So͘ Io̍k-châi Bo̍k-su ê Sió-toān

 So͘ Io̍k-châi Bo̍k-su, jú-miâ Seng, thó͘-miâ pún-chng ê lâng kiò i Khok-è. Bêng-tı̄ 16 nı̂ 7 goe̍h 20 jı̍t, chhut-sı̀ tı̄ Chiang-hoà chhı̄ ê tang-pêng, iok phò͘-jı̄ lō͘ ê Khoài-koaⁿ. Pē-bó chá koè-sı̀, i ê hiaⁿ So͘ Sam--sı̄ chin láu-sı̍t ê lông-hu. In hiaⁿ-tı̄ ê sèng-chêng kú-tōng, ū thiⁿ choa̍h tē ê cheng-chha. 
 So͘ kun ūi-tio̍h bô sı̄-toā-lâng ê iok-sok, seⁿ-sêng sı̄ ióng-kám hò͘-chiàn ê sèng-chit. Kàu cha̍p-gō͘ la̍k hoè ê sı̂, chı̍t toā kûn ê chheng-liân, So͘ kun chiū chò tóng-siú, hoah phah chiū phah. Chng-tiong ê lâng kiaⁿ i ná kiaⁿ hó͘, lâng chiū kóng, “Khok-è nā bô phah-sí lâng, ún-tàng ē hō͘ lâng phah--sí.” 
 Hia ū jia̍t-sim ê sı̀n-tô͘ Pún hiaⁿ kap Pin hiaⁿ, thiaⁿ-tio̍h lâng teh gı̄-lūn i, koh khoàⁿ-tio̍h i ô kú-tōng, ūi-tio̍h i chhim-chhim hoân-ló. Chiū chı̄n chò Ki-tok-tô͘ ê pún-hūn, ke̍k-le̍k bián-lē i tio̍h thiaⁿ tō-lí, chiong-lâi chiàⁿ ū hó kiat-kó. Hit-nı̂ So͘ kun tú 17 hoè, hoaⁿ-hí kap in khı̀ lé-pài, o̍h pe̍h-oē-jı̄, bô kú Sèng-keng ē hiáu tha̍k. Chit pái the̍h Sèng-keng khı̀ tiàm-á tha̍k, chı̍t kûn lâng cháu lâi khoàⁿ, “hé, Khok-è chin gâu, ē hiáu tha̍k tāu-chhài-gê,” tha̍k kàu chı̍t kù “A-pa Pē-ah !” Chı̍t lâng ı̀n kóng, “Oê-ē.” So͘ kun it-sı̂ hoat-sèng khí-chhiú phah chı̍t-ē, hit lâng tó tı̄ tē-nih. 
 Khó-sioh i thiaⁿ tō-lí bô loā kú, ūi-tio̍h khoân-kéng ê koan-hē, hō͘ pêng-iú chio khı̀ chhut-goā bô͘ seng-oa̍h, iā bat khı̀ tı̄ Kheng-thih hoē-siā hōng-chit. Chit sı̂ i iā sı̄ chò tóng-siú, hoa-liú ê sū i bô hèng, sio-phah ū chhù-bı̄. Léng-sim soà m̄-bat lé-pài, kū-sèng koh hoat-seng, āu-lâi koh tńg-khı̀ pún-hiong. Pún hiaⁿ ke̍k-le̍k bián-lē i, tio̍h koh kiâⁿ thiⁿ-lō͘ khah ū hok-khı̀, i iā sêng-jı̄n pài Siōng-tè ê seng-oa̍h siāng hó. Koat-sim koh kiâⁿ thiⁿ-lō͘, chit-sı̂ thài-tō͘ toā piàn chiâⁿ-chò sin ê lâng, iā siūⁿ chiong-lâi ài chò Chú ê kang. Kàu 20 hoè ê sı̂, thiaⁿ-tio̍h Ka-tang kheⁿ-kháu kàu-hoē ū siat Sió-o̍h, chiū khoán hêng-lí lâi hia tha̍k