Tâi-oân Kàu-hōe Kong-pò 780 Hō/Gián-kiù/Sèng-keng ê sìn-pîn-sèng

Sèng-keng ê sìn-pîn-sèng

(Chng Teng-chhiong)

(Chit phiⁿ tī goân-chheh tē 9 ia̍h)

In-ūi chóa-bīn ê koan-hē, góa tī-chia chí-ū té-té siá 3 hāng:

Thâu chi̍t hāng. Sèng-keng ê lâi-goân, sī chèng-bêng Sèng-keng thang sìn ê pîn-kù.

Sèng-keng Sin Kū-iok choân-pō͘ 66 pún, ū 1,189 chiuⁿ, kiōng 31,173 chat, sī 40 gōa ūi bô siâng ê lâng lâi siá ê. Tùi thâu 5 pún ngó͘-keng Mô͘-se só͘ siá, kàu Khé-sī-lio̍k Iok-hān só͘ siá, hit ê tiong-kan cheng-chha 1600 nî kú. Siōng-chhiáⁿ in ê tē-ūi, ha̍k-sek, kéng-gū lóng bô siâng, tòa ê só͘-chāi iā bô siâng. Siá ê bûn-jī ū-ê ēng Hi-pek-lâi ōe, ū-ê ēng Hi-lī-nî ōe, só͘ lūn ê sū iā bô siâng, chóng-sī in só͘ siá ê ì-sù ū it-koàn, chêng-āu ū thóng-it-sèng. Che piáu-bêng in só͘ siá chhut tī chi̍t-iū ê ì-sù. Chit ê chóng chú-pit chiū-sī lán só͘ sìn ê Siōng-tè. Tû-khì án-ni ké-soeh í-gōa, bô koh ū sím-mi̍h lí-iû thang soat-bêng i ê lâi-goân. M̄-nā in ê ì-sù chêng-āu ū it-tì, liân hiah ê múi-pún ê pâi-lia̍t ê chhù-sū iā sī hui-siông ê ha̍h, thang chai m̄-nā siá chheh ê lâng ū hō͘ Sèng Sîn kám-tōng, liân hia ê phian-chhip chhù-sū ê lâng iā sī hō͘ Siōng-tè be̍k-sī kap Sèng Sîn ín-chhōa lâi sêng-kong Sin Kū-iok choân-pún ê Sèng-keng (11 Thê-mô͘-thài 3:16, 17).

Tē-jī hāng. Sèng-keng lāi-iông pún-sin ū thang sìn ê kè-ta̍t, in-ūi

(A) Sèng-keng ka-kī kóng sī chhut tī Siōng-tè ê ōe.

Kū-iok Sèng-keng ê lāi-bīn siông-siông kì-chài kóng, "Iâ-hô-hoa án-ni kóng," "Che sī Iâ-hô-hoa kóng ê," "Iâ-hô-hoa ê ōe lîm-kàu góa," á-sī chū-chheng sī "Siōng-tè só͘ bēng-lēng lín ê ōe" (Sin 4:2), á-sī "be̍k-sī" (Í-sài-a 1:1), Kū-iok ū 2600 pái. Sin-iok chhin-chhiūⁿ Iâ-so͘ (Iok 12:49, 50, 14:10--24, 17:8), Pó-lô (I Ko 2:13, 11:23: Ka-lia̍p-thài 1:11, 12; Í-hut-só͘ 3:3--5; I Thiap 2:13), Pí-tek (II Pí 1:19--21) chheng in ê ōe sī Siōng-tè só͘ be̍k-sī ê, ū 525 pái. Iâ-so͘ bat kóng, "Thiⁿ-tōe beh hòe-bô, góa ê ōe bōe hòe-bô" (Má-thài 24:35). Iâ-so͘ I chai Sèng-keng sī Siōng-tè só͘ be̍k-sī ê, in-ūi I bat hiah ê siá ê lâng, só͘-í lán thang sìn Iâ-so͘ só͘ kóng ê ōe chò chèng-kù, Sèng-keng khak-si̍t sī Siōng-tè ê ōe.

(B) Sèng-keng chiūⁿ ū-giân ê èng-giām, chèng-bêng Sèng-keng sī Siōng-tè ê ōe.

