Té-phiⁿ siáu-soat 4 phiⁿ
Ē-BĪⁿ Ê Kò͘-SŪ SÌⁿ PUT SÌⁿ IÛ LÍ,CHONG2-SĪ M̄-THANG BÔ KÍⁿ-SĪⁿ 1. Put-sok chi-khek. Hit jı̍t goá chē tı̄ pān-kong thiaⁿ teh chéng-lí kàu-hoē su-lūi. “Pêng-an,” hut-jiân ū chı̍t ê lâng khiā tı̄ mn̂g-kháu teh kā goá chhéng-an, goá kia̍h thâu chı̍t-ē khoàⁿ, m̄-sı̄ goá ê hoē-iú, iā m̄-sı̄ goá só͘ bat ê sı̀n-tô͘, tùi chit khoán siⁿ-hūn lâng kong-lı̂m ê keng-giām, kà-sı̄ goá sui-jiân tio̍h piáu-sı̄ hoan-gêng, chóng-sı̄ iā tio̍h chûn tām-po̍h ê kài-sim, in-ūi goá í-keng hō͘ chin-choē lâng phiàn ê phiàn, láu ê láu, liáu khı̀ bû-sò͘ ê chı̂ⁿ lah, só͘-í ta̍k pái nā khoàⁿ-tio̍h chiah ê put-sok chi-khek jı̍p-lâi, boē bián tit hō͘ goá hân-sim. Chóng-sı̄ chit ūi hiaⁿ-tı̄ seng-khu chhēng se-chong, chhiú koāⁿ pá-pá ê phê-pau, tùi chit khoán chhēng-chhah kap bı̄n-iông khoàⁿ--lâi, bô thang giâu-gı̂ sı̄ chı̍t ê liû-lōng-chiá teh choè pián-sian ê lâng, te̍k pia̍t i thâu-chı̍t kù oē tùi goá kóng pêng-an, hō͘ goá ke-thiⁿ an-sim, chai-iáⁿ i sı̄ Chú-lāi ê hiaⁿ-tı̄. Goá sûi-sı̂ tùi í-á peh khí-lâi, chhut-lâi hoan-gêng i kap i ak-chhiú, chhiáⁿ i jı̍p lâi chē. “Sian-siⁿ, kùi sı̀ⁿ?” “Sió sı̀ⁿ Gô͘, miâ Pang , tiàm tı̄ Tâi-pak sio̍k S.M. kàu-hoē.” Goá chı̍t-ē thiaⁿ-kı̀ⁿ i sı̄ tùi Tâi-pak lâi, boē-bián tio̍h chı̍t kiaⁿ, koh mn̄g i kóng,“Gô͘ Sian-siⁿ ū sím-mı̍h kùi-sū, tiâu-kang chiah hn̄g lâi chhē goá?”“M̄-sı̄, goá m̄-sı̄ tiâu-kang lâi chhē lí, in-ūi goá ê chit-gia̍p sı̄ teh siu-lí hong-khı̂m, só͘-í tùi Pak-pō͘ it-tı̍t lo̍h-lâi, kàu ta̍k só͘-chāi ê kàu-hoē, teh siu-lí hong-khı̂m, kin-á-jı̍t lâi kàu chia jı̍p lâi khoàⁿ kàu-hoē ê hong-khı̂m ū thang siu-lí bô?”“Ah! chin sit-lé, pún kàu-hoē ê hong-khı̂m tú-chiah boé bô joā-kú, m̄-bián siu-lí.” “Án-ni chin hó, put-kò goá m̄-sı̄ teh siu-lí hong-khı̂m nā-tiāⁿ, kám-siā Siōng-tè, hō͘ goá chià tio̍h chit ê ki-hoē thang tı̄ ta̍k só͘-chāi ê kàu-hoē ūi Chú choè kang.”