó, 7 hoè chiū ē hiáu tha̍k si, 10 hoè ê sı̂ chiū í-keng chin gâu tha̍k Sèng-keng, chin gâu gı̂m-si; ta̍k-nı̂ ê Kiù-chú-tàn lóng ū the̍h siúⁿ-phín, kū-nı̂ ū siū-siúⁿ chı̍t-pún kim-kı̂ⁿ ê Sin-iok Sèng-chheh; i ta̍k lé-pài lóng chiâu chhut-se̍k, só͘-í chiah hiah khoài chı̀n-pō͘; taⁿ í-keng sı̄ ko-téng-kho ê ha̍k-seng lah; iā chím-á múi lé-pài m̄-nā hù Chú-jı̍t-o̍h, iā ū kap toā-lâng chò-hoé lé-pài; gı̂m-si, thiaⁿ tō-lí, chin hoaⁿ-hí; ta̍k lé-pài kiâⁿ hn̄g-lō͘ bô hiâm ià-siān, ài kàu Siōng-tè ê sèng-tiān, khiam-pi sêng-siū kà-sı̄, thiaⁿ tō-lí chin chhù-bı̄, sim-koaⁿ chin kám-kek, sı̍t-chāi ū hō͘ i tit-tio̍h chin toā ê lı̄-ek. Gio̍k-ki ê lāu-bó chiū tùi i ê a-ché kóng, “Lí ê sió-tı̄ sı̍t-chāi chin khiáu, chin khó-chhú, lóng sı̄ tùi lí chin gâu kà-sı̄.” Siù-jiông kóng,“Bô-iáⁿ ah, pí I khah ē hiáu--ê mā sı̄ chin-chē leh!”Gio̍k-ki ê lāu-bó chiū koh kóng,“Sı̍t-chāi chin gâu, án-ni to sǹg sı̄ chin kám-sim lah!”Āu--lâi kóng soah, in tāi-ke chiū lóng khı̀ khùn. Keh jı̍t chiū-sı̄ pài-saⁿ, in chia̍h chá-tǹg liáu; Gio̍k-ki chiū chhoā i ê chhong-iú kap in sió-tı̄ khı̀ khoàⁿ chè-thn̂g hoē-siā, hui-hêng-ki-tiûⁿ hiah ê bêng-só͘. Ē-po͘ ū hioh-khùn, iā 5 tiám poàⁿ chiū chia̍h ê-hng-tǹg, in-ūi joa̍h-thiⁿ sı̂, só͘-í jı̍t-thâu iáu-boē lo̍h-soaⁿ; kàu 6 tiám in chiū sio-chhoā beh khı̀ kong-hn̂g sàn-pō͘; iā in pêng-siông lóng chin ài tâm-lūn Sèng-keng-lāi ê kò͘-sū, í-kı̍p lâ-so͘ ê kà-sı̄; só͘-í in tùi kong-hn̂g chhut-lâi ê sı̂, chiū tı̍t-tı̍t kiâⁿ tùi lông-tiûⁿ hit hong-bı̄n khı̀; sı̀-bı̄n ū chhân-hn̂g chháu-ba̍k chin-súi, iā liâng-hong bı̂-bı̂-á lâi chin chhio-chhı̀n; in ná kiâⁿ chiū ná tâm-oē, taⁿ chiong in só͘ tâm-lūn ê kı̀ tı̄ ē-té: Gio̍k-ki,“Siù-jiông sàng, lí khoàⁿ goán ê pài-tn̂g hiah toā keng hiah súi leh; lán tùi chiah hn̄g ê só͘-chāi iā iáu-kú khoàⁿ ē tio̍h, lí khoàⁿ hit ê thah hiah koân leh; téng-bı̄n ū chı̍t ki Sı̍p-jı̄-kè, sı̍t-chāi kiám m̄-sı̄ chin chong-giâm ê hoē-tn̂g mah?” Siù-jiông,“Ū-iáⁿ to tio̍h, sı̍t-chāi khí-liáu chin hó khoàⁿ chin súi, bô-lūn sím-mı̍h goā-ūi ê lâng tùi chia lâi, khoàⁿ-liáu liâm-piⁿ ē chai hit-keng chiū-sı̄ pài-tn̂g; ē hō͘ sı̀n Chú ê lâng ê sim chin him-bō͘ ı̀-ài, sim-sim liām-liām ài jı̍p-khı̀ khoàⁿ; iā tı̄ hia gı̂m-si, kı̂-tó, kám-siā Siōng-tè, lâi hióng-siū bû hān ê hok-khı̀.” Gio̍k-ki,“Lí ē