Gú-giân sı̄ kóng-oē ê kang-khū, sı̄ lâng kap lâng tiong-kan ko-thong ê kiô-niû, bô hó, bái, koân, kē ê hun-pia̍t. Siōng kè Tâi-gú ê khò, goá bêng-pe̍k gú-giân m̄-nā ū ko͘-thong ê kong-iōng, siāng-sı̂ iā pān-ián bûn-hoà thoân-chiap ê tiōng-iàu kak-sek. Gú-giân hoán-èng seng-oa̍h hong-sek, lûn-lí tō-tek, hiān-kim seng-oa̍h hong-sek kap lông-gia̍p siā-hoē chin bô kāng-khoán, só͘-í chin chē oē chit tāi ê siàu-liân-lâng lóng m̄ bat.
Tùi Tâi-gú khò, koh chài thé-hoē Tâi-gú ê súi, te̍k-pia̍t sı̄ sio̍k-gú, i hián chhut oa̍h-thiàu-thiàu ê chêng-kéng, seng-oa̍h sı̍p-koàn, mā pau-hâm hong-hù ê jı̂n-seng tı̀-hūi, sı̄m-chı̀ mē--lâng ê oē, oē tiong ū oē, ke̍k ko-bêng.
Múi chı̍t chióng gú-giân piáu-ta̍t hong-sek bô kâng, Hoâ-gú ū pháiⁿ-thiaⁿ ê só͘-chāi, Tâi-gú iā sı̄. Ū lâng bē-hiáu kóng Tâi-gú, khiok oē-hiáu ēng “saⁿ-jı̄-keng” mē--lâng, “saⁿ-jı̄-keng” kiám-chhái sı̄ chı̍t chióng Tâi-gú bûn-hoà, tān-sı̄ chit khoán ê oē, thǹg khı̀ lâng ê goā-saⁿ kap lāi-saⁿ, chiū sı̄ thiah phoà lâng ê bı̄n-chú, bô ha̍h sèng-keng ê kà-sı̄, só͘-í sı̀n-tô͘ tio̍h tû khı̀ chit khoán ê oē.
Beh pó-chûn Tâi-oân-lâng ê bûn-hoà, tio̍h pó-chûn Tâi-gú, goá siūⁿ chèng-hú kàu-io̍k chèng-chhek nā chù-tiōng Tâi-gú, hō͘ gín-á tı̄ soè-hàn ê sı̂ chiū o̍h Pe̍h-oē-jı̄, án-ni ū bûn-jı̄ ê pang-chān, Tâi-gú chiū oē-tàng koh-khah oân-chéng lâi pó-chûn.