“Chin hó, chin hó! Chhin-chhiūⁿ Pó-lô chı̍t bı̄n choè pò͘-pı̂ⁿ, chı̍t bı̄n choè Chú ê kang, goān Siōng-tè chiok-hok lí chit khoán kang-chok.” “Kám-siā Chú, goá bat tı̄ goá ê kàu-hoē choè T.K.C. hoē-tiúⁿ, iā bat choè Chú-jı̍t-o̍h kàu-oân, ū sı̂ bat thoè bo̍k-su káng-tō.”I koh kóng, “Goá chhut-lâi ta̍k só͘-chāi siông-siông ū ki-hoē thang pang-chān kàu-hoē ê kang.” Gô͘ Sian-siⁿ chin oē kóng oē, bô-lūn thó-lūn Sèng-keng, á-sı̄ kàu-hoē ê chêng-hêng,sı̄m-chı̀ chin-choē bo̍k-su ê loē-iông i lóng chin chai-iáⁿ, goá chin khim-poē i ê hâng-chêng, koh-khah kám-sim i tùi Chú ê jia̍t-sim, goá bô lí-iû koh hoâi-gı̂ chit ê siⁿ-hūn-lâng. Goá ê hū-jı̂n-lâng tùi bô se̍k-sāi ê lâng-kheh, it-hiòng bín-kám koh kín-sı̄n,tng i tı̄ lāi-bı̄n siông-sè thiaⁿ goán ê tâm-lūn, iā bô oē-phāng khoàⁿ chhut i m̄-sı̄ chı̍t ê jia̍t-sim ê Ki-tok-tô͘, só͘-í iā chhut-lâi ka-jı̍p goán ê tâm-oē, sı̄m-chı̀ chún-pı̄ ké-chí lâi chiau-thāi i. 2. Sêng-sim chiap-thāi. Tng tāi-ke kóng kàu chin sim-sek ê sı̂, jı̍t-thâu chiām-chiām lo̍h-soaⁿ. Gô͘ Sian-siⁿ koh kóng, “Chin kám-siā Chú, goá múi kàu chı̍t só͘-chāi, tāi-ke sui-jiân bô se̍k-sāi,nā-sı̄ bo̍k-su, sian-siⁿ á-sı̄ hoē-iú lóng khoàⁿ goá choè chı̍t ke ê lâng; chin-chiàⁿ Chú-lāi chiū-sı̄ chhù-lāi, hō͘ goá chin toā hong-piān. Teng Sian-siⁿ, eng-àm beh kā lí chioh hioh chı̍t mı̂, m̄-chai lí chia ū só͘-chāi thang iông-ún á bô?” “Kı̀-jiân sı̄ tâng sio̍k Chú ê lâng, tong-jiân hoan-gêng.” “Kàu-hoē eng-àm ū chū-hoē bô?” I koh mn̄g.“Ū! Eng-àm sı̄ pài saⁿ, sı̄ chiu-kan lé-pài(kı̂-tó-hoē).”“Án-ni chin kám-siā Chú, nā bô khı̀-hiâm, hō͘ goá chú-lí hó bô?” “Hó! hó, lí beh choè kang chin hoan-gêng.” “Teng Sian-siⁿ lí chin hó, goá bat tı̄ chin-choē kàu-hoē thó beh chú-lí, ū sı̂ boē thang tit-tio̍h bo̍k-su ê ún-chún, in kóng káng-tâi boē-sái sûi-piān hō͘ chı̍t ê bô se̍k-sāi, koh bô Tiong-hoē ún-chún ê lâng khiā, goá khoàⁿ chia ê bo̍k-su lóng hō͘ hoat-kui pa̍k-teh, bô sı̍t-chāi thiàⁿ Chú.” Hut-jiân i ê oē hō͘ goá ê sim chha̍k chı̍t ē, goá ı̀n i kóng, “Tio̍h! tio̍h! káng-tâi boē thang sûi-piān hō͘ lâng khiā, in-ūi jı̂-pí oē nāu-chhut būn-toê lâi,” chit sı̂ goá ê sim-lāi chin mâu-tún, m̄-kú goá kı̀-jiân tah-èng i, boē thang koh siu-hoê, jı̂-chhiáⁿ khoàⁿ chit ê lâng ê sı̀n-gióng kàu-gia̍h thang hō͘ sı̀n-tô͘ o̍h, hō͘ i khiā ū sím-mı̍h chó͘-gāi? só͘-í kā i kóng, “Gô͘ Sian-siⁿ, lí oē kham-tit choè chú-lí, bô iàu-kín.” “To-siā, lí ê hó-ı̀ goá chin