kı̀-tit lán tı̄ Lú-o̍h. Lô͘ Ko͘-niû bat kóng, in hit pêng ê pài-tn̂g khí-liáu chin chhoàng, chin hó-khoàⁿ, kap pa̍t khoán ê chhù lóng ū hun-pia̍t; hō͘ lâng tùi chin hn̄g ê só͘-chāi lóng khoàⁿ ē tio̍h, iā ū toā-cheng hông-hun-àm ê sı̂ nā kòng-cheng, hit ê siaⁿ thiaⁿ kàu chin hn̄g, hō͘ lâng ê sim-koaⁿ khui, ı̀-hiòng tùi hia khı̀; lí khoàⁿ goán ê pài-tn̂g mā sı̄ iû-goân ū toā-cheng, nā hông-hun-àm goá chhut-lâi sàn-pō͘ thiaⁿ liáu sim-koaⁿ chò chı̍t-ē khui; ài koáⁿ-kín khı̀ hù kı̂-tó-hoē.” Siù-jiông,“Lán tı̄ Lú-o̍h beh àm ê sı̂, lán chhut-khı̀ chháu-po͘ kiâⁿ-iû, mā ū thiaⁿ-kı̀ⁿ Sı̂n Ha̍k-hāu ê toā-cheng teh kòng, khong, khong, khong...... sı̍t-chāi thiaⁿ-liáu hō͘ lâng ē kái sim-būn; chai-iáⁿ sı̂-kan í-keng beh kàu, chiū-sı̄ hō͘ lán thang khı̀ Siōng-tè ê hoē-tn̂g, tı̄ hia hióng-siū, kı̂-kiû, kám-siā ê hok-khı̀.” Gio̍k-ki,“Sı̍t-chāi hō͘ lán ê sim chin him-bō͘ hò͘ⁿ; lán tı̄ Lú-o̍h tô͘-oē ê sı̂-kan, sian-siⁿ ū the̍h chit tiuⁿ goā-kok ê ang-á-tô͘, chiū-sı̄ oē nn̄g ê ang-á-bó͘ tı̄ hn̂g--nı̍h teh chò-kang; kàu beh àm, hut-jiân thiaⁿ-tio̍h kàu hoē ê toā-cheng teh kòng, in nn̄g lâng chiū pàng-kang siang-chhiú ha̍p-oá, thâu-khak chhih-chhih ǹg tùi kàu-hoē tn̂g hit bı̄n teh kı̂-tó hò͘ⁿ; sı̍t-chāi lán teh oē hit tiuⁿ tô͘ ê sı̂, lán ê sim kiám m̄-sı̄ chin siū kám-kek mah?” Siù-jiông,“Sı̍t-chāi ū-iáⁿ to tio̍h, hō͘ lán ê sim chin him-bō͘, sim-sim liām-liām ài kàu Siōng-tè ê chhù.”In teh kóng ê sı̂ hut-jiân Pı̂n-tong kàu-hoē ê cheng teh kòng, khong, khong, khong; Gio̍k-ki, hò͘ⁿ,“Siù-jiông sàng, lí ū thiaⁿ-kı̀ⁿ bô?”Siù-jiông,“Hò͘--ah! Chin hó-thiaⁿ ê siaⁿ ū-iáⁿ, kin-á-jı̍t sı̄ pài-saⁿ, só͘-í lán tio̍h kín-mé tò-tńg lâi-khı̀ hù kı̂-tó-hoē.”Gio̍k-ki,“Taⁿ bô lán koáⁿ-kín tńg-lâi-khı̀ koh.” Só͘-í in chiū kín-mé tò-khı̀ the̍h Sèng si, Sèng-chheh khı̀ hù Pı̂n-tong kàu-hoē ê kı̂-tó-hoē. In nn̄g, saⁿ lâng hit àm khı̀ hù kı̂-tó-hoē, sı̍t-chāi hō͘ in ê sim chin hoaⁿ-hí; m̄-nā chhong-iú ê chhù tāi-ke saⁿ-thàm, koh-khah iàu-kín in ū chin him-bō͘ ài kàu Siōng-tè ê chhù, kap hiaⁿ-tı̄ chí-moē saⁿ kau-poê, ná chhin-chhiūⁿ chı̍t ke ê lâng; sı̍t-chāi in ê sim chin jia̍t, kàu-ke̍k hoaⁿ-hí ê khoán. Kàu lé-pài-jı̍t ê sı̂, Gio̍k-ki ū chhoā i ê chhong-iú kap in sió-tı̄ khı̀ lé-pài, in chin chá chiū khı̀, sı̄ ài thàm-khoàⁿ Chú-jı̍t-o̍h ê chōng-hóng