Sió-o̍h. Hit-sı̂ N̂g Hiàn-chiong Sian-seⁿ tı̄-hia chò thoân-tō kiam kà Sió-o̍h. So͘ kun chin chhut-la̍t bián-kióng, o̍h soàn-su̍t, tha̍k Hàn-bûn. Kàu kū-le̍k ê nı̂-té, soàⁿ o̍h, koaⁿ-thiaⁿ m̄-chún, Sió-o̍h sin-nı̂ bē thang koh khui. So͘ kun chiū khı̀ chhoē Mûi Bo̍k-su, Lân I-seng, Ha̍k-kiong Sian-seⁿ, kóng i ài jı̍p Toā-o̍h, ài chò Chú ê kang, in tāi-ke hoaⁿ-hí chhui-chiàn. Tit-tio̍h Kàu-sū-hoē èng-ún, chiū jı̍p Toā-o̍h tha̍k-chheh. Hit-sı̂ sin jı̍p seng chin chē, So͘ kun siāng bô sı̍t-le̍k. Goân-lâi i sı̄ ū châi-tiāu ê lâng, koh bián-kióng, chhı̀-giām ê sêng-chek chin hó, siông-siông iâⁿ-koè ū keng-iû Tiong-ha̍k ê pêng-iú. 
 Bêng-tı̄ 41 nı̂ sin-le̍k chiaⁿ goe̍h, tùi Sı̂n-ha̍k-hāu chut-gia̍p, iā sûi-sı̂ kap Tâi-lâm chhı̄ N̂g--sı̄ Ia̍t lú-sū kiat-hun. N̂g lú-sū sı̄ ū ha̍k-le̍k, ū châi-tiāu, jia̍t-sim, kut-la̍t, tùi lāi, tùi goā lóng oân-boán, sèng-chêng un-sûn, So͘ kun tı̄ kàu-kài ê sêng-kong, sı̍t-chāi tit-tio̍h hiân loē-chō͘. 
 I só͘ toà ê kàu-hoē, chiū-sı̄ Lí-hı̂-thâm, Toā-siā, Hong-goân, Toā-tō͘, Pı̂n-tong, Lo̍k-káng, Chheng-chúi, Chiang-hoà, Moâ-tāu. Tāi-chèng 9 nı̂, siū Chiang-hoà pún kàu-hoē, ke̍k-le̍k phèng-chhiáⁿ chò Bo̍k-su, saⁿ nı̂ jı̄m-moá chiū sı̂-chit, khı̀ toà Moâ-tāu kàu-hoē chı̍t nı̂ kú. 
 Tāi-chèng 13 nı̂, Pı̂n-tong tông-hoē phèng-chhiáⁿ i chò Pı̂n-tong tông-hoē ê Bo̍k-su, kiōng toà 12 nı̂ kú. In-ūi ū siong-tong ê jı̂n-bu̍t Khó͘ Iú-châi kun, thang chiap i ê jı̄m, i chiū jiōng-hiân sı̂-chit. 
 Chiau-hô 11 nı̂ jı̄m Ko Tiong bêng-ū Bo̍k-su. Kàu kin-nı̂ sin-thé soe-jio̍k, chiū sı̂ bêng-ū Bo̍k-su ê chit, ǹg-bāng tı̄ ka-têng chēng-ióng, hō͘ sin-thé khah ióng-kiāⁿ, bô phah-sǹg chiàn bé bô pháu tian-tò m̄-hó. 
 Pún-nı̂ 7 goe̍h 16 jı̍t, ngó͘-hō͘ 11 tiám 15 hun, an-jiân kap sè-kan soah, khı̀ Thiⁿ-pē tau, hióng-siū 57 hoè. Hok-khı̀ ah ! 
 Lâu So͘ Bo̍k-su-niû, lēng-lông Chín-hui kun, kap 5 ê chhian-kim, kan-ta siāng soah boé ê cha-bó͘-kiáⁿ boē chhut-kè, lāi-goā sun sêng-kûn, i ê jı̂n-sū í-keng chı̄n lah ! 