kám-siā, taⁿ goá tio̍h lâi chún-pı̄ chı̍t-ē.” I kā goá chioh Sèng-keng, sèng-si jı̍p-khı̀ lâng-kheh pâng teh chún-pı̄, goá tı̄ goā-bı̄n thiaⁿ i kı̂-tó chin toā siaⁿ, ūi-tio̍h eng-àm ê chú-lí, goá ê hū-jı̂n-lâng chai-iáⁿ chit ê lâng-kheh eng-àm oē tı̄ chia chia̍h-pn̄g, i iā bū sà-sà, lı̂m-sı̂ kiò goá khiâ-chhia khı̀ chhı̄-tiûⁿ boé bah, nn̄g, iân-chhiân thang lâi chhiáⁿ i. 3. Chú-chhı̂ kı̂-tó-hoē chin láu-liān. Kı̂-tó-hoē ê sı̂-kan, goá tùi chèng hoē-iú kài-siāu liáu, Gô͘ Sian-siⁿ chiū chhoā tāi-ke gı̂m-si tha̍k Sèng-keng, i ín Má-thài 24:1---24; II Ko-lı̂m-to 11: 12----15 bián-lē sı̀n-tô͘ kóng.“Tı̄ chit ê boa̍t-sè sı̂-tāi, lâng ná lâi ná pháiⁿ, só͘ choè ê ná khúi-khiat, Mô͘-kúi lóng oē chng-choè kng-bêng ê thiⁿ-sài, chhin-chhiūⁿ gı̄ ê chhe-ēng, sı̀-koè kiâⁿ teh chhē só͘ beh thun-chia̍h ê lâng, só͘-í hiaⁿ-tı̄ chí-bē, lín tio̍h kéng-séng, tio̍h kı̂-tó chiah bián jı̍p tı̄ bê-he̍k..........” Kóng soah, i ēng hui-siông pek-chhiat ê siaⁿ thoè kàu-hoē, thoè goá, kap chèng hoē-iú kı̂-tó, i ê jia̍t-chêng kám-tōng choē-choē lâng khí-lâi kı̂-tó, liân pêng-siông m̄-bat khí-lâi ê sı̀n-tô͘ iā lóng khí-lâi jı̄n-choē kı̂-tó. Che sı̄ chı̍t pái chin sêng-kong ê kı̂-tó-hoē, te̍k-pia̍t kám-tōng tio̍h Tân Tiúⁿ-ló. Kàu chū-hoē soah, Tân Tiúⁿ-ló sûi-sı̂ chhut-lâi kap i ak-chhiú, nn̄g lâng tı̍t-tı̍t hoah“kám-siā Chú, o-ló Chú.” Kàu beh khùn ê sı̂, Tân Tiúⁿ-ló khı̀ goā-bı̄n kiò tiám-sim kap ké-chí hō͘ i chia̍h; in-ūi thiⁿ-khı̀ chin joa̍h, i tiâu-kang tńg-khı̀ chhù-nih giâ i ê tiān-hong-sı̀ⁿ lâi beh hō͘ Gô͘ Sian-siⁿ khùn thang chhe, iā ūi i koà báng-tà, chiau-thāi tit bû-bı̂ put-chı̀, Tân Tiúⁿ-ló beh tńg-khı̀ ê sı̂, nn̄g lâng koh kūi tı̄ bı̂n-chhn̂g téng toā siaⁿ kı̂-tó; goá thiaⁿ-kı̀ⁿ Tân Tiúⁿ-ló ēng chin khún-chhiat ê ai-kiû tùi Siōng-tè kóng, “Nā-sı̄ Lí ê hó chí-ı̀, chhiáⁿ iông-ún Lí ê tiong-po̍k Gô͘ hiaⁿ-tı̄ tiàm tı̄ chia lâi ho̍k-heng Lí ê Sèng-hoē.” I chhiong-moá heng-hùn ê sim, toà tio̍h hoaⁿ-hí ê ba̍k-sái tńg-khı̀. 4. Goân-lâi jû-chhú. Keh chá-khí thiⁿ iáu-bē kng, goá iáu tı̄ bı̂n-chhn̂g téng tng hó-khùn. Tân Tiúⁿ-ló tio̍h-kip ê siaⁿ kiò-chhíⁿ goá, goá lia̍h chún i beh kiò goá khí-lâi saⁿ-kap kı̂-tó, bô phah-sǹg i ê bı̄n lóng piàn-sek, oē kóng boē siáⁿ liàn-tńg, tı̍t-tı̍t mn̄g.