sím-mı̍h khoán; in-ūi in nn̄g lâng tı̄ Lú-o̍h ê sı̂ ta̍k lé-pài lóng ū teh pang-chān Chú-jı̍t-o̍h ê kang; hioh-khùn tńg-khı̀ in chhù ê sı̂, iā ū tàu pang-chān Chú-jı̍t-o̍h; só͘-í in tùi sè-hàn gín-ná chám-jiân ū chhù-bı̄ ê khoán. Só͘-í Gio̍k-ki ū chhoā i ê chhong-iú Siù-jiông, khı̀ khoàⁿ Pı̂n-tong kàu-hoē ê Chú-jı̍t-o̍h, iā ū chiong i hioh-joa̍h-tiong teh kà hit pan hō͘ i kà; Siù-jiông bô the-sı̂ hoaⁿ-hí kà, bô koh-iūⁿ i pêng-siông só͘ teh kà ê khoán, kap ha̍k-seng chin hó kóng-oē; iā chin gâu kóng kò͘-sū hō͘ in thiaⁿ; só͘-í hiah ê ha̍k-seng kàu soah ê sı̂, tı̄ piⁿ-á tāi-ke teh hoē kóng,“Chit ê sian-siⁿ tùi tá-lo̍h lâi, hé chin gâu kóng--ah, goán chin ài thiaⁿ; beh oē thang ta̍k lé-pài lâi chò goán ê sian-siⁿ kiám m̄-sı̄ chin hó.” Āu--lâi Chú-jı̍t-o̍h soah, in chiū chhoā khı̀ hù toā-lâng ê lé-pài, hit-jı̍t chin hoaⁿ-hí, tńg-khı̀ ná chhin-chhiūⁿ ū bē kóng--tit ê hoaⁿ-hí kap kám-kek tı̄ in ê sim-lāi ê khoán. Keh chá-khí chiū-sı̄ pài-it, Siù-jiông kap i ê sió-tı̄ Bûn-hiông chiū kap i ê chhong-iú Gio̍k-ki saⁿ-sı̂ tò-khı̀ in ê pún só͘-chāi; ǹg-bāng koh bô loā-kú in beh koh tı̄ Lú-o̍h lâi chò-hoé, chiū án-ni tāi-ke chiām-sı̂ lı̄-pia̍t. Lia̍t-ūi hiaⁿ-tı̄ chí-bē, í-kı̍p chèng Chú-jı̍t-o̍h ê ha̍k-seng, lán kiám m̄-sı̄ chin ài khoàⁿ chit nn̄g, saⁿ lâng ê bô͘-iūⁿ; hoaⁿ-hí put-sı̂ sim-sim liām-liām ài kàu Siōng-tè ê chhù mah? Lán chai lán lâng ê sim-sı̂n, jio̍k-thé, put-sı̂ lóng ū khiàm-khoeh, só͘-í lán ê sim nā chin khiam-pi, chhin-chhiūⁿ sim-lāi chin sàn-hiong ài him-bō͘ Siōng-tè ê gı̄; ài thiaⁿ Bo̍k-su, Thoân-tō-su chhián-bêng Siōng-tè ê tō-lí, iúⁿ-chhı̄ lán sim-sı̂n ê bí-niû tit-tio̍h chiâu-pı̄; kı̂-kiû, kám-siā, gı̂m-si, lán ê sim kiám bô chin hoaⁿ-hí; hióng-siū Siōng-tè só͘ siúⁿ-sù ê bû-hān ê hok-khı̀ mah? Iâ-so͘ tı̄ sè-kan, tú-chiah 12 hoè ê sı̂, kap i ê pē-bú siōng Ia-lō͘-sat-léng siú-poâⁿ koè-chiat; tı̄ tiān-nı̍h tùi i ê pē-bú kóng: “Kiám m̄-chai goá eng-kai tı̄ goá ê pē ê chhù mah?” (Lō͘-ka 2:49). Koh chı̍t-pái, Iâ-so͘ iû-goân kàu Ia-lō͘-sat-léng, jı̍p tiān, koán chhut tiān-lāi bé-bē ê lâng, chhia-tó in só͘ ēng bé-bē ê khı̀-kū, lâi chheng-khı̀ sèng-tiān ê sı̂, iā bat kóng: “Kiám bô kı̀-chāi kóng, goá ê chhù beh chheng chò bān-bang kı̂-tó ê chhù mah?” (Má-khó 11:17) (Tâi-oân Kàu-hoē-pò tē 517 koàn, 1928 nı̂ 4 ge̍h)