Lūn kàu Sèng-keng ê kè-ta̍t, oân-choân kun-kù tī ū-giân ê chún-khak-siōng. Sè-kài bô chi̍t ê chong-kàu ê keng-tián káⁿ ū-giân bī-lâi tek-khak beh chiâⁿ ê sū, in kiaⁿ-liáu ū-giân nā bô èng-giām, chiū sit-lo̍h keng-tián ê kè-ta̍t kap sìn-iōng. Ū-giân ê khak-si̍t èng-giām, m̄-nā ōe chèng-bêng Sèng-keng sī Siōng-tè só͘ be̍k-sī ê, koh khah thang chèng-bêng Siōng-tè ê khak-si̍t chûn-chāi kap koân-lêng (khòaⁿ Í-sài-a 42:8:9).

Sèng-keng ū kì-chài chin chōe ū-giân, siâng sî ū kì-chài hiah ê ū-giân tī kúi-nî āu á-sī kúi cha̍p nî, kúi pah nî, kúi chheng nî āu ū khak-si̍t èng-giām. Hiah ê ū-giân ê tōa pō͘-hūn koh khah sī lūn kàu Kiù-chú Iâ-so͘ kàng-seng háu-āu, ti̍t-kàu sè-kài ê boa̍t-ji̍t. Kin-á-ji̍t it-chhè ê tāi-sè tú-tú sī chiàu Sèng-keng ê ū-giân teh chìn-hêng, ti̍t-kàu Siōng-tè kiat-sok ê ji̍t-chí lîm-kàu.

Tē-saⁿ hāng. Sèng-keng ê kám-hòa-la̍t chèng-bêng Sèng-keng sī Siōng-tè ê ōe.

Sè-kài ê it-chhè ê chong-kàu ê keng-tián, á-sī kok chióng ê hó chheh, lóng ū tām-po̍h tō-tek ê kà-sī, tī it-poaⁿ siā-hōe, á-sī hō͘ tha̍k ê lâng tit-tio̍h an-ùi, á-sī ìn-siōng, á-sī tùi tī tha̍k ê lâng ê jîn-seng ū tām-po̍h chí-tō. Chóng-sī choa̍t-tùi bōe tàng koh chhē tio̍h chi̍t pún chhin-chhiūⁿ Sèng-keng hit khoán ū hiah-nih úi-tāi ê kî-biāu kám-hòa-la̍t ê chheh. Lán khòaⁿ hiān-kim ê sè-kài bûn-bêng khai-hòa, hiah ê peh-sìⁿ khah ū tō-tek ê sim, tek-khak sī tùi tī Sèng-keng kám-hòa lâi ê. Chòe-kūn nn̄g-pah nî pò͘-tō ê mn̂g tōa khui, tī Hui-chiu ê tiong-pō͘, Thài-pêng-iûⁿ kûn-tó, iá-bân, ū-ê ōe chia̍h lâng ê só͘-chāi, tit-tio̍h hok-im ê kng chiò kàu-ui, chiū sûi-sî chiâⁿ-chòe bûn-bêng su-bûn. Hō͘ hiòng-ok ê chōe-jîn thoat-lī hiong-ok ê chōe-gia̍t, chiâⁿ-chòe kui-chèng, chiâⁿ-chòe seng-kiat, sin ê lâng ê seng-oa̍h. Chit ê hō͘ lâng oa̍h-miā piàn-hòa ê tōa lêng-le̍k, m̄-sī it-poaⁿ lóng ōe chāi, tek-to̍k chí-ū chin ê Ki-tok-tô͘ ōe tàng chòe chit ê kiàn-chèng nā-tiāⁿ.

Hi-pek-lâi 4:12 kóng, "In-ūi Siōng-tè ê tō sī oa̍h-miā ê, sī ū kong-hāu ê, pí it-chhè siang-bīn ê kiàm khah lāi, hoān-nā hûn kap sîn, kut-chat kap kut-chhé, bô m̄ chhì--ji̍p phòa-khui......" I ê khùi-la̍t si̍t-chāi chin tōa, só͘-í hiān-sî liû-hêng kàu thong sè-kài chí-ū chit pún chheh-- Sèng-keng hō͘ lâng tha̍k bōe ià. Hiān-sî í-keng ū hoan-e̍k 1118 ê gú-giân. Ūi sím-mi̍h ōe án-ni? In-ūi Sèng-keng sī Siōng-tè ê ōe, ū hō͘ lâng khak-sìn bô gî ê pîn-kù. Só͘-í lán tio̍h tha̍k, tio̍h sìn. Sèng-keng iā ka-kī ū kóng, "To̍k-to̍k Chú ê ōe éng-oán tī-teh. Chit ê ōe chiu-si só͘ thoân hō͘ lín hok-im ê ōe." (I Pí-tek 1:25).

(Oân).