 Kı̀ kúi hāng lâi siàu-liām i. 
 1. I sı̄ hiông-piān-ka. I tha̍k-chheh keng-iû chiàⁿ ū 5 nı̂ kú, lūn ha̍k-būn sı̄ pêng-siông, chóng-sı̄ i ê kháu-châi chin iu-siù. Pò͘-tō thèng-chiòng bô-lūn kúi pah lâng, i chı̍t-ē kóng, tāi-ke chēng-chēng teh thiaⁿ. Tı̄ pài-tn̂g ê soat-kàu, oē chin tāng, kám-tōng chin toā, ē hō͘ lâng lâu ba̍k-sái, kiaⁿ-hiâⁿ, hoán-hoé. Kap hoē-goā ê lâng thó-lūn chong-kàu ê būn-tê, i iā sı̄ khiā tı̄ iu-sèng ê tē-ūi, sı̄ Lâm-pō͘ thoân-kàu-chiá it-liû ê hiông-piān-ka. 
 2. I sı̄ ū siông-sek ióng-kám--ê. Boē sı̀n Chú ê í-chêng, i sı̄ ióng-kám phah lâng, sı̀n Chú ê í-āu, sı̄ ióng-kám pó-hō͘ kàu-hoē, ióng-kám chò Chú ê kang, pa̍t-lâng kiaⁿ-hiâⁿ m̄-káⁿ chò, i sı̄ chı̀n-chêng khı̀ chò. I ê siông-sek chin hong-hù, jı̄n-sek chin thàu. Kàu-hoē sū, ka-têng sū, châi-sán sū, oan-ke sū, chhin-sū, nā ū hùi-khı̀ ê só͘-chāi, chhiáⁿ i kàu, thiaⁿ siang-hong ê oē liáu-āu, pó͘-thâu kia̍h-khí phoà lo̍h-khı̀, bān-sū to kái-koat. “Bē lâi, chhoē So͘ Io̍k-châi”, sı̍t-chāi bô chhò. I kúi-nā hoê chò Lâm-pō͘ Tiong-hoē ê Gı̄-tiúⁿ, chò Ko Tiong ê Gı̄-tiúⁿ, pān-sū chin bín-chia̍t, tiâu-tiâu iú toāⁿ, hō͘ gı̄-tiûⁿ an-chēng, i sı̄ ū thóng-chè ê tiâu-kiāⁿ. 
 3. I sı̄ chı̄n-tiong ê kang-jı̂n. I chò Chú ê kang 33 nı̂ kú, ū niá siā-kim, á bô niá siā-kim, i sı̄ it-koàn chı̄n-tiong, bô-lūn koâⁿ, joa̍h, hong, hō͘, hn̄g, kı̄n, pêⁿ, kiā, jı̍t, mê, ióng-kiāⁿ, á lám sin-miā, i sı̄ bô the-sı̂ chı̀n-chêng teh chò. I ê sin-thé hiah lám, tài kúi-nā hāng pēⁿ, iā thoa-pēⁿ teh chò kang, káⁿ sı̄ ài o̍h Pó-lô ê khoán, chı̄n-tiong kàu-sí. Toā ǹg-bāng i ê chú-lú, ē kè-sio̍k lāu-pē ê sı̀n-gióng, chı̄n-la̍t oān-chō͘ kàu-hoē. I ū ûi-chiok ài hoé-chòng, 7 goe̍h 24 jı̍t, ē-po͘ 3 tiám, tı̄-chiang-hoà pài-tn̂g kú-hêng giâm-siok ê kò-pia̍t-sek, ta̍k hong-biān ê lâng to ū lâi hoē-chòng, toā-keng ê pài-tn̂g chē kàu bô ūi, chin sēng-hóng. 

(Tâi-oân Kàu-hoē Kong-pò tē 655 hō, 1939 nı̂ 10 goe̍h)