“Gô͘ Sian-siⁿ khı̀ tá-lo̍h?”“Un2-tàng tı̄ lé-pài-tn̂g teh kı̂-tó.” Goá ba̍k-chiu bâng-bâng teh ı̀n.“Bô! bô tı̄ lé-pài-tn̂g, iā bô tı̄ bı̂n-chhn̂g, goá ta̍k-ūi chhē lóng bô.” Tân Tiúⁿ-ló kóng“Bı̂n-chhn̂g lóng kim tang-tang, liân goá ê tiān-sı̀ⁿ iā bô khoàⁿ-tio̍h!”“Sím-mı̍h?” Goá thiaⁿ chı̍t-ē, ba̍k-chiu tián toā lúi khí-lâi, khùn-sı̂n lóng bô--khı̀, bô khoà chhēng-saⁿ, chiū tùi bı̂n-chhn̂g téng chông--lo̍h-lâi, Thian ah! kha-ta̍h-chhia iā bô-khı̀, lāi-bı̄n kı̀ⁿ-nā oē ēng-tit ê mı̍h lóng sàu kàu khang-khang. Goá koh cháu-jı̍p pài-tn̂g, khoàⁿ-kı̀ⁿ hit tâi sin ê hong-khı̂m ê goā-khak pak-lo̍h-lâi, goá hàiⁿ-thâu tùi Tân Tiúⁿ-ló kóng, “Hong-khı̂m ê pi-á iā hō͘ chhiú-su̍t khı̀, m̄-sı̀n goá toâⁿ hō͘ lí thiaⁿ, kó-jiân kha chı̍t-ē ta̍h-lo̍h-khı̀, chí-ū thiaⁿ-tio̍h hong ê siaⁿ hū-hū háu nā-tiāⁿ. Tân Tiúⁿ-ló kap goá lám-heng, sı̀-lúi ba̍k-chiu tùi siòng, lóng boē kóng oē, chin kú, i chiah tı̍t-tı̍t iô-thâu thó͘-khùi kóng.“Ti-jı̂n ti-bı̄n put-ti sim, goá m̄-sı̄ bô-chhái hiah ê mı̍h-kiāⁿ bô khı̀, goá sı̄ thòng-sim kin-á-jı̍t ū joā-choē ê ki-tok-tô͘ sı̄ koà iûⁿ-thâu boē káu-bah, ēng Ki-tok ê chiau-pâi teh choè hoān-choē ê sū, chhùi kóng Iâ-so͘, chhiú kia̍h gû-to; chhùi kóng saⁿ-thiàⁿ, kı̂-sı̍t teh saⁿ-piàⁿ; thâu-chêng teh kı̂-tó, āu-piah teh iat lián-pó; thâu-chêng teh hoah kám-siā Chú, āu-piah ū mı̍h chiū chhú. Khó-lı̂n ê ki-tok-tô͘”. I thâu-khak àⁿ-àⁿ, ná kóng ná kiâⁿ tńg-khı̀. Goá hui-siông hō͘-hoé, tùi goá ê bû-ti chiah oē ín-chı̀n chhâi-lông jı̍p chhù-lāi(引狼入室). Goá kūi tı̄ lé-pài-tn̂g lâi kiû Siōng-tè sià-bián goá chit chhù ê gû-gōng, siúⁿ-sù goá ū tı̀-hūi, í-āu oē hiáu hun-piat hó-pháiⁿ, bô koh ū tē jı̄ pái ê sit-chhò. Goá chim-chiok siūⁿ, sı̄ lah! che sı̄ Siōng-tè thong-kè i tùi goá (iā tùi lán)kóng oē:“Tı̄ chit ê boa̍t-sè ê sı̂-tāi, Mô͘-kúi chng-choè kng-bêng ê thiⁿ-sài, chhin-chhiūⁿ gı̄ ê chhe-ēng, sı̀-koè kiâⁿ, teh chhē só͘ thang thun chia̍h ê lâng, só͘-í tio̍h kéng-séng kı̂-tó, chiah bián jı̍p tı̄ bê-he̍k.”
oân------1966, 3: 18.
(Tâi-oân Kàu-hoē Kong-pò tē 979 koàn, 1966 nı̂ 4 ge̍h)