Tâi-oân chhiò-oē

Giâm-lô-ông phài siáu-kúi-á khı̀ iông-kan cháu-chhoē bêng-i: “Hoān-nā mn̂g-kháu bô oan-hûn--ê chiū-sı̄ bêng-i.” Siáu-kúi-á lâi kàu iông-kan, chhoē chin-choē pı̄ⁿ-ı̄ⁿ, mn̂g-kháu lóng ū chin-choē oan-hûn. Choè-āu, i khoàⁿ-kı̀ⁿ chı̍t-keng, mn̂g-kháu kan-nā ū chı̍t-chiah oan-hûn, siáu-kúi-á chiū kóng: “Chit-ê it-tēng sı̄ bêng-i”. Āu--lâi chı̍t-ē thàm-thiaⁿ chiah chai chit-keng pı̄ⁿ-ı̄ⁿ, cha-hng chiah khai-gia̍p niā. Ū chı̍t-ê tha̍k-chheh-lâng, siang-pêng ê chhù-piⁿ sı̄ phah-thih kap phah-tâng--ê, ta̍k-jı̍t chhá kah beh sí. Tha̍k-chheh lâng chiū kā siang-pêng ê chhù-piⁿ kóng: “lín nā khéng poaⁿ khı̀ pa̍t-ūi, goá chiū pān chı̍t-toh-á chhiáⁿ--lín”. Bô goā-kú, siang-pêng ê chhù-piⁿ lóng hoaⁿ-hí tap-èng. Tha̍k-chheh lâng iā chiàu iok-tēng chhiáⁿ--in. Chē-toh ê sı̂, tha̍k-chheh lâng mn̄g khoàⁿ in beh poaⁿ khı̀ tó-ūi. In kóng, phah-thih--ê beh poaⁿ koè phah-tâng--ê chit-pêng, phah-tâng--ê beh poaⁿ koè phah-thih--ê hit-pêng. Hó-gia̍h lâng: “Goá ū-chı̂ⁿ, lí ài phô͘ goá chiah tio̍h.” Sàn-hiong lâng: “Ū-chı̂ⁿ sı̄ lín tau ê tāi-chı̀, kap goá lóng bô kan-gāi, goá ná-tio̍h phô͘ lí ?” Hó-gia̍h lâng: “Goá nā chı̂ⁿ chı̍t-poàⁿ hō͘ lí, lí kám m̄-bián tio̍h phô͘ goá ?” Sàn-hiong lâng: “Án-ni m̄-bián tio̍h phô͘ lí, lí chı̂ⁿ chı̍t-poàⁿ hō͘ goá, lán chiū pı̂ⁿ-pı̂ⁿ hó-gia̍h ah, phô͘ lí beh chhòng siáⁿ ?” Hó-gia̍h lâng: “Hó, ká-sú goá só͘-ū ê chı̂ⁿ lóng-chóng hō͘ lí, lí kám káⁿ bô phô͘ goá ?” Sàn-hiong lâng: “Chhiò phoà lâng ê chhùi, nā án-ni goá piàn hó-gia̍h, lí piàn sàn-chhiah. Tian-tò sı̄ lí tio̍h lâi phô͘ goá chiah tio̍h ......” Hó-gia̍h lâng: “Goá ū 1000 bān ê châi-sán.” Sàn-chhiah lâng: “Bô hi-hán, goá mā ū 1000 bān.” Hó-gia̍h lâng: “Mài teh pûn ke-kui ......” Sàn-chhiah lâng: “Hûiⁿ-tı̍t lí ū-chı̂ⁿ to tàng-sng m̄-bat teh ēng, kap goá bô chı̂ⁿ thang ēng m̄-sı̄ lóng kāng-khoán ?” Chı̍t-ê hoê-siūⁿ kap chı̍t-ê hū-jı̂n-lâng kāng-chē chı̍t-chiah chûn, it-tı̍t khoàⁿ hū-jı̂n-lâng. Hū-jı̂n-lâng siū-khı̀, chiū kiò lâng phah hoê-siūⁿ, hoê-siūⁿ chiū ba̍k-chiu kheh-kheh m̄-káⁿ koh khoàⁿ, bô-kú, chûn oá hoāⁿ, hū-jı̂n-lâng koh kiò lâng kā phah. Hoê-siūⁿ mn̄g kóng: “Goá ba̍k-chiu kheh-kheh, sı̄ án-choáⁿ koh leh phah goá ?” Hū-jı̂n-lâng ı̀n kóng “Lí ba̍k-chiu kheh-kheh sı̄ teh siūⁿ goá ê bí-māu.” Chı̍t-ê lâng ê kha hō͘ chı̀ⁿ siā--tio̍h, khı̀ chhoē i-seng. I-seng chiū kā chı̀ⁿ thó͘--chhut-lâi goā-kháu ê pō͘-hūn kı̀ hō͘ tn̄g. hoān-chiá mn̄g: “Tiâu tı̄ kha lāi-té--ê beh án-choáⁿ ?” I-seng ı̀n kóng: “Goá chia sı̄ goā-kho, tiâu tı̄ lāi-té--ê, lí ài chhoē lāi-kho.” (Hong-hiòng Tē 15 kı̂, 1992 nı̂ 3 goe̍h)