Tâi-oân-lâng kap chı̂ⁿ

Tâi-oân-lâng ê chhùi-kháu sı̂-siông koà chit-kù oē: “Tâi-oân ê chia̍h, siāng hong-hù.” Ēng án-ni chò moá-chiok, che hián-sı̄ chhut Tâi-oân-lâng ê chân-chhù goā-nı̄-á kē. Tâi-oân-lâng ê chhùi-lāi sı̂-siông khǹg lēng-goā chı̍t-kù oē: “Chı̂ⁿ siōng-hó.” Hián-sı̄ chhut Tâi-oân-lâng bô chhim-khek thé-giām tio̍h sè-kan kı̂-tha koh khah bí-hó ê hí-lo̍k. Khó-liân. “Lâng ài ū it-ki-chi-tióng” Tâi-oân-lâng án-ni kóng, tāi-pō͘-hūn iā-sı̄ khiā tı̄ bu̍t-chit ê chân-bı̄n lâi kóng chit-kù oē, lâi khoàⁿ jı̂n-seng. Chit-toāⁿ sı̂-kan, Tâi-oân lâng-lâng lóng teh hoah, “Ài piàⁿ chiah ē iâⁿ.” Khó-sioh, chin-chió lâng mn̄g, “Piàⁿ sím-mı̍h?” Tâi-oân-lâng só͘ piàⁿ, bû-kò sı̄ chı̂ⁿ, miâ-siaⁿ, tē-ūi. Án-ni, tong-jiân sı̄: Tâi-oân-lâng piàⁿ, kok-bı̂n-tóng iâⁿ. Tâi-oân-lâng piàⁿ, Sat-tàn iâⁿ. Tâi-oân-lâng piàⁿ, pı̄ⁿ-mô͘ iâⁿ...... Ham-bān thàn-chı̂ⁿ, m̄-bián koè-thâu kut-la̍t. Seng-oa̍h ê ki-pún su-iàu tit-tio̍h boán-chiok liáu-āu (kàu sím-mı̍h thêng-tō͘ kiò-choè ki-pún su-iàu tit-tio̍h boán-chiok, tı̄ chia bô beh thó-lūn), lú ham-bān thàn-chı̂ⁿ ê lâng, lú m̄-thang koè-thâu phah-piàⁿ thàn-chı̂ⁿ. Hiah-ê gâu-thàn--ê, chhı̀n-chhái liòng--chı̍t-ē, tō thàn hiah-nı̍h choē, lio̍h-lio̍h-á lōng-hùi sı̀ⁿ-miā khı̀ thàn-chı̂ⁿ, iáu sǹg ē-hô. Iā lán chiah-ê hām-bān thàn--ê, piàⁿ-siⁿ piàⁿ-sí, thàn m̄-chiâⁿ-chı̂ⁿ, sian sǹg mā sǹg boē-hô, lêng-khó͘ tı̄ ki-pún ê kang-chok liáu-āu, ke ēng koá sı̂-kan chò khah ū ı̀-gı̄, tùi oa̍h-miā ū lı̄-ek ê tāi-chı̀ khah hó. (Hong-hiòng Tē 11 kı̂, 1991 nı̂ 7 goe̍h)